എംബിബിഎസ് പ്രവേശനത്തിനുശേഷമുള്ള ഓരോ സെമസ്റ്ററും രക്ഷിതാക്കള്ക്കു വലിയൊരു സാമ്പത്തിക പേടിസ്വപ്നമാണ്. വര്ഷങ്ങളായി തുടരുന്ന ഈ സാമ്പത്തിക ബാധ്യതയ്ക്ക് അറുതി വരുത്താന്, മെഡിക്കല് വിദ്യാഭ്യാസ മേഖലയിലെ ഫീസ് ഘടനയില് മാറ്റം വരുത്താന് സര്ക്കാര് നിര്ദ്ദേശം നല്കിയിരിക്കുന്നു. ഇനി മുതല് എംബിബിഎസ് വിദ്യാര്ത്ഥികളില്നിന്ന് നാലര വര്ഷത്തെ ട്യൂഷന് ഫീസ് മാത്രമേ ഈടാക്കാവൂയെന്നാണു നാഷണല് മെഡിക്കല് കമ്മിഷന്റെ നിര്ദ്ദേശം. മെഡിക്കല് വിദ്യാഭ്യാസ മേഖലയിലെ അമിതമായ സാമ്പത്തിക ചൂഷണങ്ങള്ക്ക് ഇത് അറുതി വരുത്തുമെന്നാണ് പ്രതീക്ഷിക്കപ്പെടുന്നത്. എന്നാല്, ഈ നിര്ദ്ദേശം മെഡിക്കല് വിദ്യാര്ത്ഥികളുടെ കണ്ണീരൊപ്പുമോ അതോ കഴിഞ്ഞകാലങ്ങളിലെ അനുഭവങ്ങള് പോലെ നിയമപോരാട്ടങ്ങളുടെ പേരില് വെറും പ്രഹസനമായി മാറുമോ എന്ന ആശങ്ക ബാക്കിയാണ്.
നിയമപ്രകാരം ലാഭമുണ്ടാക്കാന് ഇവര്ക്ക് അനുവാദമില്ലെങ്കിലും, 'ന്യായമായ മിച്ചം' (Reasonable Surplus) എന്ന പേരില് ഇവര് വന്തോതില് പണം സമാഹരിക്കുന്നു.
മെഡിക്കല് ഫീസ് റെഗുലേറ്ററി കമ്മിറ്റിയുടെ അംഗീകാരത്തോടെയുള്ള ഫീസ് ഘടനയില് മാറ്റം വരുത്താന് സര്ക്കാര് ഒരുങ്ങുമ്പോള്, അത് സ്വാശ്രയ മെഡിക്കല് കോളേജ് മാനേജ്മെന്റുകള് എത്രത്തോളം ഗൗരവത്തോടെ നടപ്പിലാക്കുമെന്നതാണു പ്രധാന വെല്ലുവിളി. നേരത്തെ ഇത്തരത്തില് വന്ന എന്എംസി നിര്ദ്ദേശങ്ങള്ക്കെതിരെ മാനേജ്മെന്റുകള് ഹൈക്കോടതിയെ സമീപിക്കുകയും സ്റ്റേ വാങ്ങുകയും ചെയ്ത ചരിത്രം കേരളത്തിനുണ്ട്. ഇത്തവണയും നിയമപരമായ തടസ്സങ്ങള് ഉണ്ടായാല് ഈ നീക്കം കടലാസില് ഒതുങ്ങുമോയന്ന ഭയം വിദ്യാര്ത്ഥികള്ക്കും രക്ഷിതാക്കള്ക്കമുണ്ട്.
