രാജ്യത്തെ ഏറ്റവും നിര്ധനരായ കുടുംബങ്ങള്ക്ക് ആശ്വാസമേകുന്ന അന്ത്യോദയ അന്നയോജന പദ്ധതിയുടെ റേഷന് വിഹിതം നിശ്ചയിക്കുന്ന മാനദണ്ഡങ്ങളില് വന് അഴിച്ചുപണിക്കൊരുങ്ങി കേന്ദ്ര സര്ക്കാര്. നിലവില് അന്ത്യോദയ കാര്ഡുടമകള്ക്ക് ലഭിക്കുന്ന നിശ്ചിത 35 കിലോഗ്രാം സൗജന്യ ഭക്ഷ്യധാന്യം എന്നത് മാറ്റി, ഇനി മുതല് ഒരംഗത്തിന് പ്രതിമാസം 7 കിലോഗ്രാം എന്ന രീതിയിലേക്ക് ചുരുക്കാനാണ് കേന്ദ്ര ഭക്ഷ്യപൊതുവിതരണ വകുപ്പ് ലക്ഷ്യമിടുന്നത്.
ദേശീയ ഭക്ഷ്യഭദ്രതാ നിയമത്തില് ഇതിനായി കൊണ്ടുവരുന്ന ഭേദഗതിയുടെ കരട് രൂപം കേന്ദ്രം പുറത്തുവിട്ടു. ഈ പുതിയ ഭേദഗതി നടപ്പിലായാല് ഒരംഗമോ മൂന്നോ അതില് താഴെയോ അംഗങ്ങളോ മാത്രമുള്ള ചെറുകുട കുടുംബങ്ങള്ക്ക് നിലവില് ലഭിച്ചുകൊണ്ടിരുന്ന വലിയൊരു വിഹിതം ഭക്ഷ്യധാന്യം നഷ്ടമാകും. കരട് നിര്ദ്ദേശത്തിന്മേല് പൊതുജനങ്ങള്ക്ക് ജൂലൈ 13 വരെ അഭിപ്രായങ്ങള് രേഖപ്പെടുത്താന് അവസരമുണ്ട്.
തുല്യത എന്ന കേന്ദ്ര വാദവും അതിന് പിന്നിലെ തിരിച്ചടിയും
ചെറിയ കുടുംബങ്ങള്ക്ക് വലിയ കുടുംബങ്ങളേക്കാള് കൂടുതല് വ്യക്തിഗത ഭക്ഷ്യധാന്യം ലഭിക്കുന്നത് വഴി നിലനില്ക്കുന്ന ആന്തരിക അസമത്വങ്ങള് പരിഹരിക്കാനാണ് ഈ പരിഷ്കരണമെന്നാണ് കേന്ദ്ര സര്ക്കാരിന്റെ വാദം. പുതിയ കണക്കനുസരിച്ച് അഞ്ചംഗങ്ങളുള്ള ഒരു കുടുംബത്തിന് ഭേദഗതി ബാധകമാകില്ലെങ്കിലും, ഒന്നോ രണ്ടോ അംഗങ്ങള് മാത്രമുള്ള വയോധികരുടെയും മറ്റും കുടുംബങ്ങള്ക്ക് ഇത് കനത്ത പ്രഹരമാകും. ഉദാഹരണത്തിന്, തനിച്ചു താമസിക്കുന്ന ഒരു അഗതിക്ക് നിലവില് ലഭിക്കുന്ന 35 കിലോ ധാന്യം ഒറ്റയടിക്ക് 7 കിലോയായി കുറയും.
മൂന്ന് പേരുള്ള കുടുംബത്തിന് അത് 21 കിലോയായി ചുരുങ്ങും. അതേസമയം, ആറോ അതില് കൂടുതലോ അംഗങ്ങളുള്ള വലിയ കുടുംബങ്ങള്ക്ക് പോലും പരമാവധി 35 കിലോഗ്രാം എന്ന പരിധി നിശ്ചയിച്ചിട്ടുള്ളതിനാല്, അവര്ക്ക് വ്യക്തിഗതമായി വെറും 5.8 കിലോ ധാന്യം മാത്രമേ ലഭിക്കൂ. ഇത് മുന്ഗണനാ വിഭാഗത്തിലുള്ള സാധാരണ കാര്ഡുടമകള്ക്ക് ലഭിക്കുന്ന വിഹിതത്തിന് തുല്യമാണെന്ന് സാമ്പത്തിക വിദഗ്ദ്ധയായ ദീപ സിന്ഹ ചൂണ്ടിക്കാണിക്കുന്നു. വ്യക്തിഗത വിഹിതത്തിലേക്ക് മാറുമ്പോള് 35 കിലോ എന്ന ഉയര്ന്ന പരിധി എടുത്തുകളയണമെന്നാണ് ഇവരുടെ ആവശ്യം
ഐ.സി.എം.ആര് നിര്ദ്ദേശിക്കുന്ന സമീകൃതാഹാര മാനദണ്ഡങ്ങള് മുന്നിര്ത്തിയാണ് 7 കിലോ എന്ന കണക്ക് നിശ്ചയിച്ചതെന്ന് കേന്ദ്രം പറയുന്നുണ്ടെങ്കിലും പ്രായോഗിക തലത്തില് ഇത് പരാജയപ്പെടാനാണ് സാധ്യത. ദരിദ്രരില് അതിദരിദ്രരായ അന്ത്യോദയ വിഭാഗത്തിന് റേഷന് വഴി ലഭിക്കുന്ന ധാന്യങ്ങള്ക്ക് പകരമായി വിപണിയില് നിന്ന് വിലകൂടിയ പരിപ്പ് വര്ഗ്ഗങ്ങളോ ഭക്ഷ്യ എണ്ണകളോ വാങ്ങി പോഷകാഹാരക്കുറവ് നികത്താനുള്ള സാമ്പത്തിക ശേഷിയില്ലെന്ന് റൈറ്റ് ടു ഫുഡ് കാമ്പയിന് പ്രവര്ത്തകര് ഓര്മ്മിപ്പിക്കുന്നു.
