വേനൽച്ചൂട് കഠിനമാകുമ്പോൾ പലരും നിസ്സാരമെന്നു കരുതി തള്ളിക്കളയുന്ന ഒന്നാണ് വിട്ടുമാറാത്ത തലവേദന. എന്നാൽ കത്തുന്ന വെയിൽ വെറുമൊരു തലവേദനയല്ല, മറിച്ച് നിങ്ങളുടെ ജീവിതത്തെ തന്നെ തളർത്താൻ ശേഷിയുള്ള 'മൈഗ്രെയ്ൻ' എന്ന വില്ലനെയാണ് ക്ഷണിച്ചുവരുത്തുന്നതെന്ന് എത്രപേർക്കറിയാം? ശ്രദ്ധിച്ചില്ലെങ്കിൽ നിങ്ങളുടെ ദൈനംദിന ജീവിതത്തെ പാടെ താറുമാറാക്കാൻ ഈ ആരോഗ്യപ്രശ്നത്തിന് സാധിക്കുമെന്ന് വിദഗ്ധർ മുന്നറിയിപ്പ് നൽകുന്നു. ഈ വേനൽക്കാലത്ത് മൈഗ്രെയ്നെ എങ്ങനെയൊക്കെ പ്രതിരോധിക്കാം, എന്തൊക്കെ ജാഗ്രത പാലിക്കണം? ഇക്കാര്യത്തിൽ എന്താണ് വിദഗ്ധരുടെ അഭിപ്രായമെന്ന് നോക്കാം.
വേനൽക്കാലത്ത് ചൂട് വർധിക്കുന്നത് മൈഗ്രെയിൻ പ്രശ്നങ്ങളെ കൂടുതൽ ശക്തമാക്കാൻ ഇടയാക്കുന്നുണ്ടോ എന്ന ചോദ്യത്തിന് ആരോഗ്യവിദഗ്ധർ നൽകുന്ന മറുപടി ഏറെ ശ്രദ്ധേയമാണ്. അന്തരീക്ഷ താപനില ഉയരുന്ന സാഹചര്യത്തിൽ മൈഗ്രെയിൻ കേസുകൾ സാധാരണത്തേക്കാൾ കൂടുതലായി റിപ്പോർട്ട് ചെയ്യപ്പെടുന്നുവെന്നാണ് വിഗദ്ധരുടെ നിരീക്ഷണം. മൈഗ്രെയിനെ വെറും തലവേദനയായി കാണുന്നത് തെറ്റാണെന്നും, അത് ഒരു നാഡീവൈകല്യമാണെന്നും വിദഗ്ധർ ചൂണ്ടിക്കാണിക്കുന്നു.
വേനൽക്കാലത്ത് ഉണ്ടാകുന്ന മൈഗ്രെയിൻ തലച്ചോറിന്റെ ചൂടിനോടുള്ള ശാരീരിക പ്രതികരണത്തിന്റെ ഭാഗമായാണ് വിലയിരുത്തപ്പെടുന്നത്. ശരീരത്തിലെ ചൂട് നിയന്ത്രിക്കുന്ന തെർമോൺഗുലേഷൻ എന്ന പ്രക്രിയയാണ് ഇതിന് പിന്നിലെ പ്രധാന ഘടകമെന്ന് വ്യക്തമാക്കപ്പെടുന്നു. അന്തരീക്ഷ താപനില ഉയരുമ്പോൾ ശരീരത്തിലെ ചൂട് കുറയ്ക്കുന്നതിനായി തലച്ചോറിൽ നിന്ന് രക്തക്കുഴലുകൾ വികസിക്കാൻ നിർദ്ദേശം നൽകപ്പെടുന്നു. ഈ പ്രക്രിയയെ വാസോഡിലേഷൻ എന്ന് വിളിക്കുന്നു. മൈഗ്രെയിൻ സാധ്യതയുള്ളവരിൽ ഇത് തലച്ചോറിലെ സംവേദനക്ഷമമായ നാഡികളുടെ അറ്റങ്ങളെ ഉത്തേജിപ്പിച്ച് വേദനയ്ക്ക് കാരണമാകുന്നു.
പാരിസ്ഥിതിക മാറ്റങ്ങൾ മൈഗ്രെയിൻ സാധ്യതയുള്ളവരെ കൂടുതൽ ബാധിക്കാനിടയുണ്ടെന്നാണ് വിദഗ്ധർ പറയുന്നത്. പ്രത്യേകിച്ച് വേനൽക്കാലത്ത് ഉണ്ടാകുന്ന നിർജ്ജലീകരണം പ്രധാന ഘടകമായി കണക്കാക്കപ്പെടുന്നു. ശരീരത്തിലെ ജലാംശം രണ്ട് ശതമാനം വരെ കുറഞ്ഞാലും തലച്ചോറിലെ ടിഷ്യുകൾ ചുരുങ്ങാൻ സാധ്യതയുണ്ട്. ഇതുവഴി അവ തലയോട്ടിയിൽ നിന്ന് അല്പം അകന്നു പോകുകയും, വേദന ഗ്രാഹകങ്ങളെ ഉത്തേജിപ്പിക്കുകയും ചെയ്യുന്നു.
