ഇന്ത്യന് പൊതുജനാരോഗ്യ രംഗത്തെയും ഭരണസംവിധാനങ്ങളെയും ഒരുപോലെ പിടിച്ചുലയ്ക്കുന്ന പ്രതിസന്ധിയിലേക്കാണ് ഏറ്റവും പുതിയ ദേശീയ കുടുംബാരോഗ്യ സര്വേ റിപ്പോര്ട്ട് വിരല് ചൂണ്ടിയിരിക്കുന്നത്. നരേന്ദ്ര മോദി സര്ക്കാരിന്റെ ഏറ്റവും വലിയ രണ്ട് ജനപ്രിയ പദ്ധതികളായ 'പ്രധാനമന്ത്രി ഉജ്ജ്വല യോജന', 'സ്വച്ഛ് ഭാരത് മിഷന്' എന്നിവയുടെ പരാജയം മറച്ചുവെക്കാന് കേന്ദ്ര ആരോഗ്യ മന്ത്രാലയം ബോധപൂര്വം ഡേറ്റ ഒളിപ്പിക്കുകയും തിരുത്തലുകള് വരുത്തുകയും ചെയ്തുവെന്ന ഞെട്ടിക്കുന്ന വിവരങ്ങളാണ് പുറത്തുവന്നിരിക്കുന്നത്. ആരോഗ്യ സര്വേയായ എന്.എഫ്.എച്ച്.എസ്-6 ന്റെ ഫാക്റ്റ്ഷീറ്റുകള് മെയ് 29-ന് പുറത്തുവിട്ടപ്പോള്, കേന്ദ്ര സര്ക്കാരിന്റെ പരാജയം തുറന്നുകാട്ടുന്ന നിര്ണായക സൂചകങ്ങള് പൂര്ണമായും നീക്കം ചെയ്യപ്പെട്ടതാണ് വിവാദത്തിനാധാരം.
ഏതാണ് ആ പദ്ധതികള്?
ദാരിദ്ര്യരേഖയ്ക്ക് താഴെയുള്ള കോടിക്കണക്കിന് സ്ത്രീകള്ക്ക് സിലിണ്ടറുകള് നല്കി പുകയില്ലാത്ത അടുക്കളകള് സമ്മാനിക്കുമെന്ന പരസ്യപ്രചാരണത്തോടെയാണ് 'പ്രധാനമന്ത്രി ഉജ്ജ്വല യോജന' കേന്ദ്ര സര്ക്കാര് കൊണ്ടാടിയത്. എന്നാല് ഇന്റര്നാഷണല് ഇന്സ്റ്റിറ്റ്യൂട്ട് ഫോര് പോപ്പുലേഷന് സയന്സസ് മുന് വര്ഷം പുറത്തുവിട്ട അഞ്ചാമത് സര്വേയില് (NFHS-5) 40 ശതമാനത്തിലധികം കുടുംബങ്ങള്ക്കും ശുദ്ധമായ പാചക ഇന്ധനം ലഭ്യമല്ലെന്ന ഔദ്യോഗിക കണക്ക് പുറത്തുവന്നിരുന്നു. സിലിണ്ടര് ആദ്യ തവണ സൗജന്യമായി നല്കിയെങ്കിലും പിന്നീട് വിലക്കയറ്റം കാരണം സാധാരണക്കാര്ക്ക് ഇത് റീഫില് ചെയ്യാന് കഴിഞ്ഞില്ലെന്ന യാഥാര്ത്ഥ്യമാണ് സര്വേ തുറന്നുകാട്ടിയത്. ഈ പരാജയം മറയ്ക്കാനായി പുതിയ ആറാമത് സര്വേയില് 'ശുദ്ധമായ പാചക ഇന്ധന ലഭ്യത' (Access to Clean Cooking Fuel) എന്ന അളവുകോല് തന്നെ കേന്ദ്ര സര്ക്കാര് പൂര്ണമായി വെട്ടിമാറ്റി.
സമാനമായ രീതിയില്, ഇന്ത്യയെ പൂര്ണമായും വെളിയിട വിസര്ജന മുക്ത രാജ്യമാക്കി (Open-Defecation Free) മാറ്റിയെന്ന അവകാശവാദവുമായി കോടികള് ഒഴുക്കി പരസ്യം ചെയ്ത പദ്ധതിയാണ് 'സ്വച്ഛ് ഭാരത് മിഷന്'. എന്നാല് കേന്ദ്ര സര്ക്കാരിന്റെ ഈ അവകാശവാദം വെറും പൊള്ളയാണെന്നും യാഥാര്ത്ഥ്യത്തില് ഇന്ത്യ ലക്ഷ്യത്തിന് അരികില് പോലും എത്തിയിട്ടില്ലെന്നും എന്.എഫ്.എച്ച്.എസ്-5 കണക്കുകള് സഹിതം തെളിയിച്ചു. കോടിക്കണക്കിന് രൂപ ചെലവഴിച്ച് നിര്മിച്ച കക്കൂസുകളില് പലതും ഉപയോഗശൂന്യമായി കിടക്കുകയാണെന്ന യാഥാര്ത്ഥ്യം പുറത്തുവന്നത് സര്ക്കാരിനെ അന്താരാഷ്ട്ര തലത്തില് തന്നെ പ്രതിരോധത്തിലാക്കി ഈ നാണക്കേടില്നിന്ന് രക്ഷപ്പെടാന് പുതിയ സര്വേയില് ശൗചാലയ ഉപയോഗത്തെക്കുറിച്ചുള്ള സൂചികകളും കേന്ദ്രം ബോധപൂര്വം ഒഴിവാക്കി.
