‘മഹാനടി’ എന്ന ചിത്രത്തിലൂടെ തന്റെ കരിയറിൽ നിർണായക നേട്ടം സ്വന്തമാക്കിയിട്ടും അതിന് പിന്നാലെ ആറുമാസത്തോളം സിനിമാ അവസരങ്ങളൊന്നും ലഭിച്ചില്ലെന്ന് നടി കീർത്തി സുരേഷ്. മികച്ച നടിയെന്ന നിലയിൽ വലിയ അംഗീകാരം നേടാനായെങ്കിലും പുതിയ സിനിമകൾ ലഭിക്കാതെ വീട്ടിലിരിക്കേണ്ടിവന്ന കാലത്ത് സാമ്പത്തികമായുള്ള കാര്യങ്ങളിൽ ആശങ്കയുണ്ടായിരുന്നുവെന്ന് താരം വെളിപ്പെടുത്തി. തുടർച്ചയായി സിനിമകളിൽ അഭിനയിച്ചുകൊണ്ടിരുന്നതിൽ നിന്ന് ഒരു വിശ്രമം ആവശ്യമായിരുന്നുവെങ്കിലും അത് വരുമാനത്തെ ബാധിക്കാൻ തുടങ്ങിയതോടെ സാഹചര്യം കുറച്ചുകൂടി സങ്കീർണമായി എന്ന് കീർത്തി സുരേഷ് പറഞ്ഞു.
നാഗ് അശ്വിന്റെ സംവിധാനത്തിൽ 2018-ൽ പുറത്തിറങ്ങിയ ‘മഹാനടി’യിൽ തെന്നിന്ത്യൻ സിനിമയിലെ ഇതിഹാസതാരം സാവിത്രിയുടെ ജീവിതമാണ് കീർത്തി സുരേഷ് അവതരിപ്പിച്ചത്. നിരൂപക പ്രശംസയും പ്രേക്ഷകപ്രീതിയും ഒരുപോലെ നേടിയ ചിത്രത്തിലെ അഭിനയത്തിന് 2019-ൽ മികച്ച നടിക്കുള്ള ദേശീയ ചലച്ചിത്ര പുരസ്‌കാരവും കീർത്തിയെ തേടിയെത്തി. എന്നാൽ ഈ നേട്ടം കരിയറിൽ ഉടനടി കൂടുതൽ അവസരങ്ങൾ തുറന്നുകൊടുത്തില്ല. ഒരു പ്രമുഖ മാധ്യമത്തിന് നൽകിയ അഭിമുഖത്തിലാണ് ഈ അനുഭവങ്ങളെക്കുറിച്ച് കീർത്തി മനസ്സുതുറന്നത്. ചിത്രത്തിന് മുമ്പ് കൊമേഴ്‌സ്യൽ സിനിമകളിൽ വളരെ സ്വാഭാവികമായ സാധാരണ കഥാപാത്രങ്ങളിലായിരുന്നു കീർത്തി കൂടുതലായി ചെയ്തിരുന്നത്. എന്നാൽ ആ ഒരു പ്രകടനത്തോടെ സംവിധായകർ കീർത്തിയെ സമീപിക്കുന്ന രീതിയിൽ വലിയ മാറ്റമുണ്ടായെന്നാണ് കീർത്തിയുടെ വിലയിരുത്തൽ.
തന്നെ ഏത് തരത്തിലുള്ള കഥാപാത്രങ്ങളിൽ അവതരിപ്പിക്കണമെന്ന കാര്യത്തിൽ സംവിധായകർക്കും സിനിമാപ്രവർത്തകർക്കും ആശയക്കുഴപ്പമുണ്ടായിരുന്നുവെന്നും നേരത്തേ ചെയ്തിരുന്ന കഥാപാത്രങ്ങൾക്കപ്പുറം അഭിനയപ്രാധാന്യമുള്ള വേഷങ്ങളാണ് ഇനി തനിക്കായി കണ്ടെത്തേണ്ടതെന്ന ചിന്ത അവർക്കുണ്ടായിരുന്നിരിക്കാമെന്നും കീർത്തി സുരേഷ് പറയുന്നു, എന്നാൽ പുതിയ കഥകളുമായി ആരും തന്നെ സമീപിക്കാതിരുന്ന കാലത്ത് തുടക്കത്തിൽ വലിയ നിരാശയായൊന്നും ഉണ്ടായിരുന്നില്ല.
