പ്രണയിക്കാൻ ഇതിലും മികച്ചൊരു സ്ഥലമില്ല! യുവാക്കൾക്കിടയിൽ പുതിയ തരംഗമായി 'ഗ്രേവ്യാർഡ് ഡേറ്റിംഗ്'

ഇന്നത്തെ തലമുറയുടെ (Gen Z) അഭിപ്രായത്തിൽ ഏറ്റവും റൊമാന്റിക്ക് ആയ ഡെറ്റിംഗ് സ്പോട്ട് ഏതാണെന്ന് അറിയാമോ? ശ്മശാനം!

ദി ബിഗ് ബാങ് തിയറിയുടെ (The Big Bang Theory) എട്ടാം സീസണിലെ "ദി ഇന്റിമസി ആക്സിലറേഷൻ" എന്ന എപ്പിസോഡിൽ, തന്റെ കാമുകിയായ എമിലി ഒരു ശ്മശാനത്തിൽ സമയം ചെലവഴിക്കാനും പ്രണയിക്കാനും ആഗ്രഹം പ്രകടിപ്പിക്കുമ്പോൾ രാജേഷ് കൂത്രപ്പള്ളി ഭയപ്പെടുന്നതായി കാണിക്കുന്നുണ്ട്. ഒരു ശവകുടീരത്തിനരികിൽ നിന്ന് ഇരുവരും ചുംബിക്കുന്നതും ആ രംഗത്തിലുണ്ട്.

'കപൂർ ആൻഡ് സൺസ്' എന്ന സിനിമയിലെ ഒരു മനോഹരമായ രംഗമുണ്ട്. അർജുനും (സിദ്ധാർത്ഥ് മൽഹോത്ര) ടിയയും (ആലിയ ഭട്ട്) ഒരു ശ്മശാനത്തിലൂടെ നടന്നു നീങ്ങുകയാണ്. തങ്ങളുടെ ശവക്കല്ലറകളിൽ എന്താണ് എഴുതിവെക്കേണ്ടത് എന്നതിനെക്കുറിച്ചാണ് അവരുടെ സംസാരം. ഒരു ചെറിയ മൗനത്തിന് ശേഷം അർജുൻ പറയുന്നു, "ആഖരി ബാർ ലിഖ് രഹാ ഹൂം... ഹോ സകേ തോ കഹാനി യാദ് രഖ്നാ" (അവസാനമായി എഴുതുകയാണ്... കഴിയുമെങ്കിൽ ഈ കഥ ഓർത്തു വെക്കുക). ടിയ അവനെത്തന്നെ നോക്കിനിൽക്കുകയാണ്, ആ നോട്ടത്തിൽ ദേഷ്യമില്ല, പകരം തനിക്ക് നന്നായി അറിയാമെന്ന് കരുതിയ ഒരാളുടെ ചിന്തകൾക്ക് ഇത്രയും ആഴമുണ്ടായിരുന്നോ എന്ന തിരിച്ചറിവിന്റെ വിസ്മയമാണത്.

അവിടെ അവരുടെ കൈകളിൽ മൊബൈൽ ഫോണുകളില്ല. പ്രണയത്തിന്റെ ആദ്യ നാളുകളിലൂടെ കടന്നുപോകുന്ന, തങ്ങളേക്കാൾ വലിയ ജീവിതസത്യങ്ങളെക്കുറിച്ച് സംസാരിക്കുന്ന രണ്ട് മനുഷ്യർ മാത്രമാണുള്ളത്.

പരസ്പരമുള്ള ശ്രദ്ധയും സമയവും ഇത്രയേറെ അപൂർവ്വമായി മാറിയ ഇന്നത്തെ ലോകത്ത്, പ്രണയം എന്നത് ചിതറിത്തെറിച്ച ചില നിമിഷങ്ങൾ മാത്രമായി ചുരുങ്ങിപ്പോയിരിക്കുന്നു. ഒരു ഡിന്നർ ഡേറ്റിനിടയിൽപ്പോലും നമ്മൾ എത്ര തവണയാണ് ഫോൺ സ്ക്രീനിലേക്ക് നോക്കിക്കൊണ്ടിരിക്കുന്നത്? അല്ലെങ്കിൽ ഒരുമിച്ച് ഇരുന്ന് വെറുമൊരു 'സിനിമ കാണുന്നത്' പങ്കാളിയുമൊത്ത് ചെലവഴിക്കുന്ന 'ക്വാളിറ്റി ടൈം' ആയി നമ്മൾ തെറ്റിദ്ധരിക്കാറില്ലേ?

