കളിക്കളത്തിന് പുറത്തും രാജാവ്: യുവ ഫുട്ബോൾ മുതൽ കോടികളുടെ ബിസിനസ്സ് വരെ; മെസ്സിയുടെ പുതിയ ലോകം

അർജന്റീനയ്ക്ക് വേണ്ടിയുള്ള തന്റെ അവസാന മത്സരത്തിന് ഒരുങ്ങുകയാണ് ലയണൽ മെസ്സി. രാജ്യത്തിനായി ഏറ്റവും കൂടുതൽ മത്സരങ്ങൾ കളിച്ച, റെക്കോർഡ് ഗോൾ വേട്ടക്കാരനായ ഈ ഇതിഹാസത്തിന് ബ്യൂണസ് അയേഴ്സിലെ മൊണ്ടുമെന്റൽ സ്റ്റേഡിയത്തിൽ ബെനിനിനെതിരെ നടക്കുന്ന സൗഹൃദ മത്സരത്തോടെ വികാരനിർഭരമായ യാത്രയയപ്പാണ് ലഭിക്കുക.

അർജന്റീനയുടെ എക്കാലത്തെയും മികച്ച താരമെന്ന് നിസ്സംശയം വിശേഷിപ്പിക്കാവുന്ന മെസ്സിയുടെ വിരമിക്കൽ പ്രഖ്യാപനം 2021 ഓഗസ്റ്റ് 31-നായിരുന്നു. സ്പെയിനിനെതിരായ ലോകകപ്പ് ഫൈനലിലെ പരാജയത്തിന് ആറാഴ്ചയ്ക്ക് ശേഷമായിരുന്നു ഇത്. ദേശീയ ടീമിന് ഇനി കൂടുതലായി ഒന്നും നൽകാൻ തനിക്കില്ലെന്നായിരുന്നു അന്ന് മെസ്സി പറഞ്ഞത്.

കളി തുടരാൻ മെസ്സി ആ​ഗ്രഹിക്കുന്നുണ്ടെങ്കിൽ അതിന് ഇനിയും സാധിക്കുമെന്നും എടുത്ത തീരുമാനത്തിൽ മാറ്റം വരുത്തുന്നതിൽ യാതൊരു തെറ്റുമില്ലെന്നുമാണ് പരിശീലകൻ ലയണൽ സ്കലോണി പറയുന്നത്. എന്നാൽ മെസ്സിയെ സംബന്ധിച്ചിടത്തോളം ആ അധ്യായം ഇതിനകം അവസാനിച്ചുകഴിഞ്ഞു.

അതേസമയം, മെസ്സിയുടെ ക്ലബ്ബ് കരിയർ ഇപ്പോഴും തുടരുകയാണ്. ഇന്റർ മിയാമിയുമായുള്ള നിലവിലെ കരാർ 2028 സീസൺ അവസാനം വരെയാണെങ്കിലും അത് ഓരോ വർഷവും അവലോകനം ചെയ്യപ്പെടുന്നുണ്ട്. എങ്കിലും കരാർ കാലാവധി തീരുന്നതിന് മുൻപ് മെസ്സി ക്ലബ്ബ് വിടുമെന്ന് അദ്ദേഹവുമായി അടുപ്പമുള്ള ആരും കരുതുന്നില്ല. മാനസികമായും ശാരീരികമായും താൻ പൂർണ്ണസജ്ജനാണെന്ന് തോന്നിയാൽ ഈ കരാർ ഇനിയും പുതുക്കാനുള്ള സാധ്യതയും ഏറെയാണ്.

പരിശീലകനല്ല, ഇനി ക്ലബ്ബ് ഉടമ

അതേസമയം, കളിക്കളത്തിൽ നിന്ന് വിരമിച്ച ശേഷം പരിശീലകന്റെയോ സ്പോർട്ടിങ് ഡയറക്ടറുടെയോ കുപ്പായമണിയാൻ മെസ്സിക്ക് താൽപര്യമില്ല. ഓരോ ആഴ്ചയിലെയും മത്സരഫലങ്ങളെ ആശ്രയിച്ച് വിധി നിർണയിക്കപ്പെടുന്ന പരിശീലകനാകുന്നതിനേക്കാൾ ഒരു ക്ലബ്ബിന്റെ ദിശ നിർണയിക്കുന്ന ഉടമയാകാനാണ് തനിക്ക് താല്പര്യമെന്ന് മെസ്സി വ്യക്തമാക്കിയിട്ടുണ്ട്. എന്നാൽ പേരിനൊരു ഉടമയായി മാറിനിൽക്കാനല്ല, മറിച്ച് തീരുമാനങ്ങളെടുക്കുന്നതിലും ക്ലബ്ബിന്റെ എല്ലാ കാര്യങ്ങളിലും നേരിട്ട് ഇടപെടുന്ന സജീവമായ ഒരു പങ്കാളിത്തമാണ് അദ്ദേഹം ലക്ഷ്യമിടുന്നത്.

