പ്രശസ്ത ഹോളിവുഡ് സംവിധായകന് ക്രിസ്റ്റഫര് നോളന്റെ ഏറ്റവും പുതിയ ബ്രഹ്മാണ്ഡ ചിത്രം 'ദി ഒഡീസി' ഇന്ന് ലോകമെമ്പാടുമുള്ള തിയറ്ററുകളില് റിലീസ് ചെയ്തിരിക്കുകയാണ്. ഹോമറിന്റെ വിഖ്യാത ഗ്രീക്ക് ഇതിഹാസത്തെ ആസ്പദമാക്കി ഒരുക്കിയ ഈ ചിത്രത്തില് മാറ്റ് ഡാമന്, ടോം ഹോളണ്ട്, സെന്ഡയ, ആനി ഹാത്വേ, റോബര്ട്ട് പാറ്റിന്സണ്, ലുപിത ന്യൂയോംഗോ തുടങ്ങിയ വന് താരനിരയാണ് അണിനിരക്കുന്നത്.
ഈ വമ്പന് താരങ്ങള്ക്കൊപ്പം ബ്രിട്ടീഷ്-ഇന്ത്യന് നടനായ ഹിമേഷ് പട്ടേലും സിനിമാലോകത്ത് ഏറെ ചര്ച്ച ചെയ്യപ്പെടുകയാണ്. ചിത്രത്തില് പ്രധാന കഥാപാത്രമായ ഒഡീസിയസിന്റെ രണ്ടാം കമാന്ഡറായ 'യൂറിലോക്കസ്' എന്ന സുപ്രധാന വേഷത്തിലാണ് ഹിമേഷ് എത്തുന്നത്. ബ്രിട്ടീഷ് ടെലിവിഷന് രംഗത്തുനിന്ന് ആരംഭിച്ച് ഇന്ന് ഹോളിവുഡിലെ മുന്നിര സംവിധായകരുടെ പ്രിയപ്പെട്ട നടനായി മാറിയ ഹിമേഷ് പട്ടേലിന്റെ സിനിമായാത്ര ശ്രദ്ധേയമാണ്.
തിയറ്ററില്നിന്ന് ഹോളിവുഡിലേക്ക്
1990 ഒക്ടോബര് 13-ന് ഇംഗ്ലണ്ടിലെ കേംബ്രിഡ്ജ്ഷെയറിലാണ് ഹിമേഷ് പട്ടേല് ജനിച്ചത്. കിഴക്കന് ആഫ്രിക്കയില് നിന്ന് യുകെയിലേക്ക് കുടിയേറിയ ഗുജറാത്തി പാരമ്പര്യമുള്ളവരാണ് അദ്ദേഹത്തിന്റെ മാതാപിതാക്കള്. പഠനകാലത്ത് മാതാപിതാക്കളുടെ ന്യൂസ് ഏജന്സിയില് സഹായിയായിരുന്ന ഹിമേഷ്, വീടുകളില് പത്രങ്ങള് എത്തിക്കുന്ന ജോലിയും ചെയ്തിരുന്നു. ചെറുപ്പകാലത്ത് തന്നെ അഭിനയത്തില് താല്പര്യം പ്രകടിപ്പിച്ച ഹിമേഷ് ഒരു പ്രാദേശിക തിയറ്റര് ഗ്രൂപ്പില് ചേര്ന്നു. പതിനാറാമത്തെ വയസ്സില്, ബിബിസിയുടെ പ്രശസ്തമായ 'ഈസ്റ്റ് എന്റേഴ്സ്' എന്ന സോപ്പ് ഓപ്പറയില് 'തംവര് മസൂദ്' എന്ന കഥാപാത്രത്തെ അവതരിപ്പിക്കാന് അവസരം ലഭിച്ചു. 2007 മുതല് 2016 വരെ ഈ പരമ്പരയുടെ ഭാഗമായി അദ്ദേഹം തുടര്ന്നു.
2019-ല് പുറത്തിറങ്ങിയ ഡാനി ബോയലിന്റെ 'യസ്റ്റര്ഡേ' എന്ന മ്യൂസിക്കല് കോമഡി ചിത്രത്തിലൂടെയാണ് ഹിമേഷ് പട്ടേല് സിനിമയില് അരങ്ങേറ്റം കുറിക്കുന്നത്. ഒരു സ്ട്രഗ്ലിങ് മ്യൂസിഷ്യന്റെ വേഷമാണ് ഇതില് ഹിമേഷ് കൈകാര്യം ചെയ്തത്. ഈ ചിത്രത്തിലെ പ്രകടനം അദ്ദേഹത്തിന് വലിയ ജനപ്രീതി നേടിക്കൊടുത്തു.
ക്രിസ്റ്റഫര് നോളനുമായുള്ള കൂട്ടുകെട്ട്
2020-ല് ക്രിസ്റ്റഫര് നോളന് സംവിധാനം ചെയ്ത 'ടെനെറ്റ്' എന്ന ചിത്രത്തിലെ 'മാഹിര്' എന്ന കഥാപാത്രത്തെ അവതരിപ്പിച്ചുകൊണ്ടാണ് ഹിമേഷ് നോളന് ചിത്രങ്ങളുടെ ഭാഗമാകുന്നത്. ഹിമേഷിന്റെ കരിയറിലെ ആദ്യത്തെ വലിയ ബ്ലോക്ക്ബസ്റ്റര് ചിത്രമായിരുന്നു ഇത്. 'ദി ഒഡീസി'യിലൂടെ രണ്ടാം തവണയാണ് അദ്ദേഹം നോളനൊപ്പം ഒന്നിക്കുന്നത്. നെറ്റ്ഫ്ളിക്സിന്റെ വന് താരനിര അണിനിരന്ന 'ഡോണ്ട് ലുക്ക് അപ്പ്', എച്ച് ബി ഒ കോമഡി പരമ്പരയായ 'ദി ഫ്രാഞ്ചൈസി', നെറ്റ്ഫ്ളിക്സിന്റെ തന്നെ 'എനോല ഹോംസ്' സിനിമാ പരമ്പരയിലെ ഡോക്ടര് ജോണ് വാട്സണ് തുടങ്ങിയ കഥാപാത്രങ്ങളിലൂടെ ഹോളിവുഡില് ഹിമേഷ് തന്റെ സാന്നിധ്യം ഉറപ്പിച്ചു. ഇതുകൂടാതെ സ്റ്റേഷന് ഇലവന്, ദി വണ്ടര്ഫുള് സ്റ്റോറി ഓഫ് ഹെന്റി ഷുഗര്, ദി അസസ്മെന്റ്, ഗ്രീഡി പീപ്പിള് തുടങ്ങിയ പ്രശസ്തമായ പ്രോജക്ടുകളിലും അദ്ദേഹം ശ്രദ്ധേയമായ വേഷങ്ങള് കൈകാര്യം ചെയ്തിട്ടുണ്ട്.
British-Indian actor Himesh Patel is drawing attention for his key role in Christopher Nolan's epic film The Odyssey, which has released worldwide. Based on Homer's classic Greek epic, the film stars Matt Damon, Tom Holland, Zendaya, Anne Hathaway, Robert Pattinson and Lupita Nyong'o. Patel plays Eurylochus, the trusted second-in-command to Odysseus. Born to a Gujarati family in England, Patel began his acting career in the BBC soap EastEnders before making his film debut in Danny Boyle's Yesterday. He first collaborated with Nolan in Tenet and has since built an impressive Hollywood career with projects including Don't Look Up, Enola Holmes, Station Eleven and The Franchise.