'യുദ്ധത്തില്‍ പോലും ഇത്രയും പേര്‍ മരിക്കുന്നില്ല, അതിവേഗത്തില്‍ പായുന്ന കാറുകളെ നിയന്ത്രിക്കാന്‍ എന്ത് സംവിധാനമാണുള്ളത്?; ചോദ്യവുമായി ഹൈക്കോടതി

സംസ്ഥാനത്ത് അമിതവേഗത്തിൽ പായുന്ന വാഹനങ്ങളെ കണ്ടെത്താനും അവയ്ക്കെതിരെ സമയബന്ധിതമായി നടപടി സ്വീകരിക്കാനും ഫലപ്രദമായ സംവിധാനമുണ്ടോ എന്ന് ഹൈക്കോടതി. നെടുമ്പാശ്ശേരിയിൽ അമിതവേഗത്തിൽ കാറോടിച്ചുണ്ടായ അപകടത്തിൽ മൂന്നുപേർ മരിച്ച സംഭവത്തിന്റെ പശ്ചാത്തലത്തിലാണ് കോടതിയുടെ നിർണായക ഇടപെടൽ. അപകടമുണ്ടാക്കിയ യുവാവ് നേരത്തേ മണിക്കൂറിൽ 240 കിലോമീറ്റർ വരെ വേഗത്തിൽ വാഹനം ഓടിച്ചിട്ടുണ്ടെന്ന വിവരവും കോടതി ചൂണ്ടിക്കാട്ടി. അത്തരം നിയമലംഘനങ്ങൾ നേരത്തേ കണ്ടെത്തി നടപടിയെടുത്തിരുന്നെങ്കിൽ ദുരന്തം ഒഴിവാക്കാനാകുമായിരുന്നില്ലേയെന്നും കോടതി ചോദിച്ചു.

റോഡ് സുരക്ഷയുമായി ബന്ധപ്പെട്ട ഹർജികൾ പരിഗണിച്ച ജസ്റ്റിസ് വി. രാജ വിജയരാഘവനും ജസ്റ്റിസ് കെ.വി. ജയകുമാറും ഉൾപ്പെട്ട ഡിവിഷൻ ബെഞ്ചാണ് ഗതാഗതനിയന്ത്രണ സംവിധാനങ്ങളിലെ പോരായ്മകളെക്കുറിച്ച് ആശങ്ക പ്രകടിപ്പിച്ചത്. അമിതവേഗം നിയന്ത്രിക്കുന്നതിന് ഹൈക്കോടതിയുടെ വിവിധ ബെഞ്ചുകൾ നേരത്തേ നിരവധി ഉത്തരവുകൾ പുറപ്പെടുവിച്ചിട്ടും ഫലപ്രദമായ നടപടികൾ ഉണ്ടാകാത്തത് ഗൗരവകരമാണെന്ന് കോടതി നിരീക്ഷിച്ചു.

രാത്രികാലങ്ങളിൽ അതിവേഗ കാറുകളുടെ മത്സരയോട്ടം

രാത്രി 12 മണിക്ക് ശേഷം കൊച്ചി നഗരത്തിലും പരിസരപ്രദേശങ്ങളിലും സൂപ്പർ കാറുകളുമായി യുവാക്കൾ നിരത്തിലിറങ്ങുന്ന സാഹചര്യം കോടതി ചൂണ്ടിക്കാട്ടി. ഇത്തരം വാഹനങ്ങൾക്ക് ഏതാനും സെക്കൻഡുകൾക്കുള്ളിൽ തന്നെ ഉയർന്ന വേഗത്തിലെത്താൻ കഴിയുമെന്നതിനാൽ അപകടസാധ്യത വളരെ കൂടുതലാണ്. സൂപ്പർ കാറുകൾക്ക് ആറ് സെക്കൻഡ് മതിയാകും മണിക്കൂറിൽ 100 കിലോമീറ്റർ വേഗത്തിലെത്താൻ. സൂപ്പർ ബൈക്കുകൾക്ക് ഇതിന് മൂന്ന് സെക്കൻഡ് മാത്രം മതിയാകുമെന്നും കോടതി നിരീക്ഷിച്ചു.

മണിക്കൂറിൽ 100 കിലോമീറ്റർ വേഗത്തിൽ സഞ്ചരിക്കുന്ന വാഹനം ബ്രേക്ക് ചെയ്താലും പൂർണമായി നിൽക്കാൻ ഏകദേശം 100 മീറ്ററോളം മുന്നോട്ടുപോകേണ്ടിവരുമെന്ന കാര്യവും കോടതി ചൂണ്ടിക്കാട്ടി. ഇത്തരം വാഹനങ്ങളുടെ വേഗം നിയന്ത്രിക്കാനും അപകടകരമായ ഡ്രൈവിങ് തടയാനും ആവശ്യമായ സംവിധാനങ്ങൾ നിലവിലുണ്ടോ എന്നതിലാണ് കോടതിയുടെ പ്രധാന ആശങ്ക.

