പള്ളിച്ചട്ടമ്പിയിലെ 'ബലാത്സംഗ കോമഡി': ഡിജോ ജോസ് ആന്റണിക്ക് സംഭവിച്ചതെന്ത്?

ടൊവിനോ തോമസിനെ നായകനാക്കി ഡിജോ ജോസ് ആന്റണി സംവിധാനം ചെയ്ത പീരിയഡ് ഡ്രാമയായ 'പള്ളിച്ചട്ടമ്പി' കഴിഞ്ഞ ആഴ്ച്ചയാണ് സോണി ലിവിൽ സ്ട്രീമിങ് ആരംഭിച്ചത്. എസ് സുരേഷ് ബാബുവിന്റെ തിരക്കഥയിൽ ഒരുങ്ങിയ ഈ ചിത്രം സാങ്കേതിക മികവിലും, പീരിയഡ് ലോകം പുനഃസൃഷ്ടിക്കുന്നതിലും, ശ്രദ്ധേയമായ ശ്രമമങ്ങൾ നടത്തിയിട്ടുണ്ട്. എന്നാൽ റിലീസിന് പിന്നാലെ ചിത്രത്തിന്റെ ഉള്ളടക്കവും അത് മുന്നോട്ടുവയ്ക്കുന്ന രാഷ്ട്രീയവും സമൂഹമാധ്യമങ്ങളിലും സിനിമാ ചർച്ചകളിലും വ്യാപക വിമർശനങ്ങൾക്കാണ് വഴിവെച്ചിരിക്കുന്നത്.

ഒരു പീരിയഡ് സിനിമ എന്ന നിലയിൽ സ്വാതന്ത്ര്യസമര കാലഘട്ടത്തെ വിശ്വസനീയമായി പുനരാവിഷ്കരിക്കുന്നതിൽ ചിത്രം വിജയിച്ചിട്ടുണ്ട്. എന്നാൽ ചില രംഗങ്ങളിൽ സ്വീകരിച്ചിരിക്കുന്ന രാഷ്ട്രീയവും, ആശയപരമായ നിലപാടുകളും, നിരൂപകർക്കും പ്രേക്ഷകർക്കുമിടയിൽ ചൂടുള്ള ചർച്ചാവിഷയമായി മാറിയിട്ടുണ്ട്. പ്രത്യേകിച്ച്, സ്ത്രീ കഥാപാത്രങ്ങളെ അവതരിപ്പിക്കുന്നതിൽ സംവിധായകൻ സ്വീകരിച്ച സമീപനം അങ്ങേയറ്റം അപകടകരമാണെന്നാണ് പ്രധാന വിമർശനം. മുൻകാല സിനിമകളിലുണ്ടായ പുരോഗമനപരമായ കാഴ്ചപ്പാടിന് പകരം സ്ത്രീകളെ പിന്നോട്ടടിക്കുന്ന തരത്തിലുള്ള അവതരണമാണ് ചിത്രത്തിലുള്ളതെന്ന് ചൂണ്ടിക്കാട്ടി നിരവധി പ്രേക്ഷകർ നിരാശ പ്രകടിപ്പിക്കുകയാണ്.

ചിത്രത്തിലെ നായിക കയാദു ലോഹർ അവതരിപ്പിച്ച 'കെ.പി.എ.സി. റെബേക്ക'യുടെ ഇൻട്രോ രംഗമാണ് നിലവിൽ ഏറ്റവും കൂടുതൽ വിമർശനം ഏറ്റുവാങ്ങുന്നത്. ജോണി ആന്റണി അവതരിപ്പിക്കുന്ന 'അനന്തൻ മുതലാളി' എന്ന കഥാപാത്രം റെബേക്കയെ ലൈംഗികമായി ആക്രമിക്കാൻ ശ്രമിക്കുന്നതും, അതിനിടയിൽ നായകൻ എത്തി അവരെ രക്ഷിക്കുന്നതുമാണ് രംഗത്തിന്റെ പ്രമേയം. എന്നാൽ ഇത് അവതരിപ്പിച്ചിരിക്കുന്ന രീതിയാണ് തികച്ചും അരോചകവും അപകടകരവുമായി മാറുന്നത്.