വിശ്രമം ആവശ്യമായിരുന്നു, പക്ഷേ സാമ്പത്തികമായ ആശങ്കയുണ്ടായിരുന്നു
തുടർച്ചയായി സിനിമകളിൽ അഭിനയിച്ചുകൊണ്ടിരുന്ന തനിക്ക് ഒരു ഇടവേള ആവശ്യമായിരുന്നു. ആറുമാസത്തോളം ജോലിയില്ലാതെ വീട്ടിലിരിക്കേണ്ടിവന്നത് ഒരു പരിധിവരെ എല്ലാ കാര്യത്തിലും ആശ്വാസമായിരുന്നുവെങ്കിലും, പക്ഷേ വരുമാനത്തെ ബാധിക്കുന്ന സാഹചര്യം വന്നതോടെ ആ ആശ്വാസത്തിന് പിന്നീട് മങ്ങലേറ്റു. സാമ്പത്തിക സുരക്ഷിതത്വം താളംതെറ്റുകയാണെന്ന് തിരിച്ചറിഞ്ഞതോടെ കാര്യങ്ങൾ കൂടുതൽ ഗൗരവത്തോടെ കാണാൻ തുടങ്ങി.
ഇതെല്ലാം ഉണ്ടായിട്ടും ആ കാലയളവിനെ പൂർണമായും നഷ്ടമായി കാണാൻ താൻ തയ്യാറായിരുന്നില്ല. തിരക്കുകൾക്കിടയിൽ മാറ്റിവെച്ചിരുന്ന കാര്യങ്ങളിലേക്കും സ്വന്തം ജീവിതത്തിലേക്കും കൂടുതൽ ശ്രദ്ധ ചെലുത്താൻ ആ ഇടവേള സഹായിച്ചു. കരിയറിലെ ഒരു നേട്ടത്തിനുശേഷം ഉടൻ അടുത്ത അവസരം ലഭിക്കണമെന്നില്ലെന്ന യാഥാർഥ്യവും ആ അനുഭവം ബോധ്യപ്പെടുത്തി എന്നും കീർത്തി പറഞ്ഞു.
കൊമേഴ്‌സ്യൽ സിനിമകളിലെ പതിവ് കഥാപാത്രങ്ങളിൽനിന്ന് കൂടുതൽ അഭിനയസാധ്യതയുള്ള വേഷങ്ങളിലേക്കുള്ള മാറ്റത്തിന്റെ തുടക്കമായിരുന്നു ‘മഹാനടി’. എന്നാൽ പ്രകടനങ്ങൾക്ക് ലഭിക്കുന്ന അംഗീകാരം മാത്രം സിനിമാ അവസരങ്ങളുടെ തുടർച്ച ഉറപ്പാക്കുന്നില്ലെന്ന് ഈ സംഭവം ഓർമ്മപ്പെടുത്തുന്നു. കാർത്തിക് സുബ്ബരാജിന്റെ സംവിധാനത്തിൽ പുറത്തിറങ്ങിയ ഡോറത്തി ആയിരുന്നു അടുത്തിടെ കീർത്തി സുരേഷിന് പ്രേക്ഷക പ്രശംസയും ഒപ്പം നിരൂപക പ്രശംസയും നേടിക്കൊടുത്ത ചിത്രം. ഇനിയും തുടർച്ചയായി നല്ല കഥാപാത്രങ്ങളിലൂടെയും സിനിമകളിലൂടെയും പ്രേക്ഷകരെ എന്റർടെയ്ൻ ചെയ്യാൻ നിരന്തരമായി പരിശ്രമിക്കും എന്നും താരം പറയുന്നു. ഡോറത്തിയിലെ ശ്രദ്ധേയ കഥാപാത്രത്തിന് ശേഷം നിലവിൽ രാധിക ആപ്‌തെയ്ക്കൊപ്പം ‘അക്ക’ എന്ന സീരീസിലും കീർത്തി സുരേഷ് അഭിനയിക്കുന്നുണ്ട്.
Keerthy Suresh revealed that she received no film offers for six months after the success of Mahanati, despite winning the National Film Award for portraying legendary actress Savitri. She explained that filmmakers were unsure about the roles to offer her, while the prolonged break also raised concerns about her financial stability and career.