ദേശീയപാതകളിൽ അനുവദനീയമായ വേഗപരിധി വ്യക്തമാക്കുന്ന, രാത്രിയിലും വ്യക്തമായി കാണാൻ കഴിയുന്ന ബോർഡുകൾ സ്ഥാപിച്ചിട്ടുണ്ടോ എന്നും കോടതി ചോദിച്ചു. മണിക്കൂറിൽ 80 കിലോമീറ്ററിലധികം വേഗത്തിൽ സഞ്ചരിക്കരുതെന്ന മുന്നറിയിപ്പുകൾ ഡ്രൈവർമാർക്ക് വ്യക്തമായി കാണാൻ കഴിയുന്ന വിധത്തിൽ ദേശീയപാതകളിൽ ഉണ്ടാകേണ്ടതിന്റെ ആവശ്യകതയും കോടതി ചൂണ്ടിക്കാട്ടി.

ക്യാമറകൾ സ്ഥാപിച്ചാൽ മാത്രം പോരാ; നിയമലംഘകർക്കെതിരെ നടപടിയും വേണം

അമിതവേഗം കണ്ടെത്തുന്നതിനായി ക്യാമറകൾ സ്ഥാപിക്കുന്നതുകൊണ്ടുമാത്രം റോഡപകടങ്ങൾ തടയാനാകില്ലെന്ന് കോടതി വ്യക്തമാക്കി. ക്യാമറകളിൽ പതിയുന്ന നിയമലംഘനങ്ങൾ കൃത്യമായി പരിശോധിക്കുകയും അവ റിപ്പോർട്ട് ചെയ്യുകയും കുറ്റക്കാർക്കെതിരെ നടപടി സ്വീകരിക്കുകയും ചെയ്യുന്ന സംവിധാനം അനിവാര്യമാണ്. അമിതവേഗത്തിൽ വാഹനമോടിച്ച കേസുകൾ എത്രത്തോളം കണ്ടെത്തിയെന്നും അവയിൽ എത്ര കേസുകളിൽ തുടർനടപടികൾ സ്വീകരിച്ചെന്നും വ്യക്തമാക്കാൻ സർക്കാരിനോട് കോടതി നിർദേശിച്ചു.

ഇതിനായി ട്രാൻസ്പോർട്ട് കമ്മിഷണർ ഓൺലൈനായി കോടതിയിൽ ഹാജരാകണമെന്നും ഡിവിഷൻ ബെഞ്ച് നിർദേശിച്ചു. റോഡ് സുരക്ഷയ്ക്കായി നീക്കിവച്ചിട്ടുള്ള ഫണ്ടിൽ ആവശ്യത്തിന് തുകയുണ്ടായിട്ടും അപകടങ്ങൾ കുറയ്ക്കുന്നതിനുള്ള നടപടികൾ ഫലപ്രദമായി നടപ്പാക്കാത്തത് എന്തുകൊണ്ടാണെന്ന ചോദ്യവും കോടതിയുടെ നിരീക്ഷണങ്ങളിൽ ഉയർന്നു.

തമിഴ്നാട് ഉൾപ്പെടെയുള്ള സംസ്ഥാനങ്ങളിൽ റോഡുകളിലെ ലൈൻ മാർക്കിങ്ങുകൾ കൃത്യമായി രേഖപ്പെടുത്തിയിട്ടുണ്ടെന്നും കേരളത്തിൽ ഇത്തരം സംവിധാനങ്ങളുടെ അഭാവം ശ്രദ്ധയിൽപ്പെട്ടിട്ടുണ്ടെന്നും കോടതി പറഞ്ഞു. മൂന്നാർ പാതയിൽ മാത്രമാണ് തനിക്ക് വ്യക്തമായ ലൈൻ മാർക്കിങ്ങുകൾ കാണാൻ കഴിഞ്ഞതെന്ന നിരീക്ഷണവും കോടതി പങ്കുവച്ചു. വാഹനങ്ങൾ ഏത് ലൈനിലൂടെ സഞ്ചരിക്കണം, എവിടെയാണ് വേഗം നിയന്ത്രിക്കേണ്ടത് തുടങ്ങിയ കാര്യങ്ങളിൽ ഡ്രൈവർമാർക്ക് വ്യക്തത നൽകുന്ന റോഡ് അടയാളങ്ങളും സംവിധാനങ്ങളും അനിവാര്യമാണെന്ന് കോടതി ചൂണ്ടിക്കാട്ടി.

