ഐപിഎല് 2026-ന്റെ എലിമിനേറ്റര് മത്സരത്തില് സണ്റൈസേഴ്സ് ഹൈദരാബാദിനെതിരെ രാജസ്ഥാന് റോയല്സിന് തകര്പ്പന് വിജയം സമ്മാനിച്ചതിനൊപ്പം ക്രിക്കറ്റ് ചരിത്ര പുസ്തകങ്ങള് ഒന്നടങ്കം തിരുത്തിക്കുറിച്ചിരിക്കുകയാണ് വൈഭവ് സൂര്യവംശി എന്ന 15 വയസ്സുകാരന്. അക്ഷരാര്ത്ഥത്തില് ഹൈദരാബാദ് ബൗളര്മാരെ അടിച്ചൊതുക്കിയ സൂര്യവംശി വെറും 29 പന്തില് 97 റണ്സ് ആണ് അടിച്ചുകൂട്ടിയത്. 5 ഫോറുകളും 12 തകര്പ്പന് സിക്സറുകളും അടങ്ങുന്നതായിരുന്നു ഈ ഇന്നിങ്സ്. 334.48 എന്ന അവിശ്വസനീയമായ സറ്റ്രൈക്ക് റേറ്റിലാണ് താരം റണ്സ് അടിച്ചുകൂട്ടിയത്. ഈ തകര്പ്പന് പ്രകടനത്തോടെ ഗുജറാത്ത് ടൈറ്റന്സിനെതിരെയുള്ള ക്വാളിഫയര് 2 പോരാട്ടത്തിലേക്ക് രാജസ്ഥാന് റോയല്സ് യോഗ്യത നേടി. മത്സരത്തിനിടയില് വിന്ഡീസ് ഇതിഹാസം ക്രിസ് ഗെയ്ലിന്റെ ഉള്പ്പെടെ ഒട്ടനവധി റെക്കോര്ഡുകളാണ് വൈഭവ് സൂര്യവംശി തച്ചുടച്ചത്.
1. ക്രിസ് ഗെയ്ലിന്റെ സിക്സര് റെക്കോര്ഡ് തകര്ത്തു
ഒരു ഐപിഎല് സീസണില് ഏറ്റവും കൂടുതല് സിക്സറുകള് പറത്തുന്ന താരം എന്ന വിന്ഡീസ് ഇതിഹാസം ക്രിസ് ഗെയ്ലിന്റെ റെക്കോര്ഡ് ഇനി വൈഭവിന് സ്വന്തം. 2012-ല് ഗെയ്ല് അടിച്ചുകൂട്ടിയ 59 സിക്സറുകളുടെ റെക്കോര്ഡാണ് ഈ സീസണില് ഇതുവരെ 65 സിക്സറുകള് അടിച്ചുകൊണ്ട് 15-കാരന് മറികടന്നത്. ഒരു ടി20 ടൂര്ണമെന്റില് ഏറ്റവും കൂടുതല് സിക്സറുകള് എന്ന റെക്കോര്ഡും ഇതോടെ സൂര്യവംശിയുടെ പേരിലായി.
2. പ്ലേഓഫ് ഇന്നിങ്സിലെ ഏറ്റവും ഉയര്ന്ന സിക്സര് വേട്ട
ഐപിഎല് പ്ലേഓഫ് മത്സര ചരിത്രത്തില് ഒരു ഇന്നിങ്സില് ഏറ്റവും കൂടുതല് സിക്സറുകള് നേടുന്ന ബാറ്ററായി സൂര്യവംശി മാറി. 12 സിക്സറുകളാണ് താരം പറത്തിയത്. 2023-ല് മുംബൈ ഇന്ത്യന്സിനെതിരെ 10 സിക്സറുകള് നേടിയ ശുഭ്മന് ഗില്ലിന്റെ റെക്കോര്ഡാണ് ഇവിടെ തകര്ന്നത്.
3. സുരേഷ് റെയ്നയുടെ റെക്കോര്ഡിനൊപ്പം
ഐപിഎല് പ്ലേഓഫ്/നോക്കൗട്ട് മത്സരങ്ങളിലെ ഏറ്റവും വേഗമേറിയ അര്ദ്ധസെഞ്ചുറി എന്ന മുന് ചെന്നൈ സൂപ്പര് കിങ്സ് താരം സുരേഷ് റെയ്നയുടെ റെക്കോര്ഡിനൊപ്പം സൂര്യവംശി എത്തി. വെറും 16 പന്തില് നിന്നാണ് താരം അര്ദ്ധസെഞ്ചുറി തികച്ചത്.
