കാപ്പി മുതൽ ചോക്ലേറ്റ് വരെ; ആസിഡ് റിഫ്ലക്സ് കൂട്ടുന്ന ഭക്ഷണങ്ങൾ ഏതൊക്കെയെന്ന് അറിയാം

ഭക്ഷണം കഴിച്ചതിന് പിന്നാലെ നെഞ്ചെരിച്ചിൽ, തൊണ്ടയിൽ അസ്വസ്ഥത എന്നിവ അനുഭവപ്പെടുന്നത് നിരവധി ആളുകൾക്ക് പതിവായ പ്രശ്നങ്ങളാണ്. പ്രത്യേകിച്ച് എരിവേറിയ ഭക്ഷണങ്ങൾ, കാപ്പി, രാത്രി വൈകിയുള്ള ഭക്ഷണശീലം എന്നിവയ്ക്കുശേഷമാണ് ഇത്തരം അസ്വസ്ഥതകൾ കൂടുതലായി പ്രകടമാകുന്നത്. ദഹനസംബന്ധമായ അസ്വസ്ഥതകളിൽ പ്രധാനപ്പെട്ട ആസിഡ് റിഫ്ലക്സാണ് പലപ്പോഴും ഇതിന് പിന്നിലെ മുഖ്യ കാരണം. നെഞ്ചെരിച്ചിൽ രൂക്ഷമാക്കാൻ ഇടയാക്കുന്ന ഭക്ഷണങ്ങളും അവ ഒഴിവാക്കാൻ സഹായിക്കുന്ന ആരോഗ്യകരമായ ഭക്ഷണശീലങ്ങളും സംബന്ധിച്ച് വിശദീകരിക്കുകയാണ് ഹാർവാർഡിലും സ്റ്റാൻഫോർഡിലും പരിശീലനം നേടിയ ഗ്യാസ്ട്രോഎൻട്രോളജിസ്റ്റും ഹെപ്പറ്റോളജിസ്റ്റുമായ ഡോ. സൗരഭ് സേഥി.

നെഞ്ചെരിച്ചിൽ വർധിപ്പിക്കുന്ന ഭക്ഷണങ്ങൾ

• കാപ്പി

പലരുടെയും ദിവസാരംഭത്തിലെ അവിഭാജ്യ ഘടകമായ കാപ്പി ചിലരിൽ ആസിഡ് റിഫ്ലക്സ് രൂക്ഷമാക്കാൻ കാരണമാകാം. കാപ്പിയിലെ കഫീൻ അന്നനാളത്തിന്റെയും ആമാശയത്തിന്റെയും ഇടയിലുള്ള പേശികളെ ശമിപ്പിക്കുന്നതിനാൽ വയറിലെ ആസിഡ് മുകളിലേക്ക് കയറാനുള്ള സാധ്യത വർധിക്കും. ഇതാണ് നെഞ്ചെരിച്ചിലും തൊണ്ടയിലെ അസ്വസ്ഥതയും കൂടുതൽ അനുഭവപ്പെടാൻ ഇടയാക്കുന്നത്.

• മദ്യം

അമിതമായോ രാത്രി വൈകിയോ മദ്യം കഴിക്കുന്നത് നെഞ്ചെരിച്ചിൽ ശക്തമാക്കാം. ഇത് വയറ്റിലെ ആസിഡിന്റെ അളവ് വർധിപ്പിക്കുകയും ദഹന വ്യവസ്ഥയെ അസ്വസ്ഥമാക്കുകയും ചെയ്യുന്നു.

• തക്കാളി

തക്കാളിയിലും അതുപയോഗിച്ച് തയ്യാറാക്കുന്ന ഭക്ഷണങ്ങളിലും വയറിലെ ആസിഡിന്റെ അളവ് വർധിപ്പിക്കാനിടയുള്ള ഘടകങ്ങൾ കൂടുതലായതിനാൽ, ചിലരിൽ നെഞ്ചെരിച്ചിൽ അനുഭവപ്പെടാൻ സാധ്യതയുണ്ട്.

• ആസിഡ് സ്വഭാവമുള്ള പഴങ്ങൾ

ഓറഞ്ച്, നാരങ്ങ, ഗ്രേപ്പ് ഫ്രൂട്ട് തുടങ്ങിയ പുളിപ്പുള്ള പഴങ്ങൾ ചിലരിൽ അസിഡിറ്റി വർധിപ്പിക്കാനും ദഹനസംബന്ധമായ അസ്വസ്ഥതകൾ ഉണ്ടാക്കാനും ഇടയാക്കാം.