ഇതിന്റെ പ്രാഥമിക പ്രവർത്തനങ്ങൾ സ്പെയിനിൽ ഇതിനകം തന്നെ ആരംഭിച്ച് കഴിഞ്ഞു. യുവതാരങ്ങളെ വളർത്തിയെടുക്കുക എന്ന ലക്ഷ്യത്തോടെ ബാഴ്സലോണയുടെ പ്രാന്തപ്രദേശത്തുള്ള അഞ്ചാം ഡിവിഷൻ ക്ലബ്ബായ യുഇ കോർനെല്ല ഏപ്രിലിൽ മെസ്സി സ്വന്തമാക്കിയിരുന്നു. ഇതിനുപുറമെ, സ്പാനിഷ് സ്പോർട്സ് കൗൺസിലിന്റെ അനുമതിക്ക് വിധേയമായി രണ്ടാം ഡിവിഷൻ ക്ലബ്ബായ 'സിഡി എൽഡെൻസെ'യുടെ (CD Eldense) പുതിയ ഉടമയായി ഒക്ടോബർ ഒന്നിന് മെസ്സിയെ പ്രഖ്യാപിച്ചു. മെസ്സിയുടെ ഫുട്ബോൾ പദ്ധതികളുടെ പ്രധാന കേന്ദ്രം ഇനി എൽഡെൻസെ ആയിരിക്കും. ടീമിനെ താഴത്തെ ഡിവിഷനിലേക്ക് തരംതാഴ്ത്തപ്പെടാതിരിക്കുക എന്ന ലക്ഷ്യത്തോടെ മുൻ വിയ്യാറയൽ പരിശീലകൻ ജാവി കല്ലെജയെ ഇതിനകം ചുമതലയേൽപ്പിച്ചിട്ടുണ്ട്.

മെസ്സിയുടെ വരവോടെ ക്ലബ്ബിലേക്ക് സ്പോൺസർമാരുടെ ഒഴുക്കാണ്. മുൻ ഉടമകളുമായി സഹകരിക്കാതിരുന്നവരും മെസ്സിയുമായി അടുത്ത ബന്ധമുള്ളവരുമായ നിരവധി പേർ ചുരുങ്ങിയ ദിവസങ്ങൾക്കുള്ളിൽ തന്നെ ക്ലബ്ബുമായി കരാറിലെത്തി. സ്പെയിനിന് പുറമെ ഉറുഗ്വേയിലും മെസ്സി തന്റെ സാന്നിധ്യമറിയിച്ചിട്ടുണ്ട്. അടുത്ത സുഹൃത്ത് ലൂയിസ് സുവാരസിനൊപ്പം ചേർന്ന് 2025 മെയ് മാസത്തിൽ അദ്ദേഹം ആരംഭിച്ച 'ഡെപോർട്ടിവോ എൽഎസ്എം' എന്ന ക്ലബ്ബ് ആദ്യ സീസണിൽ തന്നെ രാജ്യത്തെ മൂന്നാം ഡിവിഷനിലേക്ക് സ്ഥാനക്കയറ്റം നേടി. കൂടുതൽ ക്ലബ്ബുകളെ ഉൾപ്പെടുത്തി വിപുലമായ ഒരു ശൃംഖല എന്ന ആശയം തുടക്കത്തിലുണ്ടായിരുന്നെങ്കിലും, ഭീമമായ സാമ്പത്തിക ബാധ്യത കണക്കിലെടുത്ത് ആ പദ്ധതി തൽക്കാലം ഉപേക്ഷിച്ചു. എൽഡെൻസെയെ ലാ ലിഗയിൽ എത്തിക്കുക എന്നതാണ് നിലവിലെ പ്രധാന ലക്ഷ്യം.

ഇന്റർ മിയാമിയുമായുള്ള നിലവിലെ കരാർ പ്രകാരം വിരമിക്കുമ്പോൾ ക്ലബ്ബിൽ മെസ്സിക്ക് ഓഹരികൾ ലഭിക്കും. എന്നാൽ സ്വന്തമായി മറ്റൊരു ഫ്രാഞ്ചൈസി തുടങ്ങാൻ അദ്ദേഹം ഉദ്ദേശിക്കുന്നില്ല.