4. പവര്പ്ലേയിലെ റണ്വേട്ടക്കാരന്
ഈ സീസണില് താന് നേടിയ 680 റണ്സില് 490 റണ്സും സൂര്യവംശി അടിച്ചുകൂട്ടിയത് പവര്പ്ലേ ഓവറുകളിലാണ് (ആദ്യ 6 ഓവര്). ഇതും ഒരു ഐപിഎല് റെക്കോര്ഡാണ്. സണ്റൈസേഴ്സിനെതിരെയുള്ള മത്സരത്തില് മാത്രം പവര്പ്ലേയില് താരം 8 സിക്സറുകള് പറത്തി.
ചരിത്രത്തിലേക്ക് ബാറ്റ് വീശിയ മറ്റ് പ്രധാന നേട്ടങ്ങള്
ഈ തകര്പ്പന് ഇന്നിങ്സോടെ ഒരു ഐപിഎല് സീസണില് 600-ലധികം റണ്സ് നേടുന്ന ചരിത്രത്തിലെ ആദ്യ കൗമാരക്കാരനായി വൈഭവ് സൂര്യവംശി മാറി. ഇതിഹാസ താരം ക്രിസ് ഗെയ്ലിന്റെ സര്വ്വകാല റെക്കോര്ഡിനൊപ്പം എത്തിക്കൊണ്ട് ടി20 ക്രിക്കറ്റില് നാല് തവണ ഒരു ഇന്നിങ്സില് 10-ലധികം സിക്സറുകള് നേടുന്ന താരം എന്ന ബഹുമതിയും ഇപ്പോള് സൂര്യവംശിക്കാണ്. കൂടാതെ, ഒരു ഐപിഎല് ഇന്നിങ്സില് മൂന്ന് തവണ പത്തോ അതിലധികമോ സിക്സറുകള് നേടുന്ന ആദ്യ താരം എന്ന റെക്കോര്ഡില് ഫിന് അലനെ വൈഭവ് മറികടന്നു. സ്വന്തം സഹതാരം യശസ്വി ജയ്സ്വാള് 2023-ല് കുറിച്ച 626 റണ്സിന്റെ റെക്കോര്ഡ് തകര്ത്തുകൊണ്ട്, ഒരു ഐപിഎല് സീസണില് ഏറ്റവും കൂടുതല് റണ്സ് നേടുന്ന അണ്ക്യാപ്ഡ് താരം എന്ന ചരിത്രനേട്ടവും ഈ 15-കാരന് തന്റെ പേരില് കുറിച്ചു കഴിഞ്ഞു.
വെറും 15 വയസ്സ് മാത്രം പ്രായമുള്ള ഈ താരം അന്താരാഷ്ട്ര താരങ്ങളെപ്പോലും അമ്പരപ്പിക്കുന്ന തരത്തിലാണ് ബാറ്റ് വീശുന്നത്. രാജസ്ഥാന് റോയല്സിന്റെ ഈ പുതിയ കണ്ടെത്തല് ഇന്ത്യന് ക്രിക്കറ്റില് വലിയൊരു വിപ്ലവമാണ് സൃഷ്ടിക്കുന്നത്. ക്വാളിഫയര് 2-ലും ഈ യുവതാരത്തിന്റെ ബാറ്റിംഗ് വിസ്ഫോടനം കാണാനായി കാത്തിരിക്കുകയാണ് ആരാധകർ.
English Summary: Fifteen-year-old batting sensation Vaibhav Suryavanshi rewrote the record books with a breathtaking knock in the IPL 2026 Eliminator against Sunrisers Hyderabad. The young star smashed 97 runs off just 29 balls, including 5 fours and 12 massive sixes, at an astonishing strike rate of 334.48. His explosive innings guided Rajasthan Royals to a dominant victory and secured their place in Qualifier 2 against Gujarat Titans. During the match, Suryavanshi also broke several records previously held by West Indies legend Chris Gayle.