തിയേറ്ററുകളിലെ നഷ്ടക്കണക്കുകൾക്കപ്പുറം, ഒടിടിയിൽ പ്രേക്ഷകർ നെഞ്ചേറ്റിയ ചിത്രം. നിഷ്കളങ്കതയുടെയും ഗൃഹാതുരത്വത്തിന്റെയും മനോഹര കാഴ്ചയൊരുക്കിയ സി പ്രേം കുമാർ ചിത്രത്തിന്റെ രണ്ടാം വാർഷികത്തിൽ ഒരു തിരിഞ്ഞുനോട്ടം. കാരണം, ചില സിനിമകൾ വെറുമൊരു കാഴ്ചാനുഭവമല്ല, നാം എവിടെയോ മറന്നുവെച്ച നന്മകളെയും കാലത്തിന്റെ ഒഴുക്കിൽ നഷ്ടമായിപ്പോയ നിഷ്കളങ്കതയെയും മൃദുവായി ഓർമിപ്പിക്കുന്നവയാണ്. അത്തരത്തിൽ പ്രേക്ഷകരുടെ മനസ്സിലേക്ക് പതിഞ്ഞിറങ്ങിയ തമിഴ് ചിത്രമാണ് ‘മെയ്യഴകൻ’.
ഈ മനോഹര കാവ്യം റിലീസായിട്ട് ഇന്നേക്ക് രണ്ട് വർഷം തികയുകയാണ്. തിയേറ്ററുകളിൽ വലിയ സാമ്പത്തിക വിജയം നേടാനായില്ലെങ്കിലും, ഒടിടിയിലെത്തിയതോടെ ചിത്രം കൂടുതൽ പ്രേക്ഷകരിലേക്ക് എത്തി. ഒരുപക്ഷേ, മറ്റൊരു ചിത്രത്തിനും ലഭിക്കാത്തത്ര ഊഷ്മളമായ സ്വീകരണമാണ് രണ്ട് വർഷങ്ങൾക്കുമുൻപ് ‘മെയ്യഴകന്’ ഒടിടിയിൽ ലഭിച്ചത്.
ഈ മനോഹര കാവ്യം റിലീസായിട്ട് ഇന്നേക്ക് രണ്ട് വർഷം തികയുകയാണ്. തിയേറ്ററുകളിൽ വലിയ സാമ്പത്തിക വിജയം നേടാനായില്ലെങ്കിലും, ഒടിടിയിലെത്തിയതോടെ ചിത്രം കൂടുതൽ പ്രേക്ഷകരിലേക്ക് എത്തി. ഒരുപക്ഷേ, മറ്റൊരു ചിത്രത്തിനും ലഭിക്കാത്തത്ര ഊഷ്മളമായ സ്വീകരണമാണ് രണ്ട് വർഷങ്ങൾക്കുമുൻപ് ‘മെയ്യഴകന്’ ഒടിടിയിൽ ലഭിച്ചത്.
അരുൾമൊഴി വർമ്മനും (അരവിന്ദ് സ്വാമി) അദ്ദേഹത്തിന്റെ അമ്മാവന്റെ മകനായ മെയ്യഴകനും (കാർത്തി) തമ്മിലുള്ള ഒരൊറ്റ രാത്രിയിലെ സംഭാഷണങ്ങളിലൂടെയാണ് കഥ വികസിക്കുന്നത്. വർഷങ്ങൾക്കുശേഷം ഒരു വിവാഹത്തിനായി ജന്മനാട്ടിലേക്ക് തിരിച്ചെത്തുന്ന അരുൾമൊഴിയും, അവനെ ജീവനുതുല്യം സ്നേഹിക്കുന്ന, പേരുപോലും അറിയാത്ത മെയ്യഴകനുമായുള്ള കൂടിക്കാഴ്ച വല്ലാത്തൊരു വൈകാരിക അനുഭവമാണ്. സ്നേഹം തുറന്നുപറയാൻ മടിക്കുന്ന, ചുറ്റുപാടുകളെ സംശയത്തോടെ നോക്കുന്ന ആധുനിക മനുഷ്യന്റെ പ്രതിനിധിയാണ് അരുൾ. എന്നാൽ മെയ്യഴകനാകട്ടെ, ഉള്ളിലുള്ള സ്നേഹം യാതൊരു മറയുമില്ലാതെ വാരിവിതറുന്ന അപൂർവം മനുഷ്യരിലൊരാളും. ഇവർക്കിടയിലെ ആത്മബന്ധവും കെമിസ്ട്രിയുമാണ് കാണികളെ പിടിച്ചിരുത്തുന്നത്.
