വിഴിഞ്ഞം അന്താരാഷ്ട്ര തുറമുഖത്തിന്റെ 49 ശതമാനം ഓഹരികള് സ്വിസ് കമ്പനിയായ എംഎസ്സി ഗ്രൂപ്പിന് വില്ക്കാനുള്ള അദാനി പോര്ട്ട്സിന്റെ തീരുമാനം കേവലം ഒരു വാണിജ്യ ഇടപാടല്ല. മറിച്ച്, അന്താരാഷ്ട്ര സമുദ്രവാണിജ്യ ഭൂപടത്തില് ഇന്ത്യയുടെ ഏറ്റവും തന്ത്രപ്രധാനമായ ഒരു തുറമുഖം വിദേശ കുത്തകകളുടെ കൈകളിലേക്ക് മാറുന്നതിന്റെ അപകടകരമായ സൂചനയാണ്. കരാര് ലംഘനമെന്ന സംസ്ഥാന സര്ക്കാരിന്റെ വാദങ്ങള്ക്കപ്പുറം, ഈ ഇടപാടില് ഒളിഞ്ഞിരിക്കുന്ന സാമ്പത്തിക കണക്കുകളും ആഗോള ഷിപ്പിങ് ലോകത്തെ ചില അപൂര്വ്വ വസ്തുതകളും പരിശോധിക്കുമ്പോഴാണ് അദാനി ഗ്രൂപ്പ് നടത്തിയ തന്ത്രപരമായ നീക്കത്തിന്റെ ആഴം വ്യക്തമാകുന്നത്. പൊതുഖജനാവിലെ പണം ഉപയോഗിച്ച് നിര്മ്മിച്ച ഒരു പദ്ധതിയിലൂടെ സ്വകാര്യ കമ്പനി എങ്ങനെയാണ് ചരിത്രത്തിലെ ഏറ്റവും വലിയ മൂല്യവര്ദ്ധനവ് സ്വന്തമാക്കുന്നത് എന്നതിന്റെ അണിയറ രഹസ്യങ്ങള് കൂടി ഈ ഇടപാടില് അടങ്ങിയിരിക്കുന്നു.
സര്ക്കാര് മുതലില് അദാനിയുടെ കൊള്ളലാഭം: അമ്പരപ്പിക്കുന്ന സാമ്പത്തിക കണക്കുകള്
വിഴിഞ്ഞം തുറമുഖത്തിന്റെ ആദ്യഘട്ട നിര്മ്മാണത്തിനായി അദാനി ഗ്രൂപ്പ് സ്വന്തം നിലയില് മുടക്കിയത് 2,454 കോടി രൂപ മാത്രമാണ്. എന്നാല് കേരള സര്ക്കാര് 5,595 കോടി രൂപയും കേന്ദ്ര സര്ക്കാര് വയബിലിറ്റി ഗ്യാപ് ഫണ്ടായി 817 കോടി രൂപയും ഈ പദ്ധതിക്കായി ചെലവഴിച്ചു. അതായത്, തുറമുഖത്തിന്റെ ഏറ്റവും ചെലവേറിയ പുലിമുട്ട് നിര്മ്മാണവും ഭൂമിയേറ്റെടുക്കലും അടക്കമുള്ള അടിസ്ഥാന സൗകര്യങ്ങള് ഒരുക്കിയത് പൂര്ണ്ണമായും സര്ക്കാരിന്റെ പണം ഉപയോഗിച്ചാണ്.
പ്രവര്ത്തനമാരംഭിച്ച് രണ്ടാമത്തെ വര്ഷം തന്നെ തങ്ങളുടെ കൈവശമുള്ള ഓഹരികളില് നിന്ന് 49 ശതമാനം വിറ്റഴിക്കുമ്പോള് അദാനി ഗ്രൂപ്പിന് ലഭിക്കുന്നത് 1,397 മില്യണ് ഡോളര്, അതായത് ഏകദേശം 13,000 കോടിയിലധികം രൂപയാണ്. സ്വന്തം നിലയില് മുടക്കിയ തുകയുടെ അഞ്ചിരട്ടിയിലധികം തുക കേവലം പകുതിയില് താഴെ ഓഹരികള് വില്ക്കുന്നതിലൂടെ അദാനി ഗ്രൂപ്പ് സ്വന്തമാക്കുന്നു. സര്ക്കാര് പണം ഉപയോഗിച്ച് നിര്മ്മിച്ച ആസ്തിയുടെ മൂല്യവര്ദ്ധനവ് പൂര്ണ്ണമായും ഒരു സ്വകാര്യ കമ്പനിയുടെ പോക്കറ്റിലേക്ക് മാത്രം എത്തുന്ന ഡിബിഎഫ്ഒടി കരാറിലെ വന് വീഴ്ചയാണ് ഈ കണക്കുകള് തുറന്നുകാട്ടുന്നത്.
