"കോടതി എന്നെ പൂർണ്ണ ബഹുമാനത്തോടെ കുറ്റവിമുക്തനാക്കി. എനിക്കും എന്റെ അനുഭാവികൾക്കും ഇതൊരു സന്തോഷവാർത്തയാണ്... ഇന്നൊരു സുദിനമാണ്. സംഭവിക്കാനുള്ളത് സംഭവിക്കും, അതെല്ലാം ശ്രീരാമന്റെ നിശ്ചയമാണ്,"
ആറ് വനിതാ ഗുസ്തി താരങ്ങൾ നൽകിയ ലൈംഗിക പീഡനക്കേസിൽ കോടതി വെറുതെ വിട്ടതിന് പിന്നാലെ, മുൻ ബിജെപി എംപിയും റെസ്ലിങ് ഫെഡറേഷൻ ഓഫ് ഇന്ത്യ മുൻ അധ്യക്ഷനുമായ ബ്രിജ് ഭൂഷൺ ശരൺ സിങിന്റെ പ്രതികരണം ഇങ്ങനെയായിരുന്നു. കഴിഞ്ഞ മൂന്ന് വർഷമായി ഇന്ത്യൻ ഗുസ്തി മേഖലയെ പിടിച്ചുകുലുക്കിയ പ്രധാന സംഭവവികാസങ്ങളിലൊന്നായ ഈ കേസിലെ നിയമനടപടികൾക്കാണ് ഇന്നത്തെ കോടതി വിധിയോടെ അവസാനമാകുന്നത്.
2023-ൽ ആറ് വനിതാ ഗുസ്തി താരങ്ങൾ നൽകിയ പരാതിയുടെ അടിസ്ഥാനത്തിൽ രജിസ്റ്റർ ചെയ്ത കേസിലാണ് ഇപ്പോൾ വിധി വന്നിരിക്കുന്നത്. വിധിപ്പകർപ്പ് പൂർണ്ണമായി പഠിച്ച ശേഷം മേൽക്കോടതിയിൽ അപ്പീൽ നൽകാനാണ് പരാതിക്കാർക്കും പ്രോസിക്യൂഷനുമുള്ള അടുത്ത വഴി.
2023 ജനുവരിയിലാണ് ഈ കേസിന്റെ സംഭവവികാസങ്ങൾ ആരംഭിക്കുന്നത്. ഇന്ത്യയുടെ അഭിമാന താരങ്ങളും ഒളിമ്പിക് മെഡൽ ജേതാക്കളുമായ സാക്ഷി മാലിക്, വിനേഷ് ഫോഗട്ട്, ബജ്റങ് പൂനിയ തുടങ്ങിയ പ്രമുഖ ഗുസ്തിക്കാരുടെ നേതൃത്വത്തിൽ ഡൽഹിയിലെ ജന്തർ മന്തറിൽ ആരംഭിച്ച സമരം രാജ്യമെമ്പാടും വലിയ വാർത്തയായിരുന്നു. 2016 നും 2019 നും ഇടയിൽ റെസ്ലിങ് ഫെഡറേഷൻ ഓഫീസിലും ബ്രിജ് ഭൂഷന്റെ ഔദ്യോഗിക വസതിയിലും വിദേശ രാജ്യങ്ങളിൽ വെച്ചും നിരവധി തവണ വനിതാ താരങ്ങളെ അദ്ദേഹം ലൈംഗികമായി ഉപദ്രവിക്കുകയും ഭീഷണിപ്പെടുത്തുകയും ചെയ്തു എന്നതായിരുന്നു പ്രധാന ആരോപണം. പ്രായപൂർത്തിയാകാത്ത ഒരു താരമുൾപ്പെടെ ഏഴ് പേരായിരുന്നു ആദ്യം പരാതിയുമായി രംഗത്തെത്തിയത്. ബ്രിജ് ഭൂഷനെ അറസ്റ്റ് ചെയ്യണമെന്നും ഫെഡറേഷൻ പിരിച്ചുവിടണമെന്നും ആവശ്യപ്പെട്ട് മാസങ്ങളോളം നീണ്ടുനിന്ന ഈ സമരം കായിക രംഗത്തെ സ്ത്രീകളുടെ സുരക്ഷയെക്കുറിച്ചുള്ള വലിയ ചർച്ചകൾക്കാണ് അന്ന് വഴിയൊരുക്കിയത്.
