നാനി നായകനാകുന്ന പുതിയ ചിത്രത്തില് ഡാന്സ് നമ്പര് ചെയ്യാന് കീര്ത്തി സുരേഷ് തീരുമാനിച്ചത് അവസരങ്ങള് കുറഞ്ഞതുകൊണ്ടാണെന്ന സോഷ്യല് മീഡിയ പ്രചാരണങ്ങള്ക്ക് മറുപടിയുമായി താരം. ചിത്രത്തില് കീര്ത്തി അഭിനയിക്കുന്നുണ്ടോ എന്ന കാര്യത്തില് ഇതുവരെ ഔദ്യോഗിക സ്ഥിരീകരണമൊന്നുമില്ലെങ്കിലും തന്റെ കരിയറിനെക്കുറിച്ച് തെറ്റായ കാര്യങ്ങള് പ്രചരിപ്പിച്ച ഇന്സ്റ്റാഗ്രാം ഹാന്ഡിലിന് രസകരമായ മറുപടിയാണ് കീര്ത്തി നല്കിയത്.
'ഫ്രണ്ട്സ്വുഡ്സ് ടിവി'യിലെ ഒരു വീഡിയോയില്, മികച്ച കഥാപാത്രങ്ങള് ലഭിക്കാത്തതിനാലാണ് കീര്ത്തി 'ദി പാരഡൈസ്' എന്ന ചിത്രത്തിലൂടെ ഡാന്സ് നമ്പറിലേക്ക് തിരിഞ്ഞതെന്ന് ഒരു സ്ത്രീ വിമര്ശിച്ചിരുന്നു. മാത്രമല്ല, ഇതൊരു തെലുങ്ക് ചിത്രമാണെന്നിരിക്കെ കന്നഡ ചിത്രമാണെന്നാണ് അവര് വീഡിയോയില് തെറ്റായി പറഞ്ഞത്. നീണ്ട വിശദീകരണങ്ങള്ക്ക് മുതിരാതെ തികച്ചും തമാശരൂപേണയുള്ള ഒരു പരിഹാസ കമന്റിലൂടെയാണ് കീര്ത്തി ഇതിനോട് പ്രതികരിച്ചത്.
തമിഴിലായിരുന്നു താരത്തിന്റെ മറുപടി. 'വേറെ ലെവല് പൊങ്ക! ചിന്ന കറക്ഷന്. നാനി നടിപ്പത് തെലുങ്ക്. കന്നഡ അല്ല.' (വേറെ ലെവല് തന്നെ! ഒരു ചെറിയ തിരുത്തുണ്ട്. നാനി അഭിനയിക്കുന്നത് തെലുങ്കിലാണ്, കന്നഡയിലല്ല.) കീര്ത്തിയുടെ ഈ തഗ്ഗ് മറുപടി ആരാധകര് ഏറ്റെടുക്കുകയും നിരവധി പേര് ചിരിക്കുന്നതും ഫയര് ഇമോജികളുമായി കമന്റ് ബോക്സില് എത്തുകയും ചെയ്തു.
നാനിയും കീര്ത്തി സുരേഷും അടുത്ത സുഹൃത്തുക്കളാണ്. 2017-ല് പുറത്തിറങ്ങിയ 'നേനു ലോക്കല്', 2023-ലെ 'ദസറ' എന്നീ ചിത്രങ്ങളില് ഇരുവരും ഒന്നിച്ചഭിനയിച്ചിട്ടുണ്ട്. ഈ രണ്ടു ചിത്രങ്ങളും ബോക്സ് ഓഫീസില് വലിയ വിജയമായിരുന്നു. 'ദി പാരഡൈസ്' എന്ന ചിത്രത്തില് കീര്ത്തി ഉണ്ടാകുമെന്ന വാര്ത്തകള് പ്രചരിക്കുന്നുണ്ടെങ്കിലും കീര്ത്തിയോ ചിത്രത്തിന്റെ അണിയറപ്രവര്ത്തകരോ ഇത് ഔദ്യോഗികമായി സ്ഥിരീകരിച്ചിട്ടില്ല.
വ്യാഴാഴ്ച പുറത്തിറങ്ങിയ ചിത്രത്തിന്റെ ടീസറിലും കീര്ത്തിയുടെ സാന്നിധ്യത്തെക്കുറിച്ച് സൂചനകളൊന്നുമില്ല. ചിത്രത്തില് രാഘവ് ജുയല്, മോഹന് ബാബു, കായാദു ലോഹര്, തനികെല്ല ഭരണി, സൊണാലി കുല്ക്കര്ണി, സമ്പൂര്ണേഷ് ബാബു, ഈശ്വരി റാവു തുടങ്ങിയവരും പ്രധാന വേഷങ്ങളില് എത്തുന്നുണ്ട്. സെപ്റ്റംബര് 24-നാണ് ചിത്രം തിയറ്ററുകളില് എത്തുന്നത്.
നിരവധി വന്കിട പ്രോജക്ടുകളാണ് കീര്ത്തിയുടേതായി അണിയറയില് ഒരുങ്ങുന്നത്. ഋഷികാന്ത്, സനാഥ് എന്നിവര്ക്കൊപ്പം കീര്ത്തി അഭിനയിക്കുന്ന കാര്ത്തിക് സുബ്ബരാജ് ചിത്രം 'ഡോറോത്തി' സെപ്റ്റംബര് 25-ന് തിയറ്ററുകളിലെത്തും. 'ദി പാരഡൈസ്' റിലീസ് ചെയ്യുന്നതിന്റെ തൊട്ടടുത്ത ദിവസമാണ് ഈ ചിത്രവും എത്തുന്ന്. തെലുങ്കില് വിജയ് ദേവരകൊണ്ട നായകനാകുന്ന 'റൗഡി ജനാര്ദ്ദന' എന്ന ചിത്രത്തിലും കീര്ത്തിയാണ് നായിക. രവികിരണ് കോല സംവിധാനം ചെയ്യുന്ന ഈ ചിത്രം 2026 ഡിസംബറിലാണ് റിലീസ് ചെയ്യാന് നിശ്ചയിച്ചിരിക്കുന്നത്. ഇതിനുപുറമെ അനില് രാവിപുഡി സംവിധാനം ചെയ്യുന്ന പേരിട്ടിട്ടില്ലാത്ത പുതിയ ചിത്രത്തില് വെങ്കടേഷ്, കല്യാണ് റാം, കൃതി ഷെട്ടി എന്നിവര്ക്കൊപ്പവും കീര്ത്തി വേഷമിടുന്നുണ്ട്.
Actress Keerthy Suresh has given a witty response to social media claims that she is doing a dance number in Nani’s upcoming Telugu film The Paradise because she is receiving fewer acting opportunities. Responding to an Instagram video that criticized her career and incorrectly referred to the film as Kannada, Keerthy sarcastically corrected the claim in Tamil, pointing out that Nani’s film is Telugu, not Kannada. Fans praised her humorous response. Although reports have linked Keerthy to The Paradise, neither the actress nor the filmmakers have officially confirmed her involvement. The film, starring Nani along with Raghav Juyal, Mohan Babu and others, is scheduled for release on September 24.