• ചോക്ലേറ്റ്

ചോക്ലേറ്റിൽ അടങ്ങിയിരിക്കുന്ന ചില ഘടകങ്ങളും കഫീനും അന്നനാളത്തിന്റെയും ആമാശയത്തിന്റെയും ഇടയിലെ പേശികളുടെ പ്രവർത്തനം ശമിപ്പിക്കാൻ ഇടയാക്കും. ഇതുവഴി വയറിലെ ആസിഡ് മുകളിലേക്ക് കയറാനുള്ള സാധ്യത വർധിക്കുകയും നെഞ്ചെരിച്ചിൽ അനുഭവപ്പെടുകയും ചെയ്യാം.

• എരിവേറിയ ഭക്ഷണം

കൂടുതൽ എരിവ് ചേർത്ത ഭക്ഷണങ്ങൾ അന്നനാളത്തെ അസ്വസ്ഥമാക്കുകയും നെഞ്ചെരിച്ചിൽ ഉണ്ടാക്കുകയും ചെയ്യാം. ഇതോടെ ആസിഡ് റിഫ്ലക്സ് വർധിച്ച് നെഞ്ചെരിച്ചിൽ കൂടുതൽ ശക്തമാകാൻ സാധ്യതയുണ്ട്.

• ഓട്സ്

നാരുകൾ ധാരാളമായി അടങ്ങിയ ഓട്സ് അധികമായി അടങ്ങിയിരിക്കുന്ന ആസിഡ് നിയന്ത്രിക്കാൻ സഹായിക്കുമെന്ന് വിദഗ്ധർ വിലയിരുത്തുന്നു. ഇത് ദഹനം സുഗമമാക്കാനും ആസിഡ് റിഫ്ലക്സ് മൂലമുള്ള നെഞ്ചെരിച്ചിൽ കുറയ്ക്കാനും സഹായകരമായേക്കാം.

• ഇഞ്ചി

ദഹനസംബന്ധമായ അസ്വസ്ഥതകൾ കുറയ്ക്കാൻ ഇഞ്ചി സഹായകമാണെന്ന് പഠനങ്ങൾ സൂചിപ്പിക്കുന്നു. വയറിലെ അസ്വസ്ഥതയും വീക്കവും കുറയ്ക്കാനും ഇത് സഹായിക്കാം.

• വാഴപ്പഴം

അസിഡിറ്റി കുറവുള്ള ഭക്ഷണമായതിനാൽ വാഴപ്പഴം വയറിന് ശമനം നൽകാൻ സഹായിക്കും.

• കറ്റാർവാഴയുടെ നീര്

ദഹനനാളത്തിലെ അസ്വസ്ഥത കുറയ്ക്കാൻ കറ്റാർവാഴ നീര് സഹായിക്കാമെന്ന് ആരോഗ്യ വിദഗ്ധർ അഭിപ്രായപ്പെടുന്നു.

• ചമോമൈൽ ചായ

ഭക്ഷണത്തിന് ശേഷമോ ഉറങ്ങുന്നതിന് മുമ്പോ ചമോമൈൽ ചായ കുടിക്കുന്നത് ദഹനസംബന്ധമായ അസ്വസ്ഥത കുറയ്ക്കാൻ സഹായിക്കാം.

ശ്രദ്ധിക്കേണ്ട കാര്യങ്ങൾ

നെഞ്ചെരിച്ചിൽ ഒഴിവാക്കാൻ ഭക്ഷണം സാവധാനം കഴിക്കുക, ഒരേസമയം അമിതമായി ഭക്ഷണം കഴിക്കുന്നത് ഒഴിവാക്കുക, ഭക്ഷണത്തിന് പിന്നാലെ ഉടൻ കിടക്കാതിരിക്കുക എന്നിവ പ്രധാനമാണ്. രാത്രി വൈകിയുള്ള ഭക്ഷണശീലം കുറയ്ക്കുന്നതും ഗുണകരമാണ്. ശരീരഭാരം നിയന്ത്രണത്തിൽ വയ്ക്കുകയും ശരീരത്തെ മുറുക്കുന്ന വസ്ത്രങ്ങൾ ഒഴിവാക്കുകയും ചെയ്യുന്നത് വയറിലെ സമ്മർദ്ദം കുറയ്ക്കാൻ സഹായിക്കുമെന്ന് വിദഗ്ധർ നിർദേശിക്കുന്നു.

English Summary: Certain foods like coffee, chocolate, spicy food, and citrus fruits can trigger acid reflux and heartburn, while foods like oats, ginger, banana, and chamomile tea may help reduce symptoms.