വിജയ് സേതുപതി നായകനായ തമിഴ് ചിത്രം ‘ബത്ത’യുടെ വിജയാഘോഷ ചടങ്ങിൽ ചിത്രത്തിന്റെ ഓസ്കർ സാധ്യതയെക്കുറിച്ചുള്ള പ്രതീക്ഷ പങ്കുവെച്ച് സംവിധായകൻ അറ്റ്ലി. ചിത്രം ഓസ്കറിലെത്തിക്കണമെന്നാണ് തന്റെ ആഗ്രഹമെന്നും അക്കാദമി വേദിയിൽ തമിഴിൽ പ്രസംഗിക്കണമെന്നത് സ്വപ്നമാണെന്നും അറ്റ്ലി പറഞ്ഞു. സിനിമയിലെ തന്റെ യാത്രയെ ഓർമിപ്പിച്ചുകൊണ്ടാണ് അദ്ദേഹം ഓസ്കർ സ്വപ്നത്തെക്കുറിച്ച് സംസാരിച്ചത്.
“സ്കൂളിൽ പഠിക്കുമ്പോൾ ഷാരൂഖ് ഖാനെയും വിജയ് അണ്ണനെയും വെച്ച് സിനിമ ചെയ്യുമെന്ന് പറഞ്ഞിരുന്നെങ്കിൽ ആളുകൾ എന്നെ നോക്കി ചിരിക്കുമായിരുന്നു. എന്നാൽ ഞാനത് ചെയ്തു. അതുപോലെ ‘ബട്ടത്ത’യെ ഓസ്കറിലേക്ക് എത്തിക്കണമെന്നാണ് ഇനിയെന്റെ ആഗ്രഹം. ആ വേദിയിൽ നിൽക്കുമ്പോൾ എങ്ങനെയായിരിക്കുമെന്ന് അനുഭവിച്ചറിയണം. അതിനായി സാധിക്കുന്നതെല്ലാം ഞാൻ ചെയ്യുന്നുണ്ട്,” അറ്റ്ലി പറഞ്ഞു.
ഓസ്കർ വേദിയിൽ അവസരം ലഭിച്ചാൽ തമിഴിലായിരിക്കും തന്റെ പ്രസംഗമെന്നും അദ്ദേഹം പറഞ്ഞു. “ഞാൻ ഉറപ്പായും തമിഴിൽ സംസാരിക്കും. ഹോളിവുഡ് എത്തിപ്പെടാനാകാത്ത ഇടമല്ല. നമുക്കത് തീർച്ചയായും ചെയ്യാനാകും,” അറ്റ്ലി പറഞ്ഞു.
അല്ലു അർജുൻ നായകനാകുന്ന തന്റെ അടുത്ത ചിത്രമായ ‘രാക്ക’യെക്കുറിച്ച് ഹോളിവുഡിൽ നിന്നുള്ള സിനിമാപ്രവർത്തകരുടെ പ്രതികരണവും അറ്റ്ലി പങ്കുവെച്ചു. ചിത്രത്തിനായി പ്രവർത്തിക്കുന്ന അന്താരാഷ്ട്ര സിനിമാപ്രവർത്തകർ യുവ സംഗീതസംവിധായകൻ സായ് അഭ്യങ്കറിന്റെ സംഗീതത്തിൽ അത്ഭുതപ്പെട്ടുവെന്നും, “ആരാണ് ഈ മനുഷ്യൻ?” എന്ന് ചോദിച്ചെന്നും സംവിധായകൻ പറഞ്ഞു.
ലണ്ടനിൽ ‘രാക്ക’യുടെ സംഗീതസംവിധാനത്തിനായി പോയപ്പോഴുണ്ടായ അനുഭവവും അറ്റ്ലി പങ്കുവെച്ചു. വിഖ്യാത സംഗീതസംവിധായകരായ ഹാൻസ് സിമ്മറും ലുഡ്വിഗ് ഗൊറാൻസണും സംഗീതസംവിധാനം നടത്തിയിട്ടുള്ള സ്റ്റുഡിയോയിലാണ് സായിക്കൊപ്പം ജോലി ചെയ്തത് എന്നും അറ്റ്ലി പറഞ്ഞു. സായ് അഭ്യങ്കറിന്റെ കഴിവിൽ തനിക്ക് വലിയ പ്രതീക്ഷയുണ്ടെന്നും സംവിധായകൻ വ്യക്തമാക്കി.
