പഞ്ചാബി സൂപ്പർതാരവും ഗായകനുമായ ദിൽജിത് ദൊസാഞ്ച് ജപ്പാനിലെ ശുചിത്വത്തെ പ്രശംസിച്ച് പങ്കുവെച്ച വീഡിയോ സോഷ്യൽ മീഡിയയിൽ ശ്രദ്ധ നേടുന്നു. ജപ്പാൻ സന്ദർശനത്തിനിടെ കൈയിലുണ്ടായിരുന്ന ചെറിയ പ്ലാസ്റ്റിക് കവർ ഉപേക്ഷിക്കാൻ അദ്ദേഹം റോഡരികിൽ ഡസ്റ്റ്ബിൻ തേടി നടക്കുന്നതാണ് വീഡിയോയിൽ കാണുന്നത്.
ജപ്പാനിലെ തെരുവുകളിൽ ഒരിടത്തും മാലിന്യം കാണാനാകില്ലെന്നും രാജ്യം അത്യന്തം വൃത്തിയോടെയാണ് പരിപാലിക്കപ്പെടുന്നതെന്നും ദിൽജിത് വീഡിയോയിൽ പറയുന്നു. മാലിന്യ സംസ്കരണത്തിൽ രാജ്യം പുലർത്തുന്ന അച്ചടക്കവും ശുചിത്വവും തന്നെ അത്ഭുതപ്പെടുത്തിയെന്നും, അതുകൊണ്ടുതന്നെ പ്ലാസ്റ്റിക് കവർ എവിടെയും വലിച്ചെറിയാതെ ശരിയായ സ്ഥലത്ത് തന്നെ നിക്ഷേപിക്കാനാണ് ശ്രമിച്ചതെന്നും അദ്ദേഹം വ്യക്തമാക്കി.
ദിൽജിത് പങ്കുവെച്ച വീഡിയോയിൽ ജപ്പാനിലെ ശുചിത്വവും പ്രകൃതി ഭംഗിയും മാത്രമല്ല, രാജ്യത്തിന്റെ വിവിധ ഭാഗങ്ങൾ സന്ദർശിക്കുന്ന ദൃശ്യങ്ങളും ഉൾപ്പെടുത്തിയിട്ടുണ്ട്. പ്രാദേശിക ഭക്ഷണവിഭവങ്ങൾ ആസ്വദിക്കുന്നതും ഷോപ്പിങ് നടത്തുന്നതുമടക്കമുള്ള യാത്രാവിശേഷങ്ങളും അദ്ദേഹം ആരാധകരുമായി പങ്കുവെക്കുന്നു. വീഡിയോയ്ക്കൊപ്പം, "യൂറോപ്പ് ടൂറിന് മുന്നോടിയായി മനോഹരമായ ജപ്പാൻ പര്യടനം. ഉടൻ യൂറോപ്പിൽ കാണാം. AURA WORLD TOUR 2026" എന്ന കുറിപ്പും താരം പങ്കുവെച്ചിട്ടുണ്ട്.
അതേസമയം, ജൂലൈ 20-ന് പാർലമെന്റിലേക്ക് നടന്ന സിജെപി (CJP) നേതൃത്വത്തിലുള്ള പ്രതിഷേധ മാർച്ചിനിടെ വിദ്യാർഥികൾക്കും യുവജന പ്രവർത്തകർക്കുമെതിരെ ഡൽഹി പൊലീസ് ബലപ്രയോഗം നടത്തിയെന്ന ആരോപണത്തെ തുടർന്ന് പ്രതിഷേധക്കാർക്ക് പിന്തുണ പ്രഖ്യാപിച്ചതും അടുത്തിടെ ദിൽജിത് വാർത്തകളിൽ ഇടം നേടിയിരുന്നു. തുടർന്ന്, കർഷക സമരകാലത്ത് നേരിട്ട വിമർശനങ്ങളും അദ്ദേഹം ഓർമിപ്പിച്ചു. കർഷക സമരത്തിന് പിന്തുണ നൽകിയതിന്റെ പേരിൽ പലതവണ തന്നെ "ആന്റി-നാഷണൽ" എന്ന് മുദ്രകുത്തിയിരുന്നുവെന്നും, അതിന്റെ പേരിൽ കടുത്ത വിമർശനങ്ങളും നിയമപരമായ പ്രശ്നങ്ങളും നേരിടേണ്ടി വന്നിരുന്നുവെന്നും ദിൽജിത് പറഞ്ഞു.
"എന്നെ പലതവണ 'ആന്റി-നാഷണൽ' എന്ന് വിളിച്ചിട്ടുണ്ട്. ഇപ്പോഴും വീണ്ടും അങ്ങനെ തന്നെ വിളിക്കുമെന്ന് എനിക്കറിയാം. കർഷക സമരത്തിന് ശേഷം എനിക്ക് ഒരുപാട് വിമർശനങ്ങളും നിയമപരമായ പ്രശ്നങ്ങളും നേരിടേണ്ടിവന്നു. ഇപ്പോഴും അതിനെക്കുറിച്ച് തുറന്ന് പറയാൻ കഴിയില്ല. ബാക്കി എല്ലാം ദൈവം കാണുന്നുണ്ട്. ബാബാ എല്ലാവരെയും അനുഗ്രഹിക്കട്ടെ," എന്നാണ് സോഷ്യൽ മീഡിയയിൽ പങ്കുവെച്ച കുറിപ്പിൽ ദിൽജിത് എഴുതിയത്.
അതേസമയം, AURA World Tour 2026-ന്റെ ഭാഗമായി ദിൽജിത് ഉടൻ യൂറോപ്പ് പര്യടനത്തിന് തുടക്കമിടും. ഓഗസ്റ്റ് 21-ന് ബെർലിനിൽ ആരംഭിക്കുന്ന പര്യടനം തുടർന്ന് ഡബ്ലിൻ, പാരിസ്, വിയന്ന എന്നിവിടങ്ങളിലെത്തും. സെപ്റ്റംബറിൽ മിലാൻ, ആംസ്റ്റർഡാം, ലണ്ടൻ, ബിർമിംഗ്ഹാം, മാഞ്ചസ്റ്റർ എന്നിവിടങ്ങളിലായി സംഗീതപരിപാടികളും അദ്ദേഹം അവതരിപ്പിക്കും.
Punjabi singer and actor Diljit Dosanjh praised Japan's exceptional cleanliness after struggling to find a roadside dustbin. Sharing his travel experiences from Tokyo, the AURA World Tour 2026 star highlighted Japan's disciplined waste management, explored local food and shopping, and impressed fans with his admiration for the country's cleanliness.