തമിഴ്നാട്ടിലെ തിരുവള്ളൂര് ജില്ലയില് പെരിയപാളയത്തിനടുത്ത് സ്വകാര്യ കടല്വിഭവ കയറ്റുമതി സ്ഥാപനത്തിലുണ്ടായ അമോണിയ വാതകച്ചോര്ച്ചയില് ഏഴ് ഇതരസംസ്ഥാന സ്ത്രീ തൊഴിലാളികള് ദാരുണമായി മരണപ്പെട്ടു. വിഷവാതകം ശ്വസിച്ച് അബോധാവസ്ഥയിലാവുകയും ശ്വാസതടസ്സം അനുഭവപ്പെടുകയും ചെയ്ത അറുപതിലധികം തൊഴിലാളികളെ അതീവ ഗുരുതരാവസ്ഥയില് ആശുപത്രികളില് പ്രവേശിപ്പിച്ചു. ഫാക്ടറി ക്യാമ്പസിനുള്ളിലെ തൊഴിലാളികളുടെ താമസസ്ഥലത്തേക്ക് വാതകം അതിവേഗം പടര്ന്നതാണ് ദുരന്തത്തിന്റെ വ്യാപ്തി വര്ദ്ധിപ്പിച്ചത്.
പെരിയപാളയത്തിനടുത്തുള്ള കന്നിഗൈപ്പൂരിലെ 'സെന്റ് പീറ്റേഴ്സ് പോള് സീഫുഡ്സ് എക്സ്പോര്ട്ട്സ് പ്രൈവറ്റ് ലിമിറ്റഡ്' എന്ന സ്ഥാപനത്തിലാണ് അപകടമുണ്ടായത്. അസം, ഒഡീഷ, ജാര്ഖണ്ഡ് എന്നിവിടങ്ങളില് നിന്നുള്ള സ്ത്രീ തൊഴിലാളികള് ഉള്പ്പെടെ നൂറ്റിരുപതോളം ഇതരസംസ്ഥാന തൊഴിലാളികളാണ് കമ്പനി വളപ്പിലെ താമസസൗകര്യത്തില് കഴിഞ്ഞിരുന്നത്. ഞായറാഴ്ച ഫാക്ടറിക്ക് വാര്ഷിക അവധിയായതിനാല് ഭൂരിഭാഗം തൊഴിലാളികളും താമസസ്ഥലത്തുണ്ടായിരുന്ന സമയത്താണ് വാതകം പടര്ന്നത്.
പൊലീസ് വൃത്തങ്ങള് നല്കുന്ന വിവരമനുസരിച്ച്, സീഫുഡ് പ്രോസസിങ് യൂണിറ്റില് നിന്നുണ്ടായ അമോണിയ ചോര്ച്ച ക്യാമ്പസിനുള്ളിലെ താമസസ്ഥലത്തേക്ക് അതിവേഗം പടരുകയായിരുന്നു. പല തൊഴിലാളികള്ക്കും കടുത്ത ശ്വാസതടസ്സം അനുഭവപ്പെടുകയും ചിലരുടെ മൂക്കില് നിന്നും വായില് നിന്നും രക്തം വരികയും ചെയ്തു. 67 തൊഴിലാളികളെ ഉടന് തന്നെ പ്രാദേശിക മെഡിക്കല് സെന്ററുകളില് എത്തിച്ചതായി തിരുവള്ളൂര് ജില്ലാ കളക്ടര് എസ്. കവിത അറിയിച്ചു. ഇതില് 46 പേരെ വെല്സ് ആശുപത്രിയിലും 21 പേരെ വെങ്കിടേശ്വര ആശുപത്രിയിലും പ്രവേശിപ്പിച്ചു. ഗുരുതരാവസ്ഥയിലായ ഒന്പത് പേരെ വിദഗ്ധ ചികിത്സയ്ക്കായി ചെന്നൈയിലെ സര്ക്കാര് സ്റ്റാന്ലി മെഡിക്കല് കോളേജ് ആശുപത്രിയിലേക്ക് മാറ്റിയിട്ടുണ്ട്.
