14 വർഷത്തെ നീണ്ട ഇടവേളയ്ക്ക് ശേഷം ഫെരാരി തങ്ങളുടെ കാറുകളിൽ മാനുവൽ ട്രാൻസ്മിഷൻ ഔദ്യോഗികമായി തിരികെ കൊണ്ടുവന്നു. ലിമിറ്റഡ് എഡിഷനായി പുറത്തിറക്കുന്ന '12Cilindri Manuale' മോഡലിലൂടെയാണ് ഈ കിടിലൻ തിരിച്ചുവരവ്. ഇറ്റാലിയൻ വാഹന നിർമ്മാതാക്കളായ ഫെരാരി അവസാനമായി പുറത്തിറക്കിയ മാനുവൽ ഗിയർ മോഡൽ കാലിഫോർണിയ റോഡ്സ്റ്റർ (California roadster) ആയിരുന്നു. വി 12 (V12) എഞ്ചിൻ ആരാധകർക്ക് യഥാർത്ഥ ഡ്രൈവിംഗ് അനുഭവം നൽകാൻ ലക്ഷ്യമിട്ടാണ് പുതിയ 12Cilindri മാനുവൽ അവതരിപ്പിച്ചിരിക്കുന്നത്.
പുതിയ 12Cilindri Manuale എന്ന മോഡലിലൂടെ ഫെരാരി തങ്ങളുടെ കാറുകളിൽ മാനുവൽ ഗിയർ സംവിധാനം തിരികെ കൊണ്ടുവന്നുവെന്ന വാർത്ത വാഹനപ്രേമികൾക്കിടയിൽ വലിയ ചർച്ചയായിരുന്നു. എന്നാൽ Motor1.com പുറത്തുവിട്ട റിപ്പോർട്ടുകൾ പ്രകാരം, ഇതൊരു സാധാരണ മാനുവൽ ഗിയർബോക്സ് അല്ല, മറിച്ച് അത്യാധുനിക സാങ്കേതികവിദ്യയുടെ സഹായത്തോടെ മാനുവൽ ഡ്രൈവിങ് അനുഭവം നൽകുന്ന ഒരു സംവിധാനമാണ്.
പുതിയ 12Cilindri Manuale-ൽ ഉപയോഗിച്ചിരിക്കുന്നത് ഒരു യഥാർത്ഥ മാനുവൽ ഗിയർബോക്സ് അല്ല എന്നതാണ് ഏറ്റവും വലിയ പ്രത്യേകത. സാധാരണ 12Cilindri മോഡലിൽ കാണുന്ന അതേ 8-സ്പീഡ് ഡ്യുവൽ ക്ലച്ച് ട്രാൻസ്മിഷൻ (DCT) തന്നെയാണ് ഇതിലും നൽകിയിരിക്കുന്നത്. എന്നാൽ ഫെരാരിയുടെ പുതിയ മാനുവൽ ബൈ-വയർ (Manuale By-Wire) സാങ്കേതികവിദ്യ വഴി ആദ്യത്തെ ആറ് ഗിയറുകളും റിവേഴ്സ് ഗിയറും മാനുവലായി മാറ്റാൻ ഡ്രൈവർക്ക് സാധിക്കും.
വാഹനത്തിൽ ഡ്രൈവർക്കായി ഒരു ക്ലച്ച് പെഡലും ഗിയർ മാറ്റാൻ ക്ലാസിക് രൂപത്തിലുള്ള മെറ്റൽ ഷിഫ്റ്ററും നൽകിയിട്ടുണ്ട്. മാനുവൽ മോഡ് തിരഞ്ഞെടുത്ത് ക്ലച്ച് ചവിട്ടി സാധാരണ മാനുവൽ കാറുകളിലേത് പോലെ ഗിയർ മാറ്റാൻ കഴിയും.
