സംസ്ഥാനത്തെ പൊതുവിദ്യാഭ്യാസ മേഖലയില് നിര്ണായകമായൊരു പ്രക്രിയയ്ക്കാണു പൊതുവിദ്യാഭ്യാസ വകുപ്പ് തുടക്കം കുറിച്ചിരിക്കുന്നത്. 2009-ലെ കേന്ദ്ര വിദ്യാഭ്യാസ അവകാശ നിയമം അനുശാസിക്കുന്ന പ്രധാന വ്യവസ്ഥകളിലൊന്ന് രാജ്യത്ത് അംഗീകാരമില്ലാത്ത സ്കൂളുകള് പ്രവര്ത്തിക്കാന് പാടില്ല എന്നതാണ്. എന്നാല്, ഈ നിയമം നിലവിലുണ്ടായിട്ടും കേരളത്തില് നിലവില് 765 സ്കൂളുകള് യാതൊരുവിധ സര്ക്കാര് അംഗീകാരവുമില്ലാതെ പ്രവര്ത്തിക്കുന്നുണ്ടെന്നാണ് കണ്ടെത്തല്. സിബിഎസ്ഇ ഉള്പ്പെടെയുള്ള കേന്ദ്ര സര്ക്കാരിന്റെ കീഴിലുള്ള വിദ്യാഭ്യാസ ബോര്ഡുകളുടെ അംഗീകാരമുണ്ടെന്ന വ്യാജേനയാണ് ഇത്തരം സ്ഥാപനങ്ങള് പ്രവര്ത്തിച്ചുവരുന്നതെന്ന് കേന്ദ്ര വിദ്യാഭ്യാസ മന്ത്രാലയം തന്നെ സംസ്ഥാന സര്ക്കാരിനെ അറിയിച്ചിട്ടുണ്ട്. രക്ഷിതാക്കളെ തെറ്റിദ്ധരിപ്പിച്ച് കുട്ടികളെ പ്രവേശിപ്പിക്കുന്ന ഈ ചൂഷണത്തിന് തടയിടുകയെന്ന ലക്ഷ്യത്തോടെയാണ് വിദ്യാഭ്യാസ വകുപ്പ് ഇപ്പോള് കര്ശന നടപടികളിലേക്ക് കടന്നിരിക്കുന്നത്.
അംഗീകാരമില്ലാത്ത സ്കൂളുകളില് പഠിക്കുന്ന കുട്ടികളുടെ അക്കാദമിക ഭാവി അനിശ്ചിതത്വത്തിലാകാതിരിക്കാന് വലിയൊരു ഇളവാണ് ഈ അധ്യയന വര്ഷം സര്ക്കാര് നല്കിയിരിക്കുന്നത്. ഇത്തരം സ്കൂളുകളില്നിന്ന് അംഗീകാരമുള്ള മറ്റൊരു സ്കൂളിലേക്കു മാറാന് നിലവില് ട്രാന്സ്ഫര് സര്ട്ടിഫിക്കറ്റ് നിര്ബന്ധമില്ല. സ്കൂള് മാറാന് ശ്രമിക്കുമ്പോള് മാനേജ്മെന്റുകള് ടിസി നല്കാതെ രക്ഷിതാക്കളെ ബുദ്ധിമുട്ടിക്കുന്ന സാഹചര്യം ഒഴിവാക്കാനാണ് ഈ പ്രത്യേക ഇളവ് നല്കിയിരിക്കുന്നത്. എന്നാല്, ഈ അവസരം ഈ വര്ഷത്തേക്കു മാത്രമായി ചുരുക്കിയിരിക്കുന്നുവെന്നതു വളരെ നിര്ണായകമാണ്. അടുത്ത അധ്യയന വര്ഷം മുതല് ടിസി ഇല്ലാതെ മറ്റ് സ്കൂളുകളില് പ്രവേശനം നേടാന് സാധിക്കില്ലെന്ന പൊതുവിദ്യാഭ്യാസ ഡയറക്ടറുടെ മുന്നറിയിപ്പ്, ഈ അധ്യയന വര്ഷം തന്നെ കുട്ടികളെ സുരക്ഷിതമായ വിദ്യാഭ്യാസ സ്ഥാപനങ്ങളിലേക്കു മാറ്റാന് രക്ഷിതാക്കളെ ഓര്മിപ്പിക്കുന്നു.
