ബ്രസീലിൽ ചരിത്രമെഴുതി ലുല ഡ സിൽവ, നാലാം തവണയും പ്രസിഡന്റ്; ചീട്ടുകൊട്ടാരം തകർന്ന് ട്രംപ്

ബ്രസീലിയൻ തെരഞ്ഞെടുപ്പിൽ ചരിത്രമെഴുതി ലൂയിസ് ഇനാഷ്യോ ലുല ഡ സിൽവ. തീവ്ര വലതുപക്ഷ എതിരാളിയായ ഫ്ലാവിയോ ബൊൾസൊനാരോയെ പരാജയപ്പെടുത്തി അവിശ്വസനീയമായ തിരിച്ചുവരവാണ് ലുല നടത്തിയിരിക്കുന്നത്. 51.75 ശതമാനം വോട്ട് സ്വന്തമാക്കിയാണ് നാലാം തവണയും പ്രസിഡന്റ് സ്ഥാനത്തേക്ക് ലുലയുടെ വരവ്.

ഒക്ടോബർ ആദ്യവാരം നടന്ന ഒന്നാം ഘട്ട തെരഞ്ഞെടുപ്പിൽ ബോൾസൊനാരോയോട് ലൂല ചെറിയ വ്യത്യാസത്തിൽ പരാജയപ്പെട്ടിരുന്നു. ഇത് അദ്ദേഹത്തിന്റെ രാഷ്‌ട്രീയ ഭാവിയെ അനിശ്ചിതത്വത്തിലാക്കുകയും പുരോഗമനവാദികളായ ബ്രസീലിയൻ ജനതയ്ക്ക് നിരാശ സമ്മാനിക്കുകയും ചെയ്തു. 1980-കളിൽ ജനാധിപത്യമുറയ്ക്ക് തിരഞ്ഞെടുപ്പ് തിരിച്ചെത്തിയതിന് ശേഷം ഒരിക്കൽ പോലും ഒന്നാം ഘട്ടത്തിൽ പിന്നിലായ ഒരാൾ രണ്ടാം ഘട്ട വോട്ടെടുപ്പിൽ വിജയിച്ചിട്ടില്ല. എന്നാൽ ഞായറാഴ്ച ലൂല കൃത്യമായി അത് നേടി. ഇതോടെ, തെരഞ്ഞെടുപ്പ് ഫലം വീക്ഷിച്ചുകൊണ്ടിരുന്ന സാവോ പോളോയിലെ തെരുവുകളിൽ ആഹ്ലാദപ്രകടനങ്ങൾ അലയടിച്ചു.

മൂന്ന് ആഴ്ച മുമ്പ് 22 ലക്ഷം വോട്ടുകൾക്ക് പിന്നിലായിരുന്ന ലുല 4.3 മില്യൺ വോട്ടുകളുടെ ഭൂരിപക്ഷത്തിലാണ് വിജയിച്ചിരിക്കുന്നത്. ഒന്നാം ഘട്ടത്തിൽ 21.08% എന്ന റെക്കോർഡ് പോളിംഗ് കുറവ് രേഖപ്പെടുത്തിയിരുന്നു. (ഇത് ലൂലയുടെ വോട്ടർമാരെയാണ് കൂടുതൽ ബാധിച്ചത്, കാരണം അവർ വോട്ടെടുപ്പ് കേന്ദ്രങ്ങളിൽ നിന്ന് വളരെ ദൂരെയാണ് താമസിക്കുന്നത്). എന്നാൽ രണ്ടാം ഘട്ടത്തിൽ ഇത് 19.21% ആയി കുറഞ്ഞു.

1970-കളുടെ അവസാനത്തിൽ സാവോ പോളോയിലെ വ്യവസായ മേഖലയിൽ ഒരു യൂണിയൻ നേതാവായി തുടക്കം കുറിച്ച ലുലയുടെ ഉജ്ജ്വല രാഷ്‌ട്രീയ ജീവിതത്തിന്റെ ഒരു ആവേശകരമായ അധ്യായമാണ് ഈ വിജയം.