രക്ഷാപ്രവര്ത്തനം
പെരിയപാളയം പൊലീസ്, ഫയര് ആന്ഡ് റെസ്ക്യൂ സര്വീസസ്, റവന്യൂ വകുപ്പ്, ആരോഗ്യ വകുപ്പ് എന്നിവര് സംഭവസ്ഥലത്തെത്തി സംയുക്തമായി രക്ഷാപ്രവര്ത്തനം നടത്തി. ജില്ലാ ഭരണകൂടത്തിന്റെ അഭ്യര്ത്ഥനയെ തുടര്ന്ന് അരക്കോണത്തെ നാലാം ബറ്റാലിയനില് നിന്നുള്ള പ്രത്യേക കെമിക്കല്, ബയോളജിക്കല്, റേഡിയോളജിക്കല്, ന്യൂക്ലിയര് റെസ്പോണ്സ് ടീമിനെ ദേശീയ ദുരന്ത പ്രതികരണ സേന നിയോഗിച്ചു. വാതകം കണ്ടെത്താനുള്ള ഉപകരണങ്ങള്, വ്യക്തിഗത സുരക്ഷാ ഗിയറുകള്, പ്രത്യേക രക്ഷാപ്രവര്ത്തന സാമഗ്രികള് എന്നിവയടങ്ങിയ 30 അംഗ സംഘമാണ് പ്രദേശത്തെ ആഘാതം വിലയിരുത്താനും സുരക്ഷ ഉറപ്പാക്കാനും രക്ഷാപ്രവര്ത്തനങ്ങള്ക്ക് പിന്തുണ നല്കാനുമായി എത്തിയത്.
അന്വേഷണ സമിതി രൂപീകരിച്ചു
സംഭവത്തെക്കുറിച്ച് അന്വേഷിക്കാന് ഡയറക്ടര് ഓഫ് ഇന്ഡസ്ട്രിയല് സേഫ്റ്റി ആന്ഡ് ഹെല്ത്ത്, മലിനീകരണ നിയന്ത്രണ ബോര്ഡ് മെമ്പര് സെക്രട്ടറി, അഡീഷണല് ഡയറക്ടര് ഓഫ് പബ്ലിക് ഹെല്ത്ത് എന്നിവരടങ്ങുന്ന ഉന്നതതല അന്വേഷണ സമിതി രൂപീകരിക്കാന് മുഖ്യമന്ത്രി വിജയ് നിര്ദേശം നല്കി. സമിതിയോട് 24 മണിക്കൂറിനുള്ളില് ഇടക്കാല റിപ്പോര്ട്ടും മൂന്ന് ദിവസത്തിനകം അന്തിമ റിപ്പോര്ട്ടും സമര്പ്പിക്കാന് ആവശ്യപ്പെട്ടിട്ടുണ്ട്.
തിരുവള്ളൂര് ജില്ലയുടെ ചുമതലയുള്ള ഐടി മന്ത്രി ആര്. കുമാറിനോട് മോണിറ്ററിങ് ഓഫീസര് കെപി കാര്ത്തികേയനൊപ്പം സംഭവസ്ഥലം സന്ദര്ശിക്കാനും കളക്ടറുമായും ജില്ലാ ഭരണകൂടവുമായും ചേര്ന്ന് ഇരകള്ക്കുള്ള ചികിത്സാ സഹായങ്ങള് ഏകോപിപ്പിക്കാനും മുഖ്യമന്ത്രി നിര്ദേശിച്ചു. പെരിയപാളയം പൊലീസ് കേസ് രജിസ്റ്റര് ചെയ്ത് വിശദമായ അന്വേഷണം ആരംഭിച്ചിട്ടുണ്ട്. മരണപ്പെട്ട തൊഴിലാളികളുടെ കുടുംബങ്ങള്ക്ക് മുഖ്യമന്ത്രിയുടെ പൊതു ദുരിതാശ്വാസ നിധിയില് നിന്ന് രണ്ട് ലക്ഷം രൂപ വീതം ധനസഹായം നല്കാന് അദ്ദേഹം ഉത്തരവിട്ടു. അപകടത്തില് ജീവന് നഷ്ടപ്പെട്ട തൊഴിലാളികളുടെ ഭൗതികശരീരങ്ങള് എത്രയും വേഗം അവരുടെ ജന്മനാടുകളിലേക്ക് എത്തിക്കുന്നതിനായി സംസ്ഥാന സര്ക്കാര് ആവശ്യമായ നടപടികള് സ്വീകരിക്കുമെന്നും മുഖ്യമന്ത്രി അറിയിച്ചു.
Seven migrant women workers were killed and more than 60 others were hospitalised after an ammonia gas leak at a private seafood export company near Periyapalayam in Tamil Nadu's Tiruvallur district. The incident occurred at St. Peter's Paul Seafoods Exports Pvt. Ltd. in Kannigaippoor, where around 120 migrant workers from Assam, Odisha, and Jharkhand were staying in company-provided accommodation.