ഇതിഹാസ ഗായിക ആശാ ഭോസ്ലെ (92) അന്തരിച്ചു. ഹൃദയസംബന്ധമായ അസുഖങ്ങളെത്തുടർന്നും ശ്വാസതടസ്സം അനുഭവപ്പെട്ടതിനാലും മുംബൈയിലെ ബ്രീച്ച് കാൻഡി ആശുപത്രിയിൽ ചികിത്സയിലായിരുന്നു. ഇന്ന് പുലർച്ചെയോടെയായിരുന്നു അന്ത്യം. മകൻ ആനന്ദ് ഭോസ്ലെയാണ് മരണവാർത്ത മാധ്യമങ്ങളെ അറിയിച്ചത്.
കഴിഞ്ഞ കുറച്ചു മാസങ്ങളായി വാർദ്ധക്യസഹജമായ ആരോഗ്യപ്രശ്നങ്ങൾ അലട്ടിയിരുന്ന ഗായികയെ, നില വഷളായതിനെത്തുടർന്ന് അതീവ ഗുരുതരാവസ്ഥയിലാണ് ആശുപത്രിയിൽ പ്രവേശിപ്പിച്ചത്. വിദഗ്ധ ഡോക്ടർമാരുടെ മേൽനോട്ടത്തിൽ തീവ്രപരിചരണ വിഭാഗത്തിൽ ചികിത്സ തുടരുന്നതിനിടെയായിരുന്നു അന്ത്യം സംഭവിച്ചത്.
ഇന്ത്യൻ ചലച്ചിത്ര സംഗീത ലോകത്തെ സമാനതകളില്ലാത്ത ശബ്ദസാന്നിധ്യമായിരുന്ന ആശാ ഭോസ്ലെയുടെ വിയോഗം സംഗീത പ്രേമികൾക്ക് വലിയ ആഘാതമാണ് സൃഷ്ടിച്ചിരിക്കുന്നത്.
ഒൻപതാം വയസ്സിൽ തുടങ്ങിയ സംഗീത യാത്ര
1933-ൽ പ്രശസ്തമായ മങ്കേഷ്കർ കുടുംബത്തിൽ ജനിച്ച ആശാ, തന്റെ ഒൻപതാം വയസ്സിലാണ് പ്രൊഫഷണൽ സംഗീത ലോകത്തേക്ക് ചുവടുവെക്കുന്നത്. 1943-ൽ ആദ്യമായി സിനിമാ ഗാനം ആലപിച്ച അവർ, 50-കളോടെ ബോളിവുഡിൽ തന്റേതായ ഇടം കണ്ടെത്തി. തുടർന്നുള്ള മൂന്ന് പതിറ്റാണ്ടോളം ഇന്ത്യൻ സംഗീത സംവിധായകരുടെ ഏറ്റവും പ്രിയപ്പെട്ട ഗായികയായി അവർ തുടർന്നു.
പരിമിതികളെ മറികടന്ന വൈവിധ്യം
കരിയറിന്റെ തുടക്കത്തിൽ കാബറേ ഗാനങ്ങൾക്കും നൃത്ത ഗാനങ്ങൾക്കും (ഇന്നത്തെ ഐറ്റം സോങ്ങ്സ്) വേണ്ടി മാത്രമുള്ള ശബ്ദമായി അവർ മുദ്രകുത്തപ്പെട്ടിരുന്നു. എന്നാൽ, 'ഉമ്രാവോ ജാൻ' പോലെയുള്ള ചിത്രങ്ങളിലെ ഹൃദയസ്പർശിയായ ഗസലുകളിലൂടെ ആ മുൻധാരണകളെ അവർ തകർത്തു. ഏത് തരം പാട്ടുകളും തനിക്ക് വഴങ്ങുമെന്ന് അവർ ലോകത്തിന് തെളിയിച്ചു കൊടുത്തു.
സംഗീത ലോകത്തെ നിരവധി ഉന്നത പുരസ്കാരങ്ങൾ ആശയെതേടിയെത്തിയിട്ടുണ്ട്:
2008 ല് രാജ്യം പദ്മവിഭൂഷന് നല്കി ആദരിച്ചു.
ദേശീയ പുരസ്കാരം: രണ്ട് തവണ (ദിൽ ചീസ് ക്യാ ഹേ - ഉമ്രാവോ ജാൻ(1981), മേരാ കുച്ച് സാമാൻ - ഇജാസത്ത്(1987)).
ഫിലിംഫെയർ അവാർഡ്: മികച്ച പിന്നണി ഗായിക്കുള്ള പുരസ്കാരം ഏഴ് തവണ സ്വന്തമാക്കി. 2001 ല് ഫിലിംഫെയര് ലൈഫ് ടൈം അച്ചീവ്മെന്റ് അവാര്ഡ് നല്കി ആദരിച്ചു. 1996 ല് ഫിലിംഫെയര് സ്പെഷ്യല് അവാര്ഡും ലഭിച്ചു.
ഇതിനു പുറമെ ദാദാ സാഹേബ് ഫാല്ക്കെ അവാര്ഡ്(2001), ഐ ഐ എഫ് എ(അന്താരാഷ്ട്ര ഇന്ത്യന് ഫിലിം അക്കാഡമി അവാര്ഡ്സ്) യുടെ ലൈഫ് ടൈം അച്ചീവ്മെന്റ് അവാര്ഡ് എന്നിവ ആശയെ തേടിയെത്തി.
മഹാരാഷ്ട്ര സംസ്ഥാന ചലച്ചിത്ര പുരസ്കാരത്തില് മികച്ച പിന്നണി ഗായികയ്ക്കുള്ള പുരസ്കാരം റെക്കോര്ഡ് നമ്പറായ 18 തവണ സ്വന്തമാക്കി.
English Summary: famous singer Asha Bhosle died at the age of 92 in a private hospital of Mumbai. She contributed over 12,000 songs to the Indian music industry.