1989, 1994, 1998 വർഷങ്ങളിൽ മൂന്ന് തവണ പരാജയം രുചിച്ച ശേഷമാണ് 2002-ൽ ബ്രസീലിന്റെ ആദ്യത്തെ തൊഴിലാളിവർഗ്ഗ പ്രസിഡന്റായി ലുല തിരഞ്ഞെടുക്കപ്പെട്ടത്.

ഭരണഘടന അനുവദിക്കുന്ന തുടർച്ചയായ കാലാവധികൾക്ക് ശേഷം ലുല അധികാരം ഒഴിഞ്ഞെങ്കിലും, 2022-ലെ തെരഞ്ഞെടുപ്പിൽ അപ്പോഴത്തെ പ്രസിഡന്റും ഫ്ലാവിയോ ബോൾസൊനാരോയുടെ പിതാവുമായ ജെയർ ബോൾസൊനാരോയെ പരാജയപ്പെടുത്തിക്കൊണ്ട് വീണ്ടും അധികാരത്തിൽ തിരിച്ചെത്തി. ജെയർ ബോൾസൊനാരോ പിന്നീട് അട്ടിമറി ശ്രമത്തിന് ജയിലിലടയ്ക്കപ്പെടുകയാണുണ്ടായത്

ലൂലയുടെ ഈ വിജയം ബോൾസൊനാരോയ്ക്ക് വലിയ തിരിച്ചടിയാണ്. 27 വർഷത്തെ തടവുശിക്ഷ അനുഭവിക്കുന്ന അദ്ദേഹം, മകൻ ജയിച്ചാൽ ജയിൽമോചിതനാകുമെന്നും ഭരണത്തിൽ പങ്കാളിത്തം ലഭിക്കുമെന്നും പ്രതീക്ഷിച്ചിരുന്നു. ബോൾസൊനാരോ കുടുംബത്തിന്റെ ഏറ്റവും പ്രധാനപ്പെട്ട അന്താരാഷ്ട്ര സഖ്യകക്ഷിയായ ഡൊണാൾഡ് ട്രംപിനും ഇത് വലിയൊരു തിരിച്ചടിയാണ്. കൊളംബിയയിലെ അബെലാർഡോ ഡി ലാ എസ്പ്രിയല്ല, ഇക്വഡോറിലെ ഡാനിയൽ നോബോവ, ചിലിയിലെ ഹൊസെ അന്റോണിയോ കാസ്റ്റ്, അർജന്റീനയിലെ ഹാവിയർ മിലി എന്നിവരെപ്പോലെ ട്രംപ് അനുകൂലിയായ മറ്റൊരു നേതാവ് കൂടി ലാറ്റിൻ അമേരിക്കയിൽ അധികാരത്തിൽ വരുന്നത് പ്രതീക്ഷിച്ചിരിക്കുകയായിരുന്നു യുഎസ് പ്രസിഡന്റ്.

ലുലയുടെ വിജയവാർത്ത ബ്രസീലിയയിൽ കടുത്ത ദേഷ്യത്തോടും അമ്പരപ്പോടും കൂടിയാണ് സ്വീകരിക്കപ്പെട്ടതെന്നാണ് വിവരം. വീട്ടുതടങ്കലിൽ കഴിയുന്ന ബോൾസൊനാരോയും മകനും തെരഞ്ഞെടുപ്പ് ഫലം തത്സമയം കണ്ടത് ഇവിടെ ആയിരുന്നു.

ശനിയാഴ്ച ലൂലയുടെ അനുയായികൾ നടത്തിയ രണ്ട് വൻ ജനകീയ ശക്തിപ്രകടനങ്ങൾക്ക് ശേഷമാണ് ലുലയുടെ ജയം പ്രഖ്യാപിക്കപ്പെട്ടത്. റിയോയിലെ കോപകബാന ബീച്ചിൽ പത്ത് ലക്ഷത്തിലധികം ആളുകളും സാവോ പോളോയുടെ ഹൃദയഭാഗത്തുള്ള പൗളിസ്റ്റ അവന്യൂവിൽ അതിലും വലിയൊരു ജനക്കൂട്ടവും അണിനിരന്നിരുന്നു.