നിലവില് കേരളത്തിലെ സ്വാശ്രയ കോളേജുകളില് ഒരു എംബിബിഎസ് സീറ്റ് എന്നത് സാധാരണക്കാര്ക്ക് അപ്രാപ്യമാണ്. മാനേജ്മെന്റ് ക്വാട്ടയില് പഠിക്കുന്ന ഒരു വിദ്യാര്ത്ഥി വര്ഷം ശരാശരി 15 ലക്ഷം മുതല് 25 ലക്ഷം രൂപ വരെ ഫീസായി നല്കേണ്ടി വരുന്നു (കോളേജുകള്ക്കനുസരിച്ച് ഈ തുകയില് വ്യത്യാസങ്ങള് വരാം). നാലര വര്ഷത്തെ പഠനകാലയളവില് മാത്രം ഏകദേശം 75 ലക്ഷം മുതല് 1.25 കോടി രൂപ വരെയാണ് ചെലവ്. എന്ആര്ഐ ക്വാട്ടയിലാണെങ്കില് ഈ തുക 1.6 കോടി രൂപ വരെ ഉയര്ന്നേക്കാം. ഇത്തരം ഭീമമായ തുക ഈടാക്കുന്ന കോളേജുകള്ക്ക്, അക്കാദമിക് പഠനത്തിനുശേഷമുള്ള ഒരു വര്ഷത്തെ നിര്ബന്ധിത ഇന്റേണ്ഷിപ്പ് കാലയളവിനു കൂടി ഫീസ് ഈടാക്കുന്നത് വരുമാനത്തിന്റെ വലിയൊരു ഭാഗമാണ്.
നിയമപരമായി ഭൂരിഭാഗം സ്വകാര്യ മെഡിക്കല് കോളേജുകളും പ്രവര്ത്തിക്കുന്നതു ചാരിറ്റബിള് ട്രസ്റ്റ് അല്ലെങ്കില് സൊസൈറ്റിയെന്ന പേരിലാണ്. നിയമപ്രകാരം ലാഭമുണ്ടാക്കാന് ഇവര്ക്ക് അനുവാദമില്ലെങ്കിലും, 'ന്യായമായ മിച്ചം' (Reasonable Surplus) എന്ന പേരില് ഇവര് വന്തോതില് പണം സമാഹരിക്കുന്നു. അടിസ്ഥാന സൗകര്യ വികസനത്തിന്റെ പേരില് ഈ 'മിച്ചം' ഉപയോഗിക്കാമെന്ന നിയമത്തിലെ പഴുതാണു മാനേജ്മെന്റുകള് ഉപയോഗപ്പെടുത്തുന്നത്. ഈ പഴുതുകള് ഉപയോഗിച്ച് ബിസിനസ് നടത്തുന്ന കോളേജുകളുടെ വരുമാന മാര്ജിനിലാണു നാലര വര്ഷത്തെ ഫീസ് മാത്രമാക്കണമെന്ന നിര്ദ്ദേശം നേരിട്ടേല്പ്പിക്കുന്നത്. ആറു മാസത്തെ അധിക ഫീസ് ഒഴിവാക്കുന്നതു മാനേജ്മെന്റുകളുടെ സാമ്പത്തിക കണക്കുകൂട്ടലുകളെ താളം തെറ്റിക്കുമെന്നതുകൊണ്ടാണ് അവര് നിയമയുദ്ധത്തിന് തയ്യാറെടുക്കുന്നത്.
ഏറ്റവും പ്രധാനപ്പെട്ട മറ്റൊരു ചോദ്യം നിലവില് അഞ്ച് വര്ഷത്തെ ഫീസ് അടച്ചുകഴിഞ്ഞ വിദ്യാര്ത്ഥികളുടെ അവസ്ഥയെക്കുറിച്ചാണ്. അധികമായി ഈടാക്കിയ ഫീസ് തിരികെ നല്കാന് എന്എംസി നിര്ദ്ദേശിച്ചിട്ടുണ്ടെങ്കിലും ഇക്കാര്യത്തില് കൃത്യമായ ഒരു 'റീഫണ്ട് മെക്കാനിസം' സര്ക്കാര് ഇതുവരെ വ്യക്തമാക്കിയിട്ടില്ല. മാനേജ്മെന്റുകള് പലപ്പോഴും ഇത്തരം ഉത്തരവുകളെ സാങ്കേതിക കാരണങ്ങള് പറഞ്ഞ് നീട്ടിക്കൊണ്ടുപോകാന് സാധ്യതയുണ്ട്. ഇതിനകം അടച്ച ലക്ഷക്കണക്കിനു രൂപ തിരികെ പിടിക്കാന് ഓരോ വിദ്യാര്ത്ഥിയും സ്വന്തം നിലയ്ക്കു നിയമനടപടികളിലേക്കു നീങ്ങേണ്ടിവന്നാല് അതു വീണ്ടും വലിയൊരു സാമ്പത്തിക ബാധ്യതയായി മാറും. അതിനാല്, ഈ തുക തിരികെ ലഭിക്കുന്നുണ്ടെന്ന് ഉറപ്പാക്കാന് സര്ക്കാര് സംവിധാനങ്ങള് തന്നെ നേരിട്ടു മുന്കൈ എടുക്കേണ്ടതുണ്ട്.
