രണ്ട് പതിറ്റാണ്ടായി ഇന്ത്യ ആഗോള വേദിയില് ആവര്ത്തിച്ചു പ്രഖ്യാപിച്ചുകൊണ്ടിരുന്ന തങ്ങളുടെ ഏറ്റവും വലിയ സാമ്പത്തിക പ്രതിരോധം തകരുകയാണോ? രാജ്യത്തിന്റെ ദീര്ഘകാല സുസ്ഥിര വളര്ച്ചയുടെ രഹസ്യ ആയുധമായി കൊണ്ടാടിയിരുന്ന 'ഡെമോഗ്രാഫിക് ഡിവിഡന്റ്' അഥവാ യുവജനസംഖ്യയില്നിന്നുള്ള സാമ്പത്തിക നേട്ടം പ്രതീക്ഷിച്ചതിലും വേഗത്തില് അവസാനിക്കുകയാണെന്ന ഞെട്ടിക്കുന്ന യാഥാര്ത്ഥ്യമാണ് ഇപ്പോള് പുറത്തുവരുന്നത്. പ്രശസ്ത അന്താരാഷ്ട്ര സാമ്പത്തിക മാസികയായ 'ദി ഇക്കണോമിസ്റ്റ്' പുറത്തുവിട്ട ഏറ്റവും പുതിയ റിപ്പോര്ട്ടുകള് പ്രകാരം, ഇന്ത്യയുടെ യുവത്വത്തിന്റെ കാലാവധി അതിവേഗം അവസാനിക്കുകയാണ്.
ജനനനിരക്കിലുണ്ടാകുന്ന ഈ ദ്രുതഗതിയിലുള്ള ഇടിവ് കേവലം ഒരു സാമൂഹിക ക്ഷേമ പ്രശ്നമല്ല, മറിച്ച് കൃത്യമായ ആസൂത്രണമില്ലെങ്കില് രാജ്യത്തിന്റെ ജിഡിപി വളര്ച്ചയെത്തന്നെ നിശ്ചലമാക്കാന് പോകുന്ന കടുത്ത സാമ്പത്തിക പ്രതിസന്ധിയാണ്
ദക്ഷിണേന്ത്യന് സംസ്ഥാനങ്ങളില് ഈ ജനസംഖ്യാപരമായ പ്രതിസന്ധി ഇപ്പോള്ത്തന്നെ പ്രകടമായിക്കഴിഞ്ഞു. സ്വാതന്ത്ര്യാനന്തരം ഇന്ത്യ നടപ്പിലാക്കിയ ശക്തമായ കുടുംബസൂത്രണ നയങ്ങളും ഗര്ഭനിരോധന മാര്ഗങ്ങളുടെ വ്യാപനവും ജനസംഖ്യാ സ്ഫോടനം നിയന്ത്രിക്കുന്നതില് വന് വിജയമായിരുന്നു. എന്നാല്, ഈ ജനസംഖ്യാ പരിവര്ത്തനം വെറും ഒരു തലമുറയുടെ വ്യത്യാസത്തില് രാജ്യത്തെ വലിയൊരു അസന്തുലിതാവസ്ഥയിലേക്കാണ് എത്തിച്ചിരിക്കുന്നത്. വിശാലമായ അടിത്തറയുള്ള ഒരു പ്രായ പിരമിഡിന് പകരം, മധ്യവയസ്കരുടെയും വയോധികരുടെയും എണ്ണം കുത്തനെ ഉയരുന്ന വിപരീത ജനസംഖ്യാ ഘടനയിലേക്കാണ് രാജ്യം നീങ്ങുന്നത്.
ലഭ്യമായ ആഗോള വിവരങ്ങള് വിശകലനം ചെയ്യുമ്പോള് ഇന്ത്യയുടെ ഭാവി സാമ്പത്തിക ഭദ്രത വലിയൊരു ചോദ്യചിഹ്നത്തിനു മുന്നിലാണ് നില്ക്കുന്നത്. ജോലി ചെയ്യുന്ന പ്രായത്തിലുള്ള ഓരോ നൂറു പേര്ക്കും ആശ്രയിച്ചു ജീവിക്കുന്ന 60 വയസ്സിന് മുകളിലുള്ള വയോധികരുടെ എണ്ണം 2021-ല് പതിനാറ് ആയിരുന്നെങ്കില്, 2050-ഓടെ ഇത് 30 ആയി ഉയരുമെന്നാണ് പ്രവചനങ്ങള് സൂചിപ്പിക്കുന്നത്. ഇതോടൊപ്പം രാജ്യത്തെ വയോജന ജനസംഖ്യ നിലവിലുള്ള പതിനാലര കോടിയില് നിന്നും മുപ്പത്തിനാല് കോടിയിലധികമായി വരുംവര്ഷങ്ങളില് കുതിച്ചുയരും. അതിനര്ത്ഥം ഇന്ത്യയിലെ പ്രായമായവരുടെ എണ്ണം വരുംദിവസങ്ങളില് ഇരട്ടിയിലധികമായി വര്ദ്ധിക്കുമെന്നാണ്.
