'എല്ലാവര്ക്കും നന്ദി..' ഒരു അപകടം, ഒരു നിമിഷം മാറ്റി മറിച്ച ജീവിതം മലയാളികളുടെ കരുതലില് തിരിച്ചുപിടിച്ച് ഒടുവില് അബ്ദുള് റഹീം ജന്മനാട്ടില് എത്തി. രണ്ട് പതിറ്റാണ്ടായി മകനെ കാത്തിരുന്ന മാതാവിന് അരികിലേക്ക് അബ്ദുള് റഹീം വിധിയെ തോല്പ്പിച്ച് ഒടുവില് മടങ്ങിയെത്തി.
കോടമ്പുഴ പരേതനായ മച്ചിലകത്ത് പീടിയേക്കല് മുഹമ്മദ് കുട്ടിയുടെയും ഫാത്തിമ(പാത്തു)യുടെയും ഇളയമകനാണ് അബ്ദുള് റഹീം. 2006 നവംബര് 28ന് 26ാം വയസില് ആണ് റിയാദിലെത്തിയത്. ഡ്രൈവര് ജോലിയില് ഒരുമാസം പിന്നിടും മുമ്പേ ഡിസംബര് 24നാണ് റഹീമിന്റെ ജീവിതം മാറ്റിയ അപകടം ഉണ്ടായത്. അപകടത്തില് സ്പോണ്സറുടെ അസുഖബാധിതനായ മകന് കൊല്ലപെടുകയായിരുന്നു. വാഹനം ഓടിച്ച റഹീം കേസില് പ്രതിയാവുകയും കൊലപാതക കേസില് ജയിലിലടയ്ക്കപ്പെടുകയുമായിരുന്നു.
വ്യാഴാഴ്ച പെരുന്നാള് ദിനത്തില് രാവിലെ കരിപ്പൂരില് വിമാനം ഇറങ്ങിയ റഹീമിനെ സ്വീകരിക്കാന് സുഹൃത്തുക്കളും നാട്ടുകാരും എത്തിയിരുന്നു. കാത്തിരുന്ന മാധ്യമങ്ങളോട് 'എല്ലാവര്ക്കും നന്ദി..' എന്ന് മാത്രമായിരുന്നു നിറ കണ്ണുകളോടെ റഹീം പറഞ്ഞത്. സൗദി സമയം ബുധനാഴ്ച രാത്രി 11.55 ന് റിയാദില് നിന്നും കോഴിക്കോട്ടേക്ക് പുറപ്പെട്ട എയര് ഇന്ത്യ എക്സ്പ്രസ്സില് ആയിരുന്നു റഹീമിന്റെ യാത്ര. ജയില് ഉദ്യോഗസ്ഥരാണ് റഹീമിനെ എയര്പോര്ട്ടില് എത്തിച്ച് എമിഗ്രെഷന് ഉള്പ്പടെയുള്ള നടപടി ക്രമങ്ങള് പൂര്ത്തിയാക്കിയത്. ഇന്ന് രാവിലെ 7.35-ഓടെ അദ്ദേഹം കരിപ്പൂര് വിമാനത്താവളത്തിലെത്തി.
കേസിൻ്റെ നാൾവഴികൾ
2006 – അപകടവും അറസ്റ്റും
സൗദി അറേബ്യയിൽ ഡ്രൈവറായി റഹീം ജോലി ചെയ്യുന്നതിനിടെയാണ് കേസിനാസ്പദമായ സംഭവം ഉണ്ടായത്. സ്പോൺസറുടെ ഭിന്നശേഷിക്കാരനായ മകനെ വാഹനത്തിൽ കൊണ്ടുപോകുന്നതിനിടെ അപകടമുണ്ടായി. കുട്ടി മരിച്ചതോടെ റഹീമിനെതിരെ ഗുരുതര കുറ്റം ചുമത്തി അറസ്റ്റ് ചെയ്തു. അപകടം യഥാർത്ഥത്തിൽ എങ്ങനെ സംഭവിച്ചു എന്നതിനെച്ചൊല്ലി പിന്നീട് പല വാദങ്ങളും ഉയർന്നു. മനഃപൂർവമല്ലാതെ സംഭവിച്ച അപകടത്തിലാണ് ജീവൻ നഷ്ടമായതെന്ന് വ്യക്തമായെങ്കിലും വിധി റഹീമിന് എതിരായി.