‘ബത്ത’യുടെ വിജയാഘോഷ വേദിയിൽ സായ് അഭ്യങ്കറിനെതിരായ നെപ്പോട്ടിസം ആരോപണങ്ങളിലും അറ്റ്ലി പ്രതികരിച്ചു. സോഷ്യൽ മീഡിയയിൽ സായ് നേരിടുന്ന ഇത്തരം ആരോപണങ്ങൾ തള്ളിക്കളഞ്ഞുകൊണ്ടായിരുന്നു സംവിധായകന്റെ പ്രതികരണം. “മറ്റുള്ളവർ പറയുന്നതുപോലെ നീ ഒരു നെപ്പോ കിഡ് അല്ല. ‘കച്ചി സേര’, ‘ആസ കൂട’ എന്നീ ഗാനങ്ങളുമായി എത്തിയ ഒരാൾ എന്നതിനുപരി, തമിഴ് ജനതയ്ക്ക് അഭിമാനിക്കാവുന്ന ഒരാളായി അവൻ മാറും,” അറ്റ്ലി പറഞ്ഞു.
ബാലാജി തരനീതരൻ സംവിധാനം ചെയ്ത ‘ബത്ത’യിൽ വിജയ് സേതുപതിയാണ് കേന്ദ്ര കഥാപാത്രത്തെ അവതരിപ്പിക്കുന്നത്. ‘നടുവുല കൊഞ്ചം പക്കത്ത കാണോം’, ‘സീതാകത്തി’ എന്നീ ചിത്രങ്ങൾക്ക് ശേഷം ബാലാജി തരനീതരനും വിജയ് സേതുപതിയും ഒന്നിക്കുന്ന മൂന്നാമത്തെ ചിത്രമാണിത്. 1986ലെ മദ്രാസിന്റെ പശ്ചാത്തലത്തിലാണ് ചിത്രം കഥ പറയുന്നത്. പ്രദേശത്തെ ഭയപ്പെടുത്തുന്ന ഗുണ്ടയായ ബത്തയെ, ഒരു എട്ടുവയസ്സുകാരൻ അബദ്ധത്തിൽ സ്കൂളിലെ ശുചിമുറിയിൽ പൂട്ടിയിടുന്നതും തുടർന്നുണ്ടാകുന്ന സംഭവങ്ങളുമാണ് ചിത്രത്തിന്റെ പ്രമേയം.
ബത്ത എന്ന ഗുണ്ടയുടെ വേഷത്തിലാണ് വിജയ് സേതുപതി എത്തുന്നത്. ബാലതാരം സായിയാണ് ചിത്രത്തിൽ എട്ടുവയസ്സുകാരന്റെ വേഷം അവതരിപ്പിക്കുന്നത്. ലിജോമോൾ ജോസ് ബത്തയുടെ ഭാര്യയായി എത്തുന്നു. അജയ് ഘോഷ്, അർജുൻ ചിദംബരം, ശാന്തി ബാലചന്ദ്രൻ, ഹരി കൃഷ്ണൻ എന്നിവരാണ് മറ്റ് പ്രധാന താരങ്ങൾ. അറ്റ്ലിയാണ് ചിത്രം അവതരിപ്പിക്കുന്നത്. എ ഫോർ ആപ്പിൾ സ്റ്റുഡിയോസും സിനി1 സ്റ്റുഡിയോസും ചേർന്നാണ് നിർമാണം. മുറാദ് ഖേതാനി, പ്രിയ അറ്റ്ലി, അലോക് ജെയിൻ, അജിത് അന്ധാരെ എന്നിവരാണ് ചിത്രത്തിന്റെ മറ്റ് നിർമാതാക്കൾ.
Director Atlee has expressed his ambition to take Vijay Sethupathi’s Tamil film Baththa to the Oscars and deliver his speech in Tamil. He also praised young composer Sai Abhyankkar, revealing that Hollywood professionals were impressed by his music for Raaka. Atlee further defended Sai against social media nepotism accusations.