രണ്ട് സെൻസറുകൾ ഉപയോഗിച്ചാണ് ഈ സംവിധാനം പ്രവർത്തിക്കുന്നത്. ഗിയർ ലിവറിന്റെ ചലനങ്ങൾ തിരിച്ചറിയുന്നതും, ക്ലച്ച് പെഡൽ എത്രത്തോളം ചവിട്ടി എന്ന് മനസിലാക്കി ഡ്യുവൽ ക്ലച്ച് ട്രാൻസ്മിഷനെ നിയന്ത്രിക്കുന്നതും ഈ സെൻസറുകളാണ്. ക്ലച്ച് ചവിട്ടാതെ ഗിയർ മാറുന്നത് തടയാൻ ഇതിൽ ഒരു ഇലക്ട്രിക് ആക്യുവേറ്ററും ഘടിപ്പിച്ചിട്ടുണ്ട്. ബ്രേക്ക് പെഡൽ മാത്രം ചവിട്ടി വാഹനം സ്റ്റാർട്ട് ചെയ്താൽ ഇതൊരു സാധാരണ ഓട്ടോമാറ്റിക് കാർ പോലെ പ്രവർത്തിക്കുകയും, എന്നാൽ ക്ലച്ച് ചവിട്ടിയാണ് സ്റ്റാർട്ട് ചെയ്യുന്നതെങ്കിൽ ഇത് നേരിട്ട് മാനുവൽ മോഡിലേക്ക് മാറുകയും ചെയ്യും. ഡ്രൈവിങ്ങിനിടയിൽ ഏത് സമയത്തും ഓട്ടോമാറ്റിക് മോഡിലേക്ക് മാറ്റാൻ സാധിക്കും.
സാധാരണ മോഡലിൽ കാണുന്ന അതേ 6.5 ലിറ്റർ നാച്ചുറലി ആസ്പിരേറ്റഡ് വി 12 (V12) എഞ്ചിൻ തന്നെയാണ് പുതിയ 12Cilindri Manuale-ലും കമ്പനി നിലനിർത്തിയിരിക്കുന്നത്. ഉയർന്ന റെവ്വിങ് ശേഷിയുള്ള ഈ എഞ്ചിൻ 9,500 rpm റെഡ്ലൈനോടെ 830 hp പവറും 678 Nm ടോർക്കും ഉത്പാദിപ്പിക്കുന്നു. വെറും 3 സെക്കൻഡിനുള്ളിൽ മണിക്കൂറിൽ 100 കിലോമീറ്റർ വേഗത കൈവരിക്കുന്ന കാറിന്റെ പരമാവധി വേഗത മണിക്കൂറിൽ 340 കിലോമീറ്ററാണ്.
ലോകമെമ്പാടുമായി ഈ മോഡലിന്റെ വെറും 1,499 യൂണിറ്റുകൾ മാത്രമേ കമ്പനി നിർമ്മിക്കുകയുള്ളൂ. ഏകദേശം 6.42 കോടി രൂപയാണ് (5,90,000 യൂറോ) ഓരോ വാഹനത്തിന്റെയും വില.
എക്സ്റ്റീരിയർ ഡിസൈനിലെ മാറ്റങ്ങളും ബാഡ്ജിംഗും
ഒറ്റനോട്ടത്തിൽ 12Cilindri Manuale സാധാരണ മോഡലിന് സമാനമാണെന്ന് തോന്നുമെങ്കിലും, ഇതിനെ വ്യത്യസ്തമാക്കാൻ ഫെരാരി ചില ചെറിയ മാറ്റങ്ങൾ ഡിസൈനിൽ വരുത്തിയിട്ടുണ്ട്. വാഹനത്തിന്റെ മുൻവശത്തെ ഫെൻഡറുകളിൽ പുതിയ Manuale ബാഡ്ജുകൾ നൽകിയിരിക്കുന്നു. കൂടാതെ വശങ്ങളിലായി ലേസർ വഴി പതിപ്പിച്ച (laser-etched) ഫെരാരി ലോഗോകൾക്ക് മനോഹരമായ സിൽവർ ഫിനിഷും നൽകിയിട്ടുണ്ട്.
ഫെരാരിയുടെ ക്ലാസിക് മോഡലായ 365 GTB4-ൽ നിന്ന് പ്രചോദനം ഉൾക്കൊണ്ട്, വാഹനത്തിന്റെ മുൻവശത്തെ സ്പ്ലിറ്ററിലും പിൻവശത്തെ വിംഗ്ലെറ്റുകളിലും (rear winglets) ആകർഷകമായ പിൻസ്ട്രിപ്പ് ഡിസൈനും കമ്പനി ഒരുക്കിയിട്ടുണ്ട്.