പങ്കാളിയോടൊപ്പം അർത്ഥവത്തായി സമയം ചെലവഴിക്കുക അഥവാ ക്വാളിറ്റി ടൈം എന്ന സങ്കൽപ്പം തന്നെ ഇന്ന് തീർത്തും ശൂന്യമായ ഒന്നായി വഴിമാറിയിരിക്കുന്നു. ഒരേ മുറിയിൽ അവർ ഒരുമിച്ചുണ്ടാകും, എന്നാൽ ഒരിക്കലും മാനസികമായി അവർ ഒരുമിച്ചായിരിക്കില്ല. പരസ്പരമുള്ള നോട്ടങ്ങളിലൂടെയും, അർത്ഥവത്തായ മൗനങ്ങളിലൂടെയും, രണ്ടുപേർക്കിടയിൽ പറയാതെ പറയുന്ന തീവ്രമായ വികാരങ്ങളിലൂടെയും പതുക്കെ വളർന്നുവരുന്ന ആ പഴയ പ്രണയബന്ധം ഇന്ന് വളരെ അപൂർവ്വമായിരിക്കുന്നു.

സോഷ്യൽ മീഡിയയിലെ ഒരു സ്റ്റോറിക്കോ അല്ലെങ്കിൽ ഫീഡിലിടാനുള്ള ഒരു ചിത്രത്തിനോ അപ്പുറം, ഒരു ഡേറ്റിംഗ് യഥാർത്ഥത്തിൽ ജീവനുള്ള ഒരു അനുഭവമായി നിങ്ങൾക്ക് അവസാനമായി തോന്നിയത് എപ്പോഴാണ്? ഇവിടെയാണ് ആരും ഒട്ടും പ്രതീക്ഷിക്കാത്ത ഒരു ട്വിസ്റ്റായി "ഗ്രേവ്യാർഡ് ഡേറ്റിംഗ്" കടന്നുവരുന്നത്.

അവിടെ പൂർണ്ണമായ നിശബ്ദതയുണ്ട്. കാതടപ്പിക്കുന്ന പാട്ടുകളില്ല, പരസ്പരം കേൾക്കാൻ വേണ്ടി തൊണ്ടപൊട്ടി സംസാരിക്കേണ്ട യാതൊരു ആവശ്യവുമില്ല. ദൈനംദിന ജീവിതത്തിലെ ബഹളങ്ങളിൽ നിന്നും, തിരക്കേറിയ ഇടങ്ങളിൽ നിന്നും, തുറിച്ചുനോക്കുന്ന കണ്ണുകളിൽ നിന്നുമുള്ള പൂർണ്ണമായ ഒരു ഒളിച്ചോട്ടം കൂടിയാണിത്. ചുറ്റും ആളുകളുടെ ശല്യമില്ലാത്തതുകൊണ്ട് തന്നെ, ഏത് കമിതാക്കളും ആഗ്രഹിക്കുന്ന ആ സ്വകാര്യത അവിടെ പൂർണ്ണമായും ലഭിക്കുന്നു. പഴയ സെമിത്തേരികളിലൂടെ അൽപനേരം വർത്തമാനം പറഞ്ഞ് നടക്കുന്നതും അതിന്റെ വീഡിയോകൾ പങ്കുവെക്കുന്നതും ജെൻസികൾക്കിടയിൽ തരംഗമായി മാറിയിരിക്കുകയാണ്.