കോമണ് യൂസര് നയത്തെ തകര്ക്കുന്ന 'ലംബമാന സംയോജനം'
ലോകത്തെ ഏറ്റവും വലിയ കണ്ടെയ്നര് ഷിപ്പിങ് കമ്പനിയായ എംഎസ്സിയുടെ ടെര്മിനല് ഓപ്പറേറ്റിംഗ് വിഭാഗമായ ടെര്മിനല് ഇന്വെസ്റ്റ്മെന്റ് ലിമിറ്റഡിന്റെ ഉപകമ്പനിയായ മുണ്ടി ലിമിറ്റഡാണ് വിഴിഞ്ഞത്ത് നിക്ഷേപം നടത്തുന്നത്. ഇവിടെയാണ് സമുദ്രവാണിജ്യ രംഗത്തെ 'ലംബമാന സംയോജനം' (Vertical Integration) എന്ന വലിയ ഭീഷണി ഒളിഞ്ഞിരിക്കുന്നത്. ഒരു തുറമുഖം എല്ലാ കപ്പല് കമ്പനികള്ക്കും തുല്യ പരിഗണന നല്കുന്ന 'കോമണ്-യൂസര്' അടിസ്ഥാനത്തിലാണ് പ്രവര്ത്തിക്കേണ്ടത് എന്ന് കരാര് നിഷ്കര്ഷിക്കുന്നുണ്ട്.
എന്നാല് ലോകത്തിലെ തന്നെ ഏറ്റവും വലിയ ഷിപ്പിങ് ലൈന് ഒരു തുറമുഖത്തിന്റെ 49 ശതമാനം ഉടമസ്ഥാവകാശം ഏറ്റെടുക്കുമ്പോള്, ആ തുറമുഖം ക്രമേണ അവരുടെ സ്വന്തം കപ്പലുകള്ക്ക് മാത്രം മുന്ഗണന നല്കുന്ന ഒരു താവളമായി മാറാന് സാധ്യതയുണ്ട്. ബെര്ത്ത് അലോക്കേഷനിലും ക്രെയ്ന് പ്രവര്ത്തനങ്ങളിലും തങ്ങളുടെ കപ്പലുകള്ക്ക് രഹസ്യ മുന്ഗണന നല്കാന് എംഎസ്സിക്ക് സാധിക്കുമെന്നതിനാല്, ലോകത്തെ മറ്റ് പ്രമുഖ കപ്പല് കമ്പനികളായ മെയിഴ്സ്ക് , സിഎംഎ-സിജിഎം എന്നിവര് വിഴിഞ്ഞത്തേക്ക് വരാന് മടിക്കും. ഇത് വിഴിഞ്ഞത്തെ ഒരു സ്വതന്ത്ര ആഗോള ട്രാന്സ്ഷിപ്പ്മെന്റ് ഹബ്ബ് എന്ന നിലയില് നിന്ന് മാറ്റി, എംഎസ്സി ഗ്രൂപ്പിന്റെ മാത്രം സ്വകാര്യ ഹബ്ബായി ചുരുക്കുമെന്നതാണ് ഏറ്റവും വലിയ അപകടം.
കരാറിലെ 'പൊതുതാല്പര്യം' എന്ന അവ്യക്തതയും നിയമക്കുരുക്കും
2015-ല് ഒപ്പുവെച്ച കണ്സെഷന് കരാറിലെ ചില അവ്യക്തതകളാണ് ഇപ്പോള് അദാനി ഗ്രൂപ്പ് തങ്ങളുടെ രക്ഷാകവചമായി ഉപയോഗിക്കുന്നത്. കരാര് പ്രകാരം 25 ശതമാനത്തിലധികം ഓഹരികള് കൈമാറ്റം ചെയ്യുമ്പോള് സര്ക്കാരിന്റെ മുന്കൂര് അനുമതി വേണമെന്നത് നിര്ബന്ധമാണ്. എന്നാല് ഇതിനായി കരാറില് ഉപയോഗിച്ചിരിക്കുന്ന വാക്ക് ദേശീയ സുരക്ഷയും പൊതുതാല്പര്യവും (National security and public interest) മുന്നിര്ത്തി സര്ക്കാര് അനുമതി നല്കണം എന്നാണ്. കരാറില് എവിടെയും എന്താണ് 'പൊതുതാല്പര്യം' എന്ന് കൃത്യമായി നിര്വചിച്ചിട്ടില്ല. ഈ നിയമപരമായ പഴുതുപയോഗിച്ചാണ് സെബിയെ അറിയിച്ച ശേഷം മാത്രം സര്ക്കാരിനെ അറിയിക്കാം എന്ന നിലപാട് അദാനി ഗ്രൂപ്പ് സ്വീകരിച്ചത്.