ക്ലബ്ബ് ഉടമസ്ഥതയ്ക്കൊപ്പം തന്നെ യുവ ഫുട്ബോൾ താരങ്ങളെ വളർത്തിയെടുക്കുന്നതിലും മെസ്സി ശ്രദ്ധ ചെലുത്തുന്നുണ്ട്. 16 വയസ്സിന് താഴെയുള്ളവർക്കായി 2025-ൽ അദ്ദേഹം ആരംഭിച്ച 'മെസ്സി കപ്പ്' ഇതിന്റെ ഏറ്റവും വലിയ ഉദാഹരണമാണ്. എട്ട് ടീമുകളുമായി ആരംഭിച്ച ടൂർണമെന്റിൽ ഈ വർഷം അത്‌ലറ്റിക്കോ മാഡ്രിഡ്, ചെൽസി, ബാഴ്‌സലോണ, ഇന്റർ മിലാൻ എന്നിവരുൾപ്പെടെ 16 ടീമുകളാണുള്ളത്. ഒക്ടോബർ 25 മുതൽ ഫ്ലോറിഡയിലെ ഇന്റർ മിയാമി മൈതാനത്ത് നടക്കുന്ന ഈ ടൂർണമെന്റിനായി പണവും സമയവും അദ്ദേഹം മാറ്റിവെക്കുന്നുണ്ട്.

വളർന്നുവരുന്ന ബിസിനസ്സ് സാമ്രാജ്യം

കളിക്കളത്തിന് പുറത്ത് വിപുലമായൊരു ബിസിനസ്സ് സാമ്രാജ്യം കൂടി മെസ്സി കെട്ടിപ്പടുത്തിട്ടുണ്ട്. ജൂണിലെ ഫോർബ്സ് റിപ്പോർട്ട് പ്രകാരം ഏകദേശം 1.1 ബില്യൺ ഡോളറാണ് മെസ്സിയുടെ ആസ്തി. 2017ൽ അഡിഡാസുമായി ഒപ്പുവെച്ച ആജീവനാന്ത കരാറാണ് മെസ്സിയുടെ ഏറ്റവും വലിയ പരസ്യ വരുമാന സ്രോതസ്സ്. മെസ്സിയുടെയും 'മജസ്റ്റിക് ഹോട്ടൽ ഗ്രൂപ്പിന്റെയും' പങ്കാളിത്തത്തിൽ ഇബിസ മുതൽ ആൻഡോറ വരെ വ്യാപിച്ചുകിടക്കുന്ന ആറ് 'MiM' ബോട്ടീക്ക് ഹോട്ടലുകളാണ് മറ്റൊരു പ്രധാന സംരംഭം. റൊസാരിയോയിലെ 'കാരാസ്കോ എം' (Carrasco M) എന്ന പാർപ്പിട പദ്ധതി, കറ്റാലോണിയയിൽ ആരംഭിക്കുന്ന 'എൽ ക്ലബ്ബ് ഡി ലാ മിലാനേസ' എന്ന റെസ്റ്റോറന്റ് ശൃംഖല, പ്രമുഖ ബ്രാൻഡായ 'സ്റ്റാൻലി'യുമായി (Stanley) ചേർന്ന് പുറത്തിറക്കുന്ന 'മേറ്റ്' പാനീയ പാത്രങ്ങൾ തുടങ്ങി നിരവധി മേഖലകളിൽ അദ്ദേഹത്തിന് പങ്കാളിത്തമുണ്ട്.

കഴിഞ്ഞ ഓഗസ്റ്റിൽ അന്തരിച്ച പിതാവ് ഹോർഹെ മെസ്സിയായിരുന്നു ഈ ബിസിനസ്സ് സാമ്രാജ്യത്തിന് അടിത്തറയിട്ടത്. ബാഴ്‌സലോണയിലെ ആദ്യകാലം മുതൽ കൂടെയുള്ള വിശ്വസ്തരായ ഒരു സംഘമാണ് ഇപ്പോൾ ഈ കാര്യങ്ങൾ നിയന്ത്രിക്കുന്നത്. "ബിസിനസ്സ് എന്നെ ആകർഷിക്കുന്ന ഒരു മേഖലയാണ്, ഞാൻ ഇപ്പോൾ തുടങ്ങുന്നതേയുള്ളൂ," എന്നാണ് തന്റെ ബിസിനസ്സ് പദ്ധതികളെക്കുറിച്ച് മെസ്സി പ്രതികരിച്ചത്. കളിക്കളത്തിലെ ഇതിഹാസമായി പടിയിറങ്ങുമ്പോഴും, ബിസിനസ്സിലും ക്ലബ്ബ് മാനേജ്മെന്റിലും തന്റെതായ പുതിയൊരു സാമ്രാജ്യം കെട്ടിപ്പടുക്കുകയാണ് മെസ്സി.