സാങ്കേതിക ലോകത്ത് ഏറ്റവും വലിയ സ്വാധീനവുമായി മാറിയിരിക്കുകയാണ് എഐ. ആരോഗ്യരംഗം മുതൽ വിദ്യാഭ്യാസം, തൊഴിൽ, വ്യവസായ മേഖലകൾ വരെ എഐയുടെ സ്വാധീനം വേഗത്തിൽ വ്യാപിക്കുന്നുണ്ടെങ്കിലും, അതിനോടൊപ്പം തന്നെ ലോകമെമ്പാടും പുതിയ ആശങ്കകളും ഉയരുകയാണ്. സാങ്കേതിക പുരോഗതിയുടെ പ്രതീക്ഷകൾ ഒരു വശത്തും, തൊഴിൽ സുരക്ഷയും സ്വകാര്യതയും സംബന്ധിച്ച ഭയങ്ങൾ മറുവശത്തും നിലനിൽക്കുന്ന സാഹചര്യത്തിലാണ് സ്റ്റാൻഫോർഡ് സർവകലാശാലയുടെ പുതിയ വാർഷിക റിപ്പോർട്ട് ശ്രദ്ധേയമാകുന്നത്. അമേരിക്കയിൽ നടത്തിയ സർവേയുടെ അടിസ്ഥാനത്തിലാണ് ഈ കണ്ടെത്തലുകൾ പുറത്തുവന്നിരിക്കുന്നത്.
എഐയുടെ ഭാവിസാധ്യതകളെ വിദഗ്ധർ വലിയ പ്രതീക്ഷയോടെ കാണുമ്പോഴും പൊതുജനങ്ങൾക്കിടയിൽ കടുത്ത ആശങ്ക നിലനിൽക്കുന്നതായാണ് റിപ്പോർട്ട് വ്യക്തമാക്കുന്നത്. ആരോഗ്യരംഗത്ത് ആർട്ടിഫിഷ്യൽ ഇന്റലിജൻസ് വലിയ വിപ്ലവം സൃഷ്ടിക്കുമെന്ന് സാങ്കേതിക വിദഗ്ധർ ഉറച്ചു വിശ്വസിക്കുമ്പോൾ, സാധാരണക്കാർക്കിടയിൽ ഈ വിശ്വാസം താരതമ്യേന കുറവാണ്. തൊഴിൽ മേഖലയിൽ എഐ ഗുണപരമായ മാറ്റങ്ങൾ കൊണ്ടുവരുമെന്ന വിദഗ്ധരുടെ നിരീക്ഷണത്തോടും ഭൂരിഭാഗം ജനങ്ങളും വിയോജിക്കുന്നു. സമ്പദ്വ്യവസ്ഥയെ ശക്തിപ്പെടുത്താനുള്ള എഐയുടെ ശേഷിയെ വിദഗ്ധർ പ്രശംസിക്കുമ്പോഴും, അതിന്റെ ഗുണഫലങ്ങളെക്കുറിച്ച് സാധാരണക്കാർക്കിടയിൽ ഇന്നും വലിയ സംശയങ്ങൾ നിലനിൽക്കുന്നു.
സാങ്കേതിക വിദ്യയോട് അടുത്ത പരിചയം ഉള്ള യുവതലമുറ പോലും എഐയെ കൂടുതൽ ജാഗ്രതയോടെയാണ് സമീപിക്കുന്നതെന്ന് പഠനം സൂചിപ്പിക്കുന്നു. ദിവസേന എഐ ഉപകരണങ്ങൾ ഉപയോഗിക്കുന്നവരാണെങ്കിൽ പോലും, അത് തങ്ങളുടെ തൊഴിൽ സാധ്യതകളെയും സർഗ്ഗാത്മകതയെയും ബാധിക്കുമോ എന്ന ആശങ്ക യുവാക്കൾക്കിടയിൽ ശക്തമാണ്. ജോലിസ്ഥലത്തെ അനിശ്ചിതത്വവും തൊഴിൽ നഷ്ടമുണ്ടാകുമോ എന്ന ഭയവും ഇവരെ അലട്ടുന്നുണ്ട്. പഠനം പൂർത്തിയാക്കി തൊഴിൽ വിപണിയിലേക്ക് പ്രവേശിക്കാൻ തയ്യാറെടുക്കുന്ന ഒരു തലമുറയായതിനാൽ തന്നെ, എഐയുടെ അതിവേഗത്തിലുള്ള വളർച്ച തങ്ങളുടെ ഭാവിയെ എങ്ങനെ ബാധിക്കുമെന്ന നേരിട്ടുള്ള ഭയമാണ് ഈ ആശങ്കകൾക്ക് പിന്നിലുള്ളത്.
അടുത്ത 20 വർഷത്തിനുള്ളിൽ എഐ വ്യാപകമായി തൊഴിൽ നഷ്ടത്തിന് കാരണമാകുമെന്ന് വലിയൊരു വിഭാഗം അമേരിക്കക്കാർ വിശ്വസിക്കുന്നുവെന്നതും റിപ്പോർട്ടിലെ പ്രധാന നിരീക്ഷണമാണ്. സാങ്കേതിക സാധ്യതകളേക്കാൾ ദൈനംദിന ജീവിതത്തിലെ സുരക്ഷ, വരുമാന സ്ഥിരത, ജീവിതച്ചെലവിന്റെ വർധന, സ്വകാര്യതാ പ്രശ്നങ്ങൾ എന്നിവയാണ് പൊതുജനങ്ങളെ കൂടുതൽ ആശങ്കപ്പെടുത്തുന്നത്. കൂടാതെ എഐയെ നിയന്ത്രിക്കാൻ സർക്കാരിന് കഴിയുമോ എന്നതിൽ പോലും സംശയം പ്രകടിപ്പിക്കുന്നവരുടെ എണ്ണം കൂടുതലാണെന്നും പഠനം വ്യക്തമാക്കുന്നു.
എഐയുടെ ഭാവിയെക്കുറിച്ച് വിദഗ്ധരും പൊതുജനങ്ങളും കാണുന്ന കാഴ്ചപ്പാടുകൾ തമ്മിൽ വ്യക്തമായ വ്യത്യാസം നിലനിൽക്കുന്നതായി റിപ്പോർട്ട് ചൂണ്ടിക്കാട്ടുന്നു. സാങ്കേതിക സാധ്യതകളെക്കുറിച്ചുള്ള പ്രതീക്ഷയും സാമൂഹിക–സാമ്പത്തിക സുരക്ഷയെക്കുറിച്ചുള്ള ആശങ്കയും തമ്മിലുള്ള ഈ വ്യത്യാസമാണ് ഇന്നത്തെ എഐ ചർച്ചകളിലെ പ്രധാന പ്രത്യേകതയായി മാറുന്നത്.
English Summary: A Stanford report reveals a growing gap between experts and the public on AI. While experts are optimistic about AI’s benefits in healthcare, jobs, and the economy, the public remains concerned about job loss, privacy, and economic security