ഓരോ മലയാളിയുടെയും പ്രഭാതം തുടങ്ങുന്നത് ഒരു കപ്പ് ചൂടുചായയിലാണ്. ആ ആദ്യത്തെ സിപ്പിൽ ലഭിക്കുന്ന ഉന്മേഷവും ആ രുചിയുമാണ് നമ്മുടെ ദിവസത്തെ മുന്നോട്ടുനയിക്കുന്നത്. എന്നാൽ, നാളെ നിങ്ങളുടെ ചായക്കപ്പിൽ എത്തുന്ന ആ പാനീയത്തിന് പഴയ കടുപ്പമോ മണമോ ഉണ്ടാവില്ലെന്ന് പറഞ്ഞാൽ വിശ്വസിക്കാനാകുമോ? അതെ, ആഗോള താപനവും കാലാവസ്ഥാ വ്യതിയാനവും നമ്മൾ പോലും അറിയാതെ നമ്മുടെ ഓരോ പ്രഭാതത്തെയും ബാധിച്ചു തുടങ്ങിയിരിക്കുന്നു. ഇത് വെറുമൊരു മുന്നറിയിപ്പല്ല, നമ്മുടെ തേയിലത്തോട്ടങ്ങളിൽനിന്ന് പുറത്തുവരുന്ന ആശങ്കാജനകമായ വസ്തുതകളാണ്.
പ്രതിസന്ധിയിലാകുന്ന തേയിലത്തോട്ടങ്ങൾ
ഇന്ത്യൻ ടീ ബോർഡിന്റെ കണക്കുകൾ പ്രകാരം കഴിഞ്ഞ വർഷം മാത്രം രാജ്യത്തെ തേയില ഉൽപാദനത്തിൽ ഒൻപത് കിലോഗ്രാമിന്റെ കുറവാണ് ഉണ്ടായത്. അടുത്ത കാലത്തെ ഏറ്റവും വലിയ ഇടിവാണിത്. തേയില വളരാൻ അനുയോജ്യമായ താപനില 18-30 ഡിഗ്രി സെൽഷ്യസിന് ഇടയിലാണ്. എന്നാൽ അസമിലെയും പശ്ചിമ ബംഗാളിലെയും തോട്ടങ്ങളിൽ താപനില ഇപ്പോൾ പലപ്പോഴും 40 ഡിഗ്രി സെൽഷ്യസ് കടക്കുന്നു. ഈ കടുത്ത ചൂട് തേയിലച്ചെടികളുടെ കരുത്ത് ചോർത്തുകയും ഇലകൾ കരിയുന്ന അവസ്ഥയുണ്ടാക്കുകയും ചെയ്യുന്നു.
ഹൈറേഞ്ചിനെ ചുട്ടുകരിക്കുന്ന കാലാവസ്ഥാ മാറ്റം
കേരളത്തിന്റെ അഭിമാനമായ മൂന്നാർ, വയനാട്, പീരുമേട് തുടങ്ങിയ മലയോര മേഖലകളും ഈ പ്രതിസന്ധിയിൽനിന്ന് മുക്തമല്ല. പണ്ട് വർഷം മുഴുവനും തണുപ്പ് നിലനിന്നിരുന്ന മൂന്നാറിൽ ഇപ്പോൾ വേനൽക്കാലത്ത് അസാധാരണമായ ചൂടാണ് അനുഭവപ്പെടുന്നത്. മഞ്ഞിന്റെ അളവ് കുറഞ്ഞത് തേയിലയുടെ നാമ്പുകൾ വിരിയുന്നതിനെ കാര്യമായി ബാധിച്ചിട്ടുണ്ട്. മറുവശത്ത് വയനാടൻ മലനിരകളിൽ പെയ്യുന്ന അതിശക്തമായ മഴ മണ്ണൊലിപ്പിനും തോട്ടങ്ങളിലെ പോഷകാംശം നഷ്ടപ്പെടുന്നതിനും കാരണമാകുന്നു. ഇത് ഉൽപ്പാദന ചെലവ് വർദ്ധിപ്പിക്കുകയും കർഷകരെ കടുത്ത സാമ്പത്തിക ബാധ്യതയിലേക്ക് തള്ളിവിടുകയും ചെയ്യുന്നു.
