ഡല്ഹിയില് കോക്രോച്ച് ജനതാ പാര്ട്ടി (സി ജെ പി) നടത്തിയ 'ചലോ സന്സദ്' മാര്ച്ചിന് നേരെ ഡല്ഹി പൊലീസ് നടത്തിയ കിരാതമായ ലാത്തിച്ചാര്ജും അതിക്രമങ്ങളും രാജ്യവ്യാപകമായി വലിയ രാഷ്ട്രീയ ചര്ച്ചകള്ക്കു വഴിവച്ചിരിക്കുകയാണ്. നീറ്റ് പരീക്ഷാ നടത്തിപ്പിലെ ഗുരുതരമായ വീഴ്ചകള്ക്കെതിരെ തെരുവിലിറങ്ങിയ വിദ്യാര്ത്ഥികള്ക്കുനേരെ ഭരണകൂടം നടത്തിയ മര്ദ്ദനങ്ങള് ഭരണകക്ഷിയായ ബി ജെ പിക്കുള്ളിലും വലിയ അസ്വസ്ഥതകള് സൃഷ്ടിച്ചിരിക്കുന്നു. പൊതുജനങ്ങളുടെ സഹതാപം ഇപ്പോള് പൂര്ണമായും പ്രതിഷേധിക്കുന്ന യുവതീയുവാക്കള്ക്കൊപ്പമാണെന്ന തിരിച്ചറിവ് പാര്ട്ടി പ്രവര്ത്തകരിലും താഴെത്തട്ടിലുള്ള നേതാക്കളിലും കടുത്ത ആശങ്കയാണുണ്ടാക്കിയിരിക്കുന്നത്.
ഡല്ഹിയിലെ സമരമുഖത്ത് സമാധാനപരമായി പ്രതിഷേധിച്ച വിദ്യാര്ത്ഥികള്ക്കുനേരെ പൊലീസ് അമിതമായ ബലപ്രയോഗം നടത്തിയതിനെതിരെ പാര്ട്ടിക്കുള്ളില്നിന്നു വിമര്ശനങ്ങള് ഉയര്ന്നുതുടങ്ങിയിട്ടുണ്ട്. മധ്യപ്രദേശ്, ഹരിയാന, അരുണാചല് പ്രദേശ് തുടങ്ങിയ സംസ്ഥാനങ്ങളില് നിന്നുള്ള ബി ജെ പി പ്രവര്ത്തകര് കേന്ദ്ര നേതൃത്വത്തിന്റെ ഈ വിഷയത്തിലെ കൈയബദ്ധങ്ങളെ പരസ്യമായി ചോദ്യം ചെയ്യുന്നുണ്ട്. നീറ്റ് പരീക്ഷാ വിവാദവും സോനം വാങ്ചുകിന്റെ നേതൃത്വത്തിലുള്ള സമരങ്ങളും തുടക്കത്തില് തന്നെ പരിഹരിക്കുന്നതില് കേന്ദ്ര നേതൃത്വത്തിന് ഗുരുതരമായ വീഴ്ച സംഭവിച്ചുവെന്നു വിവിധ സംസ്ഥാനങ്ങളിലെ പാര്ട്ടി പ്രവര്ത്തകര് കരുതുന്നു. ചെറിയ രീതിയില് തുടങ്ങിയ പ്രതിഷേധങ്ങളെ അവഗണിച്ചതാണ് ഡല്ഹിയില് വലിയ പ്രക്ഷോഭമായി മാറാന് കാരണമെന്ന് അവര് ചൂണ്ടിക്കാണിക്കുന്നു.
സമാധാനപരമായി പ്രതിഷേധിച്ച വിദ്യാര്ത്ഥികള്ക്കുനേരെ ഡല്ഹി പൊലീസ് ലാത്തിച്ചാര്ജും കണ്ണീര്വാതക പ്രയോഗവും നടത്തിയത് തികച്ചും അനുചിതമായിപ്പോയെന്ന് പാര്ട്ടിയിലെ താഴെത്തട്ടിലുള്ള പ്രവര്ത്തകര് തുറന്നുകാട്ടുന്നു. 'ഇത് നമ്മുടെ സ്വന്തം കുട്ടികളാണ്, അവരോട് ഇങ്ങനെ പെരുമാറാന് പാടില്ലായിരുന്നു' എന്ന പൊതുവികാരം ബി.ജെ.പി അണികള്ക്കിടയിലും ശക്തമാണ്.