സര്ക്കാര് ഈ ഇടപാട് തടസ്സപ്പെടുത്തിയാല്, 'പൊതുതാല്പര്യം' എന്താണെന്ന് തെളിയിക്കേണ്ട ബാധ്യത സര്ക്കാരിന്റേതായി മാറും. ഇത് ഡല്ഹിയിലെ ഇന്റര്നാഷണല് സെന്റര് ഫോര് ആള്ട്ടര്നേറ്റീവ് ഡിസ്പ്യൂട്ട് റെസൊല്യൂഷന്റെ കീഴിലുള്ള നീണ്ട ആര്ബിട്രേഷന് നടപടികളിലേക്ക് നയിക്കാനും തുറമുഖത്തിന്റെ ഭാവി വികസനത്തെ വര്ഷങ്ങളോളം തടസ്സപ്പെടുത്താനും ഇടയാക്കും.
കൊളംബോയെ വീഴ്ത്താനുള്ള എംഎസ്സിയുടെ അണിയറ നീക്കം
എന്തുകൊണ്ടാണ് എംഎസ്സി ഗ്രൂപ്പ് ഇത്രയും വലിയ തുക മുടക്കി വിഴിഞ്ഞത്ത് 49 ശതമാനം ഓഹരികള് സ്വന്തമാക്കാന് തിടുക്കം കൂട്ടുന്നത് എന്നതിലും ഒരു വലിയ അന്താരാഷ്ട്ര വാണിജ്യ രഹസ്യമുണ്ട്. നിലവില് ഇന്ത്യയുടെ ട്രാന്സ്ഷിപ്പ്മെന്റ് കാര്ഗോയുടെ 75 ശതമാനവും കൈകാര്യം ചെയ്യുന്നത് കൊളംബോ, സിംഗപ്പൂര് തുറമുഖങ്ങളാണ്. അടുത്തിടെയായി കൊളംബോ തുറമുഖം കടുത്ത പ്രവര്ത്തന തടസ്സങ്ങളും രാഷ്ട്രീയ-സാമ്പത്തിക പ്രതിസന്ധികളും നേരിടുന്നുണ്ട്. ഇന്ത്യയിലെ ക്യാബോട്ടേജ് നിയമങ്ങളില് വന്ന ഇളവുകള് പ്രയോജനപ്പെടുത്തി, കൊളംബോയ്ക്ക് പകരം ഇന്ത്യയുടെ ദക്ഷിണതീരത്ത് സ്വന്തമായി ഒരു വലിയ ട്രാന്സ്ഷിപ്പ്മെന്റ് സാമ്രാജ്യം സ്ഥാപിക്കുകയാണ് എംഎസ്സിയുടെ ലക്ഷ്യം.
അദാനി ഗ്രൂപ്പിന്റെ ഗുജറാത്തിലെ മുന്ദ്ര പോര്ട്ടിലും തമിഴ്നാട്ടിലെ എണ്ണൂര് പോര്ട്ടിലും എംഎസ്സിക്ക് നിലവില് പങ്കാളിത്തമുണ്ട്. വിഴിഞ്ഞം കൂടി തങ്ങളുടെ നിയന്ത്രണത്തിലാകുന്നതോടെ ഇന്ത്യന് മഹാസമുദ്രത്തിലെ ചരക്കുനീക്കത്തിന്റെ പൂര്ണ്ണ നിയന്ത്രണം സ്വിസ് ഭീമന്റെ കൈകളില് എത്തും. ഈ ആഗോള കുത്തകവല്ക്കരണമാണ് കേരളത്തിന്റെ സ്വപ്ന പദ്ധതിയിലൂടെ ഇപ്പോള് യാഥാര്ത്ഥ്യമാകുന്നത്.
The decision by Adani Ports to sell a 49% stake in the Vizhinjam International Seaport to the Swiss-based MSC Group is viewed not merely as a commercial transaction, but as a strategic shift that raises concerns about national security and the control of a critical maritime asset. Critics argue that this move risks placing one of India's most strategically important ports into the hands of a foreign entity, transcending simple contract disputes with the state government. By analyzing the underlying financial dynamics and the complexities of the global shipping industry, it becomes evident that this transaction represents a calculated strategic maneuver by the Adani Group.