ഒരു സ്ത്രീ അനുഭവിക്കുന്ന ഏറ്റവും ഗുരുതരമായ അതിക്രമങ്ങളിൽ ഒന്നായ ലൈംഗികാതിക്രമശ്രമത്തെ ഗൗരവത്തോടെ കൈകാര്യം ചെയ്യുന്നതിന് പകരം, തമാശ കലർത്തിയ അവതരണത്തിലൂടെയാണ് സിനിമ മുന്നോട്ടുപോകുന്നത്. മാത്രമല്ല, വ്യത്യസ്തമായ ഭാവം നൽകാനെന്ന പേരിൽ പശ്ചാത്തലത്തിൽ ഉപയോ​ഗിച്ചിരിക്കുന്ന റിട്രോ ഗാനവും അതിന്റെ ഗൗരവത്തെ കൂടുതൽ ലഘൂകരിക്കുന്നുവെന്ന വിമർശനവും ഉയരുന്നുണ്ട്. അതീവ സെൻസിറ്റീവായ ഈ വിഷയത്തെ കോമഡിയായി അവതരിപ്പിക്കുന്നത് അത്തരം കുറ്റകൃത്യങ്ങളുടെ ഭീകരതയെ നിസ്സാരവൽക്കരിക്കുന്നതാണെന്നും, അതിലൂടെ സ്ത്രീവിരുദ്ധ കാഴ്ചപ്പാടുകൾക്ക് അംഗീകാരം നൽകുന്നുവെന്നുമാണ് സമൂഹമാധ്യമങ്ങളിൽ ഉയരുന്ന പ്രധാന വിമർശനം.

ഡിജോ ജോസ് ആന്റണിക്കെതിരായ വിമർശനങ്ങൾ ഇത്ര ശക്തമാകാനുള്ള പ്രധാന കാരണം അദ്ദേഹത്തിന്റെ മുൻകാല സിനിമകൾ മുന്നോട്ടുവച്ച രാഷ്ട്രീയ നിലപാടുകളാണ്. 'ക്വീൻ', 'ജന ഗണ മന' എന്നീ ചിത്രങ്ങളിൽ സ്ത്രീകൾക്ക് നേരെയുള്ള അതിക്രമങ്ങളെ ശക്തമായി അപലപിക്കുകയും, അതിനെതിരെ വ്യക്തമായ നിലപാട് സ്വീകരിക്കുകയും ചെയ്ത സംവിധായകനെന്ന പ്രതിച്ഛായയാണ് അദ്ദേഹത്തിനുണ്ടായിരുന്നത്. പ്രത്യേകിച്ച് 'ജന ഗണ മന'യിൽ ലൈംഗികാതിക്രമത്തിനിരയായ സ്ത്രീക്ക് നീതി ലഭിക്കാനുള്ള പോരാട്ടം വൈകാരികവും രാഷ്ട്രീയപരവുമായ തലങ്ങളിൽ അദ്ദേഹം അവതരിപ്പിച്ചത് ശ്രദ്ധിക്കപ്പെട്ടിരുന്നു.

അത്തരമൊരു സംവിധായകൻ, തന്റെ പുതിയ ചിത്രത്തിൽ ബലാത്സംഗശ്രമം പോലുള്ള അതീവ ഗൗരവമുള്ള ഒരു വിഷയത്തെ തമാശയുടെ അകമ്പടിയോടെ അവതരിപ്പിച്ചിരിക്കുന്നത് എന്നതാണ് പ്രേക്ഷകരെ ഏറ്റവും കൂടുതൽ നിരാശപ്പെടുത്തിയത്. ഇതോടെ, മുൻകാല ചിത്രങ്ങളിൽ ഡിജോ ജോസ് സ്വീകരിച്ച രാഷ്ട്രീയ നിലപാടുകൾ, പ്രേക്ഷകസ്വീകാര്യത നേടാനുള്ള സിനിമാറ്റിക് ടൂൾ മാത്രമായിരുന്നോ എന്ന് വരെ പ്രേക്ഷകർ ചോദിക്കുന്നു.

സിനിമ എന്നത് വിനോദത്തിനുള്ള ഒരു മാധ്യമം മാത്രമല്ല. സമൂഹത്തിന്റെ കാഴ്ചപ്പാടുകളെ സ്വാധീനിക്കാനും രൂപപ്പെടുത്താനും കഴിവുള്ള ശക്തമായ കലാരൂപം കൂടിയാണ്. അതുകൊണ്ടുതന്നെ, ലൈംഗികാതിക്രമം പോലുള്ള ഗുരുതരമായ കുറ്റകൃത്യങ്ങളെ ചിരിച്ചുതള്ളാവുന്ന സംഭവമായി അവതരിപ്പിക്കുന്നത് സമൂഹത്തിന് അപകടകരമായ സന്ദേശമാണ് നൽകുന്നത്.