ആരും ഒട്ടും പ്രതീക്ഷിക്കാത്ത ഒരു മാറ്റമാണിത്. വെറുമൊരു ട്രെൻഡിന് വേണ്ടിയോ, മറ്റുള്ളവരിൽ നിന്ന് വേറിട്ടുനിൽക്കാൻ വേണ്ടിയോ അല്ല അവരിത് തിരഞ്ഞെടുക്കുന്നത്. മറിച്ച്, ഇന്നത്തെ കാലത്തെ തിരക്കുകളിൽ നിന്നുള്ള ഒരു ഒളിച്ചോട്ടം കൂടിയാണിത്. റെസ്റ്റോറന്റുകളിലെ വലിയ ബഹളങ്ങളിൽ നിന്നും, പാർക്കുകളിലെ ആൾക്കൂട്ടത്തിൽ നിന്നും, തുറിച്ചുനോക്കുന്ന അപരിചിതരുടെ കണ്ണുകളിൽ നിന്നും പൂർണ്ണമായും അകന്ന്, ഇന്നത്തെ കാലത്തെ ഏറ്റവും വലിയ ആഡംബരമായ നിശ്ചലതയും സ്വകാര്യതയും ശ്മശാനങ്ങൾ അവർക്ക് നൽകുന്നു.

ഈ ഡേറ്റിംഗ് രീതി തിരഞ്ഞെടുക്കുന്നതിന് പിന്നിൽ ആ സ്ഥലത്തിന്റെ പ്രത്യേകതയും ഒരു പ്രധാന പങ്കുവഹിക്കുന്നുണ്ട്. ചരിത്രത്തിന്റെ സ്പർശനവും, ജീവിതത്തിന്റെയും മരണത്തിന്റെയും ഓർമ്മപ്പെടുത്തലുകളും നിറഞ്ഞ ഈ അന്തരീക്ഷം സ്വാഭാവികമായും കൂടുതൽ അർത്ഥവത്തായ ചർച്ചകളിലേക്ക് വഴിതുറക്കും. സാധാരണ ഡേറ്റുകളെ അപേക്ഷിച്ച്, ഇത് തങ്ങൾക്കിടയിൽ കൂടുതൽ ശക്തമായ ഒരു വൈകാരിക ബന്ധം സൃഷ്ടിക്കുമെന്നാണ് ചില യുവപ്രേമികൾ വിശ്വസിക്കുന്നത്.

എങ്കിലും, ഈ പുതിയ പ്രവണത വലിയ ചർച്ചകൾക്കും വിവാദങ്ങൾക്കും വഴിവെച്ചിട്ടുണ്ട്. ശ്മശാനങ്ങൾ എന്നത് മരിച്ചവരോടുള്ള ആദരവും ദുഃഖവും പ്രകടിപ്പിക്കേണ്ട പവിത്രമായ ഇടങ്ങളാണെന്നും, അത്തരം സ്ഥലങ്ങൾ പ്രണയയാത്രകൾക്കായി ഉപയോഗിക്കരുതെന്നും വിമർശനം. എന്നാൽ മറ്റു ചിലരാകട്ടെ, ഈ ട്രെൻഡ് യഥാർത്ഥത്തിൽ ആളുകൾക്കിടയിൽ വ്യാപകമാണോ, അതോ സോഷ്യൽ മീഡിയയിൽ ശ്രദ്ധ നേടാൻ വേണ്ടി മാത്രം ഉണ്ടാക്കിയെടുത്തതാണോ എന്നും സംശയിക്കുന്നു.

ഈ തർക്കങ്ങൾ എങ്ങനെയൊക്കെ ആണെങ്കിലും, 'ഗ്രേവ്യാർഡ് ഡേറ്റിംഗിന്റെ' ഈ വളർച്ച വലിയൊരു സാംസ്കാരിക മാറ്റത്തിലേക്കാണ് വിരൽ ചൂണ്ടുന്നത്. ഇന്നത്തെ പല ജെൻ സി യുവാക്കൾക്കും പ്രണയം എന്നാൽ പണം വാരിയെറിയുന്ന ഡേറ്റുകളോ സോഷ്യൽ മീഡിയയിൽ പങ്കുവെക്കാനുള്ള 'പിക്ചർ പെർഫെക്റ്റ്' നിമിഷങ്ങളോ അല്ല. പകരം, പരസ്പരം ഉള്ളുതുറന്ന് സംസാരിക്കാനും സത്യസന്ധമായി അടുത്തുറിയാനും സാധിക്കുന്ന ശാന്തമായ ചില ഇടങ്ങൾ കണ്ടെത്തുക എന്നത് മാത്രമാണ്.