രുചി മാറും, വിലയും കൂടും
നമ്മൾ ആസ്വദിക്കുന്ന ചായയുടെ സുഗന്ധത്തിനും രുചിക്കും കാരണം അതിലടങ്ങിയിരിക്കുന്ന പോളിഫെനോളുകളും അമിനോ ആസിഡുകളുമാണ്. ഇവയുടെ അളവ് കൃത്യമാകണമെങ്കിൽ കൃത്യമായ താപനിലയും ഈർപ്പവും അത്യാവശ്യമാണ്. ചൂട് കൂടുമ്പോൾ ഇലകളിലെ ജലാംശം കുറയുകയും ചായയ്ക്ക് കയ്പ് കൂടുകയും ചെയ്യുന്നു. കൂടാതെ അമിതമായ മഴ തേയിലയുടെ തനതായ ഗന്ധം നഷ്ടപ്പെടുത്തുന്നു. ഉൽപ്പാദനം കുറയുന്നതോടെ വിപണിയിൽ ചായപ്പൊടിയുടെ വില വൻതോതിൽ വർദ്ധിക്കാനാണ് സാധ്യത. സാധാരണക്കാരന്റെ ആശ്വാസമായിരുന്ന ചായ വൈകാതെ ഒരു ആഡംബര പാനീയമായി മാറിയേക്കാം.
വിപണി മങ്ങുന്നതെങ്ങനെ?
തേയില ചെടി വളർന്നാലും രുചി കുറയുകയോ കയ്പ്പേറിയതോ ആകുന്നുണ്ട്. ഇത് കച്ചവടത്തിൽ മികച്ച വില ലഭിക്കാതിരിക്കാനുള്ള കാരണമായി മാറുന്നു. ഈ പ്രവണത തുടർന്നാൽ അടുത്ത വർഷങ്ങളിൽ വിളവിലും ചായ കൃഷിയ്ക്ക് അനുയോജ്യമായ ഭൂമിയിലും വലിയ കുറവ് സംഭവിക്കാം. അതോടെ ചായയുടെ വില ഉയരും, ഒരു സാധാരണ പാനീയത്തിൽനിന്ന് ആഡംബര വസ്തുവായി മാറാനും സാധ്യതയുണ്ട്. കയറ്റുമതിയിൽ വലിയ പങ്കുവഹിക്കുന്ന ഉത്പന്നം കൂടെയായ തേയില സമ്പദ്വ്യവസ്ഥയെ പിടിച്ചുകുലുക്കുമെന്ന് തീർച്ച.
പരിഹാരമുണ്ടോ?
തോട്ടങ്ങളിൽ തണൽ മരങ്ങൾ വെച്ചുപിടിപ്പിക്കുന്ന 'അഗ്രോഫോറസ്ട്രി' രീതിയും കൂടുതൽ ചൂടിനെ പ്രതിരോധിക്കുന്ന പുതിയ ഇനം തേയിലച്ചെടികൾ വികസിപ്പിക്കുന്നതും മാത്രമാണ് നിലവിലെ പോംവഴി. എങ്കിലും പ്രകൃതിയുടെ താളം വീണ്ടെടുക്കാതെ നമ്മുടെ പ്രിയ ചായയെ രക്ഷിക്കുക അസാധ്യമാണ്.
അടുത്ത തവണ ഓരോ തുള്ളി ചായ കുടിക്കുമ്പോഴും ഓർക്കുക, അത് വെറുമൊരു പാനീയമല്ല,പ്രകൃതി നൽകുന്ന ഒരു മുന്നറിയിപ്പ് കൂടിയാണ്.
English Summary: Climate change is impacting India’s tea industry with rising temperatures, erratic rainfall, and declining quality in Assam, Darjeeling, Wayanad, and Munnar. Falling yields and weaker flavour are raising concerns over economy, exports, and future tea production