പ്രതിഷേധങ്ങളെ അടിച്ചമര്ത്തുന്നതിനുപകരം തുടക്കത്തില് തന്നെ വിദ്യാര്ത്ഥികളുമായി തുറന്ന ചര്ച്ചയ്ക്കു സര്ക്കാര് തയ്യാറാകണമായിരുന്നുവെന്ന് പാര്ട്ടിയിലെ ഒരു വിഭാഗം നേതാക്കള് അഭിപ്രായപ്പെടുന്നു. ജെ പി നഡ്ഡ പോലുള്ളവര് ചില ചര്ച്ചകള് നടത്തിയെങ്കിലും, താഴെത്തട്ടില് പാര്ട്ടിക്കുള്ളിലെ വിശ്വാസ്യത നഷ്ടപ്പെടുന്നുണ്ടെന്നാണു പാര്ട്ടി പ്രവര്ത്തകരുടെ വികാരം. പൊലീസ് നടപടിയെ ന്യായീകരിക്കാന് സോഷ്യല് മീഡിയയില് ഉള്പ്പെടെ കഷ്ടപ്പെടേണ്ടി വരുന്ന അവസ്ഥയാണ് അണികള്ക്കുള്ളത്. പ്രക്ഷോഭകാരികളെ കല്ലെറിയുന്നവരായി ചിത്രീകരിക്കാന് ശ്രമിക്കുമ്പോഴും പൊതുജനം ഈ വിഷയത്തില് സര്ക്കാരിനൊപ്പമല്ലെന്ന യാഥാര്ത്ഥ്യം ബി ജെ പി പ്രവര്ത്തകരെ ആശങ്കപ്പെടുത്തുന്നുണ്ട്.
അതേസമയം, ഈ പ്രക്ഷോഭങ്ങള് രാഷ്ട്രീയമായി ഹൈജാക്ക് ചെയ്യപ്പെട്ടുവെന്ന വാദവും ഒരു വിഭാഗം ബി ജെ പി നേതാക്കള് ഉയര്ത്തുന്നുണ്ട്. സമരത്തിന്റെ മറവില് സര്ക്കാരിനെതിരെ ഉയര്ന്ന അതിക്രമ സ്വഭാവമുള്ള മുദ്രാവാക്യങ്ങളും ചില കോണുകളില്നിന്നുണ്ടായ പ്രകോപനങ്ങളും ചൂണ്ടിക്കാണിച്ചാണ് ഇവര് പൊലീസ് നടപടിയെ ന്യായീകരിക്കുന്നത്. എങ്കിലും, വരാനിരിക്കുന്ന തിരഞ്ഞെടുപ്പുകളെ ഇത് ബാധിക്കുമോയെന്ന ഭയം പാര്ട്ടിക്കുള്ളില് ശക്തമാണ്. മുന്കാലങ്ങളില്നിന്ന് വ്യത്യസ്തമായി പ്രതിപക്ഷം ഈ വിഷയത്തില് ഒറ്റക്കെട്ടല്ലെങ്കിലും യുവജനങ്ങളുടെ രോഷം വോട്ടായി മാറുമോയെന്ന ആശങ്കയിലാണ് ബി ജെ പി നേതൃത്വം.
The Delhi Police's forceful lathi charge and crackdown on the 'Chalo Sansad' march organised by the Cockroach Janata Party (CJP) in Delhi have triggered widespread political debate across the country. The march was held to protest serious irregularities in the conduct of the NEET examination.
The police action against students who took to the streets over the alleged failures in the NEET examination process has also caused unease within the ruling BJP. Party workers and grassroots leaders are reportedly increasingly concerned that public sympathy has now shifted overwhelmingly in favour of the protesting youth.