രാജ്യത്തെ അധ്വാനിക്കുന്ന ജനവിഭാഗത്തിന്റെ ശതമാനം 2035-നും 2045-നും ഇടയില് അതിന്റെ പരമാവധിയില് എത്തിയ ശേഷം കുത്തനെ താഴോട്ട് പതിക്കും. ജനനനിരക്കിലുണ്ടാകുന്ന ഈ ദ്രുതഗതിയിലുള്ള ഇടിവ് കേവലം ഒരു സാമൂഹിക ക്ഷേമ പ്രശ്നമല്ല, മറിച്ച് കൃത്യമായ ആസൂത്രണമില്ലെങ്കില് രാജ്യത്തിന്റെ ജിഡിപി വളര്ച്ചയെത്തന്നെ നിശ്ചലമാക്കാന് പോകുന്ന കടുത്ത സാമ്പത്തിക പ്രതിസന്ധിയാണ്.
ജനസംഖ്യാപരമായ ഈ ഘടന മാറ്റത്തിന്റെ ആദ്യ ഇരകള് ഇന്ത്യയിലെ ഏറ്റവും ഉല്പ്പാദനക്ഷമതയും സാമ്പത്തിക വളര്ച്ചയുമുള്ള ദക്ഷിണേന്ത്യന് സംസ്ഥാനങ്ങളാണ്. തമിഴ്നാടും കേരളവും ഉള്പ്പെടുന്ന തെക്കന് സംസ്ഥാനങ്ങളില് വരാനിരിക്കുന്ന വലിയ പ്രതിസന്ധിയുടെ സൂചനകള് കണ്ടുതുടങ്ങിയിട്ടുണ്ട്. ജനനനിരക്ക് കുത്തനെ ഇടിഞ്ഞതും കുട്ടികളുടെ എണ്ണത്തില് കുറവുണ്ടായതും മൂലം കഴിഞ്ഞ അധ്യയന വര്ഷത്തില് തമിഴ്നാട്ടില് മാത്രം ആയിരത്തി ഇരുന്നൂറിലധികം സ്കൂളുകളാണ് പൂട്ടേണ്ടി വന്നത്. ഒരൊറ്റ കുട്ടി പോലും പുതുതായി പഠിക്കാന് ചേരാത്തതാണ് ഈ വിദ്യാലയങ്ങളുടെ തകര്ച്ചയ്ക്ക് കാരണമായത്.
നിലവില് ദക്ഷിണേന്ത്യയിലെ കടുത്ത തൊഴില്ക്ഷാമം പരിഹരിക്കുന്നത് ഉയര്ന്ന പ്രജനന നിരക്കുള്ള ഉത്തറേന്ത്യന് സംസ്ഥാനങ്ങളില് നിന്നുള്ള കുടിയേറ്റ തൊഴിലാളികളെ ആശ്രയിച്ചാണ്. എന്നാല് വൈകാതെ തന്നെ ഈ പ്രതിസന്ധി ഉത്തറേന്ത്യയെയും ബാധിക്കുന്നതോടെ രാജ്യം മുഴുവന് ഒരുപോലെ കടുത്ത തൊഴില്ക്ഷാമത്തിലേക്ക് നീങ്ങുമെന്നത് സ്ഥിതി കൂടുതല് സങ്കീര്ണമാക്കുന്നു.
ജനസംഖ്യാ ഘടന മാറുമ്പോള് രാജ്യത്തിന്റെ സമ്പദ്വ്യവസ്ഥയിലും മാറ്റങ്ങള് അനിവാര്യമായിവരുന്നു. അധ്വാനിക്കുന്ന ജനവിഭാഗത്തിന്റെ പ്രായപരിധി പതിനഞ്ച് മുതല് അറുപത് വയസ്സായി നിജപ്പെടുത്തിയ പഴയ രീതി ഇന്ത്യയ്ക്ക് ഇനി ദീര്ഘകാലം തുടരാനാവില്ല. മനുഷ്യന്റെ ആയുര്ദൈര്ഘ്യം വര്ദ്ധിച്ച സാഹചര്യത്തില് 60 വയസ്സിന് ശേഷവും ജോലി ചെയ്യാനും ഉല്പ്പാദന മേഖലകളില് പങ്കാളികളാകാനും വലിയൊരു വിഭാഗം ജനങ്ങള് ആഗ്രഹിക്കുന്നുണ്ട്.
