27 വർഷത്തെ സ്തുത്യർഹമായ സേവനം അവസാനിപ്പിച്ച് ഒരു വകുപ്പ് മേധാവി പടിയിറങ്ങുന്നു; തൊട്ടുപിന്നാലെ മറ്റു പ്രമുഖ ഡോക്ടർമാരും സീനിയർ ഫാക്കൽറ്റികളും കൂട്ടത്തോടെ രാജിവയ്ക്കുന്നു. ഇന്ത്യയിലെ ഏറ്റവും അഭിമാനകരമായ പൊതുമേഖലാ മെഡിക്കൽ സ്ഥാപനമായ ഡൽഹി എയിംസിൽ (AIIMS) സംഭവിച്ചുകൊണ്ടിരിക്കുന്ന കാര്യങ്ങൾ രാജ്യത്തെ ആരോഗ്യമേഖലയെ ഒരേസമയം അമ്പരപ്പിക്കുകയും ആശങ്കപ്പെടുത്തുകയും ചെയ്യുന്ന ഒന്നാണ്.
ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ് (എയിംസ്) ന്യൂഡൽഹിയിലെ കാർഡിയോതൊറാസിക് ആൻഡ് വാസ്കുലർ സർജറി (CTVS) വിഭാഗം മേധാവിയായിരുന്ന പ്രശസ്ത ഹൃദയശസ്ത്രക്രിയാ വിദഗ്ദ്ധൻ ഡോ. ശിവ് കുമാർ ചൗധരിയുടെ പെട്ടെന്നുള്ള വിരമിക്കൽ പ്രഖ്യാപനം മെഡിക്കൽ ലോകത്തെ ഞെട്ടിക്കുന്നതായിരുന്നു. ഔദ്യോഗിക സേവന കാലാവധി പൂർത്തിയാക്കാൻ വർഷങ്ങൾ ബാക്കിനിൽക്കെയാണ് എയിംസിലെ 27 വർഷത്തെ തന്റെ സേവനം അവസാനിപ്പിച്ച് അദ്ദേഹം പടിയിറങ്ങിയത്.
രാജ്യം ആദരിക്കുന്ന ഒരു ഡിപ്പാർട്ട്മെന്റ് മേധാവിക്കു താൻ ജീവശ്വാസം പോലെ കൊണ്ടുനടന്ന സ്ഥാപനം ഉപേക്ഷിക്കേണ്ടി വന്നതിന് പിന്നിൽ കേവലം വ്യക്തിപരമായ കാരണങ്ങൾ മാത്രമല്ല ഉള്ളത്. എയിംസ് എന്ന മഹത്തായ സ്ഥാപനത്തിന്റെ ആഭ്യന്തര ഭരണസംവിധാനത്തിലും കൽപ്പിത അധികാരശ്രേണി(institutional hierarchy) യിലുമുണ്ടായ ഗുരുതരമായ വിള്ളലുകളാണ് കടുത്ത തീരുമാനത്തിലേക്കു തന്നെ നയിച്ചതെന്ന് ഡോക്ടർ തന്നെ തുറന്നുപറയുന്നുണ്ട്. എയിംസ് വിട്ട അദ്ദേഹം നിലവിൽ ഡൽഹിയിലെ ഫോർട്ടിസ് എസ്കോർട്ട്സ് ഹാർട്ട് ഇൻസ്റ്റിറ്റ്യൂട്ടിലാണ് സേവനമനുഷ്ഠിക്കുന്നത്.
ഇത് ഡോ. ശിവ് കുമാർ ചൗധരിയുടെ മാത്രം കഥയല്ല, മറിച്ച് എയിംസിന്റെ ഇടനാഴികളിൽ ഇപ്പോൾ പതിവായി മാറിക്കൊണ്ടിരിക്കുന്ന ഒരു പ്രവണതയാണ്. ലഭ്യമായ ഔദ്യോഗിക വിവരങ്ങൾ പ്രകാരം കഴിഞ്ഞ രണ്ട്-മൂന്ന് വർഷങ്ങൾക്കിടയിൽ മാത്രം എയിംസിലെ വിവിധ വകുപ്പുകളിൽ നിന്നായി പതിനഞ്ചോളം മുതിർന്ന ഫാക്കൽറ്റി അംഗങ്ങളാണ് ഔദ്യോഗിക കാലാവധി തികയ്ക്കാതെ സ്വയം വിരമിക്കൽ (VRS) വാങ്ങി പുറത്തുപോയത്.
ഇതിൽ ഭൂരിഭാഗം പേരും തൊട്ടുപിന്നാലെ തന്നെ പ്രമുഖ സ്വകാര്യ ആശുപത്രികളിൽ ഉയർന്ന പദവികളിൽ ജോലിയിൽ പ്രവേശിക്കുകയും ചെയ്തു. മുൻ ഡയറക്ടർ ഡോ. രൺദീപ് ഗുലേറിയ, ന്യൂറോ സർജറി വിഭാഗം മേധാവിയായിരുന്ന ഡോ. ശശാങ്ക് ശരദ് കാലെ, ഇഎൻടി വിഭാഗം മേധാവിയായിരുന്ന ഡോ. അലോക് ഥാക്കർ തുടങ്ങി ഇന്ത്യയിലെ തന്നെ ഏറ്റവും മികച്ച മെഡിക്കൽ പ്രതിഭകളുടെ ഒരു നീണ്ട നിരയാണ് എയിംസ് ഉപേക്ഷിച്ച് സ്വകാര്യ മേഖലയിലേക്കു ചേക്കേറിയത്.