പ്രത്യേകമായി നിർമ്മിച്ച 5-സ്പോക്ക് ഫോർജ്ഡ് അലോയ് വീലുകൾ നാല് വ്യത്യസ്ത ഫിനിഷുകളിൽ ഉപഭോക്താക്കൾക്ക് ലഭ്യമാണ്. വാഹനത്തിന്റെ നീളമേറിയ ബോണറ്റിലെ കറുത്ത ഭാഗത്ത് സംയോജിപ്പിച്ചിട്ടുള്ള ഹെഡ്ലൈറ്റുകൾ, കാർബൺ ഫൈബർ പാനലുകൾ, ഡെൽറ്റ-വിംഗ് റൂഫ് ഡിസൈൻ, ക്വാഡ് എക്സ്ഹോസ്റ്റുകൾ, ആക്റ്റീവ് വിംഗ്ലെറ്റുകൾ, അഗ്രസ്സീവ് ലുക്ക് നൽകുന്ന റിയർ ഡിഫ്യൂസർ എന്നിവയുൾപ്പെടെയുള്ള മറ്റ് ഡിസൈനുകളെല്ലാം സാധാരണ 12Cilindri മോഡലിന് സമാനമായി തന്നെ നിലനിർത്തിയിട്ടുണ്ട്.
ഇതിനുപുറമെ, വാഹനത്തിന്റെ 6-സ്പീഡ് ഗിയർബോക്സിനോടുള്ള ആദരസൂചകമായി നിരവധി കളർ കോമ്പിനേഷനുകളിൽ തിരഞ്ഞെടുക്കാൻ സാധിക്കുന്ന ഒരു ഓപ്ഷണൽ ലിവറിയും കമ്പനി ഉപഭോക്താക്കൾക്കായി വാഗ്ദാനം ചെയ്യുന്നുണ്ട്.
ഇന്റീരിയറിലെ മാറ്റങ്ങളും പുതിയ ഫീച്ചറുകളും
12Cilindri Manuale-യുടെ ഇന്റീരിയറിലെ ഏറ്റവും പ്രധാനപ്പെട്ട മാറ്റം പുതുതായി രൂപകല്പന ചെയ്ത സെന്റർ കൺസോളാണ്. പുതിയ മാനുവൽ ഗിയർ ലിവർ ഉൾപ്പെടുത്തുന്നതിനായാണ് ഈ മാറ്റം വരുത്തിയിരിക്കുന്നത്. പഴയകാല ക്ലാസിക് ഫെരാരി മോഡലുകളിലെ ഗേറ്റഡ് മാനുവൽ ഷിഫ്റ്ററുകളെ അനുസ്മരിപ്പിക്കുന്ന രീതിയിൽ അലുമിനിയത്തിൽ തീർത്ത റൗണ്ട് ഗിയർ ലിവറാണിത്. ഉപഭോക്താക്കൾക്ക് തങ്ങളുടെ താൽപര്യത്തിനനുസരിച്ച് സിൽവർ അല്ലെങ്കിൽ കറുപ്പ് നിറങ്ങളിൽ ഇത് തിരഞ്ഞെടുക്കാം.
കംഫർട്ട് , റേസിങ് എന്നിങ്ങനെ രണ്ട് വ്യത്യസ്ത വേർഷനുകളിൽ സീറ്റുകൾ ലഭ്യമാണ്. പുതിയ Manuale ഐഡന്റിറ്റി കൂടുതൽ എടുത്തുകാണിക്കുന്നതിനായി ഈ സീറ്റുകളിൽ ആറ് വെർട്ടിക്കൽ ഗ്രൂവുകൾ നൽകിയിട്ടുണ്ട്. മികച്ച മെക്കാനിക്കൽ ഡ്രൈവിങ് അനുഭവത്തിനൊപ്പം തന്നെ നൂതന ഡിജിറ്റൽ വിവരങ്ങളും ലഭ്യമാക്കുന്നതിനായി, സാധാരണ 12Cilindri മോഡലിലുള്ള ട്രിപ്പിൾ-സ്ക്രീൻ ഡാഷ്ബോർഡ് ഈ പുതിയ മോഡലിലും കമ്പനി നിലനിർത്തിയിട്ടുണ്ട്.
Ferrari has officially reintroduced a manual transmission after a 14-year hiatus (the last being the California roadster) to cater to V12 driving enthusiasts. Production of the 12Cilindri Manuale is strictly limited to 1,499 units worldwide, with each car priced at €590,000 (approximately Rs 6.42 crore).