300 കോടി ക്ലബ്ബിൽ ഇടംപിടിച്ച് ‘ബെത്‌ലഹേം കുടുംബ യൂണിറ്റ്’; അപ്രതീക്ഷിത വിജയത്തിൽ പ്രതികരണവുമായി ഫഹദ് ഫാസിൽ. മലയാള സിനിമയിലെ സമീപകാല ബോക്സ് ഓഫീസ് വിജയങ്ങളിൽ ശ്രദ്ധേയമായി മാറിയ ചിത്രത്തിന് ആഗോളതലത്തിൽ 300 കോടിയിലധികം കളക്ഷൻ ലഭിച്ചതിന് പിന്നാലെയാണ് ഫഹദിന്റെ പ്രതികരണം. ചിത്രം ഇത്രയും വലിയ വിജയമാകുമെന്ന് പ്രതീക്ഷിച്ചിരുന്നില്ലെന്നും, പ്രേക്ഷകർ നൽകിയ സ്വീകാര്യതയിൽ സന്തോഷവും അഭിമാനവുമുണ്ടെന്നും സഹനിർമാതാവും നടനുമായ ഫഹദ് ഫാസിൽ പറഞ്ഞു. വലിയ താരനിരയോ വമ്പൻ ബജറ്റോ മുന്നോട്ടുവെക്കാതെ എത്തിയ ചിത്രത്തിന് ലഭിച്ച ഈ സ്വീകാര്യതയാണ് വിജയത്തെ കൂടുതൽ ശ്രദ്ധേയമാക്കുന്നത്.
ഗിരീഷ് എ.ഡി. സംവിധാനം ചെയ്ത ചിത്രത്തിൽ നിവിൻ പോളിയും മമിത ബൈജുവുമാണ് പ്രധാന കഥാപാത്രങ്ങളെ അവതരിപ്പിച്ചത്. പ്രണയവും കുടുംബബന്ധങ്ങളും നൊസ്റ്റാൾജിയയും ചേർത്തുള്ള ലളിതമായ കഥപറച്ചിലാണ് ചിത്രത്തിന്റെ പ്രധാന ആകർഷണം. ഓണം റിലീസായി തിയറ്ററുകളിലെത്തിയ ചിത്രം ആദ്യദിനങ്ങളിൽ തന്നെ മികച്ച പ്രേക്ഷക പ്രതികരണം നേടി. പിന്നീട് കുടുംബപ്രേക്ഷകരുടെ പിന്തുണ കൂടി ലഭിച്ചതോടെ ബോക്സ് ഓഫീസിലും ചിത്രത്തിന്റെ കുതിപ്പ് ശക്തമായി.
ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാം പുഷ്കരൻ എന്നിവർ ചേർന്ന് നിർമിച്ച ചിത്രത്തിന്റെ അസാധാരണ വിജയത്തിൽ നിർമാതാവ് എന്ന നിലയിൽ അഭിമാനമുണ്ടെന്ന് ഫഹദ് ഫാസിൽ പറഞ്ഞു. അതേസമയം, ചിത്രം 300 കോടിയിലേറെ കളക്ഷൻ നേടിയാലും അതിന്റെ പകുതി പോലും തനിക്ക് ലഭിക്കില്ലെന്ന ഫഹദിന്റെ തമാശ കലർന്ന പ്രതികരണവും ശ്രദ്ധ നേടിയിരുന്നു.
ചിത്രത്തിൽ മമിത ബൈജു അവതരിപ്പിച്ച ആഷ്‌ലി എന്ന കഥാപാത്രവുമായി ബന്ധപ്പെട്ട രംഗവും ഫഹദിന്റെ പ്രത്യേക ശ്രദ്ധ നേടിയിട്ടുണ്ട്. ക്ലൈമാക്സിനോട് അടുക്കുന്ന ഘട്ടത്തിൽ ജസ്റ്റിൻ ആഷ്‌ലിയെക്കുറിച്ചുള്ള ഓർമകൾ വീണ്ടെടുക്കുന്ന രംഗം തന്റെ പ്രിയപ്പെട്ട ഭാഗങ്ങളിലൊന്നാണെന്ന് ഫഹദ് പറഞ്ഞു. കഥാപാത്രങ്ങളെയും അവരുടെ ചെറിയ ജീവിതാനുഭവങ്ങളെയും സ്വാഭാവികമായി അവതരിപ്പിച്ചതാണ് ചിത്രത്തോട് പ്രേക്ഷകർക്ക് ഇത്രയും അടുപ്പം തോന്നാനുള്ള പ്രധാന കാരണങ്ങളിലൊന്നെന്നും അദ്ദേഹം വ്യക്തമാക്കി.
സിനിമയുടെ വിജയം വിലയിരുത്തുമ്പോൾ താരമൂല്യത്തേക്കാൾ കഥാപാത്രങ്ങളോടും കഥയോടുമുള്ള പ്രേക്ഷകരുടെ ബന്ധമാണ് ‘ബെത്‌ലഹേം കുടുംബ യൂണിറ്റിന്റെ’ യാത്രയിൽ നിർണായകമായതെന്നും താൻ പോലും പ്രതീക്ഷിക്കാത്ത തരത്തിൽ ചിത്രം മുന്നേറിയതിൽ സന്തോഷമുണ്ടെന്നും ഫഹദ് ഫാസിൽ കൂട്ടിചേർത്തു. പ്രേക്ഷകർ നൽകിയ ഈ സ്വീകാര്യതയാണ് ചിത്രത്തിന്റെ വിജയത്തെ കൂടുതൽ ശ്രദ്ധേയമാക്കുന്നതും.
ഗിരീഷ് എ.ഡിയും കിരൺ ജോസിയും ചേർന്നാണ് ചിത്രത്തിന്റെ തിരക്കഥ ഒരുക്കിയത്. പ്രണയത്തിനൊപ്പം കുടുംബബന്ധങ്ങളും പഴയ ഓർമകളും ജീവിതത്തിലെ പുതിയ വഴിത്തിരിവുകളുമെല്ലാം കഥയിൽ ഇടംപിടിക്കുന്നു. തിയറ്ററുകളിലെ മികച്ച വിജയത്തിന് പിന്നാലെ ചിത്രം തമിഴ്, തെലുങ്ക് ഭാഷകളിലും പ്രേക്ഷകരിലേക്ക് എത്തി. 300 കോടി കളക്ഷൻ ഇതിനകം ചിത്രം പിന്നിട്ടു കഴിഞ്ഞു. പ്രമുഖ ട്രാക്കിംഗ് സൈറ്റായ സാക്നിൽക്കിന്റെ റിപ്പോർട്ട് പ്രകാരം 330.13 കോടി രൂപയാണ് ഇതുവരെ ബെത്‌ലഹേം കുടുംബ യൂണിറ്റ് നേടിയിരിക്കുന്നത്. റിലീസ് ചെയ്ത് 41 ദിവസം വരെയുള്ള കണക്കാണിത്.
‘Bethlehem Kudumba Unit’ has emerged as a major Malayalam blockbuster, crossing the ₹300 crore mark worldwide. Co-producer Fahadh Faasil says he never expected the Girish A.D.-directed film to achieve such massive success. Starring Nivin Pauly and Mamitha Baiju, the film’s relatable characters, emotions and simple storytelling connected strongly with audiences.