അതിഥികളെ കൊണ്ടുവരൂ, സമ്മാനം നേടൂ: വിനോദസഞ്ചാരികളെ തിരികെയെത്തിക്കാൻ ദുബായിയുടെ കിടിലൻ തന്ത്രം

യുഎസ്-ഇറാൻ യുദ്ധം രൂക്ഷമായതോടെ ദുബായിലെ ടൂറിസം മേഖല വലിയ വെല്ലുവിളിയാണ് നേരിടുന്നത്. സുരക്ഷിതവും ആഡംബരപൂർണവുമായി നഗരം എന്ന ദുബായിയുടെ പ്രതിച്ഛായക്ക് യുദ്ധം മങ്ങലേൽപ്പിച്ചിട്ടുണ്ട്. ഈ പ്രതിസന്ധി മറികടക്കാൻ സുഹൃത്തുക്കളെയും ബന്ധുക്കളെയും ദുബായിലേക്ക് ക്ഷണിക്കുന്ന താമസക്കാർക്ക് ആകർഷകമായ ഓഫറുകളുമായി ദുബായ് ഡിപ്പാർട്ട്മെന്റ് ഓഫ് ഇക്കണോമി ആൻഡ് ടൂറിസം രംഗത്തെത്തിയിരിക്കുകയാണ്.

ദുബായി ഇൻവൈറ്റ് എന്ന പദ്ധതിക്ക് കീഴിലാണ് ഈ ഓഫറുകൾ പ്രഖ്യാപിച്ചിരിക്കുന്നത്. ദുബായിലെ താമസക്കാർക്ക് അവരുടെ സുഹൃത്തുക്കളെയോ ബന്ധുക്കളെയോ ദുബായിലേക്ക് ക്ഷണിക്കാം. ഈ ക്ഷണം സ്വീകരിച്ച് അവർ ദുബായിൽ എത്തിയാൽ ക്ഷണിച്ചയാൾക്ക് 3,000 യുഎഇ ദിർഹം (ഏകദേശം 68,000 രൂപ) വരെയുള്ള ആനുകൂല്യങ്ങൾ ലഭിക്കും. ഹോട്ടൽ താമസം, ഭക്ഷണശാലകളിലെ ഡിസ്കൗണ്ടുകൾ, വിനോദസഞ്ചാര കേന്ദ്രങ്ങളിലേക്കുള്ള ടിക്കറ്റുകൾ എന്നിവ ഇതിൽ ഉൾപ്പെടുന്നു.

ഒക്ടോബർ 31നകം എത്തുന്ന വിനോദസഞ്ചാരികളെ ക്ഷണിക്കുന്നതിനാണ് ഈ ആനുകൂല്യങ്ങൾ ലഭിക്കുക, എന്നാൽ ഡിസംബർ വരെ ഈ ഓഫറുകൾ ഉപയോഗിക്കാം. ഒരാൾക്ക് പരമാവധി മൂന്ന് പേരെ മാത്രമേ ക്ഷണിക്കാൻ സാധിക്കൂ. ക്ഷണിക്കപ്പെടുന്നവർ യുഎഇ താമസക്കാർ ആകാൻ പാടില്ല കൂടാതെ അവർക്ക് സാധുവായ ടൂറിസ്റ്റ് വിസ ഉണ്ടായിരിക്കണം.

കഴിഞ്ഞ വർഷം 20 ദശലക്ഷത്തോളം വിനോദസഞ്ചാരികളാണ് ദുബായിലെത്തിയത്. ഇതൊരു റെക്കോർഡ് ആയിരുന്നു. എന്നാൽ യുഎസ്-ഇറാൻ യുദ്ധം പൊട്ടിപ്പുറപ്പെട്ടതോടെ ഈ സംഖ്യയിൽ ഗണ്യമായ കുറവുണ്ടായി. ഫെബ്രുവരിയിൽ ഇറാൻ നടത്തിയ മിസൈൽ-ഡ്രോൺ ആക്രമണങ്ങളിൽ ഫെയർമോണ്ട് ഹോട്ടലിനും ദുബായ് അന്താരാഷ്ട്ര വിമാനത്താവളത്തിനും കേടുപാടുകൾ സംഭവിച്ചിരുന്നു. ഇത് വിനോദസഞ്ചാരികളിൽ ആശങ്ക സൃഷ്ടിച്ചു.

പല വിമാനക്കമ്പനികളും മിഡിൽ ഈസ്റ്റ് വഴിയുള്ള സർവീസുകൾ വെട്ടിച്ചുരുക്കി. ദുബായിലെ ഹോട്ടലുകളിൽ മുറികൾ ഒഴിഞ്ഞുകിടക്കുന്ന അവസ്ഥയാണ്. പല വ്യാപാര സ്ഥാപനങ്ങളുടെയും വരുമാനത്തിൽ 50 ശതമാനത്തിലധികം ഇടിവ് രേഖപ്പെടുത്തിയിട്ടുണ്ട്. പ്രശസ്തമായ പല ഹോട്ടലുകളും അടച്ചുപൂട്ടിയിരിക്കുകയാണ്. ബുർജ് അൽ അറബ് പോലെയുള്ള ചില ഹോട്ടലുകൾ അറ്റകുറ്റപ്പണികൾക്കായി ഒന്നര വർഷത്തേക്ക് അടച്ചിടും. എന്നാൽ ചില ഹോട്ടലുകൾ പുതിയ പദ്ധതിയുടെ ഭാഗമായി 45 ശതമാനം വരെ ഡിസ്കൗണ്ടുകളും സൗജന്യ താമസവും വാഗ്ദാനം ചെയ്യുന്നുണ്ട്.

പദ്ധതി പ്രഖ്യാപിച്ചതിന് ശേഷം ആദ്യ 48 മണിക്കൂറിനുള്ളിൽ 10,000-ത്തിലധികം അപേക്ഷകൾ ലഭിച്ചതായി പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. ഈ പുതിയ നീക്കം ദുബായിലെ ടൂറിസം മേഖലയെ പഴയ നിലയിലേക്ക് കൊണ്ടുവരുമെന്നാണ് പ്രതീക്ഷിക്കുന്നത്.