ഇന്ത്യയില് പ്രമേഹമെന്നത് കേവലം ഒരു രോഗമല്ല, മറിച്ച് ദശലക്ഷക്കണക്കിന് ആളുകളുടെ ജീവിതശൈലിയെ തന്നെ നിയന്ത്രിക്കുന്ന നിത്യജീവിതത്തിന്റെ ഭാഗമായി മാറിയിരിക്കുന്നു. പതിറ്റാണ്ടുകളായി, രക്തത്തിലെ പഞ്ചസാരയുടെ അളവ് നിയന്ത്രിക്കാന് ദിവസവും ഒന്നോ അതിലധികമോ തവണയുള്ള ഇന്സുലിന് കുത്തിവയ്പുകളെന്നതു രോഗികള്ക്ക് ഒഴിവാക്കാനാവാത്ത ഒരു ബാധ്യതയായിരുന്നു. കുത്തിവയ്പുകളോടുള്ള ഭയം, വേദന, യാത്രകളിലും ജോലിസ്ഥലത്തും അതു കൈകാര്യം ചെയ്യേണ്ടി വരുന്ന ബുദ്ധിമുട്ടുകള് ഇതെല്ലാം പലരെയും ഇന്സുലിന് ചികിത്സയില്നിന്ന് അകറ്റിനിര്ത്തിയിരുന്നു.
ഈ വിമുഖത പലപ്പോഴും രോഗം കൂടുതല് സങ്കീര്ണമാകുന്നതിലേക്കും മറ്റ് അവയവങ്ങളെ ബാധിക്കുന്നതിലേക്കും നയിക്കാറുണ്ട്. എന്നാല്, പ്രമേഹ ചികിത്സാ ചരിത്രത്തിലെ ഏറ്റവും പുതിയ കണ്ടുപിടുത്തം ഈ പ്രതിസന്ധികള്ക്കു വലിയൊരു അന്ത്യം കുറിക്കുകയാണ്. നോവോ നോര്ഡിസ്ക് പുറത്തിറക്കിയ 'അവിക്ലി'എന്ന ആഴ്ചയിലൊരിക്കല് മാത്രം എടുക്കാവുന്ന ഇന്സുലിന് കുത്തിവയ്പ് ഇപ്പോള് ഇന്ത്യയിലും ലഭ്യമായിരിക്കുന്നു. വര്ഷത്തില് 365 തവണ കുത്തിവെക്കേണ്ടിയിരുന്ന സ്ഥാനത്ത് വെറും 52 തവണ മാത്രം മതിയാകുന്ന ഈ പുതിയ സാങ്കേതികവിദ്യ, ഒരു പ്രമേഹരോഗിയുടെ ജീവിതത്തെ എത്രത്തോളം ഈസിയാക്കും? വെറും 50 രൂപ പ്രതിദിന ചെലവില് പ്രമേഹം നിയന്ത്രിക്കാന് കഴിയുമെന്ന അവകാശവാദം എത്രത്തോളം യാഥാര്ത്ഥ്യമാണ്? പ്രമേഹത്തെ ഭേദമാക്കുമോ അതോ നിയന്ത്രിക്കുമോ?
അതെ, ഇത് സാമ്പത്തികമായി പരിശോധിച്ചാല് മറ്റു പല ഇന്സുലിന് അനലോഗുകളെ അപേക്ഷിച്ച് ലാഭകരമാണ്. ഒരു രോഗിക്ക് ആഴ്ചയില് ശരാശരി 70 യൂണിറ്റ് ഇന്സുലിന് ആവശ്യമാണെന്ന് കരുതുക. ഇതിനുള്ള ചെലവ് 262.50 രൂപയാണ്. അതായത്, ഒരു ദിവസത്തേക്ക് ഏകദേശം 37.50 രൂപ മാത്രമേ വരുന്നുള്ളൂ. നിലവില് ലഭ്യമായ മറ്റു ദീര്ഘകാല ഇന്സുലിന് കുത്തിവയ്പുകള്ക്ക് ആഴ്ചയില് 345 മുതല് 453 രൂപ വരെ ചെലവ് വരുന്നുണ്ട്. അതിനാല്, വിലയുടെ കാര്യത്തില് ഇതൊരു വലിയ മുന്നേറ്റമാണ്.