രാഷ്ട്രീയ പ്രതികാരവും ആസൂത്രിത നീക്കങ്ങളും?
ഈ ഡേറ്റാ ഒളിപ്പിക്കലിന് പിന്നില് കടുത്ത രാഷ്ട്രീയ പ്രതികാരവും ആസൂത്രിത നീക്കങ്ങളും നടന്നിട്ടുണ്ടെന്നതിന്റെ ഏറ്റവും വലിയ തെളിവാണ് ഐ.ഐ.പി.എസ് മുന് ഡയറക്ടര് കെ.എസ്. ജെയിംസിന്റെ പുറത്താക്കല്. മോദി സര്ക്കാരിന്റെ പദ്ധതികളുടെ പരാജയം വെളിപ്പെടുത്തുന്ന അഞ്ചാമത് സര്വേ റിപ്പോര്ട്ട് പുറത്തുവിട്ടതിനു തൊട്ടുപിന്നാലെയാണ് സ്വതന്ത്രമായി പ്രവര്ത്തിച്ചിരുന്ന സ്ഥാപനത്തിന്റെ തലവനായ പ്രൊഫസര് കെ.എസ്. ജെയിംസിന് അദ്ദേഹത്തിന്റെ കസേര നഷ്ടമായത്. ഔദ്യോഗിക ഡേറ്റ സര്ക്കാരിന്റെ പ്രചാരണങ്ങള്ക്ക് വിരുദ്ധമായാല് ഉദ്യോഗസ്ഥരെ വേട്ടയാടുമെന്ന ഭയപ്പെടുത്തുന്ന സന്ദേശമാണ് കേന്ദ്രം ഇതിലൂടെ നല്കിയത്. ഇതിന്റെ തുടര്ച്ചയായാണ് ഇപ്പോഴത്തെ എന്.എഫ്.എച്ച്.എസ്-6 ല് സര്ക്കാരിനെ പ്രതിക്കൂട്ടിലാക്കുന്ന എല്ലാ ഡേറ്റ മുന്കൂട്ടിത്തന്നെ വെട്ടിമാറ്റപ്പെട്ടിരിക്കുന്നത്.
എന്.എഫ്.എച്ച്.എസ് സര്വേകളുടെ ഏറ്റവും വലിയ പ്രത്യേകത അത് രാജ്യത്തെ ഓരോ ജില്ലയിലെയും കൃത്യമായ താഴേത്തട്ടിലുള്ള (District-wise data) സാമൂഹിക-സാമ്പത്തിക വിവരങ്ങള് നല്കുന്നുവെന്നതാണ്. മറ്റ് സര്ക്കാര് സര്വേകള്ക്കൊന്നും ഇല്ലാത്ത ഈ സവിശേഷതയാണ് നയരൂപീകരണത്തിന് വിദഗ്ധര് ഉപയോഗിക്കുന്നത്. ഇത്തരം സുപ്രധാന ഡേറ്റ ഒളിപ്പിക്കുന്നത് വഴി പ്രാദേശിക തലത്തില് ദരിദ്ര ജനവിഭാഗങ്ങള്ക്ക് ലഭിക്കേണ്ട ആനുകൂല്യങ്ങളും കൃത്യമായ നയരൂപീകരണവുമാണ് കേന്ദ്ര സര്ക്കാര് അട്ടിമറിക്കുന്നതെന്നാണ് പേര് വെളിപ്പെടുത്താന് ആഗ്രഹിക്കാത്ത ഐ.ഐ.പി.എസിലെ മുന് ഫാക്കല്റ്റി അംഗങ്ങള് വ്യക്തമാക്കുന്നത്. പദ്ധതികളുടെ പരാജയം വിലയിരുത്തി തിരുത്തലുകള് വരുത്തുന്നതിന് പകരം, ചോദ്യം ചോദിക്കുന്ന സൂചകങ്ങളെയും ഡേറ്റകളെയും തന്നെ ഇല്ലാതാക്കുന്ന ഈ പ്രവണത ജനാധിപത്യ ഇന്ത്യയ്ക്ക് അതീവ ഗുരുതരമായ ഭീഷണിയാണ് ഉയര്ത്തുന്നത്.
English Summary: A major controversy has emerged over the release of the National Family Health Survey (NFHS-6) factsheets, with allegations that India's Union Health Ministry deliberately removed or altered key health indicators that could expose the shortcomings of flagship government schemes. Critics claim that crucial data related to the Pradhan Mantri Ujjwala Yojana (PMUY) and Swachh Bharat Mission (SBM) were omitted from the survey findings released on May 29. The missing indicators reportedly relate to household cooking fuel usage, sanitation, and other public health measures, raising concerns about transparency, data integrity, and accountability in India's public health system.
