പസഫിക് സമുദ്രത്തിലെ ഭൂമധ്യരേഖാ പ്രദേശത്ത് എല് നിനോ പ്രതിഭാസം രൂപപ്പെട്ടതായി ഇന്ത്യന് കാലാവസ്ഥാ നിരീക്ഷണ കേന്ദ്രം (ഐഎംഡി) ഔദ്യോഗികമായി സ്ഥിരീകരിച്ചു. നിലവിലുള്ള തെക്കുപടിഞ്ഞാറന് മണ്സൂണ് കാലയളവില് ഈ കാലാവസ്ഥാ പ്രതിഭാസം കൂടുതല് ശക്തിപ്രാപിക്കാന് സാധ്യതയുണ്ടെന്ന് ഐഎംഡി മുന്നറിയിപ്പ് നല്കുന്നു. ഇഎന്എസ്ഒ, ഇന്ത്യന് ഓഷ്യന് ഡൈപോള് (ഐഒഡി) ബുള്ളറ്റിന് പ്രകാരം, മധ്യ-കിഴക്കന് പസഫിക് സമുദ്രത്തിലെ സമുദ്രോപരിതല താപനില എല് നിനോ സാഹചര്യങ്ങള്ക്കുള്ള പരിധിയും കടന്നതായാണ് റിപ്പോര്ട്ട്. സമുദ്രത്തിലെ ഈ മാറ്റത്തോട് അന്തരീക്ഷവും പ്രതികരിച്ചു തുടങ്ങിയതോടെ, എല് നിനോ സ്വാധീനവലയം ഉറപ്പായിട്ടുണ്ട്. മണ്സൂണ് മിഷന് കപ്പിള്ഡ് ഫോര്കാസ്റ്റ് സിസ്റ്റം പ്രകാരം, മണ്സൂണ് സീസണ് പുരോഗമിക്കുന്തോറും എല് നിനോയുടെ തീവ്രത വര്ദ്ധിക്കാനാണ് സാധ്യത.
എന്താണ് നിയോ 3.4 സൂചിക?
എല് നിനോ പ്രതിഭാസം നിരീക്ഷിക്കുന്നതിനായി ശാസ്ത്രജ്ഞര് ഉപയോഗിക്കുന്ന പ്രധാന സൂചികയാണിത്. കഴിഞ്ഞ മൂന്ന് മാസത്തെ ഇതിന്റെ ശരാശരി താപനില +0.5 ഡിഗ്രി സെല്ഷ്യസ് എന്ന പരിധിക്ക് മുകളിലെത്തിയതോടെയാണ് എല് നിനോയുടെ ഔദ്യോഗിക തുടക്കം കുറിച്ചതായി കാലാവസ്ഥാ നിരീക്ഷണ കേന്ദ്രം പ്രഖ്യാപിച്ചത്. പസഫിക് സമുദ്രത്തിന്റെ അടിത്തട്ടില് ഇപ്പോഴും ശക്തമായ താപവ്യതിയാനങ്ങള് നിലനില്ക്കുന്നതിനാല് വരും മാസങ്ങളിലും ചൂടുവെള്ളം മുകളിലേക്ക് ഉയരാനും എല് നിനോയുടെ തീവ്രത കൂട്ടാനും സാധ്യതയേറെയാണ്.
ഇന്ത്യന് മണ്സൂണിനെ എങ്ങനെ ബാധിക്കും?
പസഫിക് സമുദ്രത്തിലെ സമുദ്രോപരിതല താപനില സാധാരണയേക്കാള് വര്ദ്ധിക്കുന്ന സ്വാഭാവിക പ്രതിഭാസമാണ് എല് നിനോ. ചരിത്രപരമായി പരിശോധിച്ചാല്, ഇന്ത്യയില് എല് നിനോ വര്ഷങ്ങളില് മണ്സൂണ് മഴ കുറയുകയും രാജ്യത്തിന്റെ പല ഭാഗങ്ങളിലും കടുത്ത ചൂടും വരള്ച്ചയും അനുഭവപ്പെടാറുമുണ്ട്. എങ്കിലും, മണ്സൂണിനെ സ്വാധീനിക്കുന്ന പ്രധാന ഘടകം എല് നിനോ മാത്രമല്ലെന്ന് ഐഎംഡി പറയുന്നു. നിലവില് ഇന്ത്യന് മഹാസമുദ്രത്തില് 'ന്യൂട്രല് ഐഒഡി' (Neutral IOD) സാഹചര്യമാണ് നിലനില്ക്കുന്നത്. ഇത് ഈ വര്ഷം എല് നിനോയുടെ ആഘാതത്തെ വലിയ രീതിയില് കൂട്ടുകയോ കുറയ്ക്കുകയോ ചെയ്യാന് സാധ്യതയില്ല.
