പശ്ചിമ ബംഗാളിൽ സ്കൂളുകൾക്ക് പിന്നാലെ മദ്രസകളിലും വന്ദേമാതരം നിർബന്ധമാക്കി സംസ്ഥാന സർക്കാർ. ന്യൂനപക്ഷകാര്യ-മദ്രസ വിദ്യാഭ്യാസ വകുപ്പിനു കീഴിലുള്ള എല്ലാ എയ്ഡഡ്, അൺഎയ്ഡഡ് മദ്രസകളിലും രാവിലെ അസംബ്ലിക്കിടെ വന്ദേമാതരം ആലപിക്കണമെന്നാണ് മദ്രസ ഡയറക്ടറേറ്റ് പുറത്തിറക്കിയ പുതിയ ഉത്തരവിൽ വ്യക്തമാക്കുന്നത്. ഉത്തരവ് ഉടൻ പ്രാബല്യത്തിൽ വരുമെന്നും അധികൃതർ അറിയിച്ചു.
അസംബ്ലിക്ക് മുമ്പ് വന്ദേമാതരം ആലപിക്കണം
ക്ലാസുകൾ ആരംഭിക്കുന്നതിന് മുൻപായി നടക്കുന്ന പ്രാർത്ഥനാ അസംബ്ലികളിലാണ് വന്ദേമാതരം ഉൾപ്പെടുത്തേണ്ടതെന്ന് നിർദേശത്തിൽ പറയുന്നു. സംസ്ഥാനത്തെ എല്ലാ മദ്രസകളും നിർബന്ധമായും ഇത് പാലിക്കണമെന്നാണ് വിദ്യാഭ്യാസ വകുപ്പിന്റെ നിർദേശം. സ്കൂളുകളിലെയും മദ്രസകളിലെയും പ്രഭാത അസംബ്ലികളെ ഏകീകരിക്കുന്ന നടപടിയുടെ ഭാഗമായാണ് പുതിയ തീരുമാനം വിലയിരുത്തപ്പെടുന്നത്.
സ്കൂളുകളിലെ തീരുമാനത്തിന് പിന്നാലെ നടപടി
സംസ്ഥാനത്തെ സ്കൂളുകളിൽ വന്ദേമാതരത്തിന്റെ ആറ് ഖണ്ഡികകളും ആലപിക്കുന്നത് നിർബന്ധമാക്കിയതിന് പിന്നാലെയാണ് മദ്രസകൾക്കും സമാന നിർദേശം നൽകിയത്. സ്കൂൾ അസംബ്ലികളിൽ ദേശീയഗാനത്തിന് മുൻപായി വന്ദേമാതരം ആലപിക്കണമെന്നായിരുന്നു നേരത്തേ പുറപ്പെടുവിച്ച ഉത്തരവ്. ബിജെപി നേതൃത്വത്തിലുള്ള പുതിയ സർക്കാർ അധികാരത്തിലെത്തിയതിന് പിന്നാലെ വിദ്യാഭ്യാസ മേഖലയുമായി ബന്ധപ്പെട്ട നിരവധി മാറ്റങ്ങൾ നടപ്പിലാക്കുന്ന സാഹചര്യത്തിലാണ് ഈ തീരുമാനവും ശ്രദ്ധനേടുന്നത്.
കേന്ദ്രത്തിന്റെ പുതിയ പ്രോട്ടോക്കോളും രാഷ്ട്രീയ ചർച്ചകളും
വന്ദേമാതരത്തിന്റെ 150-ാം വാർഷികത്തോടനുബന്ധിച്ച് കേന്ദ്ര സർക്കാർ ഈ വർഷം പുതിയ പ്രോട്ടോക്കോൾ പ്രഖ്യാപിച്ചിരുന്നു. സർക്കാർ പരിപാടികളിലും വിദ്യാഭ്യാസ സ്ഥാപനങ്ങളിലെ ഔദ്യോഗിക ചടങ്ങുകളിലും ജനഗണമനയ്ക്ക് മുൻപായി വന്ദേമാതരത്തിന്റെ ആറ് ഖണ്ഡികകൾ ആലപിക്കണമെന്നായിരുന്നു കേന്ദ്ര ആഭ്യന്തര മന്ത്രാലയത്തിന്റെ നിർദേശം. ഇതിനിടെ വിവിധ സംസ്ഥാനങ്ങളിലെ സർക്കാർ ചടങ്ങുകളിൽ വന്ദേമാതരം ഉൾപ്പെടുത്തിയതിനെച്ചൊല്ലിയും രാഷ്ട്രീയ വിവാദങ്ങൾ ഉയർന്നിരുന്നു.
English Summary: The West Bengal government has made singing Vande Mataram mandatory in all aided and unaided madrasas during morning assemblies, aligning madrasa protocols with state school assembly regulations.