ഐകോഡെക് എന്ന് വിളിക്കപ്പെടുന്ന ഈ മരുന്നിന് രണ്ട് പ്രത്യേകതകളുണ്ട്:
1. ആല്ബുമിന് ബൈന്ഡിങ്: മരുന്ന് ശരീരത്തില് കടക്കുമ്പോള് രക്തത്തിലെ പ്രോട്ടീനായ ആല്ബുമിനുമായി ചേര്ന്ന് ഒരു സംഭരണ കേന്ദ്രം ഉണ്ടാക്കുന്നു. ആഴ്ച മുഴുവന് ചെറിയ അളവില് ഇന്സുലിന് രക്തത്തിലേക്ക് പുറത്തുവിടാന് ഇത് സഹായിക്കുന്നു.
കുറഞ്ഞ റിസപ്റ്റര് അഫിനിറ്റി: മരുന്നിന്റെ തീവ്രത കുറവായതിനാല് അത് സാവധാനം മാത്രമേ ഉപയോഗിക്കപ്പെടുകയുള്ളൂ. ഇത് മരുന്നിന്റെ ഫലപ്രാപ്തി കുറയ്ക്കുന്നില്ല, മറിച്ച് അതിന്റെ കാലാവധി വര്ധിപ്പിക്കുകയാണു ചെയ്യുന്നത്.
ഇവിടെ ശ്രദ്ധിക്കേണ്ട ഒരു പ്രധാന കാര്യമുണ്ട്. ഇതൊരു 'ക്യുവര്' അഥവാ പ്രമേഹം പൂര്ണമായും ഭേദമാക്കുന്ന മരുന്നല്ല. പ്രമേഹം കൃത്യമായി നിയന്ത്രിക്കാനുള്ള ഒരു മാര്ഗം മാത്രമാണ്.
ഭക്ഷണക്രമവും വ്യായാമവും: ഈ ഇന്സുലിന് എടുത്താലും ആരോഗ്യകരമായ ഭക്ഷണരീതിയും കൃത്യമായ വ്യായാമവും തുടരണം.
ടൈപ്പ് 1 രോഗികള്ക്ക്: ടൈപ്പ് 1 പ്രമേഹമുള്ളവര്ക്കു ബേസ് ഡോസ് ആവശ്യത്തിന് ഇത് സഹായിക്കുമെങ്കിലും ഭക്ഷണം കഴിക്കുമ്പോള് എടുക്കേണ്ട ബോലസ് ഡോസുകള് ആവശ്യമായി വരും. ദിവസവും ഇന്സുലിന് എടുക്കുന്നവരിലെന്ന പോലെ ഇതിലും 'ഹൈപ്പോഗ്ലൈസീമിയ' (പഞ്ചസാര വല്ലാതെ കുറയുന്നത്) ഉണ്ടാകാന് സാധ്യതയുണ്ട്. എന്നാല് ദിവസേനയുള്ള ഇന്സുലിനേക്കാള് അധികമായുള്ള സുരക്ഷാ ഭീഷണിയില്ല.
ഇന്ത്യയില് പ്രമേഹം വൈകി ചികിത്സിക്കുന്നതു വൃക്ക, കണ്ണ്, ഞരമ്പുകള് എന്നിവയെ ഗുരുതരമായി ബാധിക്കുന്നു. ചികിത്സയോടുള്ള ഭയം കുറയ്ക്കുന്നതിലൂടെ കൂടുതല് ആളുകള് നേരത്തെ ചികിത്സയിലേക്കു വരാന് ഇതു വഴിയൊരുക്കും. പ്രമേഹം ഒരു ഭാരമായി കൊണ്ടുനടക്കുന്ന പലര്ക്കും ആഴ്ചയിലൊരിക്കല് മാത്രം ശ്രദ്ധിച്ചാല് മതിയെന്നതു മാനസികമായ വലിയൊരു സമ്മര്ദ്ദമുക്തിയാണു നല്കുന്നത്.
A major breakthrough in diabetes care has reached India with the launch of Awiqli, Novo Nordisk's once-weekly insulin injection. The new treatment reduces the number of insulin injections from 365 per year to just 52, offering greater convenience for people who require insulin therapy. The innovation has sparked interest over its potential to improve quality of life and claims that diabetes management could cost as little as ₹50 per day. However, while once-weekly insulin can simplify treatment and help control blood sugar, it is not a cure for diabetes and should be used only under medical supervision.