മരണ രജിസ്ട്രേഷന് പ്രക്രിയ കൂടുതല് ശാസ്ത്രീയവും സുതാര്യവുമാക്കുന്നതിനായി മെഡിക്കല് സര്ട്ടിഫിക്കറ്റ് ഓഫ് കോസ് ഓഫ് ഡെത്ത് നിര്ബന്ധമാക്കാന് തീരുമാനിച്ചിരിക്കുകയാണ് സംസ്ഥാന സർക്കാർ. ആരോഗ്യമേഖലയില് വലിയ മാറ്റങ്ങള്ക്കു വഴിവയ്ക്കുന്ന നീക്കമാണിത്. 1969-ലെ ജനന-മരണ രജിസ്ട്രേഷന് നിയമത്തിന്റെ അടിസ്ഥാനത്തിലാണ് ഈ തീരുമാനം നടപ്പാക്കുന്നത്. സർട്ടിഫിക്കറ്റ് നൽകുന്നതിൽ വീഴ്ച വരുത്തിയാൽ പിഴയും ഈടാക്കും. ഇതോടെ ഇതുവരെ പലയിടത്തും പേരിനു മാത്രം നടന്നിരുന്ന മരണകാരണം രേഖപ്പെടുത്തല് ഇനി മുതല് ഒരു സര്ക്കാര് ഉത്തരവാദിത്തമായി മാറും.
പരിഷ്കരണത്തിന്റെ ഗുണഫലങ്ങള്
ഈ പരിഷ്കാരം കേവലം ഒരു ഔദ്യോഗിക നടപടിക്രമം എന്നതിലുപരി, സംസ്ഥാനത്തിന്റെ ആരോഗ്യ ഭൂപടം തന്നെ മാറ്റിയെഴുതാന് ശേഷിയുള്ള ഒരു സുപ്രധാന തീരുമാനമാണ്. പൊതുജനാരോഗ്യ കണക്കുകള് കൂടുതല് കൃത്യമാക്കുന്നതിലൂടെ കൈവരിക്കാന് കഴിയുന്ന ഗുണഫലങ്ങള് താഴെ പറയുന്നവയാണ്:
>രോഗാവസ്ഥകളെക്കുറിച്ചുള്ള കൃത്യമായ ധാരണ
ഓരോ മരണത്തിന്റെയും യഥാര്ത്ഥ കാരണങ്ങള് ശാസ്ത്രീയമായി രേഖപ്പെടുത്തുന്നതിലൂടെ, കേരളത്തില് ഏറ്റവും കൂടുതല് ആളുകള് മരണപ്പെടുന്നത് ഏതു രോഗം മൂലമാണെന്ന് കൃത്യമായി മനസിലാക്കാന് സാധിക്കും. കാന്സര്, ഹൃദ്രോഗം, ജീവിതശൈലീ രോഗങ്ങള് അല്ലെങ്കില് പകര്ച്ചവ്യാധികള് എന്നിവയില് ഏതിനാണു കൂടുതല് മുന്ഗണന നല്കേണ്ടതെന്നു തിരിച്ചറിയാന് ഈ കണക്കുകള് സഹായിക്കും.
>ആരോഗ്യ പദ്ധതികളുടെ കാര്യക്ഷമമായ ആസൂത്രണം
ഏതെങ്കിലും പ്രത്യേക പ്രദേശത്തോ ജനവിഭാഗത്തിനോ ഇടയില് നിശ്ചിത രോഗങ്ങള് മൂലമുള്ള മരണങ്ങള് കൂടുന്നുണ്ടോയെന്ന് പരിശോധിക്കാന് ഈ ഡേറ്റ വഴി സാധിക്കും. ഇതിന്റെ അടിസ്ഥാനത്തില്, ആ പ്രദേശങ്ങളിലേക്കു പ്രത്യേക ആരോഗ്യ ക്യാമ്പുകള്, പരിശോധനാ സംവിധാനങ്ങള്, പ്രതിരോധ മരുന്നുകള് എന്നിവ മുന്കൂട്ടി എത്തിക്കാനും ആരോഗ്യ പദ്ധതികള് കൂടുതല് ലക്ഷ്യാധിഷ്ഠിതമാക്കാനും സര്ക്കാരിനു കഴിയും.
