ഫോൺ നമ്പർ പങ്കുവെക്കാതെ തന്നെ മറ്റുള്ളവരുമായി ബന്ധപ്പെടാൻ സാധിക്കുന്ന പുതിയ യൂസർനെയിം ഫീച്ചർ അവതരിപ്പിക്കാനൊരുങ്ങി വാട്ട്സ്ആപ്പ്. ഈ ഫീച്ചർ പൂർണ്ണമായും എല്ലാവരിലേക്കും എത്തുന്നതിന് മുൻപായി ഉപയോക്താക്കൾക്ക് തങ്ങൾക്ക് ഇഷ്ടമുള്ള യൂസർനെയിം സ്വന്തമാക്കാനുള്ള അവസരം വാട്ട്സ്ആപ്പ് ഒരുക്കിയിരിക്കുകയാണ്. വാട്ട്സ്ആപ്പിന്റെ സിഇഒ കുനാൽ ഷായാണ് എക്സിലൂടെ ഈ വിവരം ഔദ്യോഗികമായി അറിയിച്ചത്.
ഉപയോക്താക്കളുടെ സ്വകാര്യത കൂടുതൽ സുരക്ഷിതമാക്കുക എന്നതാണ് ഇതിലൂടെ വാട്ട്സ്ആപ്പ് ലക്ഷ്യമിടുന്നത്. പുതിയ ഒരാളുമായി പരിചയപ്പെടുമ്പോഴോ അല്ലെങ്കിൽ പബ്ലിക് ഗ്രൂപ്പുകളിൽ ചേരുമ്പോഴോ സ്വന്തം ഫോൺ നമ്പർ മറ്റുള്ളവർക്ക് നൽകാൻ താല്പര്യമില്ലാത്തവർക്ക് ഈ അപ്ഡേറ്റ് ഏറെ സഹായകമാകും. വാട്ട്സ്ആപ്പിൽ ലോകമെമ്പാടുമായി 300 കോടിയിലധികം ഉപയോക്താക്കളുള്ളതിനാൽ ഒരേ പേരുകൾ ആവർത്തിക്കാൻ സാധ്യതയുണ്ട്. അതിനാൽ എത്രയും വേഗം തങ്ങൾക്ക് ആവശ്യമുള്ള യൂസർനെയിം സ്വന്തമാക്കാനാണ് കമ്പനിയുടെ നിർദ്ദേശം.
പുതിയ ഫീച്ചർ എല്ലാവരിലേക്കും എത്തുന്നതിന് മുൻപായി തന്റെ യൂസർനെയിം സ്വന്തമാക്കിയതായി വാട്ട്സ്ആപ്പ് സിഇഒ കുനാൽ ഷാ എക്സിലൂടെ വെളിപ്പെടുത്തി. "സമയമാണ് എല്ലാം. ഈ ഫീച്ചർ ലോകത്തിന് മുന്നിൽ അവതരിപ്പിക്കുന്നതിന് മുൻപേ എന്റെ യൂസർനെയിം ഞാൻ സ്വന്തമാക്കി കഴിഞ്ഞു. ഇനി നിങ്ങളുടെ ഊഴമാണ്," അദ്ദേഹം എക്സിൽ കുറിച്ചു. തങ്ങൾക്ക് ഇഷ്ടമുള്ള യൂസർനെയിമുകൾ മറ്റാരെങ്കിലും എടുക്കുന്നതിന് മുൻപായി എത്രയും വേഗം റിസർവ് ചെയ്യാൻ ഉപയോക്താക്കളെ ഓർമ്മിപ്പിക്കുകയാണ് കുനാൽ ഷായുടെ പോസ്റ്റ്.
യൂസർനെയിം എങ്ങനെ സ്വന്തമാക്കാം
വാട്ട്സ്ആപ്പ് ലേറ്റസ്റ്റ് വേർഷനിൽ Settings > Account > Username എന്ന ഓപ്ഷനിൽ പോയി നിങ്ങൾക്ക് ആവശ്യമുള്ള പേര് നൽകാം. പേര് കണ്ടെത്താൻ ബുദ്ധിമുട്ടുള്ളവർക്കായി പ്രത്യേക 'യൂസർനെയിം ജനറേറ്റർ' സംവിധാനവും കമ്പനി നൽകുന്നുണ്ട്. ചെറിയ ബിസിനസ്സ് സ്ഥാപനങ്ങൾക്കും കണ്ടന്റ് ക്രിയേറ്റർമാർക്കും ഓൺലൈനിൽ ഒരേ പേര് നിലനിർത്തുന്നതിനായി, തങ്ങളുടെ ഇൻസ്റ്റാഗ്രാം അല്ലെങ്കിൽ ഫേസ്ബുക്ക് അക്കൗണ്ടുകളിലെ അതേ യൂസർനെയിം തന്നെ വാട്ട്സ്ആപ്പിലും സ്വന്തമാക്കാൻ പ്രത്യേകം ഓപ്ഷൻ നൽകിയിട്ടുണ്ട്.