വിചാരണയും വധശിക്ഷയും
സൗദി കോടതിയിൽ നടന്ന വിചാരണയ്ക്ക് ശേഷം അബ്ദുൾ റഹീമിന് വധശിക്ഷ വിധിച്ചു. കേസ് മലയാളി സമൂഹത്തിലും പ്രവാസി ലോകത്തും വലിയ ആശങ്ക സൃഷ്ടിക്കുകയും ചെയ്തു. ഭാഷാപ്രശ്നങ്ങൾ, നിയമസഹായത്തിലെ പരിമിതികൾ, വിദേശരാജ്യങ്ങളിലെ നിയമ വ്യവസ്ഥകളെക്കുറിച്ചുള്ള അറിവില്ലായ്മ എന്നിവയും ചർച്ചയായി.
ജയിലിലെ വർഷങ്ങൾ
വർഷങ്ങളോളം റഹീമിന് സൗദി ജയിലിൽ കഴിയേണ്ടിവന്നു. കുടുംബം കേരളത്തിൽ വലിയ സാമ്പത്തികവും മാനസികവുമായ പ്രതിസന്ധി നേരിട്ടു. അമ്മയും ബന്ധുക്കളും ഓഫീസുകൾ കയറിയിറങ്ങി മോചനത്തിനായി അപേക്ഷകൾ നൽകി.
പ്രവാസി സംഘടനകളുടെ ഇടപെടൽ
സൗദിയിലെയും മറ്റ് ഗൾഫ് രാജ്യങ്ങളിലെയും മലയാളി സംഘടനകൾ കേസിൽ സജീവമായി ഇടപെട്ടു. നിയമസഹായം, വിവർത്തന സഹായം, നയതന്ത്ര ഇടപെടൽ എന്നിവയ്ക്കായി വിവിധ കൂട്ടായ്മകൾ പ്രവർത്തിച്ചു. കേസ് ക്രമേണ കേരളത്തിന്റെ പൊതുചർച്ചകളിൽ പ്രധാന വിഷയമായി മാറി.
'ബ്ലഡ് മണി' ചർച്ച
സൗദി നിയമപ്രകാരം മരിച്ച വ്യക്തിയുടെ കുടുംബം മാപ്പ് നൽകിയാൽ 'ദിയ' അഥവാ 'ബ്ലഡ് മണി' നൽകി ശിക്ഷയിൽ ഇളവ് നേടാനാകുന്ന സാഹചര്യമുണ്ടായിരുന്നു. ഇതോടെ അബ്ദുൾ റഹീമിനെ രക്ഷിക്കാനായി വലിയ തോതിൽ ഫണ്ട് റെയ്സിംഗ് ആരംഭിച്ചു.
കേരളത്തിന്റെ കൂട്ടായ ഇടപെടൽ
കേരളത്തിൽ സമൂഹ്യമാധ്യമങ്ങൾ വഴിയും പൊതുപ്രവർത്തകരുടെ നേതൃത്വത്തിലുമായി വൻ ക്യാംപെയ്ൻ നടന്നു. ചെറിയ തുകകളായി സാധാരണ ജനങ്ങൾ നൽകിയ സംഭാവനകൾ കോടികളായി സമാഹരിക്കപ്പെട്ടു. മത-രാഷ്ട്രീയ ഭേദമില്ലാതെ ആളുകൾ ക്യാംപെയ്നിൽ പങ്കാളികളായി. അബ്ദുൾ റഹീം കേസ് ഒരു വ്യക്തിയുടെ നിയമപോരാട്ടം മാത്രമല്ല. പ്രവാസി ജീവിതത്തിന്റെ അനിശ്ചിതത്വവും മനുഷ്യാവകാശ ചർച്ചകളും സമൂഹത്തിന്റെ കൂട്ടായ ഇടപെടലിന്റെ ശക്തിയും വ്യക്തമാക്കി തന്ന ഒരു സുപ്രധാന സംഭവം കൂടിയാണ്.
English Summary: After spending 20 years in prison in Saudi Arabia, Abdul Rahim returned to Kerala and arrived at Karipur International Airport on an Air India Express flight. Speaking to the media upon arrival, Rahim expressed heartfelt gratitude to everyone who supported him throughout his prolonged legal battle. He was accompanied by his family members and his power of attorney during the journey back home.