മമിത ബൈജുവിന്റെ മേക്കോവറും തമിഴ് നടിമാരെ അവഗണിക്കുന്നു എന്ന ആക്ഷേപവും കോളിവുഡിൽ വലിയ ചർച്ചകൾക്ക് വഴിവെച്ചിരിക്കുകയാണ്. ധനുഷ് ചിത്രം 'കര'യിൽ മമിതയെ ബോധപൂർവം ഇരുണ്ട നിറക്കാരിയായി ചിത്രീകരിച്ചു എന്ന വിമർശനത്തിന് കൃത്യമായ മറുപടിയുമായി സംവിധായകൻ വിഘ്നേഷ് രാജ തന്നെ ഇപ്പോൾ രംഗത്തെത്തി. ബാഹ്യസൗന്ദര്യത്തേക്കാൾ അഭിനയശേഷിക്കാണ് താൻ മുൻഗണന നൽകുന്നതെന്നും, ആ കഥാപാത്രമായി മാറാൻ ഏറ്റവും അനുയോജ്യമായ ആളെയാണ് തിരഞ്ഞെടുത്തതെന്നും അദ്ദേഹം വ്യക്തമാക്കി. വിവാദങ്ങൾക്കും പരാതികൾക്കും വിഘ്നേഷ് നൽകിയ ഈ വിശദീകരണം സിനിമാ ലോകത്ത് പുതിയ ചർച്ചകൾക്ക് തുടക്കമിട്ടിട്ടുണ്ട്.
സിനിമയിലെ നായിക വേഷത്തിനായി തമിഴ്നാട്ടിൽ നിന്നുള്ള ഇരുപതോളം പെൺകുട്ടികളെ ഓഡിഷൻ ചെയ്തിരുന്നതായി വിഘ്നേഷ് രാജ വെളിപ്പെടുത്തി. എന്നാൽ മമിത ബൈജു കാഴ്ചവെച്ച പ്രകടനത്തിന് അടുത്തെങ്ങും എത്താൻ മറ്റാർക്കും സാധിച്ചില്ല. മെറിറ്റിന്റെ അടിസ്ഥാനത്തിലാണ് മമിതയെ തിരഞ്ഞെടുത്തതെന്നും സെക്സിസ്റ്റ് ആണെന്നോ പഴയ രീതികൾ പിന്തുടരുന്നവനാണെന്നോ ഉള്ള വിമർശനങ്ങളിൽ തനിക്ക് ആശങ്കയില്ലെന്നും അദ്ദേഹം ഒരു അഭിമുഖത്തിൽ പറഞ്ഞു. കഥാപാത്രത്തിന് പൂർണ്ണത നൽകാനാണ് മമിതയ്ക്ക് മേക്കപ്പിലൂടെ ഇരുണ്ട നിറം നൽകിയതെന്നാണ് സംവിധായകൻറെ പക്ഷം.
'പോർ തൊഴിൽ' എന്ന ഹിറ്റ് ചിത്രത്തിന് ശേഷം വിഘ്നേഷ് രാജ സംവിധാനം ചെയ്യുന്ന 'കര' ഒരു ആക്ഷൻ ഡ്രാമയായാണ് ഒരുങ്ങുന്നത്. ജയറാം, സുരാജ് വെഞ്ഞാറമൂട്, കരുണാസ് തുടങ്ങിയ വലിയ താരനിര തന്നെ ഈ ചിത്രത്തിൽ അണിനിരക്കുന്നുണ്ട്. വെൽസ് ഇന്റർനാഷണൽ ഫിലിംസ് നിർമ്മിക്കുന്ന ഈ ചിത്രത്തിന് ജി.വി. പ്രകാശ് കുമാറാണ് സംഗീതം പകരുന്നത്. പൊല്ലാതവൻ, വാത്തി എന്നീ ചിത്രങ്ങൾക്ക് ശേഷം ധനുഷും ജി.വി. പ്രകാശും വീണ്ടും ഒന്നിക്കുന്നു എന്ന പ്രത്യേകതയും ഈ സിനിമയ്ക്കുണ്ട്.
ഏപ്രിൽ 30-നാണ് 'കര' തീയേറ്ററുകളിലേക്ക് എത്തുന്നത്. ട്രെയിലർ പുറത്തുവന്നതോടെ വലിയ ആവേശത്തിലാണ് ധനുഷ് ആരാധകർ. വിമർശനങ്ങൾ നിലനിൽക്കുന്നുണ്ടെങ്കിലും, വ്യത്യസ്തമായ ഒരു ദൃശ്യാനുഭവമായിരിക്കും ചിത്രം സമ്മാനിക്കുക എന്ന സൂചനയാണ് അണിയറപ്രവർത്തകർ നൽകുന്നത്.
English Summary: Vignesh Raja responds to criticism over casting Mamitha Baiju in Dhanush’s film Kara, clarifying that her selection was purely based on performance. He also addressed backlash over her on-screen appearance, stating it was essential for the character.