മദ്യപിച്ച് വാഹനമോടിക്കുന്നതും പരിശോധിക്കണം

നെടുമ്പാശ്ശേരിയിൽ അപകടമുണ്ടാക്കിയ യുവാവ് ബാറുകളിൽനിന്ന് മദ്യം കഴിച്ചിറങ്ങിയശേഷമാണ് വാഹനം ഓടിച്ചതെന്ന വിവരവും കോടതി പരാമർശിച്ചു. 23 വയസ്സിൽ താഴെയുള്ളവർക്ക് മദ്യം നൽകാൻ പാടില്ലെന്ന നിയമം കൃത്യമായി പാലിക്കപ്പെടുന്നുണ്ടോ എന്നതിലും കോടതി ആശങ്ക പ്രകടിപ്പിച്ചു. മദ്യപിച്ചുള്ള ഡ്രൈവിങ്ങും അമിതവേഗവും ഒരുമിക്കുമ്പോൾ റോഡുകളിൽ ഗുരുതരമായ അപകടസാധ്യതയുണ്ടാകുന്നുവെന്ന് കോടതി നിരീക്ഷിച്ചു.

റോഡപകടങ്ങളിലെ മരണങ്ങളുടെ ഗൗരവം ചൂണ്ടിക്കാട്ടിയ കോടതി, യുദ്ധങ്ങളിൽപ്പോലും ഇത്രയധികം ആളുകൾ മരിക്കുന്നില്ലെന്ന രൂക്ഷമായ പരാമർശവും നടത്തി. അപകടങ്ങളിൽ കുട്ടികളും സ്ത്രീകളും ഉൾപ്പെടെ നിരപരാധികളായ ആളുകൾക്ക് ജീവൻ നഷ്ടപ്പെടുന്ന സാഹചര്യം സമൂഹം ഗൗരവമായി കാണണം. സ്വന്തം കുടുംബത്തിലെ ഒരാൾ വാഹനാപകടത്തിൽ മരിക്കുമ്പോഴാണ് പലർക്കും അതിന്റെ വേദനയുടെ ആഴം മനസ്സിലാകുന്നതെന്നും കോടതി പറഞ്ഞു.

റോഡിലെ മറ്റ് സുരക്ഷാ വീഴ്ചകളും പരിശോധിക്കും

അമിതവേഗം മാത്രമല്ല, റോഡുകളുടെ അടിസ്ഥാനസൗകര്യങ്ങളുമായി ബന്ധപ്പെട്ട പ്രശ്നങ്ങളും കോടതി പരിഗണനയിലെടുത്തു. റോഡരികിൽ ഗതാഗതത്തിന് തടസ്സമായി നിൽക്കുന്ന ട്രാൻസ്ഫോർമറുകൾ മാറ്റിസ്ഥാപിക്കേണ്ടതിന്റെ ആവശ്യകത കോടതി ചൂണ്ടിക്കാട്ടി. ദേശീയപാതകളിൽ വാഹനങ്ങൾ അനധികൃതമായി പാർക്ക് ചെയ്യുന്നത് അനുവദിക്കരുതെന്നും നിർദേശിച്ചു.

സ്വകാര്യ ബസ് ഉടമകളുടെയും ബന്ധപ്പെട്ടവരുടെയും വാദങ്ങൾ കേൾക്കുമെന്നും കോടതി വ്യക്തമാക്കി. റോഡിലെ ലൈനുകൾ തെറ്റിച്ച് വാഹനമോടിക്കുന്നതും ഗതാഗതനിയമങ്ങൾ ലംഘിക്കുന്നതും നിയന്ത്രിക്കേണ്ടതുണ്ട്. റോഡ് സുരക്ഷാ കമ്മിഷൻ ഉൾപ്പെടെയുള്ള ബന്ധപ്പെട്ട സംവിധാനങ്ങളുടെ അഭിപ്രായങ്ങളും പരിഗണിക്കുമെന്ന് കോടതി അറിയിച്ചു.

അമിതവേഗം കണ്ടെത്തുന്നതിനുള്ള സംവിധാനങ്ങൾ, നിയമലംഘകർക്കെതിരായ നടപടികൾ, റോഡുകളിലെ സുരക്ഷാ ക്രമീകരണങ്ങൾ, മദ്യപിച്ചുള്ള ഡ്രൈവിങ് തടയുന്നതിനുള്ള നടപടികൾ എന്നിവയിൽ സർക്കാർ സ്വീകരിച്ച നടപടികൾ വ്യക്തമാക്കേണ്ടിവരും. വിഷയം ഹൈക്കോടതി പിന്നീട് വീണ്ടും പരിഗണിക്കും.