റിയാൻ പരാഗ് കുടുങ്ങുമോ? ഡ്രസിങ് റൂമിൽ നിരോധിത ഇ-സിഗരറ്റ് ഉപയോഗം; ബിസിസിഐ നടപടിയും നിയമക്കുരുക്കും കാത്ത് താരം

രാജസ്ഥാൻ റോയൽസ് പഞ്ചാബ് കിങ്സിന്റെ വിജയക്കുതിപ്പിന് തടയിട്ടെങ്കിലും ക്രിക്കറ്റ് ലോകം ചർച്ച ചെയ്യുന്നത് ടീമിന്റെ ജയത്തെയല്ല, മറിച്ച് റിയാൻ പരാഗിന്റെ ഡ്രസ്സിംഗ് റൂമിലെ പെരുമാറ്റത്തെയാണ്. മത്സരത്തിനിടയിൽ ഡ്രസ്സിങ് റൂമിലിരുന്ന് പരാഗ് ഇ-സിഗരറ്റ് (Vaping) ഉപയോഗിക്കുന്ന ദൃശ്യങ്ങൾ ക്യാമറയിൽ പതിഞ്ഞതോടെ വലിയ വിവാദമാണ് ഉടലെടുത്തിരിക്കുന്നത്. ഇത് കേവലം അച്ചടക്ക ലംഘനം മാത്രമല്ല, ഗുരുതരമായ നിയമക്കുരുക്കിലേക്കും ബിസിസിഐയുടെ കടുത്ത നടപടികളിലേക്കും താരത്തെ നയിച്ചേക്കാം

എന്താണ് നിയമം പറയുന്നത്?

ഇന്ത്യയിൽ ഇ-സിഗരറ്റുകളുടെ ഉപയോഗവും വിപണനവും സംബന്ധിച്ച് വളരെ കർശനമായ നിയമങ്ങളാണുള്ളത്. 2019-ലെ 'പ്രൊഹിബിഷൻ ഓഫ് ഇലക്ട്രോണിക് സിഗരറ്റ്സ് ആക്ട്' (PECA) പ്രകാരം ഇന്ത്യയിൽ ഇ-സിഗരറ്റുകളുടെ ഉത്പാദനം, വിപണനം, ഇറക്കുമതി, പരസ്യം ചെയ്യൽ എന്നിവ പൂർണ്ണമായും നിരോധിച്ചിട്ടുണ്ട്. ഡ്രസ്സിംഗ് റൂമുകളിലും സ്റ്റേഡിയം പരിസരത്തും പുകവലി കർശനമായി നിരോധിച്ചിരിക്കെ, രാജ്യത്ത് നിരോധിക്കപ്പെട്ട ഒരു ഉപകരണം താരം ഉപയോഗിച്ചത് ബിസിസിഐയുടെ അഴിമതി വിരുദ്ധ വിഭാഗത്തിനും (ACU) ചട്ടങ്ങൾക്കും വിരുദ്ധമാണ്.

ബിഎൻഎസ് പ്രകാരമുള്ള പ്രത്യാഘാതങ്ങൾ

ഭാരതീയ ന്യായ സംഹിത (മുമ്പ് ഐപിസി) പ്രകാരം പൊതുസ്ഥലങ്ങളിലെ സുരക്ഷാ ചട്ടങ്ങൾ ലംഘിക്കുന്നതും നിരോധിച്ച വസ്തുക്കൾ കൈവശം വയ്ക്കുന്നതും കുറ്റകരമാണ്. ഇലക്ട്രോണിക് സിഗരറ്റ് നിരോധന നിയമം (PECA) പ്രകാരം ആദ്യമായി കുറ്റം ചെയ്യുന്നവർക്ക് ഒരു വർഷം വരെ തടവോ ഒരു ലക്ഷം രൂപ പിഴയോ അല്ലെങ്കിൽ രണ്ടും കൂടിയോ ലഭിക്കാം. പരാഗിന്റെ കാര്യത്തിൽ ബിസിസിഐ അന്വേഷണം പ്രഖ്യാപിച്ചാൽ കനത്ത പിഴയോ ഏതാനും മത്സരങ്ങളിൽ നിന്നുള്ള വിലക്കോ നേരിടേണ്ടി വന്നേക്കാം.

ബിസിസിഐയുടെ സാധ്യമായ നടപടി

നേരത്തെ രാജസ്ഥാൻ റോയൽസ് മാനേജർ റോമി ഭീന്ദർ ഡഗൗട്ടിൽ മൊബൈൽ ഫോൺ ഉപയോഗിച്ചതിന് ഒരു ലക്ഷം രൂപ പിഴയും ഔദ്യോഗിക മുന്നറിയിപ്പും നൽകിയിരുന്നു. ഇതിന് പിന്നാലെയാണ് പരാഗിന്റെ ഭാഗത്ത് നിന്നുള്ള ഈ ലംഘനം. ഐപിഎൽ പെരുമാറ്റച്ചട്ടങ്ങൾ പ്രകാരം താരത്തിന്റെ ഭാഗത്തുനിന്നുണ്ടായ ഈ പ്രവൃത്തി 'ലെവൽ 1' അല്ലെങ്കിൽ 'ലെവൽ 2' കുറ്റമായി കണക്കാക്കപ്പെടാം.

English Summary: Rajasthan Royals' victory over Punjab Kings was overshadowed by a viral video showing star batter Riyan Parag vaping in the dressing room. This incident has sparked a massive debate regarding IPL's disciplinary protocols and India's legal stance on e-cigarettes. Under the Prohibition of Electronic Cigarettes Act (PECA) 2019, vapes are banned in India, carrying penalties of imprisonment or heavy fines. Following a recent fine on RR manager Romi Bhinder for a mobile phone violation, Parag now faces potential BCCI sanctions, including heavy fines or a suspension, as smoking is strictly prohibited within stadium premises and dressing rooms.