അംഗീകാരമില്ലാത്ത സ്ഥാപനങ്ങളുടെ പ്രവര്ത്തനം അവസാനിപ്പിക്കുകയന്നതു താക്കീതില് ഒതുങ്ങില്ലെന്നാണ് പുതിയ നടപടികള് വ്യക്തമാക്കുന്നത്. കുട്ടികളെ മറ്റു സ്കൂളുകളിലേക്ക് മാറ്റാന് സമയം അനുവദിച്ചശേഷം, ഇത്തരം വ്യാജ സ്കൂളുകള്ക്കെതിരെ അടച്ചുപൂട്ടല് ഉള്പ്പെടെയുള്ള കര്ശനമായ നിയമനടപടികള് വരും നാളുകളില് പ്രതീക്ഷിക്കാം. കൃത്യമായ അടിസ്ഥാന സൗകര്യങ്ങളോ യോഗ്യരായ അധ്യാപകരോ ഇല്ലാതെ പ്രവര്ത്തിക്കുന്ന ഇത്തരം സ്ഥാപനങ്ങള് കുട്ടികളുടെ ബൗദ്ധിക നിലവാരത്തെ ദോഷകരമായി ബാധിക്കുന്നുണ്ട്. സര്ക്കാരിന്റെ ഈ ഇടപെടല് വിദ്യാഭ്യാസ മേഖലയുടെ ഗുണനിലവാരം ഉറപ്പുവരുത്തുന്നതിനും വ്യാജ അവകാശവാദങ്ങളിലൂടെ പണം തട്ടുന്ന പ്രവണത അവസാനിപ്പിക്കുന്നതിനും വലിയ രീതിയില് സഹായകമാകും. നിയമം കര്ശനമാകുന്നതോടെ സംസ്ഥാനത്തെ വിദ്യാഭ്യാസ രംഗത്ത് കൂടുതല് സുതാര്യത കൈവരുമെന്നാണു വിലയിരുത്തപ്പെടുന്നത്.
ഏതൊരു സ്കൂളും പ്രവര്ത്തിക്കാന് സര്ക്കാര് അല്ലെങ്കില് വിദ്യാഭ്യാസ വകുപ്പിന്റെ അംഗീകാരം അനിവാര്യമാണ്. സ്കൂളിന്റെ ഓഫീസില് സന്ദര്ശിക്കുമ്പോള് സര്ക്കാരിന്റെ 'അംഗീകാര പത്രം' ആവശ്യപ്പെട്ട് പരിശോധിക്കുക. ഇത് കൃത്യമായ സീലോടും തീയതിയോടും കൂടി വിദ്യാഭ്യാസ വകുപ്പിന്റെ ലെറ്റര് ഹെഡില് ഉള്ളതാണോയെന്നു ഉറപ്പുവരുത്തണം. സിബിഎസ്ഇ അല്ലെങ്കില് ഐസിഎസ്ഇ അംഗീകാരമുണ്ടെന്ന് അവകാശപ്പെടുന്നുണ്ടെങ്കില്, അവരുടെ ഔദ്യോഗിക വെബ്സൈറ്റുകളില് നല്കിയിട്ടുള്ള 'Affiliation Number' ഉപയോഗിച്ച് സ്കൂളിന്റെ പേര് ലിസ്റ്റില് ഉണ്ടോയെന്ന് ഓണ്ലൈനായി പരിശോധിക്കണം. അതുപോലെ സംസ്ഥാന പൊതുവിദ്യാഭ്യാസ വകുപ്പ് എല്ലാ വര്ഷവും അംഗീകാരമുള്ള സ്കൂളുകളുടെ പട്ടിക പുറത്തിറക്കാറുണ്ട്. വിദ്യാഭ്യാസ ഓഫീസുകളില് (AEO/DEO ഓഫീസ്) പോയി ആ മേഖലയിലെ അംഗീകൃത സ്കൂളുകളുടെ ലിസ്റ്റില് ഈ സ്കൂള് ഉള്പ്പെട്ടിട്ടുണ്ടോയെന്ന് എളുപ്പത്തില് കണ്ടെത്താനാകും. പൊതുവിദ്യാഭ്യാസ വകുപ്പിന്റെ ഔദ്യോഗിക വെബ്സൈറ്റിലും ഇതു ലഭ്യമായേക്കാം.
