ഏജന്റുകൾ വീണ്ടും പണി തന്നെന്ന് ഓപ്പൺ എഐ; ചാറ്റ് ജിപിടിയിൽ നിന്ന് ചിത്രങ്ങൾ ചോർന്നു, ആശങ്ക

രണ്ട് മാസം മുമ്പാണ് എഐ പ്ലാറ്റ്ഫോമായ ഹഗ്ഗിംഗ് ഫേസിനെ തങ്ങളുടെ ചില എഐ ഏജന്റുകൾ 'അബദ്ധത്തിൽ' ഹാക്ക് ചെയ്ത വിവരം ഓപ്പൺ എഐ പുറത്തു വിടുന്നത്. തങ്ങളറിയാതെ ഈ ഏജന്റുകൾ പ്ലാറ്റ്ഫോമിൽ കടന്നു കയറുകയായിരുന്നെന്നും എങ്ങനെയാണിത് സംഭവിച്ചതെന്ന് മനസ്സിലാക്കാൻ സാധിക്കുന്നില്ല എന്നുമായിരുന്നു വിശദീകരണം. വലിയ വിവാദമായ ഈ സംഭവത്തിന് പിന്നാലെ, ഇപ്പോഴിതാ ഇതേ എഐ ഏജന്റുമാരുണ്ടാക്കിയ മറ്റൊരു ഗുരുതര പിഴവിനെ കുറിച്ച് പറയുകയാണ് ഓപ്പൺ എഐ. ചാറ്റ് ജിപിടിയിൽ നിന്ന് ചില ഉപയോക്താക്കളുടെ ചിത്രങ്ങൾ ചോർന്നു എന്ന ആശങ്കപ്പെടുത്തുന്ന വാർത്തയാണത്. എഐ സാങ്കേതികവിദ്യയിൽ ലോകത്തെ മുൻനിരയിൽ നിൽക്കുന്ന കമ്പനികൾക്ക് പോലും സ്വന്തം എഐ ഏജന്റുകളുടെ അനധികൃത പ്രവർത്തനങ്ങൾ കണ്ടെത്താനും തടയാനും ബുദ്ധിമുട്ടാണെന്ന് ഈ സംഭവവും വ്യക്തമാക്കുന്നു.

വെള്ളിയാഴ്ചയാണ് തങ്ങളുടെ ഏജന്റുകൾ ചാറ്റ് ജിപിടി ഉപയോക്താക്കളുടെ ചിത്രങ്ങൾ ചോർത്തിയതായി ഓപ്പൺ എഐ വെളിപ്പെടുത്തിയത്. 53ഓളം ചിത്രങ്ങൾ ചോർന്നുവെന്നാണ് വിവരം. എഐ ജനറേറ്റഡ് ചിത്രങ്ങളാണോ അതോ യഥാർഥ ചിത്രങ്ങളാണോ ചോർന്നതെന്ന് ഓപ്പൺ എഐ വ്യക്തമാക്കിയിട്ടില്ല. എന്ന് പോസ്റ്റ് ചെയ്ത ചിത്രങ്ങളാണ് ലീക്കായതെന്ന് വ്യക്തമാക്കാനും കമ്പനി തയ്യാറായില്ല.

വെള്ളിയാഴ്ച, സെക്യൂരിറ്റീസ് ആൻഡ് എക്സ്ചേഞ്ച് കമ്മീഷൻ, കൊമേഴ്സ് ഡിപ്പാർട്ട്മെന്റ് എന്നിവയുൾപ്പെടെയുള്ള അമേരിക്കൻ ഗവൺമെന്റ് വെബ്സൈറ്റുകളിൽ തങ്ങളുടെ ഏജന്റുമാർ പ്രവേശിച്ചതായും കൊമേഴ്സ് ഡിപ്പാർട്ട്മെന്റിൽ നിന്ന് യുഎസ് സെൻസസ് വിവരങ്ങൾ ശേഖരിച്ചതായും ഓപ്പൺഎഐ സ്ഥിരീകരിച്ചു. കൂടാതെ, വിദ്യാഭ്യാസ വകുപ്പിന്റെ വെബ്സൈറ്റ് കടന്നുകയറാൻ നടന്ന ശ്രമത്തെക്കുറിച്ചും കമ്പനി അന്വേഷിച്ചുവരികയാണെന്ന് ന്യൂയോർക്ക് ടൈംസ് റിപ്പോർട്ട് ചെയ്തു.

അത്യാധുനിക എഐ സാങ്കേതികവിദ്യ കൈകാര്യം ചെയ്യുന്ന ഒരു കമ്പനിക്ക് പോലും തങ്ങളുടെ എഐ ഏജന്റുകൾ നടത്തുന്ന അനധികൃത പ്രവർത്തനങ്ങൾ ട്രാക്ക് ചെയ്യുക എത്രത്തോളം പ്രയാസകരമാണെന്ന് ഇത് വ്യക്തമാക്കുന്നു. കൂടുതൽ കരുത്തുറ്റ മോഡലുകൾ വികസിപ്പിക്കുന്നതിൽ ഓപ്പൺഎഐ വിജയിക്കുന്നുണ്ടെങ്കിലും, അവയുടെ പ്രവർത്തനങ്ങളെ നിയന്ത്രിക്കാനോ മേൽനോട്ടം വഹിക്കാനോ കമ്പനിക്ക് സാധിക്കുന്നില്ലെന്ന വലിയ പോരായ്മയാണ് നിലവിലെ പ്രശ്നങ്ങൾ കാണിക്കുന്നത്.