>ആഗോള നിലവാരത്തിലുള്ള ആരോഗ്യ ഡേറ്റാബേസ്
ലോകാരോഗ്യ സംഘടനയുടെ അന്താരാഷ്ട്ര മാനദണ്ഡങ്ങള് (ICD-10/ICD-11) പ്രകാരം മരണകാരണങ്ങള് രേഖപ്പെടുത്തുന്നതു വഴി കേരളത്തിന്റെ ആരോഗ്യ സ്ഥിതിവിവരക്കണക്കുകള് അന്താരാഷ്ട്ര തലത്തില് താരതമ്യം ചെയ്യാന് പാകത്തിലാകും. ഇതു കേരളത്തിലെ ആരോഗ്യസംവിധാനത്തിന്റെ വിശ്വാസ്യത വര്ധിപ്പിക്കുകയും ഭാവിയില് ആരോഗ്യമേഖലയില് കൂടുതല് ഗവേഷണങ്ങള്ക്കും പഠനങ്ങള്ക്കും വഴിയൊരുക്കുകയും ചെയ്യും.
>രോഗവ്യാപന പ്രവണതകള് മുന്കൂട്ടി തിരിച്ചറിയല്
അസാധാരണമായ മരണങ്ങള് സംഭവിക്കുന്നുണ്ടെങ്കില് അത് തിരിച്ചറിയാനും ഒരു മഹാമാരിയുടെയോ അല്ലെങ്കില് ഗുരുതരമായ ആരോഗ്യപ്രശ്നത്തിന്റെയോ തുടക്കം നേരത്തെ തന്നെ കണ്ടെത്തി പ്രതിരോധിക്കാനും പുതിയ സംവിധാനം സഹായിക്കും. ഇതു പകര്ച്ചവ്യാധി നിയന്ത്രണത്തിലും ആരോഗ്യ സുരക്ഷയിലും കേരളത്തെ കൂടുതല് സജ്ജമാക്കും.
>സുതാര്യതയും ശാസ്ത്രീയതയും
മരണകാരണം 'അജ്ഞാതം' എന്നോ 'രോഗം' എന്നോ മാത്രം രേഖപ്പെടുത്തുന്ന പഴയ രീതിക്ക് അന്ത്യം കുറിക്കപ്പെടുന്നു. ഓരോ മരണവും എന്തിനാല് സംഭവിച്ചു എന്നതിനെക്കുറിച്ച് ശാസ്ത്രീയമായ രേഖകള് ഉണ്ടാകുന്നതോടെ, രജിസ്ട്രേഷന് നടപടികള് കൂടുതല് സുതാര്യമാവുകയും കൃത്യമായ വിവരങ്ങള് ഭരണകൂടത്തിനു ലഭ്യമാവുകയും ചെയ്യും.
പുതുക്കിയ നിയമപ്രകാരം, ആശുപത്രികളില് സംഭവിക്കുന്ന മരണങ്ങള്ക്കും ചികിത്സ നല്കിയ ഡോക്ടറുടെ മേല്നോട്ടത്തില് നടക്കുന്ന മരണങ്ങള്ക്കും രജിസ്ട്രേഷനോടൊപ്പം മെഡിക്കല് സര്ട്ടിഫിക്കറ്റ് നിര്ബന്ധമാണ്. ചികിത്സിച്ച ഡോക്ടര് അല്ലെങ്കില് ബന്ധപ്പെട്ട ആശുപത്രിയാണ് ഈ സര്ട്ടിഫിക്കറ്റ് സൗജന്യമായി നല്കേണ്ടത്.