അംഗീകാരമില്ലാത്ത സ്കൂളുകള്ക്കു പലപ്പോഴും കെട്ടിട സൗകര്യം, കളിസ്ഥലം, ലബോറട്ടറി, ലൈബ്രറി തുടങ്ങിയ കാര്യങ്ങളില് സര്ക്കാര് നിഷ്കര്ഷിക്കുന്ന മാനദണ്ഡങ്ങള് പാലിക്കാന് സാധിക്കാറില്ല. ഒരു വാടക കെട്ടിടത്തിലോ വളരെ ചെറിയ സ്ഥലത്തോ ആണ് സ്കൂള് പ്രവര്ത്തിക്കുന്നതെങ്കില്, അത് ഒരു അംഗീകൃത സ്കൂളാകാന് സാധ്യത കുറവാണ്. കൂടാതെ, സ്കൂള് കെട്ടിടത്തിനു ഫയര് ഫോഴ്സിന്റെയും ആരോഗ്യവകുപ്പിന്റെയും ഫിറ്റ്നസ് സര്ട്ടിഫിക്കറ്റുകള് ഉണ്ടോയെന്ന് അന്വേഷിക്കുന്നത് ഗുണകരമാണ്.
അംഗീകാരമില്ലാത്ത സ്കൂളുകള് പലപ്പോഴും ആകര്ഷകമായ ഓഫറുകളും ഫീസ് ഇളവുകളും നല്കി രക്ഷിതാക്കളെ ആകര്ഷിക്കാന് ശ്രമിക്കും. എന്നാല് ഇവരുടെ ഫീസ് രസീതുകളില് കൃത്യമായ സ്കൂള് സീലോ രജിസ്ട്രേഷന് നമ്പറോ ഇല്ലാത്തത് ഒരു മുന്നറിയിപ്പാണ്. പാഠപുസ്തകങ്ങളിലും യൂണിഫോമിലും ഔദ്യോഗിക ചിഹ്നങ്ങള് ഉണ്ടോയെന്നു പരിശോധിക്കുക.
കൂടാതെ നിയമപ്രകാരം സ്കൂളുകളിലെ അധ്യാപകര്ക്കു കൃത്യമായ യോഗ്യതയുണ്ടായിരിക്കണം. അധ്യാപകരുടെ പാനലിലുള്ളവരുടെ യോഗ്യതയെക്കുറിച്ച് ചോദിക്കുമ്പോള് മറുപടി നല്കാന് സ്കൂള് അധികൃതര് മടിക്കുകയാണെങ്കില് അതു സംശയിക്കണം. അംഗീകാരമില്ലാത്ത സ്കൂളുകളില് പലപ്പോഴും അധ്യാപകരുടെ യോഗ്യത പരിശോധിക്കപ്പെടാറില്ല.
രക്ഷിതാക്കള് ശ്രദ്ധിക്കേണ്ടത്
ഈ സ്കൂളുകളില് പഠിക്കുന്ന കുട്ടികള്ക്കു പരീക്ഷ എഴുതുന്നതിനോ ടിസി ലഭിക്കുന്നതിനോ ഭാവിയില് വലിയ തടസ്സങ്ങള് നേരിട്ടേക്കാം. സര്ക്കാര് മുന്നറിയിപ്പ് നല്കിയിട്ടുള്ള സാഹചര്യത്തില്, നിങ്ങളുടെ കുട്ടിയുടെ സ്കൂളിനെക്കുറിച്ച് സംശയമുണ്ടെങ്കില് അടിയന്തരമായി അടുത്തുള്ള ഉപജില്ലാ വിദ്യാഭ്യാസ ഓഫീസറുമായി ബന്ധപ്പെട്ട് വിവരങ്ങള് ഉറപ്പുവരുത്തുക. 2009-ലെ വിദ്യാഭ്യാസ അവകാശ നിയമപ്രകാരം പ്രവര്ത്തിക്കുന്ന സ്കൂളുകള്ക്ക് സര്ക്കാര് നിഷ്കര്ഷിക്കുന്ന എല്ലാ മാനദണ്ഡങ്ങളും പാലിക്കേണ്ടതുണ്ട്.
The Kerala General Education Department has launched a major crackdown on 765 unrecognised schools operating across the state in violation of the Right to Education (RTE) Act, 2009. According to the department, many of these institutions falsely claim affiliation with central education boards such as CBSE. To protect students, the government has allowed children studying in these schools to transfer to recognised institutions during the current academic year without a Transfer Certificate (TC). However, this relaxation will not continue next year. Authorities have warned that strict legal action, including the closure of unrecognised schools, will follow. Parents have been advised to verify a school's government recognition, affiliation number, infrastructure, teacher qualifications, and official documents before admission.