ട്യൂഷന് ഫീസ് നാലര വര്ഷത്തേക്കു മാത്രമാക്കിയതു സ്വാഗതാര്ഹമാണെങ്കിലും കേരളത്തിലെ സ്വാശ്രയ മെഡിക്കല് കോളേജുകളിലെ മൊത്തം ട്യൂഷന് ഫീസ് തന്നെ വളരെ ഉയര്ന്നതാണ്. നാലര വര്ഷത്തെ ഫീസ് കുറച്ചതുകൊണ്ടു മാത്രം മാനേജ്മെന്റ്, എന്ആര്ഐ ക്വാട്ടകളില് പഠിക്കുന്ന സാധാരണ വിദ്യാര്ത്ഥികളുടെ സാമ്പത്തിക ഭാരം പൂര്ണമായും ഇല്ലാതാകുന്നില്ല. കോടിക്കണക്കിനു രൂപ മുടക്കി പഠിക്കേണ്ടി വരുന്ന മെഡിക്കല് വിദ്യാഭ്യാസം സാധാരണക്കാര്ക്ക് ഇന്നും ഒരു സ്വപ്നമായി തുടരുന്നു. വിദ്യാഭ്യാസത്തിന്റെ ഗുണനിലവാരം ഉറപ്പാക്കുന്നതിനൊപ്പം തന്നെ, ഫീസ് ഘടനയിലെ ഈ അമിത വര്ദ്ധനവ് നിയന്ത്രിക്കാന് സര്ക്കാര് ഫലപ്രദമായ ഇടപെടലുകള് നടത്തണം.
ഈ പുതിയ നീക്കം ഒരു തുടക്കം മാത്രമാണ്. മെഡിക്കല് കോളേജുകളുടെ പ്രവര്ത്തനങ്ങളില് കൂടുതല് സുതാര്യത കൊണ്ടുവരാനും ഏകീകൃതമായ ഫീസ് ഘടന നടപ്പാക്കാനും സര്ക്കാര് തയ്യാറാകണം. നിര്ദ്ദേശങ്ങളിലൊതുങ്ങാതെ, നിയമലംഘനം നടത്തുന്ന കോളേജുകള്ക്കെതിരെ ശക്തമായ നടപടി സ്വീകരിക്കാന് സര്ക്കാര് മടിക്കരുത്. വിദ്യാര്ത്ഥികളെ ചൂഷണം ചെയ്യുന്ന മാനേജ്മെന്റുകളെ നിയന്ത്രിക്കാനും പഠനത്തിനുള്ള ചെലവ് ന്യായമായ രീതിയില് നിലനിര്ത്താനും സര്ക്കാര് നിരന്തരമായ ഇടപെടലുകള് നടത്തിയില്ലെങ്കില് ഈ ഉത്തരവ് പ്രഖ്യാപനങ്ങളില് മാത്രം ഒതുങ്ങിപ്പോകും. നീതിക്കുവേണ്ടിയുള്ള കാത്തിരിപ്പിന് അറുതി വരുത്തേണ്ടതു സര്ക്കാരിന്റെ ഉത്തരവാദിത്തമാണ്. നിയമങ്ങള് കടലാസില് ഒതുങ്ങുമ്പോള് തോല്ക്കുന്നതു സ്വപ്നങ്ങളുമായി പഠനത്തിനിറങ്ങിയ ആയിരക്കണക്കിനു വിദ്യാര്ത്ഥികളാണ്. ആ പണം വിദ്യാര്ത്ഥികളിലേക്കു തന്നെ മടങ്ങിയെത്തുമെന്ന് ഉറപ്പാക്കുന്ന വ്യക്തമായ ഒരു കര്മപദ്ധതിയാണ് ഇനി അടിയന്തരമായി ആവശ്യം.
The National Medical Commission (NMC) has proposed a major reform in the fee structure of MBBS courses, directing medical colleges to collect tuition fees only for the 4.5 years of academic study. The move is aimed at reducing the long-standing financial burden on students and parents, who often face steep and prolonged fee demands throughout medical education. The proposal is being seen as a significant step toward curbing excessive commercialization in the medical education sector. However, questions remain over how effectively the directive will be implemented and whether legal challenges or institutional resistance could dilute its intended benefits.