‘96’ എന്ന ഒറ്റ ചിത്രം കൊണ്ട് സിനിമാപ്രേമികളെ പ്രണയത്തിന്റെ ആഴങ്ങളിലേക്ക് കൂട്ടിക്കൊണ്ടുപോയ സി പ്രേം കുമാറാണ് ഈ മനോഹര ചിത്രത്തിന്റെയും ശിൽപി. മനുഷ്യബന്ധങ്ങളുടെ സങ്കീർണ്ണതകളും ഒറ്റപ്പെടലും അത്രത്തോളം സൂക്ഷ്മതയോടെയാണ് സംവിധായകൻ ചിത്രത്തിൽ അവതരിപ്പിച്ചിരിക്കുന്നത്
സിനിമ മുന്നോട്ടുവെക്കുന്ന പരസ്പര വിശ്വാസത്തിന്റെയും പങ്കുവെക്കലിന്റെയും സന്ദേശം സാധാരണ പ്രേക്ഷകരെ മാത്രമല്ല, സമൂഹത്തിലെ നിരവധി പ്രമുഖരെയും ആഴത്തിൽ സ്വാധീനിച്ചിരുന്നു. വിവിധ മേഖലകളിലുള്ളവർ ചിത്രത്തെ പ്രശംസിച്ച് അന്ന് രംഗത്തെത്തിയിരുന്നു. ഭാഷയുടെയും ദേശത്തിന്റെയും അതിരുകൾക്കപ്പുറം ഹൃദയത്തിൽ തൊടുന്ന ഒരു കഥയായി ‘മെയ്യഴകൻ’ മാറിയത് സിനിമയുടെ ഈ മാനുഷികത കൊണ്ടുകൂടിയാണ്. കലയ്ക്ക് അതിരുകളില്ലെന്ന സത്യത്തെ ഒരിക്കൽ കൂടി ഓർമിപ്പിക്കുന്ന ചിത്രമായി ‘മെയ്യഴകൻ’ ഇന്നും പ്രേക്ഷകരുടെ മനസ്സിൽ തുടരുന്നു.
രണ്ട് വർഷങ്ങൾക്കിപ്പുറം വീണ്ടും ഈ സിനിമ കാണുമ്പോഴും, ആദ്യ കാഴ്ചയിൽ അനുഭവിച്ച അതേ കുളിർമ തന്നെയാണ് പ്രേക്ഷകനെ തേടിയെത്തുന്നത്. വേഗമേറിയ ഇന്നത്തെ ലോകത്ത് അൽപ്പനേരം ഒന്ന് നിശ്ചലമായി ശ്വാസമെടുക്കാനും, നമ്മെ നിരുപാധികം സ്നേഹിക്കുന്നവരെ ചേർത്തുപിടിക്കാനും ‘മെയ്യഴകൻ’ നമ്മെ ഓർമിപ്പിക്കുന്നു. ‘മെയ്യഴകൻ’ വെറുമൊരു ചലച്ചിത്രമല്ല. നാം മറന്നുതുടങ്ങിയ ചില വേരുകളിലേക്കുള്ള മടങ്ങിപ്പോക്കാണ്. തണുത്ത രാത്രിയിൽ പുതയ്ക്കാൻ കിട്ടുന്ന കമ്പിളിപ്പുതപ്പുപോലെ, മനസ്സിനെ പൊതിയുന്ന ഒരു സാന്ത്വനമാണ് ഈ സിനിമ.
Two years after its release, C. Prem Kumar’s Meiyazhagan continues to resonate with audiences through its warmth, innocence and nostalgia. Though it had a modest theatrical run, the film found a wider audience on OTT. Karthi and Arvind Swamy’s emotional bond makes this heartfelt story of love and human connection unforgettable.