ഒരു വാട്ട്സ്ആപ്പ് യൂസർനെയിമിൽ പരമാവധി 35 അക്ഷരങ്ങൾ വരെ ഉപയോഗിക്കാം. പേര് തിരഞ്ഞെടുക്കുമ്പോൾ കമ്പനിയുടെ ചില നിബന്ധനകൾ പാലിക്കേണ്ടതുണ്ട്. ഉപയോക്താക്കൾക്ക് തങ്ങളുടെ യൂസർനെയിം എപ്പോൾ വേണമെങ്കിലും മാറ്റാനോ പുതുക്കാനോ പൂർണ്ണമായും ഒഴിവാക്കാനോ സാധിക്കും. പ്രമുഖ വ്യക്തികളുടെയും സെലിബ്രിറ്റികളുടെയും പേരിലുള്ള വ്യാജ അക്കൗണ്ടുകൾ തടയുന്നതിനായി അത്തരം പേരുകൾ കമ്പനി മുൻകൂട്ടി റിസർവ് ചെയ്ത് വെക്കും. പുതിയ മാറ്റങ്ങൾ നിങ്ങളുടെ നിലവിലെ ചാറ്റുകളെ യാതൊരു വിധത്തിലും ബാധിക്കില്ല. നിങ്ങളുടെ ഫോണിലെ കോൺടാക്റ്റ് ലിസ്റ്റിലുള്ളവർക്ക് പഴയത് പോലെ തന്നെ നിങ്ങളെ ബന്ധപ്പെടാം. അനാവശ്യ മെസ്സേജുകൾ ഒഴിവാക്കാനുള്ള ബ്ലോക്കിങ്, റിപ്പോർട്ടിങ്, സ്വകാര്യത ഉറപ്പാക്കുന്ന എൻഡ്-ടു-എൻഡ് എൻക്രിപ്ഷൻ തുടങ്ങിയ എല്ലാ സുരക്ഷാ സംവിധാനങ്ങളും പഴയതുപോലെ തന്നെ തുടർന്നും പ്രവർത്തിക്കും.
വരും മാസങ്ങളിൽ ഘട്ടം ഘട്ടമായാണ് ഈ ഫീച്ചർ ഉപയോക്താക്കളിലേക്ക് എത്തുക. നിങ്ങളുടെ വാട്ട്സ്ആപ്പിൽ ഇത് ആക്റ്റീവ് ആകുമ്പോൾ കമ്പനി നേരിട്ട് നോട്ടിഫിക്കേഷൻ നൽകും
ഇൻസ്റ്റഗ്രാം പോലെ എല്ലാവർക്കും പേരുകൾ തിരയാൻ ഒരു പബ്ലിക് ഡയറക്ടറി ഇതിൽ ഉണ്ടാകില്ല. കൃത്യമായ യൂസർനെയിം അറിയുന്നവർക്ക് മാത്രമേ മെസ്സേജ് അയക്കാൻ സാധിക്കൂ. യൂസർനെയിം വഴിയുള്ള സ്പാം മെസ്സേജുകൾ തടയാനായി ഒരു ഓപ്ഷണൽ 'യൂസർനെയിം കീ' (Username Key) സെറ്റ് ചെയ്യാം. പുതിയ ഒരാൾ ആദ്യമായി മെസ്സേജ് അയക്കുമ്പോൾ നിങ്ങളുടെ യൂസർനെയിമിനൊപ്പം ഈ 'കീ' കൂടി നിർബന്ധമായും നൽകേണ്ടി വരും.
വരും മാസങ്ങളിൽ ഘട്ടം ഘട്ടമായാണ് ഈ ഫീച്ചർ ഉപയോക്താക്കളിലേക്ക് എത്തുക. നിങ്ങളുടെ വാട്ട്സ്ആപ്പിൽ ഇത് ആക്റ്റീവ് ആകുമ്പോൾ കമ്പനി നേരിട്ട് നോട്ടിഫിക്കേഷൻ നൽകും. ഈ ഫീച്ചർ വരുന്നതോടെ പുതിയ ആളുകൾക്കോ ബിസിനസ്സ് അക്കൗണ്ടുകൾക്കോ മെസ്സേജ് അയക്കുമ്പോൾ നിങ്ങളുടെ ഫോൺ നമ്പർ അവർക്ക് കാണാൻ സാധിക്കില്ല.
WhatsApp is introducing a new username feature that allows users to connect with others without sharing their phone numbers, significantly enhancing privacy. Users are encouraged to claim their preferred usernames early to avoid unavailability, as the platform has over 3 billion users. This update will be particularly beneficial for interacting with new acquaintances or participating in public groups. Notably, this announcement was shared by Kunal Shah via X