Gender

രണ്ടിലധികം പങ്കാളികള്‍ക്ക് നിയമപരമായ അംഗീകാരം; വെസ്റ്റ് ഹോളിവുഡ് പ്രണയത്തിന്റെയും ബന്ധങ്ങളുടെയും പരമ്പരാഗത അതിരുകള്‍ തിരുത്തുമ്പോള്‍...

ഒരേ സമയം ഒന്നിലധികം വ്യക്തികളുമായി പരസ്പര സമ്മതത്തോടെ പ്രണയത്തിലോ ലൈംഗിക ബന്ധത്തിലോ ഏര്‍പ്പെടുന്ന ജീവിതരീതിയെയാണ് പോളിയാമറി എന്ന് വിശേഷിപ്പിക്കുന്നത്

Madism Desk

രണ്ടില്‍ കൂടുതല്‍ ആളുകള്‍ ഉള്‍പ്പെടുന്ന പ്രണയബന്ധങ്ങളെയും കുടുംബഘടനകളെയും നിയമപരമായി അംഗീകരിച്ചുകൊണ്ട് അമേരിക്കയിലെ വെസ്റ്റ് ഹോളിവുഡ് നഗരം ചരിത്രപരമായ ഒരു ചുവടുവെപ്പ് നടത്തിയിരിക്കുകയാണ്. 'പോളിയാമറി' (Polyamorous) എന്ന് വിളിക്കപ്പെടുന്ന, മൂന്നോ അതിലധികമോ ആളുകള്‍ പരസ്പര സമ്മതത്തോടെ പുലര്‍ത്തുന്ന ബന്ധങ്ങളില്‍ ജീവിക്കുന്നവര്‍ക്ക് ഇനി നഗരത്തില്‍ 'ഡൊമസ്റ്റിക് പാര്‍ട്ണര്‍മാര്‍' ആയി രജിസ്റ്റര്‍ ചെയ്യാം.

സിറ്റി കൗണ്‍സില്‍ ഏകകണ്‌ഠേന അംഗീകരിച്ച ഈ പുതിയ ഓര്‍ഡിനന്‍സ്, പരമ്പരാഗത കുടുംബ സങ്കല്‍പ്പങ്ങള്‍ക്ക് പുറത്തു ജീവിക്കുന്ന മനുഷ്യര്‍ക്ക് വ്യക്തിഗതവും പ്രായോഗികവുമായ നിരവധി നിയമപരമായ സംരക്ഷണങ്ങള്‍ ഉറപ്പുനല്‍കുന്നു.

എന്താണ് പോളിയാമറി?

ഒരേ സമയം ഒന്നിലധികം വ്യക്തികളുമായി പരസ്പര സമ്മതത്തോടെ പ്രണയത്തിലോ ലൈംഗിക ബന്ധത്തിലോ ഏര്‍പ്പെടുന്ന ജീവിതരീതിയെയാണ് പോളിയാമറി എന്ന് വിശേഷിപ്പിക്കുന്നത്. മറ്റു ബന്ധങ്ങളില്‍ നിന്നും പോളിയാമറിയെ വേര്‍തിരിക്കുന്നത് പങ്കാളികള്‍ക്കിടയിലുള്ള പരസ്പര സത്യസന്ധതയും തുറന്ന ആശയവിനിമയവുമാണ്. മൂന്ന് വ്യക്തികള്‍ ഉള്‍പ്പെടുന്ന പ്രണയബന്ധത്തെ 'ത്രപ്പിള്‍' (Throuple) എന്നും നാല് വ്യക്തികള്‍ ഉള്‍പ്പെടുന്ന പങ്കാളിത്തത്തെ 'ഫോര്‍സം' (Foursome) എന്നും വിളിക്കുന്നു. എന്നിരുന്നാലും, പോളിയാമറസ് ബന്ധത്തില്‍ ജീവിക്കുന്നവര്‍ ഒരേ വീടിനുള്ളില്‍ത്തന്നെ താമസിക്കുന്നവരാകണമെന്നോ ഏതെങ്കിലും ഒരു പ്രത്യേക ചട്ടക്കൂടില്‍ ഒതുങ്ങി ജീവിക്കുന്നവരാകണമെന്നോ നിര്‍ബന്ധമില്ല.

വെസ്റ്റ് ഹോളിവുഡിലെ പുതിയ നിയമം

മേയര്‍ ജോണ്‍ ഹെയ്ല്‍മാന്‍ അവതരിപ്പിച്ച ഓര്‍ഡിനന്‍സ് വെസ്റ്റ് ഹോളിവുഡ് സിറ്റി കൗണ്‍സില്‍ ഏകകണ്‌ഠേന അംഗീകരിക്കുകയായിരുന്നു. പുതിയ വ്യവസ്ഥകള്‍ അനുസരിച്ച്, പരസ്പര സമ്മതമുള്ള മൂന്നോ അതിലധികമോ മുതിര്‍ന്ന വ്യക്തികള്‍ക്ക് ആവശ്യമായ രേഖകള്‍ സിറ്റി ക്ലര്‍ക്ക് മുന്‍പാകെ സമര്‍പ്പിച്ച് തങ്ങളുടെ പങ്കാളിത്തം ഔദ്യോഗികമായി രജിസ്റ്റര്‍ ചെയ്യാന്‍ സാധിക്കും. വെസ്റ്റ് ഹോളിവുഡില്‍ സ്ഥിരതാമസക്കാരല്ലാത്തവര്‍ക്കും ഈ രജിസ്‌ട്രേഷന്‍ സൗകര്യം പ്രയോജനപ്പെടുത്താമെന്നത് ഇതിന്റെ ഒരു പ്രത്യേകതയാണ്. എങ്കിലും, പങ്കാളികള്‍ തമ്മില്‍ യാതൊരുവിധ രക്തബന്ധവും ഉണ്ടാകരുത് എന്നതും എല്ലാവരുടെയും വ്യക്തമായ സമ്മതം ഉണ്ടായിരിക്കണമെന്നതും നിര്‍ബന്ധമാണ്.

