60-കളിലെ വസ്ത്രധാരണ രീതികളെ അനുസ്മരിപ്പിക്കുന്ന 'ബേബിഡോൾ' വസ്ത്രങ്ങൾ ഇന്ന് ആഗോളതലത്തിൽ വലിയ തരംഗമാണ് സൃഷ്ടിക്കുന്നത്. പ്രശസ്ത പോപ്പ് ഗായികമാരായ ഒലിവിയ റോഡ്രിഗോ, സബ്രീന കാർപെന്റർ തുടങ്ങിയവർ ഈ ശൈലിയിലുള്ള വസ്ത്രങ്ങൾ ധരിച്ച് പൊതുവേദികളിലും മ്യൂസിക് വീഡിയോകളിലും പ്രത്യക്ഷപ്പെട്ടതോടെയാണ് ഈ ഫാഷൻ ട്രെൻഡ് വീണ്ടും ജനശ്രദ്ധയാകർഷിച്ചത്. വെഴ്സായ് കൊട്ടാരത്തിന്റെ പശ്ചാത്തലത്തിൽ ചിത്രീകരിച്ച തന്റെ പുതിയ മ്യൂസിക് വീഡിയോയിലും പിന്നീട് ബാഴ്സലോണയിൽ നടന്ന ഒരു സംഗീത പരിപാടിയിലും ഒലിവിയ ഇത്തരം വസ്ത്രങ്ങളണിഞ്ഞ് എത്തിയിരുന്നു. എന്നാൽ, ഈ വസ്ത്രധാരണം ഒരു വിഭാഗം ആളുകൾക്കിടയിൽ കടുത്ത വിമർശനങ്ങൾക്ക് വഴിവെച്ചിരിക്കുകയാണ്. പ്രായത്തിന് യോജിക്കാത്തതും കുട്ടിക്കളിയുള്ളതുമായ വസ്ത്രധാരണത്തിലൂടെ തെറ്റായ സന്ദേശമാണ് ഇവർ നൽകുന്നതെന്നാണ് വിമർശകരുടെ വാദം
ഒലിവിയയുടെ വസ്ത്രധാരണത്തെ അനുകൂലിച്ചും പ്രതികൂലിച്ചും സോഷ്യൽ മീഡിയയിൽ വലിയ രീതിയിലുള്ള സംവാദങ്ങളാണ് നടക്കുന്നത്. ഈ വസ്ത്രങ്ങൾ ഒരു തരം അപക്വത പ്രകടിപ്പിക്കുന്നുവെന്നും കുട്ടികളെപ്പോലെ വസ്ത്രം ധരിച്ച് ലൈംഗികാകർഷണം നേടാൻ ശ്രമിക്കുന്നുവെന്നുമാണ് പ്രധാന ആക്ഷേപം.
എന്നാൽ, ഈ വസ്ത്രം ഡിസൈൻ ചെയ്ത പ്രമുഖ ബ്രാൻഡുകൾ ഇത്തരം ആരോപണങ്ങളെ ശക്തമായി എതിർക്കുന്നു. ബേബിഡോൾ ശൈലി എന്നത് ഒരിക്കലും കുട്ടികളെ അനുകരിക്കുന്ന ഒന്നല്ലെന്നും, അത് പ്രണയത്തിന്റെ ദീർഘമായ ഫാഷൻ ചരിത്രത്തിന്റെ ഭാഗമാണെന്നും അവർ വ്യക്തമാക്കുന്നു. ഇരുപത്തിമൂന്നുകാരിയായ ഒലിവിയയും തന്റെ വസ്ത്രധാരണത്തെ പ്രതിരോധിച്ച് രംഗത്തെത്തിയിട്ടുണ്ട്. തനിക്ക് ഫാഷൻ എന്നത് തികച്ചും ആസ്വാദ്യകരവും ലളിതവുമായ ഒരു വിനോദമാണെന്നാണ് ഗായികയുടെ നിലപാട്
ബേബിഡോൾ വസ്ത്രങ്ങൾക്ക് ഫാഷൻ ചരിത്രത്തിൽ വലിയൊരു പാരമ്പര്യമുണ്ട്. 1960-കളിൽ മിനി സ്കോർട്ടുകളുടെ തരംഗത്തിനൊപ്പമാണ് ഈ ശൈലിയും രൂപപ്പെടുന്നത്. അക്കാലത്ത് സ്ത്രീകൾക്ക് മേൽ സമൂഹം അടിച്ചേൽപ്പിച്ച ചില അലിഖിത നിയമങ്ങളെ മറികടക്കാനും, തങ്ങളുടെ സ്വാതന്ത്ര്യവും സ്ത്രീത്വവും വിളിച്ചോതാനുമുള്ള ഒരു മാധ്യമമായിട്ടാണ് സ്ത്രീകൾ ഇതിനെ കണ്ടിരുന്നത്. പകൽ വസ്ത്രമായും രാത്രികാല വസ്ത്രമായും ഒരുപോലെ ഉപയോഗിച്ചിരുന്ന ഈ ശൈലി സ്ത്രീകളുടെ വ്യക്തിസ്വാതന്ത്ര്യത്തിന്റെ പ്രതീകമായിരുന്നുവെന്ന് ഫാഷൻ ഗവേഷകർ നിരീക്ഷിക്കുന്നു
പിന്നീട് 1990-കളിൽ പ്രശസ്ത റോക്ക് താരം കോട്നി ലവ് ഉൾപ്പെടെയുള്ളവർ ഈ വസ്ത്രരീതിയെ തങ്ങളുടെ വിപ്ലവകരമായ സംഗീത സംസ്കാരത്തിന്റെ ഭാഗമാക്കി മാറ്റിയിരുന്നു. നിലവിലെ വിവാദങ്ങളിൽ ഒലിവിയയെ പിന്തുണച്ച് കോട്നി ലവും രംഗത്തെത്തിയിട്ടുണ്ട്. വസ്ത്രങ്ങളെ കേവലം ലൈംഗികമായ കാഴ്ചപ്പാടോടെ മാത്രം കാണുന്നവരുടെ ചിന്താഗതിയിലാണ് പ്രശ്നമെന്നാണ് അവർ വ്യക്തമാക്കുന്നത്. ഇന്നത്തെ യുവതലമുറ ചില കാര്യങ്ങളിൽ കൂടുതൽ യാഥാസ്ഥിതികരായി മാറുന്നുണ്ടോ എന്ന ചോദ്യം ഉയർത്തുന്നതാണ് ഈ സംഭവം. എങ്കിലും, മാറ്റങ്ങൾ ഉൾക്കൊള്ളാൻ മടിക്കുന്ന ഒരു സമൂഹത്തിൽ സ്ത്രീകളുടെ ഫാഷൻ തിരഞ്ഞെടുപ്പുകളെ അനാവശ്യമായി നിയന്ത്രിക്കാനുള്ള ശ്രമങ്ങളുടെ ഭാഗമായാണ് ഈ വിവാദങ്ങളെയെല്ലാം ഫാഷൻ ലോകം വിലയിരുത്തുന്നത്
English Summary: The “Babydoll” fashion trend from the 1960s is making a major comeback globally, fueled by celebrities like Olivia Rodrigo and Sabrina Carpenter. While the trend has sparked criticism online over its styling and symbolism, fashion experts argue that babydoll outfits represent freedom, femininity, and a long-standing fashion culture