നാലര പതിറ്റാണ്ടിനിപ്പുറവും സംഗീതത്തിന് പ്രായമില്ല; ‘ശങ്കരാഭരണം’ വീണ്ടും തിയറ്ററുകളിലേക്ക്

ഇന്ത്യൻ ശാസ്ത്രീയ സംഗീതത്തിന്റെ സൗന്ദര്യവും കാലാതീതമായ ഗാനങ്ങളും കൊണ്ട് സിനിമാപ്രേമികളുടെ ഹൃദയത്തിൽ ഇടംനേടിയ ‘ശങ്കരാഭരണം’ വീണ്ടും ബിഗ് സ്ക്രീനിലേക്ക്. കെ. വിശ്വനാഥ് സംവിധാനം ചെയ്ത് 1980-ൽ പുറത്തിറങ്ങിയ തെലുങ്ക് ക്ലാസിക് ചിത്രത്തിന്റെ നവീകരിച്ച ഡിജിറ്റൽ പതിപ്പാണ് നവംബറിൽ ലോകമെമ്പാടുമുള്ള തിയറ്ററുകളിലെത്തുന്നത്. 4K അൾട്രാ എച്ച്ഡി ദൃശ്യവ്യക്തതയിലും 7.1 സറൗണ്ട് സൗണ്ട് മികവിലും ഒരുങ്ങുന്ന പുതിയ പതിപ്പിലൂടെ പഴയ തലമുറയ്ക്ക് പ്രിയപ്പെട്ട സിനിമ വീണ്ടും തിയറ്ററിൽ ആസ്വദിക്കാനും പുതിയ തലമുറയ്ക്ക് ഈ സംഗീതവിസ്മയം വലിയ സ്ക്രീനിൽ പരിചയപ്പെടാനും അവസരമൊരുങ്ങും.

പൂർണോദയ മൂവി ക്രിയേഷൻസിന്റെ ബാനറിൽ നിർമിച്ച ചിത്രം മലയാളത്തിലും തമിഴിലുമാണ് പുനഃപ്രദർശനത്തിനെത്തുന്നത്. പുതിയ ഡിജിറ്റൽ പതിപ്പ് ഒരുക്കിയിരിക്കുന്നത് ശ്രീലാൽ ദേവരാജാണ്. പീപ്പിൾസ് ഫിലിം അക്കാദമിയും ചാനൽ ഫൈവും ചേർന്നാണ് വിതരണച്ചുമതല നിർവഹിക്കുന്നത്. റിലീസ് തീയതിയുടെ കൃത്യമായ വിശദാംശങ്ങൾ ഇതുവരെ പുറത്തുവന്നിട്ടില്ല.

കർണാടക സംഗീതത്തിലെ പ്രഗത്ഭനായ ശങ്കരശാസ്ത്രിയുടെ ജീവിതവും അദ്ദേഹത്തിന്റെ കലയോടുള്ള നിഷ്ഠയും തുളസി എന്ന യുവതിയുമായുള്ള ആത്മബന്ധവുമാണ് സിനിമയുടെ പ്രമേയത്തിന്റെ അടിത്തറ. മാറുന്ന കാലത്ത് ശാസ്ത്രീയ സംഗീതത്തിന് ലഭിക്കുന്ന അവഗണനയും അതിനിടയിലും സംഗീതത്തിന്റെ മഹത്വം കാത്തുസൂക്ഷിക്കാൻ ശ്രമിക്കുന്ന ഒരു കലാകാരന്റെ ജീവിതസംഘർഷങ്ങളും ചിത്രം ഹൃദയസ്പർശിയായി അവതരിപ്പിക്കുന്നു. കലയും പ്രശസ്തിയും മാത്രമല്ല, ഗുരു-ശിഷ്യ ബന്ധത്തിന്റെ ആഴവും മനുഷ്യബന്ധങ്ങളുടെ മൂല്യവും സിനിമയുടെ പ്രധാന ഘടകങ്ങളാണ്. ജെ. വി. സോമയാജുലു ശങ്കരശാസ്ത്രിയായി വേഷമിട്ട ചിത്രത്തിൽ മഞ്ജു ഭാർഗവി, രാജലക്ഷ്മി, തുളസി, ചന്ദ്രമോഹൻ എന്നിവരും പ്രധാന കഥാപാത്രങ്ങളായി എത്തുന്നു. കഥാപാത്രങ്ങളുടെ വൈകാരികമായ യാത്രയ്ക്കൊപ്പം സംഗീതത്തിന് വലിയ പ്രാധാന്യം നൽകുന്ന അവതരണരീതിയാണ് ചിത്രത്തെ മറ്റു സിനിമകളിൽനിന്ന് വേറിട്ടുനിർത്തിയത്.