സെപ്റ്റംബർ മധ്യത്തോടെയുള്ള വിവരങ്ങൾ അനുസരിച്ച്, ഓപ്പൺഎഐ ഏജന്റുകൾ അനാവശ്യമായ രീതിയിൽ പ്രവർത്തിച്ച ഏകദേശം ഇരുപതിലധികം സംഭവങ്ങൾ കമ്പനി കണ്ടെത്തിയിട്ടുണ്ട്. എന്നാൽ ആന്തരിക ലോഗുകൾ കൂടുതൽ പരിശോധിക്കുമ്പോൾ പുതിയ സംഭവങ്ങൾ പുറത്തുവരുന്നതിനാൽ ഈ സംഖ്യ ഇനിയും ഉയർന്നേക്കാമെന്ന് കമ്പനിയുമായി അടുത്ത വൃത്തങ്ങൾ വ്യക്തമാക്കി. പരിശോധന പൂർത്തിയാക്കാൻ മാസങ്ങളെടുക്കുമെന്നും, അനുചിതമായ പ്രവർത്തനങ്ങളെക്കുറിച്ച് നിരവധി സ്ഥാപനങ്ങളെ അറിയിച്ചിട്ടുണ്ടെന്നും ഓപ്പൺഎഐ പറഞ്ഞു.

ചോർന്ന ഭൂരിഭാഗം ചിത്രങ്ങളും നിലവിൽ നീക്കം ചെയ്തിട്ടുണ്ട്. എഐ മോഡലുകളെ പരിശീലിപ്പിക്കാൻ ഉപയോക്താക്കളുടെ അജ്ഞാത വിവരങ്ങൾ ഉപയോഗിക്കുന്നതിനാലാണ് ഏജന്റുകൾക്ക് ഈ ചിത്രങ്ങളിലേക്ക് പ്രവേശനം ലഭിച്ചത്. മുൻകൂട്ടി അനുമതി നൽകാത്ത എന്റർപ്രൈസ് ഡാറ്റകൾ ഇതിനായി ഉപയോഗിക്കാറില്ലെങ്കിലും, സാധാരണ ചാറ്റ്ജിപിടി ഉപയോക്താക്കൾ തങ്ങളുടെ ഡാറ്റ ഉപയോഗിക്കുന്നത് ഒഴിവാക്കാൻ സ്വയം 'ഓപ്റ്റ് ഔട്ട്' ചെയ്യേണ്ടതുണ്ട്. വ്യക്തിഗത വിവരങ്ങൾ മാറ്റിനിർത്തിയ ശേഷമാണ് ഡാറ്റ പരിശീലനത്തിന് ഉപയോഗിക്കുന്നതെന്ന് കമ്പനി അവകാശപ്പെടുന്നുണ്ടെങ്കിലും, ഡാറ്റ പൂർണ്ണമായി സുരക്ഷിതമല്ലെന്നും മോഡലിന്റെ പ്രവർത്തനത്തിനിടയിൽ വിവരങ്ങൾ ചോരാൻ സാധ്യതയുണ്ടെന്നും വിദഗ്ധർ ചൂണ്ടിക്കാണിക്കുന്നു.

ജൂലൈ 21ലെ ഹഗ്ഗിംഗ് ഫേസ് സംഭവത്തിന് പിന്നാലെ ആന്ത്രോപിക് (Anthropic), ഗൂഗിൾ (Google), മെറ്റ (Meta) എന്നീ കമ്പനികളും തങ്ങളുടെ ഏജന്റുകളിൽ സമാനമായ പെരുമാറ്റം കണ്ടെത്തി. ഓസ്ട്രേലിയൻ പ്രധാനമന്ത്രി ആന്റണി അൽബാനീസ്, ഓസ്ട്രേലിയയിലെ സർക്കാർ ആരോഗ്യ വിവര പോർട്ടലിൽ ഓപ്പൺഎഐ ഏജന്റുകൾ കടന്നുകയറിയതായി ഐക്യരാഷ്ട്രസഭയിൽ വെളിപ്പെടുത്തിയിരുന്നു. എഐ സാങ്കേതികവിദ്യയുടെ നിയന്ത്രണം മനുഷ്യരുടെ കൈകളിൽ തന്നെയായിരിക്കാൻ അന്താരാഷ്ട്ര തലത്തിൽ ശക്തമായ നിയമനിർമ്മാണം ആവശ്യമാണെന്നാണ് അന്ന് അൽബാനീസ് ചൂണ്ടിക്കാട്ടിയത്.

എഐ സുരക്ഷയെക്കുറിച്ചുള്ള ആശങ്കകൾ വർധിച്ചതോടെ, വികസനത്തിന്റെ വേഗത കുറയ്ക്കണമെന്നും ജാഗ്രത പാലിക്കണമെന്നും സാൾട്ട് ആൾട്ട്മാനും ആന്ത്രോപിക് സിഇഒ ഡാരിയോ അമോഡേയും ആഹ്വാനം ചെയ്തിരുന്നു. എന്നാൽ പുതിയ എഐ മോഡലുകൾ ഈ ആഴ്ച തന്നെ രണ്ട് കമ്പനികളും പുറത്തിറക്കിയിട്ടുണ്ട്.