ബ്രിജ് ഭൂഷനെ ജയിലിലടയ്ക്കുന്നതുവരെ ന്യൂഡൽഹിയിൽ തുടരുമെന്ന് 2023 ഏപ്രിൽ 28-ന് പ്രഖ്യാപിച്ച വനിതാ താരങ്ങൾ തങ്ങളുടെ നിലപാടിൽ ഉറച്ചുനിന്നു. ഇതിനുശേഷമാണ് സമരവേദിയിൽ കാര്യങ്ങൾ കൂടുതൽ വഷളായത്. അനുമതിയില്ലാതെ 'മടക്കുകട്ടിലുകൾ' ഇട്ടു എന്നാരോപിച്ച് മെയ് മൂന്നിന് അർദ്ധരാത്രി ഡൽഹി പൊലീസ് തങ്ങളെ ആക്രമിച്ചതായും ചിലരെ അറസ്റ്റ് ചെയ്യുകയും ചെയ്തതായും വിനേഷ് ഫോഗട്ടും സഹതാരങ്ങളും വെളിപ്പെടുത്തി. ഈ പൊലീസ് അതിക്രമത്തിന്റെ മൊബൈൽ ഫോൺ ദൃശ്യങ്ങൾ വൈറലായതോടെ രാജ്യത്തുടനീളം വൻ പ്രതിഷേധം അലയടിച്ചു.
വൈകാതെ തന്നെ രാജ്യത്തിന്റെ നാനാഭാഗത്തുനിന്നും ഗുസ്തി താരങ്ങൾക്ക് വലിയ പിന്തുണ ലഭിക്കാൻ തുടങ്ങി. ഒളിമ്പ്യന്മാരായ നീരജ് ചോപ്ര, അഭിനവ് ബിന്ദ്ര എന്നിവർക്കൊപ്പം സാനിയ മിർസയെപ്പോലുള്ള മറ്റ് പ്രമുഖ കായികതാരങ്ങളും ഗുസ്തി താരങ്ങൾക്ക് പിന്തുണ പ്രഖ്യാപിച്ച് സമൂഹമാധ്യമങ്ങളിൽ രംഗത്തെത്തി.
2023 മെയ് 28-ന്, പ്രധാനമന്ത്രി നരേന്ദ്ര മോദി പുതിയ പാർലമെന്റ് മന്ദിരം ഉദ്ഘാടനം ചെയ്യുന്ന സമയത്ത്, ഗുസ്തി താരങ്ങളും സമര അനുഭാവികളും ആ ചടങ്ങിലേക്ക് പ്രതിഷേധ മാർച്ച് നടത്തി. എന്നാൽ, സുരക്ഷാ ബാരിക്കേഡുകൾക്ക് സമീപം എത്തിയപ്പോൾ നൂറുകണക്കിന് പൊലീസുകാർ അവരെ തടയുകയും, വിനേഷ് ഫോഗട്ട്, സഹോദരി സാക്ഷി മാലിക് എന്നിവരുൾപ്പെടെയുള്ളവരെ റോഡിലൂടെ വലിച്ചിഴച്ച് അറസ്റ്റ് ചെയ്ത് നീക്കുകയും ചെയ്തു.