ധാന്യങ്ങള്ക്ക് പുറമെ പയറുവര്ഗ്ഗങ്ങളും എണ്ണയും കൂടി അന്ത്യോദയ വിഹിതത്തില് ഉള്പ്പെടുത്തണമെന്നും വ്യക്തിഗത വിഹിതം 14 കിലോയായി ഉയര്ത്തണമെന്നുമാണ് ഇവരുടെ ആവശ്യം. കൂടാതെ, പതിറ്റാണ്ടുകളായി നടക്കാത്ത ജനസംഖ്യാ സെന്സസ് കാരണം യഥാര്ത്ഥ കുടുംബങ്ങളുടെ എണ്ണത്തിലുണ്ടായ വര്ദ്ധനവ് ഇപ്പോഴും റേഷന് വിതരണത്തില് പ്രതിഫലിക്കുന്നില്ലെന്ന ആക്ഷേപവും ശക്തമാണ്.
കേരളത്തെ പ്രതികൂലമായി ബാധിക്കുന്ന വടക്ക്-തെക്ക് വിഭജനം
കേന്ദ്രത്തിന്റെ ഈ പുതിയ നീക്കം ബി.ജെ.പി ഇതര സംസ്ഥാനങ്ങളില് നിന്നും, പ്രത്യേകിച്ച് കേരളം പോലുള്ള ദക്ഷിണേന്ത്യന് സംസ്ഥാനങ്ങളില് നിന്നും വലിയ രീതിയിലുള്ള രാഷ്ട്രീയഭരണപരമായ എതിര്പ്പുകള്ക്ക് കാരണമായിട്ടുണ്ട്. കേരള ഭക്ഷ്യ സിവില് സപ്ലൈസ് മന്ത്രി അനൂപ് ജേക്കബ് ഈ ഭേദഗതിയെ ശക്തമായി എതിര്ത്തുകൊണ്ട് കേന്ദ്ര സര്ക്കാരിന് കത്തയക്കുമെന്ന് വ്യക്തമാക്കിയിട്ടുണ്ട്.
നിലവിലുള്ള 35 കിലോഗ്രാം വിഹിതം അതേപടി തുടരണമെന്നാണ് കേരളത്തിന്റെ ആവശ്യം. കേരളം പോലുള്ള സംസ്ഥാനങ്ങളില് ജനസംഖ്യാ വളര്ച്ചാ നിരക്ക് കുറവായതിനാലും ശരാശരി കുടുംബാംഗങ്ങളുടെ എണ്ണം കുറവായതിനാലും, വ്യക്തിഗത അടിസ്ഥാനത്തിലുള്ള പുതിയ വിതരണ ശൈലി സംസ്ഥാനത്തിനുള്ള ആകെ ഭക്ഷ്യധാന്യ വിഹിതം ഗണ്യമായി വെട്ടിക്കുറയ്ക്കാന് കാരണമാകുമെന്ന് അദ്ദേഹം ആശങ്ക പ്രകടിപ്പിച്ചു.
ഭക്ഷ്യധാന്യ വിതരണത്തിലെ ഈ പുതിയ മാനദണ്ഡം രാജ്യത്ത് ഒരു വടക്ക-്തെക്ക് പ്രാദേശിക അസമത്വത്തിന് വഴിമാറുമെന്ന് റൈറ്റ് ടു ഫുഡ് കാമ്പയിന്റെ അനുരാധ തല്വാറും മുന്നറിയിപ്പ് നല്കുന്നു. അംഗസംഖ്യ കൂടുതലുള്ള ഉത്തരേന്ത്യന് സംസ്ഥാനങ്ങളിലെ വലിയ കുടുംബങ്ങള്ക്ക് ഈ പരിഷ്കാരം അനുകൂലമാകുമെങ്കിലും കുടുംബാംഗങ്ങള് കുറവായ കേരളം പോലുള്ള വികസിത സംസ്ഥാനങ്ങളിലെ പാവപ്പെട്ട ജനവിഭാഗങ്ങള്ക്ക് ഇത് വലിയ തോതിലുള്ള പട്ടിണിക്കും ഭക്ഷ്യപ്രതിസന്ധിക്കും കാരണമാകുമെന്നാണ് വിലയിരുത്തപ്പെടുന്നത്.
The Central government is set to overhaul the eligibility norms for the Antyodaya Anna Yojana (AAY), the food security scheme for India's poorest families. Under the proposed changes, the current entitlement of 35 kg of free foodgrains per Antyodaya ration card will be replaced with an allocation of 7 kg per person per month.
The Ministry of Consumer Affairs, Food and Public Distribution has released the draft amendment to the National Food Security Act (NFSA) to implement the change. If approved, small households with one to three members will lose a significant portion of the foodgrains they currently receive under the scheme. The Centre has invited public comments on the draft proposal until July 13