കെ. വി. മഹാദേവന്റെ സംഗീതവും എസ്. പി. ബാലസുബ്രഹ്മണ്യത്തിന്റെയും വാണി ജയറാമിന്റെയും ആലാപനവുമാണ് ‘ശങ്കരാഭരണം’ എന്ന സിനിമയുടെ ആത്മാവ്. ‘ശങ്കരാ… നാദശരീരാ പരാ’ ഉൾപ്പെടെയുള്ള ഗാനങ്ങൾ പതിറ്റാണ്ടുകൾ പിന്നിട്ടിട്ടും സംഗീതപ്രേമികൾക്കിടയിൽ പ്രിയപ്പെട്ടവയായി തുടരുന്നു. കഥയോട് ചേർന്നുനിൽക്കുന്ന സംഗീതവും കർണാടക സംഗീതത്തിന്റെ സവിശേഷതകൾ ജനകീയമായ ചലച്ചിത്രഭാഷയിലൂടെ അവതരിപ്പിച്ചതും ചിത്രത്തിന്റെ സ്വീകാര്യത വർധിപ്പിച്ചു.

റിലീസ് ചെയ്ത കാലത്തുതന്നെ മികച്ച ജനപിന്തുണ നേടിയ ചിത്രം കേരളത്തിലും ദീർഘകാലം തിയറ്ററുകളിൽ പ്രദർശിപ്പിച്ച് ചരിത്രം സൃഷ്ടിച്ചിരുന്നു. മികച്ച ജനപ്രിയ ചിത്രത്തിനുള്ള ദേശീയ ചലച്ചിത്ര പുരസ്കാരമുൾപ്പെടെ നാല് ദേശീയ പുരസ്കാരങ്ങളും ‘ശങ്കരാഭരണം’ സ്വന്തമാക്കി. ഇന്ത്യൻ ശാസ്ത്രീയ സംഗീതത്തിന്റെ പാരമ്പര്യം വെള്ളിത്തിരയിൽ അടയാളപ്പെടുത്തിയ ഈ സൃഷ്ടി രാഷ്ട്രപതി ഭവനിൽ പ്രദർശിപ്പിക്കപ്പെട്ടതും ചിത്രത്തിന്റെ ചരിത്രത്തിലെ ശ്രദ്ധേയമായ അധ്യായമാണ്.

നവീകരിച്ച ദൃശ്യങ്ങളോടും ശബ്ദമികവോടും കൂടി സിനിമ വീണ്ടും പ്രദർശനത്തിനെത്തുമ്പോൾ, പഴയ ഓർമകൾ പുതുക്കുന്നതിനപ്പുറം സംഗീതത്തിന് കാലാതീതമായ പ്രസക്തിയുണ്ടെന്ന് ഓർമിപ്പിക്കുന്ന അനുഭവമായിരിക്കും അത്. തിയറ്ററുകളിൽ സംഗീതത്തിന്റെ ആഴം നേരിട്ടാസ്വദിക്കാൻ ആഗ്രഹിക്കുന്നവർക്ക് ‘ശങ്കരാഭരണം’ വീണ്ടും ഒരു അവസരമൊരുക്കുകയാണ്.