സിനിമയിലെ താരമെന്ന നിലയിൽ മാത്രമല്ല, വിദ്യാഭ്യാസ രംഗത്തെ ഇടപെടലുകളിലൂടെയും ശ്രദ്ധ നേടുകയാണ് നടൻ സൂര്യ. പിന്നാക്ക സാഹചര്യങ്ങളിൽ നിന്നുള്ള വിദ്യാർഥികൾക്ക് ഉയർന്ന വിദ്യാഭ്യാസം നേടാൻ സഹായിക്കുന്ന അഗരം ഫൗണ്ടേഷന്റെ പ്രവർത്തനങ്ങളാണ് ഇപ്പോൾ വീണ്ടും ചർച്ചയാകുന്നത്. നടൻ ആർ മാധവനും സൂര്യയുടെ ഈ പ്രവർത്തനങ്ങളെ അഭിനന്ദിച്ച് രംഗത്തെത്തി.
അഗരം ഫൗണ്ടേഷന്റെ പ്രവർത്തനങ്ങളെക്കുറിച്ചുള്ള ഒരു പോസ്റ്റ് മാധവൻ തന്റെ ഇൻസ്റ്റഗ്രാം സ്റ്റോറിയിൽ പങ്കുവയ്ക്കുകയായിരുന്നു. വിദ്യാർഥികളുടെ വിദ്യാഭ്യാസത്തിന് ഫൗണ്ടേഷൻ നൽകുന്ന പിന്തുണയെ അഭിനന്ദിച്ചുകൊണ്ടായിരുന്നു അദ്ദേഹത്തിന്റെ പ്രതികരണം.
സൂര്യയുടെ നേതൃത്വത്തിൽ പ്രവർത്തിക്കുന്ന അഗരം ഫൗണ്ടേഷൻ സാമ്പത്തികമായി പിന്നാക്കം നിൽക്കുന്ന കുടുംബങ്ങളിൽ നിന്നുള്ള വിദ്യാർഥികൾക്ക് ഉയർന്ന വിദ്യാഭ്യാസം നേടാനുള്ള അവസരങ്ങൾ ഒരുക്കുകയാണ്. പ്രത്യേകിച്ച് കുടുംബത്തിൽ ആദ്യമായി കോളേജ് വിദ്യാഭ്യാസത്തിലേക്ക് എത്തുന്ന വിദ്യാർഥികൾക്ക് പഠനം തുടരാൻ ആവശ്യമായ പിന്തുണ നൽകുന്നതാണ് ഫൗണ്ടേഷന്റെ പ്രധാന പ്രവർത്തനങ്ങളിലൊന്ന്.
പുറത്തുവന്ന കണക്കുകൾ പ്രകാരം, അഗരം ഫൗണ്ടേഷന്റെ സഹായത്തോടെ പഠിച്ചവരിൽ 51 പേർ ഡോക്ടർമാരും ഏകദേശം 1,800 പേർ എൻജിനീയർമാരുമായി മാറിയിട്ടുണ്ട്. വിദ്യാഭ്യാസം പൂർത്തിയാക്കിയ ശേഷം വിവിധ മേഖലകളിൽ ജോലി കണ്ടെത്താനും സ്വന്തം കുടുംബത്തിന്റെ ജീവിതനിലവാരം മെച്ചപ്പെടുത്താനും ഇവരിൽ പലർക്കും കഴിഞ്ഞു.
കഴിഞ്ഞ 20 വർഷത്തിനിടെ ഏകദേശം 6,000 വിദ്യാർഥികളുടെ ജീവിതത്തിൽ മാറ്റം കൊണ്ടുവരാൻ അഗരം ഫൗണ്ടേഷന് കഴിഞ്ഞതായി സൂര്യ നേരത്തെ പറഞ്ഞിരുന്നു. സാമ്പത്തിക സാഹചര്യങ്ങൾ ഒരു വിദ്യാർഥിയുടെ പഠനത്തിന് തടസ്സമാകരുതെന്ന ആശയമാണ് ഫൗണ്ടേഷന്റെ പ്രവർത്തനങ്ങൾക്ക് പിന്നിൽ.
സൂര്യയുടെ സിനിമാ ജീവിതത്തിലെ നേട്ടങ്ങൾക്കൊപ്പം, സമൂഹത്തിന് വേണ്ടി അദ്ദേഹം നടത്തുന്ന ഇത്തരം ഇടപെടലുകളും പലപ്പോഴും ശ്രദ്ധ നേടാറുണ്ട്. ഇപ്പോഴിതാ, സഹതാരമായ മാധവന്റെ അഭിനന്ദനം കൂടി എത്തിയതോടെ അഗരം ഫൗണ്ടേഷന്റെ പ്രവർത്തനങ്ങൾ വീണ്ടും സോഷ്യൽ മീഡിയയിൽ ചർച്ചയാവുകയാണ്.
സിനിമയിൽ ഒരുമിച്ച് പ്രേക്ഷകരെ കൈയടിപ്പിച്ച താരങ്ങൾക്കിടയിൽ, സിനിമയ്ക്ക് പുറത്തുള്ള ഒരു നല്ല പ്രവർത്തനത്തിന് ലഭിക്കുന്ന ഈ കൈയടിക്കും അതിന്റേതായ പ്രത്യേകതയുണ്ട്.
Actor R. Madhavan praises Suriya’s educational initiatives through the Agaram Foundation, which supports students from financially disadvantaged backgrounds in pursuing higher education. Reports say 51 beneficiaries have become doctors and around 1,800 engineers. Suriya has previously said the foundation has positively impacted nearly 6,000 students over two decades.