തിയറ്റർ റിലീസിന് മണിക്കൂറുകൾ മാത്രം ബാക്കിനിൽക്കെ ‘ഏഴു കടൽ ഏഴു മലൈ’ യെ ചുറ്റിപ്പറ്റിയുള്ള ചർച്ചകൾ സജീവമാണ്. റാം സംവിധാനം ചെയ്ത നിവിൻ പോളി ചിത്രം പ്രിവ്യൂ പ്രദർശനത്തിന് പിന്നാലെ പ്രേക്ഷകരിൽ നിന്ന് മികച്ച പ്രതികരണമാണ് നേടുന്നത്. ചിത്രത്തിന്റെ വ്യത്യസ്തമായ ലോകവും നിവിൻ പോളിയുടെ കഥാപാത്രവുമാണ് ആദ്യ പ്രതികരണങ്ങളിൽ പ്രധാനമായും ശ്രദ്ധ നേടുന്നത്.
8000 വർഷത്തിലേറെയായി ജീവിക്കുന്ന ഒരു അമരനായ മനുഷ്യനെയാണ് നിവിൻ പോളി ചിത്രത്തിൽ അവതരിപ്പിക്കുന്നത്. നൂറ്റാണ്ടുകളായി തന്റെ പ്രണയത്തെ തേടിനടക്കുന്ന അയാളുടെ യാത്രയ്ക്കിടയിൽ ഒരു ട്രെയിൻ യാത്രയിൽ സൂരി അവതരിപ്പിക്കുന്ന സാധാരണക്കാരനായ കഥാപാത്രത്തെ കണ്ടുമുട്ടുന്നതോടെയാണ് കഥ പുതിയ വഴിയിലേക്ക് കടക്കുന്നത്. പ്രണയം, ഫാന്റസി, വൈകാരികത, ആക്ഷൻ എന്നിവയെ ചേർത്താണ് റാം ഈ കഥ പറയുന്നത്.
ചിത്രത്തിന്റെ ആദ്യ മൂന്ന് മിനിറ്റുകൾ പുറത്തുവന്നതോടെ സിനിമയുടെ വ്യത്യസ്തമായ ലോകത്തിന്റെ ചെറിയൊരു കാഴ്ച പ്രേക്ഷകർക്ക് ലഭിച്ചിരുന്നു. ഒരു കുട്ടിയോട് പറയുന്ന കഥയിലൂടെയാണ് ആ ഭാഗം ആരംഭിക്കുന്നത്. ഏഴ് കുന്നുകൾക്കപ്പുറവും ഏഴ് കടലുകൾക്കപ്പുറവും വ്യത്യസ്ത കാലഘട്ടങ്ങളിൽ ഉറങ്ങുന്ന ഒരേ മനുഷ്യനിലേക്കാണ് ആ കഥ എത്തുന്നത്. അയാളുടെ അമരത്വവും നൂറ്റാണ്ടുകൾ നീളുന്ന പ്രണയാന്വേഷണവുമാണ് സിനിമയുടെ കേന്ദ്രത്തിലേക്ക് എത്തുന്നത്.
നിവിൻ പോളിക്കൊപ്പം അഞ്ജലിയും സൂരിയും പ്രധാന വേഷങ്ങളിലെത്തുന്ന ചിത്രത്തിന് സംഗീതം ഒരുക്കിയിരിക്കുന്നത് യുവൻ ശങ്കർ രാജയാണ്. എൻ.കെ. ഏകാംബരം ഛായാഗ്രഹണവും മതി വി.എസ്. എഡിറ്റിംഗും നിർവഹിക്കുന്നു. സുരേഷ് കാമാച്ചിയാണ് നിർമ്മാണം.
അന്താരാഷ്ട്ര ചലച്ചിത്രമേളകളിലൂടെ നേരത്തെ തന്നെ ശ്രദ്ധ നേടിയ ചിത്രമാണ് ‘ഏഴു കടൽ ഏഴു മലൈ’. 53-ാമത് റോട്ടർഡാം അന്താരാഷ്ട്ര ചലച്ചിത്രമേളയിൽ പ്രദർശിപ്പിച്ച ചിത്രം ബിഗ് സ്ക്രീൻ മത്സരവിഭാഗത്തിലും ഇടം നേടിയിരുന്നു. ക്ടോബർ 1നാണ് ചിത്രം ആഗോളതലത്തിൽ തിയറ്ററുകളിലെത്തുന്നത്.
Ram’s ‘Yezhu Kadal Yezhu Malai’, starring Nivin Pauly, has received positive responses following its preview screening. The fantasy drama follows an immortal man who has lived for over 8,000 years and continues searching for his love. Anjali and Soori also play key roles, with Yuvan Shankar Raja composing the music.