ഹാസ്യ കഥാപാത്രങ്ങളിലൂടെ പ്രേക്ഷകർക്കിടയിൽ സ്വീകാര്യത നേടിയ ജോണി ആന്റണിയെപ്പോലൊരു നടനെ ഉപയോഗിച്ച് ഇത്തരമൊരു രംഗം അവതരിപ്പിക്കുമ്പോൾ, അതിന്റെ ഗൗരവം സ്വാഭാവികമായും ലഘൂകരിക്കപ്പെടുകയും പ്രേക്ഷകർ അത് ഒരു കോമഡി മുഹൂർത്തമായി സ്വീകരിക്കാനുള്ള സാധ്യത വർധിക്കുകയും ചെയ്യുന്നു. കഥ നടക്കുന്നത് പഴയ കാലഘട്ടത്തിലാണെങ്കിലും, ആ കാലത്തെ സംഭവങ്ങളെ ഇന്നത്തെ പ്രേക്ഷകർക്ക് മുന്നിലെത്തിക്കുമ്പോൾ ആവശ്യമായ സാമൂഹിക ഉത്തരവാദിത്തവും സെൻസിറ്റിവിറ്റിയും പാലിക്കേണ്ടത് അനിവാര്യമാണ്. ആ ഉത്തരവാദിത്തം നിറവേറ്റുന്നതിൽ 'പള്ളിച്ചട്ടമ്പി' ഗൗരവമായ വീഴ്ചയാണ് വരുത്തിയിരിക്കുന്നത്

മലയാള സിനിമാ പ്രേക്ഷകർ രാഷ്ട്രീയമായി ഏറെ ബോധവാന്മാരായിക്കഴിഞ്ഞു എന്നതിന്റെ ഏറ്റവും വലിയ തെളിവാണ് പള്ളിച്ചട്ടമ്പിക്ക് നേരെ ഉയരുന്ന ഈ വിമർശനങ്ങൾ. നായകൻ എത്തി രക്ഷിക്കുന്നതുവരെയുള്ള നായികയുടെ നിസ്സഹായതയെയും അവരുടെ മേലുള്ള കടന്നുകയറ്റത്തെയും പശ്ചാത്തല സംഗീതത്തിന്റെയും തമാശയുടെയും അകമ്പടിയോടെ ആഘോഷമാക്കുന്ന പഴയ സിനിമാ ശൈലികൾക്ക് ഇന്നത്തെ പ്രേക്ഷകർക്കിടയിൽ സ്വീകാര്യത ലഭിക്കില്ലെന്നാണ് ഈ വിമർശനങ്ങൾ വ്യക്തമാക്കുന്നത്. ഒരു രംഗം ചിത്രീകരിക്കുമ്പോൾ, അതിനുള്ളിൽ ഒളിഞ്ഞിരിക്കുന്ന രാഷ്ട്രീയവും സാമൂഹികവുമായ ശരികേടുകൾ തിരിച്ചറിയാൻ സംവിധായകനും തിരക്കഥാകൃത്തിനും കഴിയേണ്ടത് അനിവാര്യമാണ്.

മുൻകാലങ്ങളിൽ മികച്ച സിനിമകൾ ഒരുക്കി കയ്യടി നേടിയ സംവിധായകനാണെങ്കിലും, മനുഷ്യത്വവിരുദ്ധമായ സമീപനങ്ങളെ നിസ്സാരവൽക്കരിക്കുകയോ സാധാരണവൽക്കരിക്കുകയോ ചെയ്യുന്ന അവതരണങ്ങളെ പ്രേക്ഷകർ ശക്തമായി ചോദ്യം ചെയ്യും. അതുകൊണ്ട് തന്നെ ഒടിടി പ്ലാറ്റ്‌ഫോമുകൾ വഴി ലോകമെമ്പാടുമുള്ള പ്രേക്ഷകരിലേക്ക് സിനിമ എത്തുമ്പോൾ സ്രഷ്ടാക്കൾ കൂടുതൽ ഉത്തരവാദിത്തം കാണിക്കേണ്ടതുണ്ട്.