ഊരാളുങ്കൽ എന്ന ലോകമാതൃകയുടെ ശില്പി; യുഎൽസിസിഎസ് ചെയർമാൻ രമേശൻ പാലേരി അന്തരിച്ചു

ഇന്ത്യയിലെ തന്നെ ഏറ്റവും വലിയ സഹകരണ പ്രസ്ഥാനങ്ങളിലൊന്നായ ഊരാളുങ്കല്‍ ലേബര്‍ കോണ്‍ട്രാക്ട് കോ ഓപ്പറേറ്റീവ് സൊസൈറ്റിയുടെ (ULCCS) വളർച്ചയ്ക്ക് ചുക്കാൻ പിടിച്ച ചെയർമാൻ രമേശൻ പാലേരി (65) ഓർമയായി. കോയമ്പത്തൂരിലെ ആശുപത്രിയിൽ ചികിത്സയിലിരിക്കെ ഇന്ന് രാവിലെയായിരുന്നു അന്ത്യം. കേരളത്തിന്റെ അടിസ്ഥാന സൗകര്യ വികസനത്തിൽ വലിയൊരു പങ്കുവഹിച്ച അതുല്യനായ ഒരു സഹകാരിയെയും ഭരണാധികാരിയെയാണ് നാടിന് നഷ്ടമായിരിക്കുന്നത്.

പാരമ്പര്യമായി ഊരാളുങ്കൽ സൊസൈറ്റിയുമായി ഇഴചേർന്നതായിരുന്നു അദ്ദേഹത്തിന്റെ ജീവിതം. സൊസൈറ്റിയുടെ രണ്ടാമത്തെ പ്രസിഡന്റായിരുന്ന പാലേരി ചന്തമ്മന്റെ കൊച്ചുമകനും, 32 വർഷത്തോളം സൊസൈറ്റിയെ നയിച്ച പാലേരി കണാരന്റെ മകനുമായിരുന്നു അദ്ദേഹം. വാഗ്ഭടാനന്ദ ഗുരുദേവന്റെ ആശയങ്ങളിൽ അധിഷ്ഠിതമായി പ്രവർത്തിക്കുന്ന പ്രസ്ഥാനത്തിന്റെ അമരത്തേക്ക് 1995-ലാണ് രമേശൻ പാലേരി എത്തുന്നത്. അന്ന് മുതൽ ഇന്നുവരെ, സുതാര്യതയും തൊഴിലാളികളുടെ ക്ഷേമവും മുൻനിർത്തിയുള്ള അദ്ദേഹത്തിന്റെ പ്രവർത്തനങ്ങൾ യുഎൽസിസിഎസിനെ രാജ്യത്തിന് തന്നെ മാതൃകയായ ഒരു ഹ്യൂമൻ മോഡൽ പ്രസ്ഥാനമാക്കി മാറ്റി.

ഒരു സാധാരണ ലേബർ കോൺട്രാക്ട് സൊസൈറ്റിയിൽ നിന്നും കോടികളുടെ വിറ്റുവരവുള്ള, ഐടി അടക്കമുള്ള പുതിയ കാലത്തെ സാങ്കേതിക മേഖലകളിലേക്ക് വരെ വ്യാപിച്ചു കിടക്കുന്ന അതിവിശാലമായ ഒരു പ്രസ്ഥാനമായി ഊരാളുങ്കലിനെ വളർത്തിയത് അദ്ദേഹത്തിന്റെ അസാമാന്യ ദീർഘവീക്ഷണമായിരുന്നു. ഏതു വലിയ സർക്കാർ-സ്വകാര്യ നിർമാണ പ്രവർത്തനങ്ങളും ഗുണനിലവാരത്തിൽ ഒട്ടും വിട്ടുവീഴ്ച ചെയ്യാതെ, സമയബന്ധിതമായി പൂർത്തിയാക്കുക എന്നതായിരുന്നു രമേശൻ പാലേരിയുടെ കീഴിൽ ഊരാളുങ്കൽ സൊസൈറ്റി പിന്തുടർന്നു പോന്ന മുഖ്യ നയം.

കേരളത്തിൽ തൊഴിലാളി സമരങ്ങൾ സാധാരണമാണെങ്കിലും, നൂറ്റാണ്ടിനോടടുക്കുന്ന യുഎൽസിസിഎസിന്റെ ചരിത്രത്തിൽ ഇന്നുവരെ ഒരു പണിമുടക്ക് പോലും നടന്നിട്ടില്ല എന്നത് രമേശൻ പാലേരിയുടെ നേതൃത്വത്തിന്റെ ഏറ്റവും വലിയ വിജയമാണ്. 'തൊഴിലാളികൾ തന്നെ മുതലാളിമാർ' എന്ന ആശയമാണ് അദ്ദേഹം പ്രാവർത്തികമാക്കിയത്. മാനേജ്മെന്റും തൊഴിലാളികളും തമ്മിലുള്ള വിടവ് ഇവിടെയില്ല. എല്ലാവർക്കും മികച്ച വേതനവും, പിഎഫ്, ഗ്രാറ്റുവിറ്റി തുടങ്ങിയ ആനുകൂല്യങ്ങളും, വർഷാവസാനം ലാഭവിഹിതവും ഉറപ്പാക്കുന്ന ഒരു മാതൃക അദ്ദേഹം കെട്ടിപ്പടുത്തു. തൊഴിലാളികൾക്ക് പൂർണ്ണ സംരക്ഷണവും പരിഗണനയും നൽകിയതിലൂടെ തൊഴിൽ തർക്കങ്ങൾ ഇല്ലാത്ത ഒരു സ്ഥാപനമായി ഊരാളുങ്കലിനെ മാറ്റാൻ അദ്ദേഹത്തിന് സാധിച്ചു.

കേരളത്തിന്റെ വികസന ചരിത്രത്തിൽ രമേശൻ പാലേരി എന്ന പേര് എക്കാലവും ഓർമിക്കപ്പെടും. തൊഴിലാളികളുടെ വിയർപ്പിന് വിലകല്പിക്കുകയും അവരെ പ്രസ്ഥാനത്തിന്റെ യഥാർത്ഥ ഉടമകളായി കണ്ട് ചേർത്തുപിടിക്കുകയും ചെയ്ത ആ മനുഷ്യ സ്നേഹിയുടെ വിയോഗം, കേരള സമൂഹത്തിന്, പ്രത്യേകിച്ച് സഹകരണ മേഖലയ്ക്ക് നികത്താനാവാത്ത വലിയൊരു നഷ്ടമാണ്.