ട്വന്റി 20 ക്രിക്കറ്റിൽ പവർപ്ലേ എന്നാൽ വെടിക്കെട്ട് ബാറ്റിങ്ങിനുള്ള ലൈസൻസ് എന്നാണ് അർത്ഥം. 30 യാർഡ് സർക്കിളിന് മുകളിലൂടെ പറത്തിയടിക്കാനാണ് ബാറ്റർമാർ പവർപ്ലേയില് പരമാവധി ശ്രമിക്കുക. അതേസമയം എതിർ ടീമിന്റെ മികച്ച ബൗളിങ് പ്രകടനത്തിനു മുൻപ് പവർപ്ലേയിൽ തന്നെ തകർന്നുതരിപ്പണമായ ടീമുകളുമുണ്ട്. ഇന്നലെ നടന്ന റോയൽ ചലഞ്ചേഴ്സ് ബെംഗളൂരു - ഡൽഹി ക്യാപിറ്റൽസ് മത്സരം അത്തരത്തിലൊരു തകർച്ചയുടെ ഉത്തമ ഉദാഹരണമാണ്.
ഐപിഎൽ ചരിത്രത്തിലെ ഏറ്റവും ചെറിയ പവർപ്ലേ സ്കോർ എന്ന നാണക്കേടിന്റെ റെക്കോർഡ് ഇനി ഡൽഹിക്കു സ്വന്തമാണ്. ആർസിബിക്കെതിരായ മത്സരത്തിൽ പവർപ്ലേയിലെ ആറ് ഓവറിൽ ഡൽഹിക്കു നേടാനായത് വെറും 13 റൺസ്. ആറ് വിക്കറ്റുകളും നഷ്ടമായി. ആർസിബിക്കു വേണ്ടി പവർപ്ലേയിൽ ഭുവനേശ്വർ കുമാറും ജോഷ് ഹെയ്സൽവുഡും മൂന്ന് വീതം വിക്കറ്റുകൾ വീഴ്ത്തി.
പവർപ്ലേയിലെ ഏറ്റവും ചെറിയ സ്കോർ എന്ന നാണക്കേടിന്റെ റെക്കോർഡ് സൺറൈസേഴ്സ് ഹൈദരബാദിന്റെ പേരിലായിരുന്നു. 2022ൽ രാജസ്ഥാൻ റോയൽസ് ഉയർത്തിയ 211 റൺസ് ചേസ് ചെയ്യാൻ ഇറങ്ങിയ സൺറൈസേഴ്സ് പവർപ്ലേയിലെ ആദ്യ ആറ് ഓവറിൽ മൂന്ന് വിക്കറ്റ് നഷ്ടത്തിൽ നേടിയത് വെറും 14 റൺസാണ്. അന്ന് രാജസ്ഥാനു വേണ്ടി ഒരു മെയ്ഡൻ ഓവർ അടക്കം രണ്ട് വിക്കറ്റ് വീഴ്ത്തി പവർപ്ലേയിൽ താരമായത് പ്രസിദ്ധ് കൃഷ്ണയായിരുന്നു.
2009ൽ പവർപ്ലേയിലെ ആറ് ഓവറിൽ റോയൽ ചലഞ്ചേഴ്സ് ബെംഗളൂരുവിനെതിരെ രാജസ്ഥാൻ റോയൽസ് നേടിയത് രണ്ട് വിക്കറ്റ് നഷ്ടത്തിൽ 14 റൺസാണ്. നാണക്കേടിന്റെ പട്ടികയിൽ മൂന്നാമതാണ് ഈ ഇന്നിങ്സ്. അന്ന് ആർസിബിക്കായി പവർപ്ലേയിലെ മൂന്ന് ഓവറിൽ ഏഴ് റൺസ് വഴങ്ങിയ പ്രവീൺ കുമാറായിരുന്നു താരമായത്.
ഏറ്റവും കുറഞ്ഞ പവർപ്ലേ സ്കോറിൽ നാലാം സ്ഥാനത്താണ് 2011ലെ ചെന്നൈ സൂപ്പർ കിങ്സ് - കൊൽക്കത്ത നൈറ്റ് റൈഡേഴ്സ് മത്സരം. ആദ്യ ആറ് ഓവറിൽ രണ്ട് വിക്കറ്റ് നഷ്ടത്തിൽ 15 റൺസ് മാത്രമേ ചെന്നൈയ്ക്കു അന്ന് നേടാൻ സാധിച്ചുള്ളൂ.
അഞ്ചാം സ്ഥാനത്ത് 2011ൽ ആർസിബിക്കെതിരെ ഒരു വിക്കറ്റ് നഷ്ടത്തിൽ 19 റൺസ് മാത്രം നേടാൻ സാധിച്ച ചെന്നൈ സൂപ്പർ കിങ്സ് തന്നെയാണ് പട്ടികയില് അഞ്ചാം സ്ഥാനവും സ്വന്തമാക്കിയിരിക്കുന്നത്. ആർസിബിക്കു വേണ്ടി യുസ്വേന്ദ്ര ചഹലാണ് തിളങ്ങിയത്.
English Summary: Delhi Capitals recorded the lowest powerplay score in IPL history with just 13 runs, as RCB bowlers dominated early, highlighting some of the worst powerplay performances in the league.