പറക്കും കാര്‍ എന്ന വിസ്മയത്തിനു പിന്നാലെ പുതിയ പരീക്ഷണങ്ങളുമായി ആഗോള ടെക് ഭീമന്‍മാരായ ടെസ്ല. കുറഞ്ഞ സമയം വായുവിൽ ഉയർന്നുപൊങ്ങാൻ ശേഷിയുള്ള റോഡ്‌സ്റ്റർ മുതൽ മനുഷ്യരെപ്പോലെ ജോലികൾ ചെയ്യുന്ന റോബോട്ടുകൾ വരെ നീളുന്ന സാങ്കേതിക പദ്ധതികളിലൂടെ ഭാവിയുടെ ഗതാഗത, തൊഴിൽ മേഖലകളെ മാറ്റിമറിക്കാനാണ് കമ്പനിയുടെ നീക്കം. ഡ്രൈവറില്ലാ ടാക്‌സി സർവീസുകൾ കൂടി വ്യാപിപ്പിക്കുന്നതോടെ പരമ്പരാഗത വാഹനനിർമാണത്തിൽ ഒതുങ്ങാതെ ആർട്ടിഫിഷ്യൽ ഇന്റലിജൻസ്, റോബോട്ടിക്‌സ് മേഖലകളിലും ആധിപത്യം സ്ഥാപിക്കുകയാണ് ടെസ്‌ലയുടെ ലക്ഷ്യം.
ഒക്ടോബർ 15-ന് നടന്ന പ്രത്യേക പ്രദർശനത്തിലൂടെയാണ് ടെസ്ല അടുത്ത തലമുറ റോഡ്‌സ്റ്റർ അവതരിപ്പിച്ചത്. മസ്‌കിന്റെ ബഹിരാകാശ കമ്പനിയായ സ്‌പേസ് എക്‌സിന്റെ സാങ്കേതികവിദ്യയിൽനിന്ന് പ്രചോദനം ഉൾക്കൊണ്ട ത്രസ്റ്ററുകൾ ഉപയോഗിച്ച് വാഹനത്തിന് ഹ്രസ്വസമയം വായുവിൽ ഉയർന്നുപൊങ്ങാൻ കഴിയുമെന്നാണ് അവകാശവാദം. എന്നാൽ, വിമാനത്തെപ്പോലെ തുടർച്ചയായി പറക്കാൻ കഴിയുന്ന വാഹനമല്ല ഇത്. പരമ്പരാഗത കാറുകളുടെ സവിശേഷതകൾക്കൊപ്പം റോക്കറ്റ് സാങ്കേതികവിദ്യയും സംയോജിപ്പിക്കാനുള്ള പരീക്ഷണമായാണ് ഈ പദ്ധതി ശ്രദ്ധ നേടുന്നത്. അതേസമയം, വാഹനം വിപണിയിലെത്താൻ 2028 വരെ കാത്തിരിക്കേണ്ടിവരുമെന്നാണ് നിലവിലെ സൂചനകൾ.
ടെസ്‌ലയുടെ ഭാവിപദ്ധതികളിൽ നിർണായക സ്ഥാനമുള്ള മറ്റൊരു പ്രോഡക്ടാണ് ഒപ്റ്റിമസ് എന്ന ഹ്യൂമനോയിഡ് റോബോട്ട്. ഫാക്ടറികളിലും വീടുകളിലും മനുഷ്യർ ചെയ്യുന്ന വിവിധ ജോലികൾ ഏറ്റെടുക്കാൻ കഴിയുന്ന രീതിയിലാണ് ഇതിനെ വികസിപ്പിച്ചിരിക്കുന്നത്. അപകടസാധ്യതയുള്ളതും ഒരേ രീതിയിൽ ആവർത്തിച്ച് ചെയ്യേണ്ടതുമായ ജോലികൾ റോബോട്ടുകളെ ഏൽപ്പിക്കുന്നതിലൂടെ തൊഴിൽരംഗത്ത് വലിയ മാറ്റങ്ങൾ സൃഷ്ടിക്കാനാകുമെന്നാണ് കമ്പനിയുടെ പ്രതീക്ഷ.