പൊലീസ് ഗുസ്തി താരങ്ങളെ ഇത്തരത്തിൽ കയ്യേറ്റം ചെയ്യുന്നതിന്റെ ദൃശ്യങ്ങൾ വലിയ രീതിയിലുള്ള വിമർശനങ്ങൾക്ക് വഴിവെച്ചു. ഇന്ത്യൻ ഗുസ്തി താരങ്ങളെ പൊലീസ് കൈകാര്യം ചെയ്ത രീതിയെയും കസ്റ്റഡിയിലെടുത്തതിനെയും അന്താരാഷ്ട്ര ഒളിമ്പിക് കമ്മിറ്റിയും യുണൈറ്റഡ് വേൾഡ് റെസ്ലിങു ശക്തമായി അപലപിച്ചു. ഈ സംഭവം "വളരെ അസ്വസ്ഥജനകമാണ്" എന്നാണ് അവർ പ്രതികരിച്ചത്.
തങ്ങൾ നേരിട്ട അവഗണനയിലും അതിക്രമങ്ങളിലും പ്രതിഷേധിച്ച്, മെഡലുകൾ ഗംഗയിലൊഴുക്കാനായി സമരക്കാരായ ഗുസ്തി താരങ്ങൾ ഹരിദ്വാറിലെ ഹർ കി പൗരിയിലെത്തി. ഭാരതീയ കിസാൻ യൂണിയൻ അധ്യക്ഷൻ നരേഷ് ടിക്കായത്തിന്റെ ഇടപെടലിനെയും അഭ്യർത്ഥനയെയും തുടർന്നാണ് അവർ ഈ വൈകാരികമായ നീക്കത്തിൽ നിന്ന് താൽക്കാലികമായി പിന്മാറിയത്.
ഒടുവിൽ, ജൂൺ മൂന്നിന് ആഭ്യന്തര മന്ത്രി അമിത് ഷാ തന്റെ വസതിയിൽ വെച്ച് ഗുസ്തി താരങ്ങളുടെ പ്രതിനിധി സംഘവുമായി നടത്തിയ കൂടിക്കാഴ്ചയോടെയാണ് ഈ വിഷയത്തിൽ നിർണ്ണായകമായ ഒരു വഴിത്തിരിവുണ്ടായത്.
സമരം ശക്തമാവുകയും ദേശീയ-അന്തർദേശീയ തലത്തിൽ ശ്രദ്ധ നേടുകയും ചെയ്തതോടെ സുപ്രീം കോടതിയുടെ ഇടപെടലുണ്ടായി. ഇതിനെത്തുടർന്ന് 2023 ഏപ്രിൽ മാസത്തിൽ ഡൽഹി പൊലീസ് ബ്രിജ് ഭൂഷനെതിരെ രണ്ട് വ്യത്യസ്ത എഫ്ഐആറുകൾ രജിസ്റ്റർ ചെയ്തു. തുടർന്ന് അതേ വർഷം ജൂൺ മാസത്തിൽ സ്ത്രീകൾക്കെതിരായ അതിക്രമം, ലൈംഗിക പീഡനം, പിന്തുടർന്ന് ശല്യം ചെയ്യൽ, ഭീഷണിപ്പെടുത്തൽ തുടങ്ങിയ കുറ്റങ്ങൾ ചുമത്തി ഇന്ത്യൻ ശിക്ഷാ നിയമത്തിലെ വിവിധ വകുപ്പുകൾ പ്രകാരം പൊലീസ് കുറ്റപത്രം സമർപ്പിച്ചു.
2024 മെയ് മാസത്തിലാണ് ബ്രിജ് ഭൂഷനും വിനോദ് തോമറിനുമെതിരെ ഔദ്യോഗികമായി കുറ്റം ചുമത്തിയത്. എന്നാൽ കുറ്റം നിഷേധിച്ച ഇരുവരും വിചാരണ നേരിടാൻ തീരുമാനിക്കുകയായിരുന്നു. തുടർന്നുള്ള മാസങ്ങളിൽ പ്രോസിക്യൂഷൻ തങ്ങളുടെ വാദങ്ങൾ കോടതിയിൽ അവതരിപ്പിച്ചു. വിചാരണയ്ക്കിടെ ആകെ 32 സാക്ഷികളെ വിസ്തരിച്ച പ്രോസിക്യൂഷൻ, ഒൻപത് സാക്ഷികളെ ഒഴിവാക്കുകയും ചെയ്തു.