രാവിലെ 11 മണിക്കും ഉച്ചയ്ക്ക് 4 മണിക്കും ഇടയിൽ അനുഭവപ്പെടുന്ന കഠിനമായ സൂര്യപ്രകാശവും മൈഗ്രെയിൻ സാധ്യത വർധിപ്പിക്കുന്നതായി ചൂണ്ടിക്കാണിക്കപ്പെടുന്നു. ഈ സമയത്തെ ശക്തമായ പ്രകാശം വിഷ്വൽ കോർട്ടെക്സിനെ അമിതമായി ഉത്തേജിപ്പിക്കാം. ഇതിനൊപ്പം, രാത്രിയിൽ ചൂട് കാരണം ഉണ്ടാകുന്ന ഉറക്കക്കുറവും ചേർന്നാൽ മൈഗ്രെയിന്റെ തീവ്രത കൂടുതൽ ഉയരാൻ സാധ്യതയുണ്ട്. സാധാരണ തലവേദനയായി അനുഭവപ്പെടുന്നതിനാൽ തന്നെ മൈഗ്രെയിൻ പലപ്പോഴും തെറ്റിദ്ധരിക്കപ്പെടുന്ന സാഹചര്യവും ഉണ്ടാകുന്നു.
ചൂട് മൂലമുള്ള മൈഗ്രെയിൻ സാധാരണയായി 12 മുതൽ 24 മണിക്കൂർ വരെ നീണ്ടുനിൽക്കാം. ക്ഷീണം, മാനസികാവസ്ഥയിലെ വ്യത്യാസങ്ങൾ, ഭക്ഷണത്തോടുള്ള ആസക്തി തുടങ്ങിയവ ഇതോടൊപ്പം കാണപ്പെടാം. തല അല്പം അനക്കുമ്പോൾ പോലും വേദന കൂടുതൽ രൂക്ഷമാകാം. കൂടാതെ, ഓക്കാനം, വെളിച്ചം ബുദ്ധിമുട്ടാകുന്നതും തുടങ്ങിയ ലക്ഷണങ്ങളും ഉണ്ടാകാം.
വെള്ളം മാത്രം കുടിക്കുന്നത് മൈഗ്രെയിൻ പൂർണ്ണമായി മാറാൻ മതിയാകില്ലെന്നാണ് വിദഗ്ധർ പറയുന്നത്. മൈഗ്രെയിൻ അനുഭവപ്പെടുമ്പോൾ രോഗിയെ തണുപ്പും ഇരുണ്ടതും ശാന്തവുമായ ഒരു മുറിയിൽ വിശ്രമിപ്പിക്കുകയാണ് ആദ്യം ചെയ്യേണ്ടത്. തുടർന്ന് വെള്ളമോ ഇലക്ട്രോലൈറ്റ് പാനീയങ്ങളോ ഉപയോഗിച്ച് ശരീരത്തിലെ ജലാംശം പുനഃസ്ഥാപിക്കണം. ആവശ്യമായ സാഹചര്യങ്ങളിൽ ഡോക്ടർ നിർദേശിക്കുന്ന റിപ്റ്റാൻ മരുന്നുകൾ നേരത്തെ ഉപയോഗിക്കുന്നത് ഫലപ്രദമാണെന്നും വിദഗ്ധർ പറയുന്നു.
വേനൽക്കാല മൈഗ്രെയിനെ പ്രതിരോധിക്കാൻ ചില ജീവിതശൈലി മാറ്റങ്ങൾ സഹായകരമാകാം. ദിവസേന രണ്ടര മുതൽ മൂന്ന് ലിറ്റർ വരെ വെള്ളം കുടിക്കുന്നത് ശരീരത്തിലെ ജലാംശം നിലനിർത്താൻ സഹായിക്കും. പകൽ സമയത്ത്, പ്രത്യേകിച്ച് കഠിനമായ ചൂടുള്ള സമയങ്ങളിൽ, പുറത്തെ പ്രവർത്തനങ്ങൾ പരിമിതപ്പെടുത്തുന്നത് നല്ലതാണ്. ഭക്ഷണം ഒഴിവാക്കാതെ, ലഘുവായതും ജലാംശം കൂടുതലുള്ളതുമായ ഭക്ഷണം തിരഞ്ഞെടുക്കുന്നത് പ്രയോജനകരമാണ്. തണ്ണിമത്തൻ പോലുള്ള ഫലങ്ങൾ ഉൾപ്പെടുത്തുന്നതും ശരീരത്തിന് ഗുണം ചെയ്യും. കൂടാതെ, സൂര്യപ്രകാശത്തിൽ നിന്ന് സംരക്ഷണം ലഭിക്കുന്ന വസ്ത്രങ്ങൾ ധരിക്കുകയും, സ്ഥിരമായ ഉറക്കക്രമം പാലിക്കുകയും ചെയ്യുന്നത് മൈഗ്രെയിൻ സാധ്യത കുറയ്ക്കാൻ സഹായകരമാകുമെന്ന് ആരോഗ്യവിദഗ്ധർ നിർദേശിക്കുന്നു.
English Summary: Extreme summer heat may trigger or worsen migraines due to dehydration, heat stress, and sun exposure. Experts suggest hydration, rest, and lifestyle changes for prevention