ഇതിന്റെ ഒരു പകര്പ്പ് മരിച്ചയാളുടെ ബന്ധുവിനു ലഭിക്കാന് നിയമപരമായ അവകാശമുണ്ട്. സര്ട്ടിഫിക്കറ്റ് നല്കുന്നതില് വീഴ്ച വരുത്തുന്ന ഡോക്ടര്മാര്ക്കോ സ്ഥാപനങ്ങള്ക്കോ എതിരെ 1969-ലെ നിയമപ്രകാരം കര്ശനമായ പിഴ ഉള്പ്പെടെയുള്ള നടപടികള് സ്വീകരിക്കും.
ആദ്യഘട്ടത്തില് നഗരസഭകളിലും കോര്പ്പറേഷനുകളിലുമാണ് പദ്ധതി നടപ്പിലാക്കുന്നത്. കെ-സ്മാര്ട്ട് പോര്ട്ടല് വഴി ഓണ്ലൈനായി നടപടികള് പൂര്ത്തിയാക്കുന്ന രീതിയാണ് സര്ക്കാര് വിഭാവനം ചെയ്യുന്നത്. അതുവരെ, ഡോക്ടര് സാക്ഷ്യപ്പെടുത്തിയ 'ഫോറം-4' സര്ട്ടിഫിക്കറ്റുകള് സ്കാന് ചെയ്ത് അപ്ലോഡ് ചെയ്യണം.
അസ്വാഭാവിക മരണങ്ങള്, അപകടങ്ങള്, കൊലപാതകങ്ങള് തുടങ്ങിയ കേസുകളില് നിലവിലുള്ള പോസ്റ്റ്മോര്ട്ടം നടപടികളിലോ നിയമപരമായ കാര്യങ്ങളിലോ മാറ്റമില്ല. എന്നാല് സ്വാഭാവിക മരണങ്ങളെന്നു കരുതപ്പെടുന്ന കേസുകളില്പ്പോലും, 'കാര്ഡിയോ റെസ്പിറേറ്ററി ഫെയിലിയര്'പോലുള്ള അവ്യക്തമായ കാരണങ്ങള് ഒഴിവാക്കി, കൃത്യമായ രോഗാവസ്ഥകള് രേഖപ്പെടുത്തണമെന്നത് ഈ നിയമത്തിന്റെ പ്രധാന പ്രത്യേകതയാണ്.
ഇതൊരു വിപ്ലവകരമായ മാറ്റമാണെങ്കിലും, ആയിരക്കണക്കിന് ആശുപത്രികളില് ഒരേസമയം ഇത് കൃത്യമായി നടപ്പിലാക്കുകയെന്നതു വലിയ വെല്ലുവിളിയാണ്. ഡോക്ടര്മാര്ക്കും ഉദ്യോഗസ്ഥര്ക്കും ഇതിനായി പ്രത്യേക പരിശീലനം അനിവാര്യമാണ്. ഒപ്പം, മരണാനന്തര നടപടികളില് ബന്ധുക്കള്ക്കുണ്ടാകുന്ന ആശയക്കുഴപ്പങ്ങള് പരിഹരിക്കാന് വ്യക്തമായ അവബോധം നല്കേണ്ടതുമുണ്ട്. എന്തായാലും, ഈ പരിഷ്കരണം നടപ്പിലാകുന്നതോടെ കേരളത്തിന്റെ ആരോഗ്യ ഡേറ്റാബേസ് കൂടുതല് കൃത്യവും സുതാര്യവുമാവുകയും ഭാവിയിലെ ആരോഗ്യ പദ്ധതികള്ക്കു കൃത്യമായ ദിശാബോധം ലഭിക്കുകയും ചെയ്യും.
The state government has decided to make the Medical Certificate of Cause of Death mandatory in order to make the death registration process more scientific and transparent. This is a move that will pave the way for major changes in the health sector. This decision is being implemented on the basis of the Registration of Births and Deaths Act, 1969. With this, recording the cause of death—which until now was done just for the sake of it in many places—will henceforth become a government responsibility