വിസ്ഡം സര്ക്കിള്-ഡാല്ബെര്ഗ് നടത്തിയ സര്വേ പ്രകാരം, ഇന്ത്യയില് 55 മുതല് 80 വരെ പ്രായമുള്ളവരില് പകുതിയോളം പേരും ഔദ്യോഗിക വിരമിക്കലിനുശേഷവും തങ്ങള്ക്കനുയോജ്യമായ തൊഴിലുകള് അന്വേഷിക്കുന്നവരാണ്. എന്നാല് കേവലം വിരമിക്കല് പ്രായം ഉയര്ത്തിയതുകൊണ്ട് മാത്രം ഈ പ്രശ്നം പരിഹരിക്കപ്പെടില്ല. പ്രായമായ തൊഴിലാളികളെ കൂടുതല് ശാക്തീകരിക്കാനും അവര്ക്ക് അനുയോജ്യമായ പരിശീലനം നല്കാനും വേഗത ക്രമീകരിക്കാന് കഴിയുന്ന തരത്തിലുള്ള ഫ്ളക്സിബിള് ജോലി സാഹചര്യങ്ങള് ഒരുക്കാനും ഭരണകൂടങ്ങള് തയ്യാറാകണം.
അമേരിക്ക, ചൈന തുടങ്ങിയ ആഗോള ശക്തികള് നിലവില് ഈ വാര്ദ്ധക്യ പ്രതിസന്ധിയിലൂടെയാണ് കടന്നുപോകുന്നത്. യു.എസിലെ കണക്കുകള് പ്രകാരം പുതിയ സംരംഭകരില് ഭൂരിഭാഗവും 50 വയസ്സ് കഴിഞ്ഞവരാണ് എന്നത് ശ്രദ്ധേയമാണ്. പതിറ്റാണ്ടുകളായി അവര് ആര്ജിച്ചെടുത്ത അറിവും പരിചയസമ്പത്തും വിരമിക്കലോടെ ഇല്ലാതാകുന്നില്ല, പകരം അവ പുതിയ സംരംഭങ്ങളിലേക്ക് വഴിമാറുകയാണ് ചെയ്യുന്നത്.
ഇന്ത്യയിലും പ്രായമാകുന്ന ജനവിഭാഗത്തെ കേന്ദ്രീകരിച്ചുള്ള 'സില്വര് ഇക്കണോമി' അതിവേഗം വളര്ന്നുവരുന്നുണ്ട്. എന്നാല് വയോജനങ്ങളെ കേവലം ഉപഭോക്താക്കള് മാത്രമായി കാണാതെ, അവരെ രാജ്യത്തിന്റെ നിര്മ്മാതാക്കളായി മാറ്റാന് നമുക്ക് സാധിക്കണം. കേരളവും തമിഴ്നാടും വയോജനങ്ങള്ക്കായി പ്രത്യേക പോളിസികളും മന്ത്രാലയങ്ങളും രൂപീകരിച്ച് തുടക്കം കുറിച്ചിട്ടുണ്ടെങ്കിലും, രാജ്യവ്യാപകമായി വലിയൊരു സാമൂഹിക അഴിച്ചുപണി ഇതിന് ആവശ്യമുണ്ട്.
സങ്കീര്ണമായ ഭൗമരാഷ്ട്രീയ സാഹചര്യങ്ങളിലൂടെയും കടുത്ത വിഭവക്ഷാമത്തിലൂടെയും രാജ്യം കടന്നുപോകുന്ന ഈ വേളയില്, ജനസംഖ്യാപരമായ ഈ വലിയ മാറ്റത്തെ രാജ്യം അങ്ങേയറ്റം ഗൗരവത്തോടെ കാണണം. വരാനിരിക്കുന്ന കടുത്ത തൊഴില്ക്ഷാമത്തെയും ഉയര്ന്ന ആശ്രയത്വ നിരക്കിനെയും പ്രതിരോധിക്കാന് ഇന്നത്തെ യുവതലമുറയ്ക്ക് കൂടുതല് നൂതനമായ തൊഴില് നൈപുണ്യങ്ങള് നല്കേണ്ടതുണ്ട്. എങ്കില് മാത്രമേ ഭാവിയില് അവര് പ്രായമാകുമ്പോഴും ഉല്പ്പാദനക്ഷമതയുള്ളവരായി തുടരുകയുള്ളൂ. പ്രായമായവര്ക്കും യുവാക്കള്ക്കും ഒരുപോലെ ജോലി ചെയ്യാനും ജീവിക്കാനുമുള്ള അനുയോജ്യമായ സാഹചര്യങ്ങള് നഗരങ്ങളിലും ജോലിസ്ഥലങ്ങളിലും ഒരുക്കുക എന്നതുമാത്രമാണ് രാജ്യത്തിന്റെ സാമ്പത്തിക വളര്ച്ച നിലനിര്ത്താനുള്ള ഏക പോംവഴി.
For more than two decades, India has highlighted its demographic dividend—the economic advantage of having a large young population—as a key driver of long-term growth. However, recent findings suggest that this advantage may be fading faster than expected. According to a latest report by The Economist, India's youthful population is shrinking rapidly due to declining fertility rates and an ageing population. This raises concerns over future labour supply, economic productivity, and sustained growth. Experts warn that unless India creates enough jobs, improves skills, and increases workforce participation, especially among women, the country may miss the opportunity to fully benefit from its demographic advantage.