അന്തിമ വാദത്തിനിടെ, പരാതിക്കാരുടെ മൊഴികളിൽ വൈരുദ്ധ്യങ്ങളുണ്ടെന്ന് ബ്രിജ് ഭൂഷന്റെ അഭിഭാഷകർ ചൂണ്ടിക്കാട്ടി. സർക്കാർ നിയോഗിച്ച മേൽനോട്ട സമിതിക്ക് മുൻപാകെ നേരത്തെ നൽകിയ സത്യവാങ്മൂലത്തിലെ വിവരങ്ങളും കോടതിയിൽ അവതരിപ്പിച്ച സംഭവങ്ങളുടെ നാൾവഴികളും തമ്മിൽ വലിയ പൊരുത്തക്കേടുകൾ ഉണ്ടെന്നും അവർ വാദിച്ചു.
എന്നാൽ, കേസിൽ ഉൾപ്പെട്ടിരുന്ന പ്രായപൂർത്തിയാകാത്ത പരാതിക്കാരി പിന്നീട് മജിസ്ട്രേറ്റിന് മുന്നിൽ മൊഴി തിരുത്തുകയും ആരോപണങ്ങൾ വ്യാജമാണെന്ന് വ്യക്തമാക്കുകയും ചെയ്തതോടെ കാര്യങ്ങൾ മാറിമറിഞ്ഞു. ഈ മൊഴിയുടെ അടിസ്ഥാനത്തിൽ പോക്സോ കേസ് റദ്ദാക്കാൻ ഡൽഹി പൊലീസ് കോടതിയിൽ അപേക്ഷ നൽകി. 2025 മെയ് മാസത്തിൽ കോടതി പൊലീസിന്റെ ഈ റിപ്പോർട്ട് അംഗീകരിക്കുകയും പോക്സോ കേസ് ഔദ്യോഗികമായി അവസാനിപ്പിക്കുകയും ചെയ്തു.
പോക്സോ കേസ് ഒഴിവായതോടെ ബാക്കിയുള്ള ആറ് മുതിർന്ന താരങ്ങളുടെ പരാതിയിലാണ് പിന്നീട് വിചാരണ നടപടികൾ പുരോഗമിച്ചത്. നീണ്ട നിയമനടപടികൾക്കൊടുവിൽ തെളിവുകളുടെ അഭാവം ചൂണ്ടിക്കാട്ടി ആറാമത്തെ പരാതിക്കാരിയുടെ ആരോപണങ്ങളിൽ നിന്നും കോടതി ബ്രിജ് ഭൂഷനെ നേരത്തെ തന്നെ ഒഴിവാക്കിയിരുന്നു. ബാക്കിയുള്ള അഞ്ച് പേരുടെ പരാതികളിൽ 2024 മെയ് മാസത്തിൽ കോടതി ഔദ്യോഗികമായി കുറ്റങ്ങൾ ചുമത്തുകയും വിചാരണ ആരംഭിക്കുകയും ചെയ്തു.
രണ്ട് വർഷത്തിലധികം നീണ്ടുനിന്ന വിചാരണകൾക്കും സാക്ഷി വിസ്താരങ്ങൾക്കും ശേഷം 2026 ജൂലൈ രണ്ടിന് വാദം പൂർത്തിയായി. കുറ്റം സംശയാതീതമായി തെളിയിക്കാൻ പര്യാപ്തമായ തെളിവുകൾ പ്രോസിക്യൂഷന് ഹാജരാക്കാൻ കഴിഞ്ഞില്ലെന്ന് നിരീക്ഷിച്ചാണ് കോടതി രണ്ട് പ്രതികളെയും കുറ്റവിമുക്തരാക്കിയത്. ഇന്ത്യൻ കായിക ചരിത്രത്തിലെ തന്നെ ഏറ്റവും വിവാദമായ ഒരു അധ്യായത്തിനാണ് വിചാരണ കോടതിയുടെ ഈ വിധിയോടെ ഇപ്പോൾ പരിസമാപ്തിയായിരിക്കുന്നത്.