എന്തുകൊണ്ടാണ് പതിറ്റാണ്ടുകളായി തങ്ങൾ കെട്ടിപ്പടുത്ത ഒരു പൊതുമേഖലാ സ്ഥാപനം ഉപേക്ഷിക്കാൻ ഈ പ്രമുഖർ തയ്യാറാകുന്നതെന്ന ചോദ്യത്തിനു പിന്നിൽ ഭരണപരമായ വീഴ്ചകളുടെ വലിയൊരു കഥയുണ്ട്. എയിംസ് വിട്ടുപോയ പല മുതിർന്ന ഡോക്ടർമാരും ചൂണ്ടിക്കാണിക്കുന്നത് സ്ഥാപനത്തിനുള്ളിലെ കടുത്ത അവിശ്വാസത്തിന്റെ അന്തരീക്ഷത്തെക്കുറിച്ചാണ്. വകുപ്പ് മേധാവികൾക്ക് പോലും സ്വന്തം ഡിപ്പാർട്ട്മെന്റുമായി ബന്ധപ്പെട്ട അടിസ്ഥാനപരമായ തീരുമാനങ്ങൾ സ്വതന്ത്രമായി എടുക്കാൻ കഴിയാത്ത അവസ്ഥ.
ഫയലുകൾ ചുവപ്പുനാടയിൽ കുടുങ്ങിക്കിടക്കുകയും ദൈനംദിന പ്രവർത്തനങ്ങൾ പോലും കടുത്ത മാനസിക സമ്മർദ്ദത്തിനു കാരണമാവുകയും ചെയ്യുമ്പോൾ പടിയിറങ്ങുകയല്ലാതെ മറ്റ് വഴികളില്ലെന്ന് ഇവർ സാക്ഷ്യപ്പെടുത്തുന്നു. ഇതിനൊപ്പം സ്വകാര്യ ആശുപത്രികൾ വാഗ്ദാനം ചെയ്യുന്ന ഭീമമായ ശമ്പളവും മികച്ച തൊഴിൽ അന്തരീക്ഷവും ആധുനിക അടിസ്ഥാന സൗകര്യങ്ങളും കൂടിയാകുമ്പോൾ പ്രതിഭകൾ എളുപ്പത്തിൽ ആകർഷിക്കപ്പെടുന്നു.
ഭരണപരമായ അസംതൃപ്തിയും മികച്ച സാമ്പത്തിക അവസരങ്ങളും ഡോക്ടർമാരെ സ്വകാര്യ മേഖലയിലേക്കു നയിക്കുമ്പോൾ അതിന്റെ ആത്യന്തിക ദുരന്തം അനുഭവിക്കുന്നതു രാജ്യത്തെ സാധാരണക്കാരായ രോഗികളാണ്. ഇന്ത്യയുടെ വിവിധ കോണുകളിൽനിന്ന് അതിസങ്കീർണമായ രോഗങ്ങൾക്കു കുറഞ്ഞ ചെലവിൽ മികച്ച ചികിത്സ തേടിയാണ് ലക്ഷക്കണക്കിന് ആളുകൾ ഡൽഹി എയിംസിലേക്ക് എത്തുന്നത്. എന്നാൽ വിദഗ്ധരായ മുതിർന്ന ഡോക്ടർമാരുടെ അഭാവം മൂലം ഹൃദയ ശസ്ത്രക്രിയകൾക്കും ന്യൂറോ സർജറികൾക്കും നിലവിൽ രണ്ടു വർഷം വരെയാണ് ഇവിടെ കാത്തിരിപ്പ് കാലാവധി. ക്യാൻസർ പോലുള്ള മാരക രോഗ ബാധിതർ പോലും ശസ്ത്രക്രിയക്കായി മാസങ്ങളോളം ക്യൂ നിൽക്കേണ്ടി വരുന്നു.
രാജ്യത്തെ മികച്ച മെഡിക്കൽ വിദ്യാർത്ഥികൾക്ക് അന്താരാഷ്ട്ര നിലവാരത്തിലുള്ള ഉപരിപഠനം ഉറപ്പാക്കാൻ ലക്ഷ്യമിട്ട് തുടങ്ങിയ എയിംസിന്റെ ഈ തകർച്ച അവിടുത്തെ പഠന നിലവാരത്തെയും ഗവേഷണങ്ങളെയും ഒരുപോലെ ബാധിക്കും. ഈ പ്രതിസന്ധി തുടർന്നാൽ അത് രാജ്യത്തിന്റെ പൊതുജനാരോഗ്യ സംവിധാനത്തിന് ഏൽപ്പിക്കുന്ന ആഘാതം ചെറുതായിരിക്കില്ല. അതുകൊണ്ടുതന്നെ ഭരണപരമായ തർക്കങ്ങൾ പരിഹരിച്ച്, മെഡിക്കൽ പ്രതിഭകൾക്ക് അർഹമായ ആദരവും സ്വാതന്ത്ര്യവും നൽകി എയിംസിന്റെ പഴയ പ്രതാപം വീണ്ടെടുക്കേണ്ടത് അടിയന്തിര ആവശ്യമായി മാറിയിരിക്കുകയാണ്.
The prestigious All India Institute of Medical Sciences (AIIMS), New Delhi, is currently facing an institutional crisis marked by a wave of mass resignations and premature retirements among its senior faculty, sparking deep concern within India's healthcare sector. The unrest was triggered by the abrupt retirement of renowned cardiac surgeon Dr. Shiv Kumar Choudhary, who stepped down as the Head of the Cardiothoracic and Vascular Surgery (CTVS) department after 27 years of dedicated service, well before completing his official tenure. Following his departure, several other prominent doctors and senior faculty members have resigned en masse.