അതേസമയം, ഈ തീരുമാനം ബഹുഭാര്യത്വത്തിനോ ബഹുഭര്‍ത്തൃത്വത്തിനോ ഉള്ള അനുമതിയല്ല. കാലിഫോര്‍ണിയ സംസ്ഥാന നിയമപ്രകാരം വിവാഹിതര്‍ക്ക് ലഭിക്കുന്ന പൂര്‍ണ്ണമായ വിവാഹ അവകാശങ്ങളോ, ഫെഡറല്‍ നികുതി ആനുകൂല്യങ്ങളോ, പാരമ്പര്യ സ്വത്തവകാശമോ ഈ രജിസ്‌ട്രേഷന്‍ വഴി സ്വയമേവ ലഭിക്കുകയുമില്ല.

എന്തുകൊണ്ട് ഇത്തരമൊരു തീരുമാനം?

ബഹുപങ്കാളിത്ത ബന്ധങ്ങളില്‍ ജീവിക്കുന്നവര്‍ നേരിടുന്ന ദൈനംദിന പ്രായോഗിക ബുദ്ധിമുട്ടുകള്‍ക്ക് പരിഹാരം കാണുകയാണ് ഈ നഗരസഭ ഓര്‍ഡിനന്‍സിന്റെ പ്രധാന ലക്ഷ്യം. ഇതിലൂടെ രജിസ്റ്റര്‍ ചെയ്ത പങ്കാളികളില്‍ ആര്‍ക്കെങ്കിലും ആരോഗ്യപ്രശ്‌നങ്ങള്‍ ഉണ്ടാകുമ്പോള്‍ ആശുപത്രികളില്‍ സന്ദര്‍ശിക്കാനും സുപ്രധാന വിവരങ്ങള്‍ അറിയാനുമുള്ള അവകാശം നിയമം നല്‍കുന്നു. കൂടാതെ, വാടകവീടുകളില്‍ താമസിക്കുമ്പോള്‍ ഏതെങ്കിലും ഒരു പങ്കാളി മാറിപ്പോയാലും ബാക്കിയുള്ളവര്‍ക്ക് താമസാവകാശം നഷ്ടപ്പെടാതിരിക്കാനുള്ള പരിരക്ഷയും ഈ നിയമം ഉറപ്പുനല്‍കുന്നു.

മാറുന്ന സമൂഹവും നിയമ വ്യവസ്ഥകളും

പരമ്പരാഗത പങ്കാളിത്ത സങ്കല്‍പ്പങ്ങളെ ചോദ്യം ചെയ്യുന്നു എന്ന പേരില്‍ വിമര്‍ശനങ്ങള്‍ നേരിടുന്നുണ്ടെങ്കിലും മാറുന്ന ലോകത്ത് വ്യത്യസ്ത ജീവിതരീതികള്‍ തിരഞ്ഞെടുക്കുന്ന മനുഷ്യരുടെ അവകാശ സംരക്ഷണം ഉറപ്പാക്കാന്‍ പ്രാദേശിക സര്‍ക്കാരുകള്‍ മുന്നോട്ടുവരുന്നു എന്നതിന്റെ തെളിവാണ് ഈ തീരുമാനം. നേരത്തെ മസാച്യുസെറ്റ്‌സിലെ സോമര്‍വില്ലെ, കേംബ്രിഡ്ജ് എന്നീ നഗരങ്ങളും സമാനമായ ഡൊമസ്റ്റിക് പാര്‍ട്ണര്‍ഷിപ്പ് നിയമങ്ങള്‍ നടപ്പാക്കിയിരുന്നു. വിവാഹ നിയമങ്ങളില്‍ മാറ്റം വരുത്താതെ തന്നെ, വൈവിധ്യമാര്‍ന്ന കുടുംബഘടനകളെ ഉള്‍ക്കൊള്ളാന്‍ അമേരിക്കന്‍ നഗരങ്ങള്‍ നടത്തുന്ന ശ്രമങ്ങളുടെ ഭാഗമാണ് വെസ്റ്റ് ഹോളിവുഡിന്റെ ഈ ചരിത്രപരമായ മുന്നേറ്റം.

West Hollywood, a city in California, has taken a historic step towards recognising diverse relationship and family structures by legally acknowledging consensual relationships involving more than two partners. Under a new ordinance unanimously approved by the City Council, three or more consenting adults can now register as domestic partners, including those in polyamorous relationships. Introduced by Mayor John Heilman, the ordinance allows multiple adults to formally register their partnerships by submitting the required documents to the City Clerk. Even people who do not reside permanently in West Hollywood can access the registration facility, provided all partners are consenting adults and are not related by blood.