ഗൂഗിളിന്റെ നിർമിത ബുദ്ധി (എഐ) ടൂളായ ജെമിനി ഉപയോഗിച്ച് ഡീപ്ഫേക്ക് വീഡിയോ നിർമിച്ച് വൻ ബാങ്ക് തട്ടിപ്പ് നടത്തിയ സംഭവത്തിൽ നാലംഗ സംഘം അറസ്റ്റിൽ. ഒരു ബിസിനസുകാരന്റെ രൂപസാദൃശ്യം സംഘം വീഡിയോ രൂപത്തിൽ സൃഷ്ടിച്ച് അതുപയോഗിച്ച് ബാങ്ക് പരിശോധനാ സംവിധാനങ്ങളെ കബളിപ്പിക്കുകയായിരുന്നുവെന്നാണ് പൊലീസ് നൽകുന്ന വിവരം. ഗുജറാത്തിലെ അഹമ്മദാബാദിലാണ് സംഭവം.
ആധാർ അടിസ്ഥാനത്തിലുള്ള ബയോമെട്രിക് സ്ഥിരീകരണവും ഒടിപി സുരക്ഷാ സംവിധാനവും മറികടക്കാൻ പ്രതികൾ അത്യാധുനിക സാങ്കേതിക മാർഗങ്ങൾ ഉപയോഗിച്ചതായാണ് പൊലീസ് പറയുന്നത്.
തട്ടിപ്പിനിടെ, ഇരയുടെ ആധാറുമായി ബന്ധിപ്പിച്ചിരുന്ന മൊബൈൽ നമ്പർ അനധികൃതമായി മാറ്റുകയും, അതുവഴി ബാങ്കിൽ നിന്നുള്ള ഒടിപി സന്ദേശങ്ങൾ പ്രതികളുടെ നമ്പറിലേക്ക് എത്തിച്ചു. ഇതോടെ ഇരയ്ക്ക് ലഭിക്കേണ്ട സുരക്ഷാ അലർട്ടുകൾ തടയപ്പെട്ടു. തുടർന്ന്, ഇരയുടെ പേരിൽ വ്യാജ ബാങ്ക് അക്കൗണ്ടുകൾ തുറന്ന് വായ്പകൾ എടുത്തതായും അന്വേഷണത്തിൽ കണ്ടെത്തി. കൂടാതെ ഡിജിറ്റൽ രേഖകൾ ലഭിക്കാൻ ഡിജിലോക്കർ അക്കൗണ്ടിലേക്കും അനധികൃതമായി പ്രവേശിച്ചതായാണ് സംശയം.
ഒടിപി സന്ദേശങ്ങൾ ലഭിക്കാതായതിനെ തുടർന്ന് സംശയം തോന്നിയ ബിസിനസുകാരൻ പൊലീസിൽ പരാതി നൽകിയതോടെയാണ് തട്ടിപ്പ് പുറത്തായത്. പിന്നാലെ കനുഭായ് പാർമർ, ആശിഷ് വാനന്ദ്, മുഹമ്മദ് കൈഫ് പട്ടേൽ, ദീപ് ഗുപ്ത എന്നിവരെ അറസ്റ്റ് ചെയ്തു. ഇവരിൽ ഒരാൾ കോമൺ സർവീസ് സെന്റർ ജീവനക്കാരനാണെന്നും റിപ്പോർട്ടുണ്ട്. എഐ സാങ്കേതികവിദ്യകൾ സാമ്പത്തിക തട്ടിപ്പുകൾക്കായി ദുരുപയോഗം ചെയ്യപ്പെടുന്നുവെന്ന ആശങ്ക ഈ സംഭവത്തോടെ വീണ്ടും ശക്തമായി.
ഇത്തരം തട്ടിപ്പുകൾ വീണ്ടും സംഭവിക്കാതിരിക്കാൻ ശ്രദ്ധിക്കേണ്ട കാര്യങ്ങൾ
ബാങ്ക് അക്കൗണ്ടുമായി ബന്ധിപ്പിച്ച മൊബൈൽ നമ്പർ ഇടയ്ക്കിടെ പരിശോധിക്കുക
ഒടിപി, ബാങ്ക് അലർട്ടുകൾ ലഭിക്കാത്തത് ഉടൻ തന്നെ ബാങ്കിനെ അറിയിക്കുക
ആധാർ, മൊബൈൽ നമ്പർ, ഡിജിറ്റൽ അക്കൗണ്ടുകൾ എന്നിവയിൽ മാറ്റങ്ങൾ വന്നാൽ ഉടൻ അധികൃതരെ അറിയിക്കുക
ലിങ്കുകൾ/ആപ്പുകൾ വഴി വ്യക്തിഗത വിവരങ്ങൾ നൽകുന്നത് ഒഴിവാക്കുക
കൃത്യമായ പാസ്വേഡുകളും ടു-ഫാക്ടർ ഓതെന്റിക്കേഷൻ ഉപയോഗിക്കുക
സംശയാസ്പദമായ സാമ്പത്തിക ഇടപാടുകൾ ഉടൻ സൈബർ ക്രൈമിൽ റിപ്പോർട്ട് ചെയ്യുക
എഐ/ഡീപ്ഫേക്ക് അടിസ്ഥാനത്തിലുള്ള വ്യാജ വീഡിയോകളെയും സന്ദേശങ്ങളെയും ശ്രദ്ധാപൂർവ്വം പരിശോധിക്കുക
English Summary: A four-member gang has been arrested for using Google Gemini AI to create deepfake videos and commit bank fraud by bypassing OTP and biometric security systems, leading to large-scale financial scams.