മലയാള സിനിമാപ്രേമികൾ ഏറെ പ്രതീക്ഷയോടെ കാത്തിരിക്കുന്ന അമൽ നീരദ് ചിത്രം 'ബാച്ച്‌ലർ പാർട്ടി Deux'ന്റെ ട്രെയിലർ പുറത്തിറങ്ങി. നസ്‌ലൻ, ഷറഫുദ്ദീൻ, സൗബിൻ ഷാഹിർ എന്നിവർക്കെതിരെ വില്ലൻ വേഷത്തിൽ കുഞ്ചാക്കോ ബോബൻ എത്തുന്നുവെന്ന സൂചനയാണ് ട്രെയിലർ നൽകുന്നത്. തോക്കുകളും വെടിയൊച്ചകളും സംഘട്ടനങ്ങളും നിറഞ്ഞ ദൃശ്യങ്ങളിലൂടെ അടിമുടി അമൽ നീരദ് ശൈലിയിലുള്ള ഒരു ആക്ഷൻ വിരുന്നാണ് ചിത്രം വാഗ്ദാനം ചെയ്യുന്നത്. നവംബർ 19-ന് ചിത്രം ആഗോളതലത്തിൽ തിയേറ്ററുകളിലെത്തും.
2012-ൽ പുറത്തിറങ്ങിയ 'ബാച്ച്‌ലർ പാർട്ടി'യുടെ തുടർച്ചയായാണ് പുതിയ ചിത്രം ഒരുങ്ങുന്നത്. പതിനാലു വർഷങ്ങൾക്കിപ്പുറം പുതിയ തലമുറയിലെ താരങ്ങളെയും മലയാളത്തിലെ മുൻനിര അഭിനേതാക്കളെയും ഒരുമിപ്പിച്ചുകൊണ്ടാണ് അമൽ നീരദ് രണ്ടാം ഭാഗം ഒരുക്കുന്നത്. ആദ്യ ചിത്രത്തിന്റെ സ്റ്റൈലിഷ് മേക്കിങ്ങും ആക്ഷൻ രംഗങ്ങളും ഇന്നും സിനിമാപ്രേമികൾക്കിടയിൽ ചർച്ച ചെയ്യപ്പെടുന്ന സാഹചര്യത്തിൽ രണ്ടാം ഭാഗത്തിനും വലിയ പ്രതീക്ഷകളാണുള്ളത്.
നസ്‌ലൻ, ടൊവിനോ തോമസ്, കുഞ്ചാക്കോ ബോബൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി, ചന്തു സലിംകുമാർ, ഷൈൻ ടോം ചാക്കോ എന്നിവർക്കൊപ്പം നാദിയ മൊയ്തു, രജിഷ വിജയൻ, ജ്യോതിർമയി, ഹൻസിക കൃഷ്ണകുമാർ, പാരിസ് ലക്ഷ്മി തുടങ്ങിയവരും ചിത്രത്തിലുണ്ട്. നേരത്തെ പുറത്തുവന്ന താരങ്ങളുടെ ക്യാരക്ടർ പോസ്റ്ററുകളും സിനിമാപ്രേമികൾക്കിടയിൽ വലിയ ശ്രദ്ധ നേടിയിരുന്നു.
ചിത്രത്തിന്റെ നിർമാണം അമൽ നീരദ് പ്രൊഡക്ഷൻസ്, അൻവർ റഷീദ് എന്റർടെയ്ൻമെന്റ്സ്, ഫഹദ് ഫാസിൽ ആൻഡ് ഫ്രണ്ട്സ് എന്നീ ബാനറുകൾ ചേർന്നാണ് നിർവഹിക്കുന്നത്. അപ്പു പ്രഭാകറാണ് ഛായാഗ്രഹണം. വിവേക് ഹർഷൻ എഡിറ്റിങ്ങും ക്രിസ്റ്റോ സേവ്യർ സംഗീതവും നിർവഹിക്കുന്നു. ഉണ്ണി ആർ ആണ് സംഭാഷണങ്ങൾ ഒരുക്കിയിരിക്കുന്നത്. തപസ് നായക് സൗണ്ട് ഡിസൈനും ജോസഫ് നെല്ലിക്കൽ പ്രൊഡക്ഷൻ ഡിസൈനും കൈകാര്യം ചെയ്യുന്നു. റഫീഖ് അഹമ്മദും വിനായക് ശശികുമാറുമാണ് ഗാനരചയിതാക്കൾ.
മലയാള സിനിമയിൽ തന്റേതായ ദൃശ്യഭാഷയും ആക്ഷൻ അവതരണശൈലിയും രൂപപ്പെടുത്തിയ സംവിധായകനാണ് അമൽ നീരദ്. 'ബാച്ച്‌ലർ പാർട്ടി'യുടെ രണ്ടാം ഭാഗത്തിലൂടെ ആ ലോകത്തേക്ക് പുതിയ തലമുറയിലെ താരങ്ങളെയും കഥാപാത്രങ്ങളെയും കൊണ്ടുവരുമ്പോൾ പ്രേക്ഷകരുടെ പ്രതീക്ഷകളും ഉയരുകയാണ്. ട്രെയിലർ നൽകിയ ആവേശം തിയേറ്ററുകളിലും ആവർത്തിക്കുമോയെന്നാണ് ഇനി അറിയേണ്ടത്. നവംബർ 19-ന് 'ബാച്ച്‌ലർ പാർട്ടി Deux' തിയേറ്ററുകളിലെത്തും.
Amal Neerad’s highly anticipated action thriller 'Bachelor Party Deux' has unveiled its trailer, promising stylish action and an ensemble cast. Kunchacko Boban appears to play the antagonist opposite Naslen, Soubin Shahir and others. A sequel to the 2012 cult classic, the film hits theatres worldwide on November 19.