രാജ്യത്തെ കാര്ഷിക മേഖലയെ എല് നിനോ സാരമായി ബാധിക്കുമെന്ന വിലയിരുത്തലില്, കേന്ദ്ര സര്ക്കാര് ജില്ലാതല കാര്ഷിക അടിയന്തിര പദ്ധതികള് പരിഷ്കരിക്കാന് ആരംഭിച്ചിട്ടുണ്ട്. രാജ്യത്തെ 150-നും 200-നും ഇടയില് ജില്ലകളെ ഇതിനായി മുന്ഗണനാ പട്ടികയില് ഉള്പ്പെടുത്തിയിട്ടുണ്ട്. ഐഎംഡി പ്രവചനം അനുസരിച്ച് മഹാരാഷ്ട്രയിലെ മറാത്ത്വാഡ, വടക്കന് കര്ണാടക ബെല്റ്റ് എന്നിവിടങ്ങളിലാണ് ഏറ്റവും കുറവ് മഴ പ്രവചിക്കുന്നത്. ഇതിന് പുറമെ രാജസ്ഥാന്, ഗുജറാത്ത്, മധ്യപ്രദേശ്, ഛത്തീസ്ഗഡ്, ഉത്തര്പ്രദേശിന്റെ കിഴക്കന് ഭാഗങ്ങള്, ബിഹാര്, ജാര്ഖണ്ഡ് എന്നീ സംസ്ഥാനങ്ങളിലും വരള്ച്ചാ സാധ്യത വളരെ കൂടുതലാണ്. തെലങ്കാനയിലെ ചില ഭാഗങ്ങളും തെക്കേ ഇന്ത്യയിലെ തീരദേശ മേഖലകളും ഒഴികെ രാജ്യത്തിന്റെ ഭൂരിഭാഗം പ്രദേശങ്ങളെയും ഇത് ബാധിച്ചേക്കാം.
മഴയുടെ അളവ് മാത്രമല്ല, ഓരോ ജില്ലയിലെയും ജലസേചന സൗകര്യം, മണ്ണ്, കൃഷിരീതി, ഭൂഗര്ഭജല ലഭ്യത എന്നിവ കൂടി കണക്കിലെടുത്താണ് ഏറ്റവും കൂടുതല് ബാധിക്കാന് സാധ്യതയുള്ള ജില്ലകളെ തരംതിരിക്കുന്നത്. വിളകള് വളരുന്നതിന് ഏറ്റവും നിര്ണായകമായ ആഗസ്റ്റ് മാസത്തില് മഴ പെയ്യാതിരുന്നാല് കര്ഷകര് എന്ത് ചെയ്യണം, പകരം ഏത് വിളകള് തിരഞ്ഞെടുക്കണം തുടങ്ങിയ ഘട്ടങ്ങളായുള്ള നിര്ദ്ദേശങ്ങള് ഈ പുതിയ പദ്ധതികളില് ഉണ്ടാകും.
പ്രതീക്ഷയേകി ജപ്പാന് കാലാവസ്ഥാ ഏജന്സിയുടെ പ്രവചനം
ജൂണ് 11-ന് തന്നെ എല് നിനോയുടെ വരവ് ഔദ്യോഗികമായി സ്ഥിരീകരിച്ച ജപ്പാന് മെറ്റീരിയോളജിക്കല് ഏജന്സി (ജെഎംഎ) ഇന്ത്യയ്ക്ക് പ്രത്യാശ നല്കുന്ന ഒരു സൂചന കൂടി പങ്കുവെക്കുന്നുണ്ട്. വരും മാസങ്ങളില് എല് നിനോ 'സൂപ്പര് എല് നിനോ' ആയി മാറിയേക്കാമെങ്കിലും, ജൂലൈ മാസത്തോടെ ഇന്ത്യന് മഹാസമുദ്രത്തില് ഒരു 'പോസിറ്റീവ് ഐഒഡി' (Positive IOD) രൂപപ്പെടാന് സാധ്യതയുണ്ടെന്നാണ് അവരുടെ കണ്ടെത്തല്. അങ്ങനെ സംഭവിച്ചാല്, അത് എല് നിനോ മൂലം ഇന്ത്യന് മണ്സൂണില് ഉണ്ടാകാനിടയുള്ള പ്രതികൂല ആഘാതങ്ങളെ ഒരു പരിധിവരെ പ്രതിരോധിക്കാന് സഹായിക്കും.
അതേസമയം, പസഫിക് സമുദ്രത്തിലെ മാറിക്കൊണ്ടിരിക്കുന്ന സാഹചര്യങ്ങള് സൂക്ഷ്മമായി നിരീക്ഷിച്ചുവരികയാണെന്നും മണ്സൂണ് കാലയളവില് എല്ലാ മാസവും കൃത്യമായ അപ്ഡേറ്റുകള് പുറത്തുവിടുമെന്നും ഇന്ത്യന് കാലാവസ്ഥാ നിരീക്ഷണ കേന്ദ്രം അറിയിച്ചു.
English Summary: The India Meteorological Department (IMD) has officially confirmed the onset of El Niño conditions over the equatorial Pacific Ocean. According to the latest ENSO and Indian Ocean Dipole (IOD) bulletin, sea surface temperatures in the central and eastern Pacific have crossed the threshold required for an El Niño declaration. Forecast models indicate that the phenomenon is likely to strengthen as the southwest monsoon season progresses.