ബ്രിജ് ഭൂഷനെ കുറ്റവിമുക്തനാക്കിയ വിവരമറിഞ്ഞ്, ഗുസ്തി താരങ്ങൾ മേൽക്കോടതിയിൽ അപ്പീൽ നൽകണമെന്ന് വിനേഷ് ഫോഗട്ട് പ്രതികരിച്ചു. "മുഴുവൻ ഭരണസംവിധാനവും സർക്കാരും സിസ്റ്റവും ബ്രിജ് ഭൂഷനെ സംരക്ഷിക്കാനാണ് പ്രവർത്തിക്കുന്നത്" എന്നും അവർ ആരോപിച്ചു. കേസിന്റെ തുടക്കം മുതൽ മുൻ ബിജെപി എംപിയെ അധികൃതർ സംരക്ഷിക്കുകയാണെന്ന് കുറ്റപ്പെടുത്തിയ വിനേഷ്, മേൽക്കോടതിയെ സമീപിക്കാൻ തങ്ങളുടെ അഭിഭാഷകർക്ക് നിർദ്ദേശം നൽകിയിട്ടുണ്ടെന്നും വ്യക്തമാക്കി.
പോരാട്ടം ഇനിയും അവസാനിച്ചിട്ടില്ലെന്ന് സഹതാരവും ഒളിമ്പ്യനുമായ ബജ്രംഗ് പുനിയയും വ്യക്തമാക്കി. ഭീഷണികൾക്കിടയിലും, അതിശക്തനായ ഒരു രാഷ്ട്രീയ നേതാവിനെതിരെ നിയമപോരാട്ടത്തിന് തയ്യാറായ പരാതിക്കാർ വലിയ ധൈര്യമാണ് കാണിച്ചതെന്ന് എക്സിൽ പങ്കുവെച്ച സംയുക്ത കുറിപ്പിൽ ഫോഗട്ടും പുനിയയും പറഞ്ഞു.
"ഭരണകക്ഷിയിലെ ശക്തനായ ഒരു നേതാവിനെതിരെ തെരുവിലിറങ്ങി എഫ്ഐആർ ഫയൽ ചെയ്യാൻ ഞങ്ങൾക്ക് വലിയ ധൈര്യം സംഭരിക്കേണ്ടി വന്നു. തന്റെ രാഷ്ട്രീയ സ്വാധീനവും ഗുണ്ടാബലവും ഉപയോഗിച്ച്, പരാതി പിൻവലിക്കാൻ ബ്രിജ് ഭൂഷൺ നിരവധി പെൺകുട്ടികളെ ഭീഷണിപ്പെടുത്തി," അവർ കുറിച്ചു.
Former BJP MP and Wrestling Federation of India (WFI) chief Brij Bhushan Sharan Singh was acquitted of sexual harassment charges filed by six women wrestlers. The court ruled that the prosecution failed to prove the charges beyond a reasonable doubt, noting inconsistencies in the complainants' testimonies compared to earlier affidavits. Following the verdict, Singh expressed his gratitude, stating that he was acquitted with honor and that "what is meant to be will be." The acquittal caps a highly publicized three-year saga that shook Indian sports. Prominent wrestlers, including Vinesh Phogat, Sakshi Malik, and Bajrang Punia, led massive protests in New Delhi demanding action against Singh. The protests gained international attention—and condemnation from the IOC—after Delhi Police manhandled and arrested the athletes during a march to the new Parliament building in May 2023. The wrestlers even threatened to immerse their medals in the river Ganga before the government intervened.