കോവിഡ് വാക്സിനുകൾ എടുത്തതിന് ശേഷം യുവാക്കൾക്കിടയിൽ ഹൃദയാഘാത നിരക്ക് വർദ്ധിക്കുന്നുണ്ടോ? കോവിഡാനന്തര കാലഘട്ടത്തിൽ സമൂഹത്തിൽ പലരിലും നിലനിൽക്കുന്ന ഒരു പ്രധാന ആശങ്കയാണിത്. എന്നാൽ ഈ ആശങ്കകൾക്ക് വിരാമമിട്ടുകൊണ്ട് ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റെ (ICMR) സുപ്രധാനമായ ഒരു പഠനം പുറത്തുവന്നിരിക്കുന്നു. വാക്സിനുകളും ഹൃദയാഘാതവും തമ്മിൽ യാതൊരു ബന്ധവുമില്ലെന്നാണ് പഠനം വ്യക്തമാക്കുന്നത്.
ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന് കീഴിലുള്ള നാഷണൽ ഇൻസ്റ്റിറ്റ്യൂട്ട് ഓഫ് എപ്പിഡെമിയോളജി (ICMR-NIE) ആണ് ഈ പഠനം നടത്തിയത്. ഇന്ത്യയിലുടനീളമുള്ള 25 വലിയ ആശുപത്രികൾ കേന്ദ്രീകരിച്ചായിരുന്നു പഠനം. 18 മുതൽ 45 വയസ്സുവരെയുള്ള യുവാക്കളിലാണ് ഗവേഷകർ പ്രധാനമായും ശ്രദ്ധ കേന്ദ്രീകരിച്ചത്. 432 ഹൃദയാഘാത കേസുകളും രക്തം കട്ടപിടിച്ചതുമായി ബന്ധപ്പെട്ട 767 കേസുകളുമാണ് ഇവർ വിശദമായി പരിശോധിച്ചത്.
പ്രധാന കാരണം വാക്സിന് അല്ല, ജീവിതശൈലി
'ഫാക്ടേഴ്സ് അസോസിയേറ്റഡ് വിത്ത് ത്രോംബോട്ടിക് ഇവന്റ്സ് 2021-23' എന്ന പഠനറിപ്പോർട്ട് പ്രകാരം രക്തക്കുഴലുകളിൽ രക്തം കട്ടപിടിക്കുന്നതിന് കാരണമാകുന്ന പ്രധാന ഘടകം പുകവലിയാണ്. കൂടാതെ, പ്രമേഹം, രക്തസമ്മർദ്ദം തുടങ്ങിയ മറ്റ് ജീവിതശൈലീ രോഗങ്ങൾ മുൻപേ ഉള്ളവരിൽ ഹൃദയാഘാത സാധ്യത കൂടുതലാണ്. കുടുംബത്തിൽ പാരമ്പര്യമായി രക്തം കട്ടപിടിക്കുന്ന അസുഖമുള്ളവരിൽ സ്വാഭാവികമായും ഈ അവസ്ഥ വരാനുള്ള സാധ്യത കൂടുതലാണ്. ഇതോടൊപ്പം, മുൻപ് കൊറോണ വൈറസ് ബാധിച്ച് ഗുരുതരാവസ്ഥയിൽ ആശുപത്രിയിലായവരിൽ പിൽക്കാലത്ത് ഹൃദയാഘാത സാധ്യത കൂടുതലായി കാണപ്പെടുന്നുണ്ട്.
2023 മെയ് വരെ ഇന്ത്യയില് കോവിഡ് വാക്സിന് അര്ഹരായവരില് 97 ശതമാനം പേര് കുറഞ്ഞത് ഒരു ഡോസെങ്കിലും സ്വീകരിച്ചപ്പോള്, 90 ശതമാനം പേര് രണ്ട് ഡോസുകളും സ്വീകരിച്ചിരുന്നു. വാക്സിനുകൾ സുരക്ഷിതമാണെന്ന് മാത്രമല്ല, കോവിഡ് മൂലമുള്ള ഗുരുതരമായ അസുഖങ്ങൾ, ആശുപത്രിവാസം, മരണം, മറ്റ് ദീർഘകാല ആരോഗ്യപ്രശ്നങ്ങൾ എന്നിവ തടയുന്നതിൽ അവ വലിയ പങ്കുവഹിച്ചിട്ടുണ്ടെന്നും റിപ്പോർട്ട് അടിവരയിടുന്നു.
കൊറോണ വൈറസ് വ്യാപനം ശക്തമായിരുന്ന കാലയളവിലാണ് ഈ പഠനം നടത്തിയത്. എന്നാൽ ഇന്ത്യയിൽ നൽകിയിരുന്ന കോവിഡ് വാക്സിനുകളുടെ രണ്ടോ അതിലധികമോ ഡോസുകൾ സ്വീകരിച്ച യുവാക്കളിൽ ഹൃദയാഘാതത്തിനുള്ള യാതൊരുവിധ അധിക സാധ്യതയും കണ്ടെത്താൻ ഗവേഷകർക്ക് കഴിഞ്ഞിട്ടില്ല. അതിനാൽ വാക്സിൻ സുരക്ഷിതമാണെന്നും യുവാക്കൾക്കിടയിലെ ഹൃദയാഘാതത്തിന് കാരണം മുകളിൽ പറഞ്ഞ ജീവിതശൈലീ-ആരോഗ്യ പ്രശ്നങ്ങളാണെന്നും ഈ പഠനം ശാസ്ത്രീയമായി ഉറപ്പിച്ചു പറയുന്നു.
A nationwide ICMR study has found no evidence that COVID-19 vaccines, including Covishield and Covaxin, increase the risk of heart attacks or blood clot-related events in adults. The research identified smoking, pre-existing medical conditions, family history, and severe COVID-19 infection as the major risk factors for such health problems. The findings reinforce the safety of COVID-19 vaccines and encourage people to focus on managing lifestyle and health risks.