വസ്തുക്കളെ തിരിച്ചറിയുക, ചുറ്റുപാടുകൾ മനസ്സിലാക്കുക, ചലനങ്ങൾ നിയന്ത്രിക്കുക തുടങ്ങിയ പ്രവർത്തനങ്ങൾക്ക് ആർട്ടിഫിഷ്യൽ ഇന്റലിജൻസ് സാങ്കേതികവിദ്യയാണ് ഉപയോഗിക്കുന്നത്. എങ്കിലും, ഒപ്റ്റിമസിന്റെ പൂർണശേഷി പ്രായോഗികമായി തെളിയിക്കാനും വ്യാപകമായ വാണിജ്യ ഉപയോഗത്തിലേക്ക് എത്തിക്കാനും ഇനിയും കടമ്പകൾ കടക്കേണ്ടതുണ്ട്.
ഗതാഗത മേഖലയിൽ ടെസ്ല മുന്നോട്ടുവയ്ക്കുന്ന പ്രധാന ആശയമാണ് റോബോടാക്‌സി. ഡ്രൈവറില്ലാതെ പ്രവർത്തിക്കാൻ രൂപകൽപ്പന ചെയ്ത ഈ വാഹനത്തിൽ രണ്ട് പേർക്ക് യാത്ര ചെയ്യാനാകും. സ്റ്റിയറിംഗ് വീലും പെഡലുകളും ഇല്ലാത്ത രൂപകൽപ്പനയാണ് പദ്ധതിയുടെ പ്രത്യേകത. അമേരിക്കയിലെ ഓസ്റ്റിനിൽ റോബോടാക്‌സി സേവനങ്ങൾ ആരംഭിച്ച കമ്പനി, കൂടുതൽ പ്രദേശങ്ങളിലേക്ക് ഈ സംവിധാനം വ്യാപിപ്പിക്കാനുള്ള ശ്രമത്തിലാണ്.
എന്നാൽ, പൂർണമായും സ്വയം നിയന്ത്രിതമായ ഗതാഗത സംവിധാനം വ്യാപകമാക്കുന്നതിന് സുരക്ഷ, സാങ്കേതിക വിശ്വാസ്യത, നിയമപരമായ അനുമതികൾ തുടങ്ങിയ വിഷയങ്ങളിൽ വ്യക്തമായ പരിഹാരങ്ങൾ ആവശ്യമാണ്. വ്യത്യസ്ത രാജ്യങ്ങളിലെ ഗതാഗത നിയമങ്ങളും നിയന്ത്രണങ്ങളും പദ്ധതിയുടെ വളർച്ചയെ സ്വാധീനിക്കാം.
ഇലക്ട്രിക് വാഹനങ്ങളുടെ നിർമാണത്തിൽനിന്ന് റോബോട്ടിക്‌സിലേക്കും സെല്‍ഫ് ഡ്രൈവിങ് സിസ്റ്റത്തിലേക്കും ടെസ്ല നടത്തുന്ന ചുവടുമാറ്റം കമ്പനിയുടെ ദീർഘകാല ലക്ഷ്യങ്ങളിലേക്കാണ് വിരൽചൂണ്ടുന്നത്. വാഹനങ്ങൾ നിർമിക്കുകയും വിൽക്കുകയും ചെയ്യുന്ന സ്ഥാപനമെന്നതിലുപരി, മനുഷ്യരുടെ ദൈനംദിന ജീവിതത്തിൽ എഐ അധിഷ്ഠിത സംവിധാനങ്ങൾ വ്യാപകമായി ഉപയോഗിക്കുന്ന ഭാവിയാണ് മസ്‌ക് വിഭാവനം ചെയ്യുന്നത്.
റോഡ്‌സ്റ്റർ, ഒപ്റ്റിമസ്, റോബോടാക്‌സി എന്നീ പദ്ധതികൾ പ്രതീക്ഷിച്ച രീതിയിൽ വിജയിച്ചാൽ യാത്ര, തൊഴിൽ, മനുഷ്യ-യന്ത്ര ഇടപെടൽ തുടങ്ങിയ മേഖലകളിൽ നിർണായക മാറ്റങ്ങൾ ഉണ്ടായേക്കാം. എന്നാൽ, ഈ സാങ്കേതികവിദ്യകളുടെ യഥാർഥ സാധ്യതയും വാണിജ്യവിജയവും നിർണയിക്കുക അവയുടെ പ്രായോഗിക പ്രകടനവും സുരക്ഷയും വിപണിയിലെ സ്വീകാര്യതയുമായിരിക്കും.
Tesla’s latest technological initiatives, including the Roadster, Optimus robot, and Robotaxi, aim to transform the future of the world, from transportation to the workplace. The company is striving to establish its dominance in artificial intelligence and robotics.